Wet Wetem Tingting We i “Wantem Tumas Blong Luk” Samting We God Bambae i Soemaot
Olgeta samting we God i mekem oli stap wet, we oli wantem tumas blong luk we God bambae i soemaot ol pikinini blong hem.”—ROM 8:19.
1. ?Olsem wanem laef blong ol Kristin tede i sem mak long laef blong ol Kristin long faswan handred yia?
LAEF blong ol trufala Kristin tede i sem mak long laef blong ol Kristin long faswan handred yia. Wan profet tok i halpem ol man blong Jeova long taem ya bifo, blong luksave wetaem Mesaea i mas kamtru. (Daniel 9:24-26) Semfala profet tok ya i talemaot se Jerusalem bambae i lus. Be, hem i no talem wan samting blong mekem ol Kristin oli save stret dei we taon ya bambae i lus. (Daniel 9:26b, 27) Long sem fasin, wan profet tok i mekem se ol trufala Baebol studen long ol yia 1800, oli wantem tumas blong luk wan samting. Taem oli joenem ol “seven taem” long Daniel 4:25 wetem “taem blong ol Hiten man,” oli luksave se Kraes bambae i kasem paoa blong Kingdom long 1914. (Luk 21:24, King James Version; Esikel 21:25-27) I tru se buk blong Daniel i fulap long ol profet tok. Be i no gat wan long ol profet tok ya i mekem se ol Baebol studen long taem blong yumi oli faenemaot stret dei we rabis wol blong Setan bambae i lus. (Daniel 2:31-44; 8:23-25; 11:36, 44, 45) Nating se i olsem, yumi save se rabis wol ya bambae i lus i no longtaem, from we yumi stap finis long “taem blong en.”—Daniel 12:4.a
Wekapgud Long Taem We Kraes i Stap
2, 3. (a) ?Wanem i mekemap bigfala pruf se yumi stap long taem we Kraes i stap finis olsem king? (b) ?Wanem i soem se ol Kristin oli mas wekapgud blong luksave taem ya we Jisas Kraes i stap finis?
2 I tru se, wan profet tok i mekem se ol Kristin oli stap wet long Kraes finis, bifo we hem i kasem paoa long Kingdom long 1914. Be “saen” we Kraes i givim blong makem taem we hem i kambak mo we wol ya i finis, i soemaot sam samting we oli mas hapen. Mo plante long ol saen ya bambae oli kamaot afta we hem i stap. Sam long ol saen ya, hemia faet, kakae i sot, graon i seksek, strong sik, fasin blong brekem loa, ronem ol Kristin, mo talemaot Kingdom long ful wol. Ol saen ya oli pruvum fulwan se naoia, yumi stap long taem we Kraes i tekem paoa blong hem finis olsem king.—Matyu 24:3-14; Luk 21:10, 11.
3 Be, impoten haf blong advaes we Jisas i givim long ol disaepol blong hem, hemia se: ‘Yufala i mas wekap gud, mo oltaem yufala i mas rere, . . . yufala i mas lukaot gud.’ (Mak 13:33, 37; Luk 21:36) Taem yumi ridimgud ol vas raonabaot long woning ya, yumi luksave se Jisas Kraes i no stap talem se ol Kristin oli mas wekapgud blong luksave ol saen we i makem stat blong taem we bambae hem i stap. No gat. Be, hem i givim oda long ol trufala disaepol blong hem, se oli mas wekapgud blong luksave taem ya we hem i stap finis. ?Ol trufala Kristin ya oli mas lukaotgud long wanem samting?
4. ?Saen ya we Jisas i givim i save givhan long ol man blong hem olsem wanem?
4 Jisas i givim bigfala profet tok blong hem blong ansarem kwestin ya: “?Bambae ol samting ya [we oli mas hapen bifo we fasin blong ol man Jyu i finis] oli kamtru wetaem, mo wanem saen we bambae i soemaot we yu stap finis mo wol ya i finis?” (Matyu 24:3, NW) Saen we Jisas i tokbaot, i blong makem taem we hem i stap finis, be tu, hem i makem ol samting we oli mas hapen bifo we rabis wol ya i lus.
