Wet Wetem Longfala Tingting

MAN ya blong lukaot long sipsip i stap singaot oltaem se “!Wael dog!” taem i no gat wael dog. From samting ya, ol narafala man oli no moa bilivim hem taem hem i singaot bakegen. Long sem fasin tede, plante man oli no bilif se dei blong Jeova i kolosap nao, from we oli harem plante woning finis we i neva kamtru. Plante man tumas oli no naf blong luksave wanem woning i tru mo wanem woning oli mas folem, mekem se, Setan we i bigfala enemi blong God, mo gyaman “enjel blong laet,” i stap gohed nomo blong gyaman long olgeta.​—2 Korin 11:14.

Fasin we man i glad nomo wetem laef blong hem naoia, hem i wan denja long yumi nomata sipos yumi wok blong Jeova longtaem finis. ?From wanem? Tingbaot woning we aposol Pita i givim long faswan handred yia.

Tingting i Mas Kliagud

Namba tu leta blong Pita i mekem ol faswan Kristin mo yumi tu, i tingbaot wan samting. Hem i raetem se: “Ol fren. Hemia seken leta blong mi long yufala. Mo long tufala leta ya, mi stap tok blong wekemap yufala, blong mekem tingting blong yufala i stret.” (2 Pita 3:⁠1) ?From wanem Pita i raetem samting ya? Pita i soemaot klia se ol man blong laf long narafala oli stap finis. Ol tok blong olgeta blong jikim narafala i stap mekem ol man blong God oli no moa tingbaot dei blong Jeova olsem we i kolosap tumas mo i stap kam kwik. Naoia, i taem blong lukaot blong no foldaon long trap blong ol man we oli laf long narafala. Taswe Pita i pulum ol man we bambae oli ridim leta blong hem, blong “tingbaot bakegen ol tok we ol tabu profet oli talem bifo.” (2 Pita 3:⁠2; Ol Wok 3:​22, 23) ?Ol profet oli bin talem wanem?

Plante taem, ol man blong God oli pulum tingting blong ol narafala blong tingbaot ol jajmen we God i bin mekem blong finisim ol rabis fasin long taem bifo. Pita i pulum ol man we oli ridim leta blong hem blong tingbaot Bigfala Wora long taem blong Noa. God i bin yusum Bigfala wora ya olsem wan rod blong stretem wol we i fulap long rabis fasin. Tru, Bigfala Wora ya i spolem wol long taem ya. Be God i sevem Noa mo famle blong hem wetem ‘olkaen anamol’ long wan bigfala sip. Ol kastom long plante ples blong wol oli pruvum se store ya blong Baebol i tru.a​—Jenesis 6:​19; 2 Pita 3:5, 6.

Pita i talem se ol man oli ‘satem ae blong olgeta long’ aksin ya we God i tekem. Nao oli letem ol man we oli laf long narafala, oli pulum olgeta blong glad nomo long laef we oli gat naoia. Taswe, yumi mas neva fogetem ol samting we Jeova i mekem finis. Pita i talem long yumi se: ‘Sem tok ya i holem heven mo wol blong naoia tu, tufala i stap wet long faea. Tufala i stap wet long dei blong jajem mo spolem ol man we oli no obei long God.’ (2 Pita 3:⁠7) Yes, bambae God i mekem samting bakegen blong stretem ol problem blong man.

God i No Slou

Plante taosen yia i pas finis. ?From wanem God i wet longtaem olsem bifo we hem i stretem ol problem blong man? Bakegen, Pita i pulum tingting blong yumi i go long wan narafala samting. Hem i talem se: ‘Ol fren. I gat wan poen we yufala i mas tingbaot. Long fes blong Jeova, wan taosen yia i olsem wan dei nomo, mo wan dei i olsem wan taosen yia nomo.’ (2 Pita 3:⁠8) Tingting blong Jeova long saed blong taem i no olsem tingting blong yumi. Taem we i stat long Adam kam kasem naoia i no olsem wan wik yet long tingting blong God ya we i no save ded. Be nomata wanem tingting blong yumi long saed blong taem, evri taosen yia mo evri dei we i pas oli mekem se yumi stap kam kolosap moa long taem ya we bambae stampa tingting blong Jeova i kamtru.

