Folem Fasin Blong Jeova Blong Soem Sore

“Yufala i mas gat sore long man, olsem we papa blong yufala i gat sore long man.”—LUK 6:​36.

1. ?Olsem wanem ol Farisi oli soem se oli no gat sore nating?

NATING se yumi pija blong God, plante taem yumi no folem fasin blong hem, blong soem sore long man. (Jenesis 1:​27) Eksampel, tingbaot ol Farisi. Oli no wantem glad taem Jisas i sore long wan man we i no save stretem han blong hem mo i mekem hem i gud bakegen long Sabat dei. Oli girap, oli mekem toktok agensem Jisas, “oli traem faenem rod blong kilim hem i ded.” (Matiu 12:​9-​14) Long wan narafala taem, Jisas i mekem wan man we i blaen finis taem hem i bon, i kamgud bakegen. Long taem ya tu, “ol Farisi” oli no glad long fasin sore we Jisas i soem long man ya. Oli girap, oli komplen, se: “Man ya i no kamaot long God, from we hem i no obei long loa blong Sabat dei.”​—Jon 9:​1-7, 16.

2, 3. ?Jisas i minim wanem taem hem i talem se: “Lukaot long is blong ol Farisi”?

² Ol Farisi, oli no gat filing blong sore nating. Taswe, oli mekem i nogud long laef blong man mo oli sin agensem God tu. (Jon 9:​39-​41) I stret nomo we Jisas i givim woning long ol disaepol blong hem se: “Yufala i mas lukaot long is” blong smol grup blong olgeta ya we oli gat paoa, mo ol narafala man blong skul, olsem ol Sadusi. (Matiu 16:6) Long Baebol, is i pija blong sin no ol fasin we oli doti. Taswe, Jisas i minim se ol tijing blong “ol tija blong Loa mo ol Farisi” oli save mekem klin wosip i kam doti. ?Olsem wanem oli mekem samting ya? Hemia taem oli tanem baksaed long ol “nambawan tok” blong loa, olsem fasin sore, mo tijim ol man blong tingbaot ol Loa blong God olsem ol rul mo kastom we oli strong bitim mak. (Matiu 23:23) Skul ya we i fulap long kastom blong man, i mekem se wosip blong God i kam olsem wan hevi samting.

³ Long seken haf blong parabol long saed blong yang boe we i lusum rod, Jisas i soemaot klia rabis tingting blong ol lida blong skul blong ol man Jyu. Long parabol ya, papa, we i minim Jeova, i wantem fogivim boe blong hem we i tanem tingting from sin blong hem. Be fasbon brata blong boe ya, we i pija blong “ol Farisi mo ol tija blong loa,” i gat wan filing we i defren olgeta.​—Luk 15:2.

Brata We i Kros

4, 5. ?Long wanem fasin brata blong yang boe we i lusum rod, hem i “lus”?

⁴ “Nao long taem ya, fasbon pikinini blong man ya, hem i stap long garen. Mo taem hem i kamhom, mo i kam klosap long haos, hem i harem noes ya we ol man oli stap singsing, oli stap danis. Nao hem i singaot wan man blong wok, i askem long hem se, ‘?Ei, wanem ya?’ Man ya i talem long hem se, ‘!O, brata blong yu i kamhom we hem i oraet nomo! Mo from samting ya, papa blong yutufala i kilim buluk ya we i fatfat gud, blong yumi mekem lafet.’ Nao fasbon pikinini ya, hem i kros tumas, i no save go insaed long haos.”​—Luk 15:25-​28.

⁵ Parabol ya blong Jisas i soem se i no yang boe ya nomo, we i gat wan problem. Wan buk i talem se: “Long parabol ya, i olsem we tufala boe ya tugeta oli lus. Wan long tufala, ol fasin we oli no stret oli winim hem, mo narawan, tingting ya se hem i stret man i blaenem hem.” Makemgud se brata blong yang boe we i lusum rod, hem i no wantem glad, be tu “hem i kros tumas.” Grik wod we tok ya “kros tumas” i kamaot long hem, i no minim fasin we man i faerap long kros. Prapa mining blong hem se man i holem kros longtaem long tingting blong hem. I klia se brata blong boe ya we i lusum rod i letem kros i gru long hat blong hem. Taswe hem i ting se i no stret blong mekem lafet from wan man we i no gat gudfala risen blong aot long haos.