5. ?Olsem wanem Jisas i soem se nating sipos hem i stap finis long saed blong speret, be bambae hem i “kamtru” yet?
5 Jisas i soem se long taem ya we hem i “stap” (Grik, pa·rou·siʹa) bambae hem i kamtru wetem olgeta paoa mo glori. Hem i tokbaot fasin ya we bambae hem i “kamtru” (we i kamaot long Grik wod ya erʹkho·mai), se: ‘Nao biaen, saen blong mi, mi Pikinini blong Man, bambae i kamaot long skae. Nao biaen, olgeta laen blong ol man long wol bambae oli krae, nao bambae oli save luk mi, mi Pikinini blong Man, mi kamtru long ol klaod blong skae, wetem olgeta paoa we mi mi gat, mo glori. . . . Long fasin blong figtri, i gat wan samting blong yufala i lanem. Stret long taem ya we han blong hem i stat gru bakegen, mo ol nyufala lif oli stat kamkamaot, yufala i save we i taem blong wokem garen blong yufala. Nao long sem fasin, taem yufala i luk ol saen ya, bambae yufala i save we [Kraes], klosap i kamtru, olsem we i stap nomo long doa blong yufala. . . . Nao from samting ya, yufala i mas lukaot gud, from we yufala i no save wanem dei, mi, mi Masta blong yufala, bambae mi kamtru long hem. . . . Yufala i mas rere, from we mi, mi Pikinini blong Man, bambae mi kamtru long taem we yufala i no tingbaot.’—Matyu 24:30, 32, 33, 42, 44.
?From Wanem Jisas Kraes i Kam?
6. ?Olsem wanem “Bigfala Babilon” bambae i lus?
6 Jisas Kraes i stap finis olsem King stat long 1914, be i gat sam wok yet we hem i mas mekem. Hem i mas jajem ol ogenaesesen blong wol ya mo ol wanwan man, bifo we hem i panisim olgeta we hem i faenem se oli rabis man. (Skelem wetem 2 Korin 5:10.) I no longtaem bambae Jeova i putum long tingting blong ol rula blong politik blong oli spolem “Bigfala Babilon,” hemia olgeta gyaman skul long wol. (Revelesen 17:4, 5, 16, 17) Aposol Pol i talem klia se Jisas Kraes bambae i spolem “man blong brekem loa”—hemia ol lida blong Krisendom, we oli wan impoten haf blong “Bigfala Babilon.” Pol i raetem se: “Man blong brekem loa bambae i kamtru long klia ples. Be Jisas, Masta blong yumi bambae i blu long hem nao man ya i ded. Taem we Jisas i kamtru, fasin blong hem blong kamtru we i gud tumas bambae i spolem man ya olgeta.”—2 Tesalonaeka 2:3, 8.
7. ?Taem Pikinini blong man i kamtru long bigfala paoa blong hem, bambae hem i mekem wanem jajmen?
7 I no longtaem, bambae Jisas Kraes i jajem ol man blong olgeta nesen stret folem samting we oli mekem long ol brata blong hem we oli stap yet long wol. Yumi ridim se: “Long taem ya we mi, mi Pikinini blong Man bambae mi King mi gat olgeta paoa bambae mi kamtru wetem olgeta enjel blong heven, nao mi go sidaon long bigfala jea blong mi. Nao olgeta man blong wol bambae oli kam stanap long fes blong mi, mo mi bambae mi seraot olgeta, olsem we man blong lukaot long sipsip i stap seraot ol sipsip blong hem long ol nani blong hem. Bambae mi putum ol sipsip oli stap long raet saed blong mi, mo ol nani oli stap long lef saed blong mi. . . . Nao mi bambae mi talem long [ol sipsip] se, ‘Tru mi talem long yufala, taem we yufala i mekem olsem long wan brata blong mi, we i daon moa long ol narafala brata blong mi, be hemia i olsem we yufala i mekem long mi nomo.’ . . . Nao [ol nani] bambae oli go blong kasem panis ya we i no save finis. Be ol stret man ya bambae oli go blong kasem laef ya we i no save finis.”—Matyu 25:31-46.
