?I Gat Wan Enjel We i Stap Lukaot Long Yu?
?YU YU bilif se i gat wan enjel we i stap lukaot long yu? Plante man oli tingting olsem. Taswe, long wes Kanada, ol man oli stap talem se, wan woman i gat wan spesel paoa blong toktok wetem ol enjel. Sipos yu givim fulnem blong yu long hem, wetem 200 dola, hem i talem se bambae hem i givhan long yu blong toktok wetem enjel ya we i stap lukaot long yu. Fastaem, woman ya i mas lukluk strong long laet blong wan kandel blong i tingting dip. Nao bambae hem i gat wan vison, mo long vison ya, enjel blong yu i givim wan mesej long hem blong i talem long yu. Ale, woman ya i mekem wan pija blong yu save luk enjel blong yu, se hem i olsem wanem. Mo hem i givim pija ya long yu, olsem spesel presen blong yu.
Maet samfala oli ting se stori ya i sem mak olsem kastom stori long saed blong King Louis 9 blong Franis. Kastom stori ya i talem se king i pem sam feta we oli sas tumas. Ol man oli talem se ol feta ya oli kamaot long wing blong Mikael, Jif blong ol Enjel. Nating se ol man oli no bilif long stori blong King Louis, be plante man oli bilif kwiktaem nomo long tok blong woman Kanada ya.
Bigfala Intres Long Ol Enjel
Long ol yia we oli jes pas, plante moa man oli soem bigfala intres long ol enjel. Long televisin, sinema, buk, magasin, mo niuspepa, ol man oli storeyan plante long saed blong ol enjel. Oli talem se ol enjel oli leftemap tingting blong ol man we oli sik bigwan mo olgeta we oli stap krae from ded, oli givim waes long man, mo oli sevem sam man we klosap oli ded. Long Yunaeted Stet, samwe 20 milyan man oli stap wajem wan film long televisin evri wik, we i soemaot wanem we ol enjel oli stap mekem long laef blong ol man. Long wan stoa blong salem buk, oli kaontem se i gat bitim 400 buk we oli tokbaot ol enjel.
Wan buk we oli jes raetem i no longtaem, i tokbaot olsem wanem ol enjel oli bin sevem sam soldia long taem blong faet. Ol man oli wokem sam smol pepa blong putum long trak, we oli raetem long hem se ol enjel oli stap lukaot long ol draeva. Ol man oli stanemap sam ogenaesesen, miting, mo kos blong stadi long saed blong ol enjel, mo oli talem se ol stadi ya oli save halpem ol man blong toktok wetem ol enjel.
Woman ya, Eileen Freeman i raetem tri buk long saed blong ol enjel, mo wan niuspepa we hem i raetem i tokbaot ol enjel nomo. Hem i talem se: “Mi mi bilif se, i gat plante narafala enjel long Wol ya, we wok blong olgeta i blong lukaot long ol man. Ol enjel ya oli plante olsem ol enjel long heven. Wok blong ol narafala enjel ya i no jes blong presem God long heven, be blong lukaotgud tu long ol man mo ol narafala laef samting long Wol ya. Wanwan long yumi i kasem enjel ya we i stap lukaot long yumi, taem yumi stap yet long bel blong mama blong yumi. Hem i lukaot long yumi go kasem we yumi bon, mo i gohed blong lukaot long yumi long ful laef blong yumi long wol ya. Biaen, enjel ya i lidim yumi i go long bigfala laet blong heven.” Bilif blong woman ya i soemaot tingting blong fulap man long saed blong ol enjel we oli stap lukaot long yumi.
Tede, yumi stap long wan taem we i gat plante wari mo laef i strong tumas. Taswe, ol man oli haremgud long bilif ya se i gat wan enjel we wok blong hem i blong sevem yumi long trabol. ?Tok blong God, Baebol, i talem wanem long saed ya? ?I gud blong traem storeyan wetem ol enjel? ?Ol enjel oli intres long ol gudfala fasin mo bilif we yumi stap folem? ?Wanem help we yumi save kasem long olgeta? Nekis haf bambae i ansa long ol kwestin ya.