6. ?Brata blong yang boe we i lusum rod i pija blong hu, mo from wanem?

⁶ Brata blong yang boe we i lusum rod, i pija blong olgeta we oli kros taem Jisas i soem se hem i sore mo i tingbaot ol sinman. Olgeta ya we oli ting se oli stret man, oli no glad taem Jisas i sore long ol man. Mo tu, oli no soemaot glad we olgeta long heven oli kasem taem God i fogivim wan sinman. I defren olgeta, fasin sore blong Jisas i mekem se oli kros, nao oli stat blong gat ol “rabis tingting” long hat blong olgeta. (Matiu 9:​2-4) Wan taem, sam Farisi oli kros tumas, nao oli singaot wan man we Jisas i mekem hem i gud bakegen, blong i kam long fes blong olgeta, nao oli “putumaot hem” long haos blong prea. !Hem i no moa wan memba blong haos prea! (Jon 9:​22, 34) Ol lida blong skul blong ol man Jyu oli olsem brata blong yang boe we i lusum rod, we ‘i no wantem go insaed long haos.’ Oli no wantem tekem jans ya blong ‘harem gud wetem olgeta we oli stap harem gud.’ (Rom 12:15) Taem Jisas i gohed long parabol blong hem, hem i mekem rabis tingting blong olgeta i kam long klia ples.

Rabis Tingting

7, 8. (a) ?Long wanem rod brata blong yang boe we i lusum rod i mestem trufala mining blong pikinini? (b) ?Olsem wanem fasbon pikinini i soem se tingting blong hem i defren long papa blong hem?

⁷ “Nao papa blong hem i kam afsaed i askem long hem blong i go insaed. Be hem i talem long papa blong hem se, ‘!Yu luk! Plante yia finis mi mi stap wok long ples ya, we mi olsem man blong wok nomo blong yu, mo neva mi brekem tok blong yu. ?Be weswe? ?Yu yu givim wanem samting long mi? !I no gat! Nating we wan smol nani nomo, be neva yu givim long mi, blong mi save mekem wan smol lafet wetem ol fren blong mi. Be pikinini ya blong yu we i bin spolem olting blong yu blong ronem ol woman blong rod, taem hem i kamhom, yu girap yu go kilim yang buluk ya we i fatfat gud, blong mekem lafet blong hem.’ ”​—Luk 15:28-​30.

⁸ Taem brata blong yang boe we i lusum rod i talem ol tok ya, hem i soemaot klia se hem i mestem trufala mining blong pikinini. Hem i stap wok blong papa blong hem, olsem we man i wok long wan Masta. Taswe hem i talem long papa blong hem, se: “Mi mi stap wok long ples ya, we mi olsem man blong wok nomo blong yu.” I tru, fasbon boe ya i neva ronwe long haos, mo i neva brekem wan tok blong papa blong hem. ?Be lav nao i pusum hem blong obei long papa blong hem? ?I tru se hem i glad long wok we hem i stap mekem long papa blong hem? no ?Hem i stap glad, i stap ting se hem i wan gudfala pikinini, jes from we hem i mekem wok blong hem “long garen”? Sipos hem i wan trufala pikinini, ?from wanem hem i no gat sem tingting olsem papa blong hem? Hemia i wan jans blong soem sore long brata blong hem. ?Be from wanem fasin sore i no stap long hat blong hem? —Skelem wetem Ol Sam 50:20-​22.

9. Eksplenem olsem wanem ol lida blong skul blong ol man Jyu oli sem mak long fasbon pikinini.

⁹ Fasbon boe ya i pija blong ol lida blong skul blong ol man Jyu. Oli ting se oli stap tru long God from we oli strong blong folem ol loa blong hem. I tru se, fasin obei i impoten tumas. (1 Samuel 15:22) Be olgeta ya, oli strong bitim mak long loa. Ale oli mekem se ol man oli stap wosip long God olsem wan mesin we i stap wok. Oli wosip long God long toktok nomo, i no rili wosip long hat blong olgeta. Tingting blong olgeta i fulap long ol kastom nomo. I no gat lav long hat blong olgeta. Traem tingbaot, long tingting blong olgeta, ol parakot man oli olsem doti aninit long leg blong olgeta. Mo tu, oli tok nogud long ol man ya, se: “God i kros long olgeta” finis. (Jon 7:​49) Tru ya, ?olsem wanem God i save glad long wok blong ol lida ya we hat blong olgeta i stap longwe long hem?​—Matiu 15:​7, 8.