Wan olfala tok i talem se: “Sipos yu stap lukluk wan pot, be wora long hem bambae i neva boel.” Tok ya i minim se sipos yu jes wet blong wan samting i kamtru, bambae i luk olsem we samting ya i stap tektaem. Nating se i olsem, Pita i givim advaes ya blong ‘stap wet mo holem dei blong Jeova i stap oltaem long tingting blong yumi.’ (2 Pita 3:12) ?Olsem wanem yumi save wokem wan tingting we i mekem se yumi stap wekapgud long saed blong taem ya we Jeova bambae i tekem aksin?

Ol Fasin Oli Gat Moa Paoa i Bitim Ol Tok

Pita i pulum tingting blong yumi i go long ol wok mo fasin. Hem i tokbaot ‘ol fasin we oli tabu mo ol wok blong soem fasin fasgud long God.’ (2 Pita 3:11) ?Hemia i minim wanem?

Wan trufala man blong God i mekem ol fasin we God i laekem. Fasin blong hem i soemaot se hem i gat bilif. Samting ya i mekem se hem i defren long olgeta we oli toktok nomo long saed blong bilif long God mo ol promes blong Hem. Maet, yu luk se wok blong talemaot gud nyus we ol Wetnes blong Jeova oli mekem, i makemaot olgeta se oli defren. Oli kam long haos blong yu blong pulum tingting blong yu i go long ol promes blong God we oli stap long Baebol. Mo tu, oli talemaot ol hop mo bilif blong olgeta long eniples we oli faenem ol man.

Taem wan Wetnes i bisi blong talemaot bilif blong hem long ol narafala, hem i mekem bilif ya i kam strong moa. Sipos yumi talemaot ol tok blong bilif, be ol tok ya oli save go dip moa insaed long yumi. Long semtaem, oli mekem yumi glad mo haremgud. Mo tu, taem yumi talemaot gud nyus blong Kingdom blong God, yumi mekem eova i glad. Olsem aposol Pol, we i wok wetem Pita, i talem, yumi save se ‘God i no save fogetem ol wok ya we yumi mekem, mo hem i stap tingbaot we yumi laekem hem tumas’.​—Hibrus 6:⁠10; Rom 10:9, 10.

?Wanem frut i kamaot from fasin ya blong stap bisi fulwan long wok blong talemaot gud nyus blong Kingdom long ol las dei blong rabis wol ya? Plante taosen man we hat blong olgeta i stret, oli stap lanem olsem wanem blong frengud wetem Jeova, kasem blesing from kaengud fasin blong Hem, faenem trufala glad mo gat jans ya blong kasem laef we i no save finis long paradaes long wol.

Save Samting Bifo We i Kamtru

Tru long Baebol, yumi save se Jeova God bambae i tekem aksin long stret taem blong hem, mo yumi suagud long samting ya taem yumi tingtingbak long ol jajmen we hem i bin mekem bifo. Nating se i olsem, yumi nidim blong lesin long wan narafala woning we Pita i givim. “Ol fren. Yufala i kasem tok blong wekemap yufala, taem trabol ya i no kamtru yet. From samting ya yufala i mas lukaot gud. Sipos no, ol man ya we oli no holem stret fasin, bambae oli pulum yufala long ol krangke tok blong olgeta, nao bambae yufala i aot long sef ples ya we yufala i stap long hem, yufala i foldaon.”​—2 Pita 3:⁠17.

Jeova i save finis se tingting blong olgeta we oli no gat strong bilif, bambae i save foldaon from we i olsem se hem i stap tektaem tumas. Hem i save tu, se ol man we oli no obei long hem bambae oli gat paoa long ol trufala man blong hem, mekem se olgeta ya oli no moa bilif se taem blong God i leftemap nem blong hem i kolosap nao. !Sore tumas long eni man long ol las dei ya, we i no moa holemstrong long God!