8. ?Olsem wanem aposol Pol i tokbaot taem ya we Kraes bambae i kamtru blong jajem olgeta we oli no save ona long God?
8 Parabol ya i soemaot se bambae Jisas i mekem laswan jajmen blong hem, hemia taem hem i kilim i ded olgeta we oli no save ona long God. Pol i leftemap tingting blong ol Kristin we oli stap safa, i se: ‘God bambae i givim spel long yufala. Hem bambae i mekem olsem long taem ya we Jisas, Masta blong yumi, bambae i aot long heven, i kamtru long yumi, wetem ol strong enjel blong hem, mo faea we i laet. Hem bambae i kam blong givim panis long olgeta we oli no save ona long God, mo long olgeta we oli no save obei long gud nyus blong Jisas, Masta blong yumi. Panis we olgeta bambae oli kasem long dei ya, bambae i no save finis samtaem. Masta blong yumi bambae i putumaot olgeta, nao bambae oli no save kam klosap long hem, oli no save kasem bigfala paoa blong hem we i blong heven. Long dei ya, bambae Jisas i kamtru bakegen, blong bambae olgeta man we oli man blong hem oli presem hem, oli ona long hem.’ (2 Tesalonaeka 1:7-10) Taem yumi tingbaot se olgeta samting ya oli mas hapen i no longtaem, i impoten tumas we yumi soemaot bilif blong yumi mo gat strong tingting blong wekapgud blong luksave taem ya we Kraes bambae i kamtru.
Holem Strong Tingting Blong Wet Long Taem Ya We Kraes i Kamtru
9, 10. ?From wanem ol tabu man we oli stap yet long wol, oli wet we oli wantem tumas blong luk Jisas Kraes i kamtru?
9 “Jisas, Masta blong yumi, bambae i aot long heven, i kamtru long yumi” blong spolem ol rabis man, be blong givim pei long ol gudfala man tu. Ol tabu brata blong Kraes, we oli stap yet long wol, maet bambae oli stap safa yet from hadtaem bifo we Kraes i kamtru. Be oli harem gud from nambawan hop blong olgeta blong go long heven. Aposol Pita i raet i go long ol tabu Kristin, i se: “I stret blong yufala i harem gud, from we yufala i joen long Kraes, mo yufala i stap kasem haf blong ol samting ya we i mekem hem i harem nogud. Nao taem ol gudgudfala samting blong Kraes oli kamtru, bambae yufala i glad tumas.”—1 Pita 4:13.
10 Ol tabu man oli gat strong tingting blong holemtaet bilif blong olgeta go kasem we Kraes i ‘tekem olgeta i kam wanples blong stap wetem hem.’ Long rod ya, “ol samting ya oli stap kam blong soemaot we fasin blong bilif” blong olgeta i strong no i no strong. ‘Nao long dei ya we bambae Jisas Kraes i kamtru long hem, God bambae i ona long olgeta, i presem olgeta, mo i leftemap nem blong olgeta.’ (2 Tesalonaeka 2:1; 1 Pita 1:7) I stret blong talem long ol Kristin ya we tabu speret i makemaot olgeta, we oli stanap strong long bilif blong olgeta, se: “Tok ya we i tokbaot Kraes i kam strong finis long laef blong yufala. Nao yufala i stap wet blong God bambae i soemaot Masta blong yumi Jisas Kraes, we yufala i no sot long wan long olgeta paoa ya we tabu speret i save givim long yufala.”—1 Korin 1:6, 7.