10. (a) Jisas i talem se: “Mi no wantem fasin ya we ol man oli stap kilim anamol blong mekem sakrefaes long mi, mi mi wantem we oltaem man i gat sore long man.” ?From wanem advaes ya i stret nomo? (b) ?Wanem bigfala denja i stap sipos man i no gat sore?

¹⁰ Jisas i talem long ol Farisi se: “I gud yufala i go lanem mining blong tok ya . . . se, ‘Mi mi no wantem fasin ya we man i stap kilim anamol blong mekem sakrefaes long mi, mi mi wantem we oltaem man i gat sore long man.’ ” (Matiu 9:​13; Hosea 6:6) Jisas i soem klia long olgeta se fasin blong sore long man i mas kam fastaem. From we sipos oli no gat fasin sore, ol sakrefaes blong olgeta oli blong nating nomo. I impoten tumas blong gat sore, from we Baebol i talem se man we i “no gat sore,” bambae “hem i mas ded from.” (Rom 1:​31, 32) From samting ya, yumi no sapraes taem Jisas i talem se ol lida blong skul ya, bambae oli lus blong olwe. I klia se, bigfala risen we i mekem se oli mas lus, hemia se oli no gat sore. (Matiu 23:33) Be maet wanwan long ol lida ya oli save kasem help. Long en blong parabol blong hem, Jisas i traehad blong jenisim tingting blong ol man Jyu ya. Blong mekem olsem, hem i yusum tok we papa ya i talem long fasbon boe blong hem. Bambae yumi luk.

Fasin Sore Blong Papa

11, 12. ?Olsem wanem papa long parabol blong Jisas i traem pulum fasbon pikinini blong hem blong i tingting gud, mo i save minim wanem taem papa i yusum tok ya “brata ya blong yu”?

¹¹ “Nao papa blong hem i talem long hem se, ‘Pikinini blong mi. Oltaem yu yu stap klosap long mi, mo olgeta samting blong mi oli blong yu. Be i stret nomo blong yumi mekem lafet ya, yumi glad, from we brata ya blong yu we i olsem we hem i ded finis, naoia hem i laef bakegen. Hem i lus, be naoia yumi faenem hem bakegen.’ ”​—Luk 15:31, 32.

¹² Makemgud se papa i yusum tok ya “brata ya blong yu.” ?From wanem? Tingbaot se fastaem finis, taem fasbon boe ya i stap toktok long papa blong hem, hem i kolem boe we i lusum rod se, “pikinini ya blong yu”​—i no “brata blong mi.” I luk olsem we hem i no tingbaot se hem i stret brata blong yang boe we i lusum rod. Ale, naoia i olsem we papa i stap talem long fasbon boe blong hem se: ‘I tru se hem i pikinini blong mi. Be hem i brata blong yu tu. Yutufala i kamaot long wan papa mo wan mama. !I stret nomo we yu glad from we hem i kambak!’ Mesej blong Jisas i kliagud blong ol lida blong ol man Jyu oli kasem save long hem. Ol sinman we ol lida ya oli ting nogud long olgeta, i rili “brata” blong olgeta. Yes, “i no gat man long wol ya we i no save mekem mastik, we oltaem i stap mekem i stret nomo.” (Prija 7:​20) Taswe, i stret nomo we ol lida ya blong ol man Jyu oli glad taem ol sinman oli tanem tingting from ol sin blong olgeta.

13. ?Parabol blong Jisas we i no finis i letem yumi blong ansa long wanem impoten kwestin?