Naoia, i no taem blong letem tingting blong yu i hafhaf mo i no suagud long samting we Jeova bambae i mekem. (Hibrus 12:⁠1) Naoia, i moa gud blong gat tangkyu from we longfala tingting blong Jeova i mekem se plante milyan man bambae oli sef. Yes, olgeta ya oli save joen long bigfala hif blong man we oli hop blong pastru long bigfala trabol we i stap kam. (Revelesen 7:​9, 14) Pita i givim advaes ya se: “Be oltaem yufala i mas gru long tufala samting ya, we Jisas Kraes, Masta mo Sevya blong yumi, i stap givhan moa long yufala long gladhat blong hem, mo we yufala i save hem moa. Yumi mas leftemap nem blong hem i stap go antap oltaem, i stat naoia, gogo i no save finis.”​—2 Pita 3:18.

‘Yufala i Save Stap Gud, We God i Laekem Yufala Tumas’

Sipos yumi bisi blong talemaot Kingdom mo yumi go long ol Kristin miting blong wosip mo stadi Tok blong God, bambae samting ya i protektem yumi. Long rod ya, bambae yumi no gat taem blong wari tumas long ol samting we oli stap kam moa nogud long rabis wol ya. Ol fraet mo wari oli no gat ples long laef blong ol trufala Kristin. (1 Korin 15:58) Sipos yumi bisi long wok blong Jeova, bambae yumi luk se taem i pas kwik moa.

Jud, we i laef long taem blong Pita mo i haf brata blong Jisas, i givim advaes ya long yumi se: ‘Yufala, ol fren, yufala i mas traem kam strong moa long tabu bilif blong yufala, mo yufala i mas prea wetem tabu speret. Nao yufala i save stap gud, we God i laekem yufala tumas. Mo long semtaem, yufala i stap wet long Masta blong yumi Jisas Kraes, we bambae i soemaot sore long yufala mo i givim laef blong olwe long yufala.’ (Jud 20, 21) Makemgud se gudfala tingting hem i wan impoten samting we i save gru moa taem yu stap prea oltaem. (1 Tesalonaeka 5:​17) Biaen, Jud i gohed se: ‘Yufala i mas gohed blong soemaot sore long samfala we tingting blong olgeta i hafhaf long saed blong bilif. Yufala i mas pulum olgeta oli aot long faea, blong sevem olgeta. Mo yufala i mas gohed blong soemaot sore long sam narafala, be yufala i mas fraet lelebet tu blong yufala i no laekem nating klos we bodi i mekem i doti.’ (Jud 22, 23) !Long ol hadtaem ya, i impoten tumas we yumi evriwan i mekem yumi kam strong moa! Mo tu, i impoten blong no foldaon long ol traem, mo blong no yusum “dei ya blong sevem ol man” olsem wan eskyus blong “mekem ol rabis fasin,” we oli fulap long kruked wol ya tede.​—Jud 4; 2 Korin 6:​1, 2.

Sipos yu lesin long gudfala advaes blong Pita, Pol, mo Jud mo yu stap bisi long wok blong God, bambae yu naf blong wet long dei blong Jeova wetem longfala tingting. Be, ?bambae yu yu mekem samting ya?

Yu no mas fraet blong storeyan wetem ol Wetnes long ples blong yu. Olgeta ya bambae oli halpem yu blong bilif strong moa long ol promes we Man we i Wokem yumi i mekem long saed blong laef we i no save finis. Yu mas lanem olsem wanem blong kam gud moa long wok ya blong givim wetnes, we bambae i finis long bigfala trabol mo we bambae yumi no moa mekem bakegen samtaem. (Mak 13:10) Bambae yu gat hop blong laef long wan nyufala wol blong stret fasin we Jeova i promes. (2 Pita 3:​13) !Yu mas lesin long ol advaes blong hem! !Yu mas wet wetem longfala tingting! !Yu mas stap bisi!

[Futnot]

[Tok Blong Pija Long Pej 7]

Naoia i taem blong lanem ol promes we God i mekem long saed blong Paradaes

[Foto Credit Line Blong Pija Long Pej 5]

Wael Dog: Animals/Jim Harter/Dover Publications, Inc.; Yangfala man blong lukaot long sipsip: Children: A Pictorial Archive from Nineteenth-Century Sources/Grafton/Dover Publications, Inc.