11. Taem ol tabu Kristin oli stap wet blong Jisas Kraes i kamtru, ?oli mekem wanem?
11 Ol tabu man ya we oli stap yet long wol, oli gat sem filing olsem Pol, we i raetem se: “Long tingting blong mi, taem we yumi stap tingbaot gudfala laef ya blong heven we bambae i save kamtru long yumi, ol samting ya we naoia oli stap mekem yumi harem nogud tumas, oli olsem nating nomo.” (Rom 8:18) Ol tabu man ya oli no nidim blong save stret taem blong mekem se bilif blong olgeta i strong. Oli bisi oltaem long wok blong Jeova. Oli soemaot nambawan eksampel long ol fren blong olgeta, hemia ol “narafala sipsip.” (Jon 10:16) Ol tabu man ya oli save se en blong rabis wol ya i kolosap. Taswe oli obei long advaes blong Pita se: “Yufala i mas mekem tingting blong yufala i rere blong yufala i mekem wok. Tingting blong yufala i mas klia gud. Mo yufala i mas putum tingting blong yufala i stap oltaem long God ya we bambae i givhan long yufala long gladhat blong hem, long taem ya we Jisas Kraes bambae i kamtru.”—1 Pita 1:13.
‘Olgeta Samting We God i Wokem Oli Wantem Tumas Blong Luk Taem Ya’
12, 13. ?Long wanem fasin, ol man “oli stap panis, oli stap roten nomo,” mo ol narafala sipsip oli wantem tumas blong luk wanem?
12 ?Olsem wanem long ol narafala sipsip? ?I gat wan risen we i mekem se oli wantem tumas blong luk taem ya? Yes, oli gat wan risen. Pol i tokbaot nambawan hop blong ol “pikinini” blong Jeova we tabu speret i makemaot olgeta mo we bambae oli ‘joen long Kraes blong kasem ol gudgudfala samting’ long Kingdom blong heven. Afta long samting ya hem i se: “Naoia, olgeta samting we God i mekem oli stap wet, we oli wantem tumas blong luk we God bambae i soemaot ol pikinini blong hem. God i jajem finis olgeta samting ya we hem i mekem, se oli mas kam nating. Mo hemia i no from we olgeta samting ya oli wantem olsem, i from we God i wantem olsem, be tingting blong God i stap yet. Naoia i olsem we olgeta samting ya we God i mekem oli stap panis, from we oli stap roten nomo. Be long dei ya we God bambae i mekem ol pikinini blong hem oli fri olgeta, we bambae oli no moa mekem sin, panis ya bambae i finis, nao olgeta samting ya we God i mekem bambae oli fri olgeta, olsem ol pikinini blong hem.”—Rom 8:14-21; 2 Timote 2:10-12.
13 From we Adam i mekem sin, olgeta man we oli kamaot biaen long hem ‘oli stap roten nomo.’ Taem oli bon, oli kalabus long sin mo ded. Oli no naf blong kamaot olgeta long kalabus ya. (Ol Sam 49:7; Rom 5:12, 21) !Tru ya, ol narafala sipsip oli wantem tumas blong ‘kam fri olgeta we bambae oli no moa panis long sin’! Be bifo we samting ya i hapen, i gat sam samting oli mas kamtru fastaem, folem ol taem mo sisen we Jeova i makemaot finis.
14. ?Wanem ol samting we bambae oli hapen taem ‘God i soemaot ol pikinini blong hem,’ mo olsem wanem samting ya bambae i mekem olgeta man oli ‘kam fri we bambae oli no moa panis long sin’?