¹³ Afta we papa i askem strong long fasbon pikinini blong hem blong joen wetem olgeta, Jisas i stop wantaem, hem i no finisim parabol ya. I olsem we Jisas i letem olgeta we oli lesin long hem, blong oli finisim stori ya. Nomata wanem samting fasbon pikinini i mekem biaen, olgeta wanwan we oli stap lesin long Jisas oli mas ansa long kwestin ya, ‘?Bambae yu yu joen long glad we olgeta long heven oli gat taem wan sinman i tanem tingting from sin blong hem?’ Ol Kristin tede tu oli gat janis blong ansa long kwestin ya. ?Olsem wanem oli save givim ansa?

Folem Fasin Sore Blong God Tede

14. (a) ?Olsem wanem yumi save folem advaes blong Pol long Efesas 5⁠:​1, long saed blong fasin sore? (b) Long saed blong fasin sore blong God, ?wanem rong tingting yumi mas blokem?

¹⁴ Pol i givim advaes long ol Kristin long Efesas se: “Yufala i pikinini blong God, mo hem i lavem yufala tumas, nao from samting ya, yufala i mas traehad blong folem fasin blong hem.” (Efesas 5:1) Taswe, yumi ol Kristin, yumi mas luksave fasin sore blong God mo gat tangkiu from. Yumi mas putum fasin sore i stap dip insaed long hat blong yumi, mo soemaot fasin ya taem yumi stap wok wetem ol narafala. Be, yumi mas lukaot gud. Yumi no mas yusum fasin sore blong God olsem eskius blong mekem ol bigfala sin. Eksampel, maet sam man oli gat tingting ya se: ‘Sipos mi mekem wan sin, mi save prea nomo long God blong i fogivim mi, nao bambae hem i sore long mi.’ Jud, wan man blong raetem Baebol, i talem se ol man we oli gat tingting olsem, ‘oli tanem kaengud fasin blong God i kam wan eskius blong mekem ol rabis fasin.’ (Jud 4) Nating se Jeova i gat sore, bambae hem i mas “panisim olgeta” we oli stap mekem ol rabis fasin, mo we oli no wantem tanem tingting from ol sin blong olgeta.​—Eksodas 34:7; Skelem wetem Josua 24:19; 1 Jon 5:​16.

15. (a) ?From wanem ol elda oli mas holem stret tingting long saed blong fasin sore? (b) Ol elda oli no save letem wan man we i stap gohed blong mekem nogud i stap long kongregesen, be ?ol elda oli mas traehad blong mekem wanem, mo from wanem?

¹⁵ Be yumi mas lukaotgud long wan narafala fasin. Yumi no mas mekem i strong tumas mo jajem olgeta ya we oli rili sore from sin blong olgeta, mo oli soemaot se oli tanem tingting blong olgeta. (2 Korin 7:​11) Jeova i putum wok ya blong lukaot ol sipsip blong hem long han blong ol elda. Taswe, i impoten tumas we ol elda oli holem stret tingting long bisnes ya, antap moa taem oli stap stretem wan problem. Kristin kongregesen i mas stap klin oltaem. Mo Baebol i talem se i stret blong putumaot ‘man we i stap gohed blong mekem sin.’ (1 Korin 5:​11-​13) Be long sem taem, i gud blong soem sore taem i gat wan klia risen blong soem fasin ya. Taswe, ol elda oli no save letem wan man we i wantem gohed blong mekem i nogud, i stap long kongregesen. Be, long sem taem, oli holemtaet ol rul blong stret fasin, taem oli stap traehad blong soem lav mo sore. Oltaem oli tingbaot rul ya blong Baebol se: ‘Man we i no soem sore, bambae God i jajem hem we i no gat sore long hem. From we fasin sore i hae moa, i winim fasin blong jajem man.’​—Jemes 2:​13; Proveb 19:17; Matiu 5:7.

16. (a) Yusum Baebol blong soem olsem wanem Jeova i wantem tumas se olgeta we oli mekem sin oli kambak long hem. (b) ?Olsem wanem yumi tu, yumi save soem se yumi mekem welkam long sinman we i tanem tingting from sin blong hem?

¹⁶ Parabol ya blong yang boe we i lusum rod i soem klia se Jeova i wantem tumas se olgeta we oli mekem sin oli kambak long hem. Bambae hem i gohed blong singaot olgeta blong kambak go kasem we oli soem klia se oli no wantem blong kambak long hem. (Esikel 33:11; Malakae 3:7; Rom 2:​4, 5; 2 Pita 3:9) Olsem papa blong yang boe we i lusum rod, Jeova i soem ona long olgeta we oli kambak long hem, i tekem olgeta oli kam olsem ol stret memba blong famle. ?Olsem wanem long yu? ?Yu yu stap folem fasin blong Jeova long saed ya? Taem wan brata no sista, we kongregesen i bin putumaot hem, i kambak long kongregesen, ?yu yu mekem wanem? Yumi save finis se ‘i gat bigfala glad long heven.’ (Luk 15:7) ?Be i gat bigfala glad long wol ya, insaed long kongregesen, mo insaed long hat blong yu? ?No yu yu olsem fasbon pikinini long parabol ya, we i kros, from we hem i ting se i no stret blong mekem welkam long hemia we i no gat gudfala risen blong lego ol sipsip blong God?

17. (a) ?Wanem samting i hapen long kongregesen blong Korin long faswan handred yia, mo Pol i givim wanem advaes long olgeta blong stretem bisnes ya? (b) ?From wanem advaes blong Pol i wokgud, mo olsem wanem yumi save folem advaes ya tede? (Lukluk bokis long raetsaed.)

¹⁷ Blong halpem yumi blong skelem yumi wanwan long bisnes ya, tingbaot wanem we i hapen long kongregesen blong Korin, samwe long yia 55 K.T. I gat wan man we kongregesen i putumaot hem, be biaen hem i lego ol rabis fasin blong hem. ?Bambae ol brata mo sista oli mas mekem wanem? ?I stret we oli fraet mo gohed blong stap longwe long hem? No gat. Pol i givim advaes long ol Kristin long Korin se: “Naoia i gud yufala i fogivim hem, yufala i leftemap tingting blong hem bakegen. Sipos no, bambae hem i harem nogud tumas, nao bambae tingting blong hem i foldaon olgeta. Mi mi talem long yufala, se plis yufala i go mekem hem i save we yufala i lavem hem.” (2 Korin 2:​7, 8) Plante taem, ol man we oli tanem tingting blong olgeta from sam nogud fasin we oli bin mekem, oli save harem nogud long filing blong olgeta mo tingting blong olgeta i save foldaon kwiktaem nomo. Taswe, yumi mas soemaot klia long olgeta se yumi laekem olgeta mo se Jeova tu i laekem olgeta. (Jeremaea 31:3; Rom 1:​12) Samting ya i impoten tumas. ?From wanem?

18, 19. (a) ?Olsem wanem kongregesen blong Korin i bin soem se hem i agri long fasin nogud? (b) ?Olsem wanem fasin blong no gat sore i save mekem se “Setan i winim” kongregesen blong Korin?

¹⁸ Taem Pol i talem long ol Kristin long Korin blong gat fasin fogif, hem i givim wan risen from wanem oli mas gat fasin ya. Hem i se: “Yumi savegud ol plan blong Setan, mo mi no wantem we hem bambae i winim yumi long bisnes ya.” (2 Korin 2:​11) ?Pol i minim wanem? Fastaem finis, hem i stretem kongregesen blong Korin from we oli letem fasin nogud i stap gohed long kongregesen. Oli letem semfala man ya i gohed long sin blong hem, mo oli no stretem hem from. Long rod ya, kongregesen​—antap moa ol elda​—⁠oli folem rod we Setan i glad long hem, blong spolem gudnem blong kongregesen.​—1 Korin 5:​1-5.

¹⁹ Be sipos nao, ol elda oli no wantem fogivim man ya we i tanem tingting blong hem, bambae Setan i winim olgeta long narafala rod. ?Wanem rod ya? Hemia se bambae Setan i yusumgud janis ya we ol elda oli strong tumas mo oli no gat sore. Sipos hemia we i tanem tingting from sin blong hem ‘i harem nogud tumas, nao tingting blong hem i foldaon olgeta’​—no olsem Today’s English Version i talem, hem i “harem nogud tumas we hem i wantem finis olgeta”​—!bambae ol elda oli gat bigfala kaon long fored blong Jeova! (Skelem wetem Esikel 34:6; Jemes 3:1) Jisas i givim woning long ol man blong hem, se oli mas lukaot gud blong no “mekem wan long olgeta ya we oli no gat paoa, i foldaon long sin.” Afta we hem i givim woning ya, i stret nomo we hem i talem se: “Sipos brata blong yu i stap mekem i no stret long yu, yu mas tok long hem blong blokem hem. Mo sipos hem i tanem tingting blong hem from rabis fasin blong hem, yu mas fogivim hem.”a​—Luk 17:​1-4.