14 Fastaem, God i mas “soemaot” smol grup blong ol tabu ‘pikinini blong Hem’ we oli stap yet long wol ya. ?Samting ya i minim wanem? Long stret taem blong God, bambae ol narafala sipsip oli luksave se olgeta tabu man ya evriwan oli kasem ‘mak’ mo paoa finis blong rul wetem Kraes. (Revelesen 7:2-4) God i ‘soemaot ol pikinini blong hem’ we oli laef bakegen long ded, taem we bambae oli joen wetem Kraes blong spolem rabis wol ya blong Setan. (Revelesen 2:26, 27; 19:14, 15) Ale, long Wan Taosen Yia Rul blong Kraes, bambae ‘God i soemaot olgeta’ bakegen taem i yusum olgeta olsem pris blong karem blesing blong ransom sakrifaes blong Jisas i go long olgeta samting we ‘God i wokem.’ Risal blong samting ya se, olgeta man bambae oli ‘kam fri olgeta we oli no moa panis long sin’ mo bambae olgeta tu oli ‘fri olgeta, olsem ol pikinini blong God.’ (Rom 8:21; Revelesen 20:5; 22:1, 2) Taem yumi tingbaot nambawan hop ya, ating yumi no sapraes from wanem ol narafala sipsip oli “stap wet, we oli wantem tumas blong luk we God bambae i soemaot ol pikinini blong hem.”—Rom 8:19.
Longfala Tingting Blong Jeova i Olsem Rod Blong Sef
15. ?Wanem samting we yumi neva mas fogetem long saed blong ol taem mo sisen we Jeova i jusumaot?
15 Jeova hem i Bigfala Man we i Bos Blong Ol Taem. Ol samting we hem i talem se bambae oli kamtru long wan stret taem, oli no save mestem. Maet ol samting ya oli no kamtru oltaem olsem we yumi tingbaot. Be, yumi save bilif fulwan se olgeta promes blong God bambae oli mas kamtru. (Josua 23:14) Maet samtaem hem i letem ol samting oli gohed longtaem moa i bitim wanem we yumi stap tingbaot. Be i gud we yumi mas traem kasem save ol rod blong hem mo tinghae long waes blong hem. Pol i raetem se: “!Olgeta! !Fasin blong God blong givhan long ol man, i gud tumas! !Waes blong hem, mo save blong hem i bigfala tumas, i bitim mak! Yumi no save talemaot olsem wanem hem i jusumaot ol rod blong hem. Yumi no naf blong save ol plan blong hem, se bambae oli kamtru olsem wanem.”—Rom 11:33, 34.
16. ?Hu olgeta we bambae oli save kasem blesing from longfala tingting blong Jeova?
16 Pita i raetem se: “Ol fren. From ol samting ya, taem yufala i stap wet long dei ya [taem we olfala “heven” mo “wol” i lus, mo “nyufala heven” mo “nyufala wol” we God i promes long hem oli kam], yufala i mas traehad blong mekem we long fes blong God, laef blong yufala i klin gud, mo we i no gat wan samting i rong long laef blong yufala. Nao long fasin ya, yufala i gat pis wetem God. Masta blong yumi i gat longfala tingting blong wet long yufala. Mo yufala i mas luk fasin ya blong hem olsem jans blong yufala blong God i sevem yufala, nao yufala i no kasem panis.” Longfala tingting blong Jeova i givim jans long plante milyan man blong sef tru long “dei blong Jeova,” we bambae i kam olsem “stilman.” (2 Pita 3:9-15) Longfala tingting blong hem tu i givim jans long yumi blong ‘gohed blong wok had, blong ona long God, mo yumi fraet tu long hem.’ (Filipae 2:12) Jisas i talem se yumi mas ‘lukaotgud’ mo ‘stap wekap.’ Long rod ya, bambae God i agri long yumi mo bambae yumi naf blong “stanap long fes blong Pikinini blong Man” long taem we bambae hem i jajem olgeta man.—Luk 21:34-36; Matyu 25:31-33.
Gohed Blong Wet
17. ?Yumi mas obei long wanem tok blong aposol Pol?