20. ?Long wanem rod i gat bigfala glad long heven mo long wol taem wan sinman i tanem tingting from ol sin blong hem?

²⁰ Ol taosen man we evri yia, oli kambak long klin wosip, oli gat bigfala tangkiu long fasin sore we Jeova i soemaot long olgeta. Wan Kristin sista, we i kambak long kongregesen, i talem se: “Long ful laef blong mi, mi no tingbaot wan taem we mi harem gud olsemia.” I tru, ol enjel long heven tu oli harem gud olsem sista ya. I gud yumi tu, yumi joen long ‘bigfala glad we i kamaot long heven’ taem wan sinman i tanem tingting blong hem from ol sin blong hem. (Luk 15:7) Taem yumi mekem olsem, yumi stap folem fasin blong Jeova blong soem sore.

[Futnot]

Ol Kwestin Blong Tingtingbak

◻ ?Olsem wanem ol lida blong skul blong ol man Jyu oli oli sem mak long brata blong yang boe we i lusum rod?

◻ ?Long wanem rod brata blong yang boe we i lusum rod i mestem trufala mining blong pikinini?

◻ Taem yumi stap tingting long fasin sore blong God, ?wanem tufala samting we yumi no mas foldaon long tufala?

◻ ?Olsem wanem yumi save folem eksampel blong God long saed blong fasin sore?

[Bokis blong pija long pej 17]

“MEKEM HEM I SAVE WE YUFALA I LAVEM HEM”

Taem Pol i raet long Kristin kongregesen blong Korin, hem i tokbaot man ya we kongregesen i putumaot hem from rabis fasin blong hem mo we biaen i tanem tingting blong hem from sin blong hem. Pol i talem se: “Plis yufala i go mekem hem i save we yufala i lavem hem.” (2 Korin 2:⁠8) Grik tok we oli tanem i kam “mekem hem i save” i wan tok we ol man blong loa oli yusum oltaem, we hem i minim “pruvum.” Yes, wan man we i tanem tingting from rabis fasin blong hem, nao i kambak long kongregesen, hem i mas luksave se ol narafala long kongregesen oli lavem hem mo oli mekem welkam long hem bakegen olsem memba blong kongregesen.

Be, yumi mas tingbaot se bighaf blong kongregesen oli no save wanem nao i mekem se kongregesen i putumaot wan man mo wanem nao i mekem se kongregesen i agri long hem bakegen. Mo tu, maet rabis fasin blong hemia we i tanem tingting from sin blong hem, i bin mekem trabol long tingting blong samfala long kongregesen no mekem i soa long filing blong olgeta​​—⁠we maet i stap longtaem. From samting ya, i gud blong tingbaot filing blong olgeta ya. Olsem nao, taem oli talemaot se kongregesen i tekembak man ya we i tanem tingting blong hem, maet i moa waes blong talem sam tok blong welkamem hem taem i no gat narafala i stap we filing blong olgeta i trabol.

!I gud tumas blong soem klia long olgeta we oli kambak long kongregesen se yumi welkamem olgeta olsem ol memba blong kongregesen! Fasin ya i save mekem bilif blong olgeta i kam strong bakegen. Yumi leftemap tingting blong olgeta taem yumi stori wetem olgeta, joen wetem olgeta long Haos Kingdom, prij wetem olgeta, mo joen wetem olgeta long ol narafala taem. Taem yumi stap soem se yumi lavem olgeta ya, hemia i no minim se yumi agri long sin we oli mekem. No gat. Be, yumi soem se, wetem ol enjel long heven, yumi harem gud from we ol man ya, oli tanem baksaed long ol sin blong olgeta, oli kambak long Jeova.​​—⁠Luk 15:⁠7.

[Tok Blong Pija Long Pej 15]

Fasbon pikinini i no wantem glad taem brata blong hem i kamhom