17 Pol i talem long ol brata blong hem long saed blong speret, se oli mas tingbaot “ol samting ya we oli no save luk” long prapa ae blong olgeta be i no ‘ol samting ya we oli save luk long ae blong olgeta.’ (2 Korin 4:16-18) Hem i no wantem se wan samting i mekem oli fogetem praes ya we oli gat blong go long heven. Nating se yumi ol Kristin we tabu speret i makemaot, no yumi ol narafala sipsip, oltaem yumi mas stap tingbaot nambawan hop ya we i stap fored long yumi. I gud yumi ‘wet wetem longfala tingting.’ Long rod ya bambae yumi pruvum se ‘yumi no man we i save tanemraon blong gobak, nao yumi lus. Be yumi man blong bilif long God, mo hem bambae i sevem yumi.’—Rom 8:25; Hibrus 10:39.
18. ?From wanem yumi save trastem Jeova fulwan mo letem hem i bos long ol taem mo sisen?
18 Yumi save trastem fulwan Jeova mo letem hem nao i bos long ol taem mo sisen. Olgeta promes blong hem bambae oli mas kamtru long stret taem blong hem, ‘oli no save let.’ (Habakuk 2:3) Go kasem taem ya, i impoten tumas we yumi folem advaes we Pol i raetem i go long Timote. Hem i se: “Long fes blong God, mo long fes blong Jisas Kraes we bambae i save jajem olgeta man, olgeta we bambae oli laef, wetem olgeta we bambae oli ded, mi mi givim strong tok ya long yu. From we Jisas Kraes bambae i kamtru bakegen, mo from we hem i King, mi talem strong long yu, se yu yu mas talemaot tok blong hem. Nating we ol man oli wantem harem tok ya no oli no wantem harem, be oltaem yu yu mas strong blong talemaot . . . Yu mas mekem wok ya blong talemaot gud nyus blong Kraes, mo yu mas finisim olgeta wok ya we God i givim long yu blong mekem.”—2 Timote 4:1-5.
19. ?Naoia i taem we ol man blong Jeova oli mekem wanem, mo from wanem?
19 Laef blong yumi mo blong ol man raonabaot long yumi, i stap long denja. Pol i raetem se: “Yu mas lukaot gud long fasin blong yu, mo long ol tok we yu stap tijim ol man long hem. Oltaem yu mas mekem olgeta fasin ya. Sipos yu mekem olsem bambae yu save sevem yu, wetem ol man we oli stap lesin long yu.” (1 Timote 4:16) Sot taem nomo i stap, nao bambae rabis wol ya i lus. Yumi stap wet, we yumi wantem tumas blong luk ol bigfala samting ya we bambae oli mas kamtru. Be, yumi no mas fogetem se naoia, yumi stap yet long taem mo sisen we Jeova i jusumaot blong ol man blong hem oli talemaot gud nyus blong Kingdom. Wok ya i mas go kasem mak we Jeova i glad long hem. ‘Nao,’ olsem Jisas i talem, ‘en i save kam.’—Matyu 24:14.
[Futnot]
a Lukluk japta 10 mo 11 long buk ya Save Blong Lidim Yu Long Laef We i No Save Finis, we Watchtower Bible and Tract Society of New York, Inc., i wokem.
Ol Kwestin Blong Tingtingbak
◻ Long saed blong fasin blong kaontem taem, ?olsem wanem laef blong yumi naoia i sem mak long ol Kristin blong faswan handred yia?
◻ ?From wanem ol Kristin oli mas “stap lukaot gud,” nating se Kraes i stap finis?
◻ ?From wanem ol man oli stap wet we tingting blong olgeta i wantem tumas blong luk we ‘God i soemaot ol pikinini blong hem’?
◻ ?From wanem yumi save trastem Jeova fulwan blong livim ol taem mo sisen long han hem?
[Tok Blong Pija Long Pej 17]
Ol Kristin oli mas stap wekap blong wet long taem we Kraes bambae i kamtru
[Tok Blong Pija Long Pej 18]
Ol tabu man we oli stap bisi oltaem long wok blong Jeova, bilif blong olgeta i no stanap long fasin blong kaontem taem