Lego Wosip Long Hedgavman Blong Joen Long Trufala Wosip

ISAMU SUGIURA I TALEM STORI YA

Nating se long 1945, i klia nomo we Japan i stap lusum Namba Tu Bigfala Faet blong Wol, mifala i trastem se ‘kamikas’ (“win blong god”), bambae i blu mo i winim ol enemi blong mifala. ‘Kamikas,’ hemia nem blong ol hariken we oli kilim Japan long 1274 mo 1281. Long tufala taem ya, ol man Mongol oli kam wetem plante sip blong faet agensem Japan. Be win ya ‘Kamikas’ i blu, mo i spolem bighaf blong ol sip blong ol man Mongol, ale, oli mas gobak.

TASWE, taem Hedgavman ya Hirohito, i talemaot, long Ogis 15, 1945, se ol kantri blong Wes oli winim Japan, plante handred milyan man we oli bin wosipim hedgavman oli harem nogud tumas. Long taem ya, mi stap long skul, mo tingting blong mi i foldaon bigwan tu. Mi askem long mi wan se: ‘Sipos hedgavman i no God we i laef, ?hu ya God? ?Hu man we mi save trastem?’

I tru se Japan i lusum Namba Tu Bigfala Faet blong Wol, be samting ya i givim jans long mi mo long plante taosen narafala man long Japan blong kasem save long trufala God, Jeova. Bifo we mi talem long yu wanem ol samting we mi mas jenisim long laef blong mi, i gud we mi tokbaot wanem we jos i tijim long mi taem mi pikinini.

Skul i Gat Paoa Long Laef Blong Mi Stat Long Taem We Mi Pikinini Yet

Mi bon long taon blong Nagoya, long Jun 16, 1932. Mi mi laswan long ol fo pikinini boe long famle blong mi. Papa blong mi i mekem wok blong droem plan blong ol graon long taon blong mifala. Mama blong mi i strong blong folem ol tijing blong Tenrikyo, hemia wan smol haf blong skul ya Sinto. Fasbon brata blong mi i bin kasem trening long skul ya blong kam wan tija blong Tenrikyo. Mama blong mi i laekem mi tumas, mo oltaem hem i stap karem mi i go long ples we oli stap mekem ol miting blong wosip.

Hem i tijim mi blong bodaon mo prea. Skul blong Tenrikyo i tijim se i gat wan god we i wokem olgeta samting, nem blong hem Tenri O no Mikoto, mo skul ya i tijim tu se i gat ten narafala god. Ol memba blong skul ya oli stap mekem merikel blong winim ol sik, oli strong long fasin blong givhan long ol narafala man mo oli talemaot ol bilif blong olgeta.

Taem mi smol yet, mi wantem save plante samting. Long naet, mi laekem lukluk mun mo ol sta we oli plante tumas long skae, mo mi wantem save hamas spes i gat biaen long skae. Mo tu, mi planem sam obesin mo sam kukamba long wan smol ples long graon blong mifala, mo mi laekem tumas blong wajem olsem wanem oli stap gru. Fasin blong lukluk ol samting raonabaot long mi, i mekem bilif blong mi long God i kam strong moa.

Ol Yia Blong Faet

Mi go long praemari skul long 1939 go kasem 1945, stret long taem blong Namba Tu Bigfala Faet blong Wol. Wan bigfala haf blong edukesen we mifala i kasem long skul, hemia wosip blong hedgavman. Wosip ya i wan impoten haf blong Sinto skul. Oli tijim shushin long mifala, hemia wan fasin blong trenem tingting blong mifala blong sapotem fulwan kantri mo ami blong mifala. Evri dei long skul, mifala i mekem ol sem samting olsem salut long flag, singim sing blong kantri, stadi long ol loa we hedgavman i talemaot long saed blong edukesen, mo ona long wan foto blong hedgavman.

Mo tu, mifala i go long haos wosip blong Sinto, blong prea long God blong i mekem se ol ami blong hedgavman oli winim faet. Tu stret brata blong mi oli joen long ami. Trening blong skul ­mo blong jos i fulumap hed blong mi wetem tingting blong sapotem hedgavman, taswe mi glad tumas blong harem ol nius blong ami blong Japan taem oli win long faet.

Long taem blong faet, Nagoya i stamba ples blong wokem ol plen blong Japan, taswe ol plen blong ami blong Amerika oli traehad blong spolem ples ya. Long dei, ol spesel plen blong sakem bom blong ol man Amerika, we oli kolem B-29 Superfortress, oli pas antap long taon, raonabaot long 9,000 mita antap, mo oli sakem plante handred tan blong bom long ples blong ol faktri. Long naet, ol soldia oli laetem sam strongfala laet blong lukaot ol plen long skae, mo oli luk sam plen blong sakem bom, we oli stap pas daon tumas, raonabaot long 1,300 mita nomo antap long graon. Plante taem, ol plen blong Amerika oli kam blong sakem ol bom we oli bosta mo laetem ol bigbigfala faea long ol ples we fulap haos i stap long hem. Long Nagoya nomo, long ol naen laswan manis blong faet, ol plen oli kam 54 taem blong sakem ol bom, mekem se plante man oli safa bigwan mo bitim 7,700 man oli ded.

Long taem ya, ol sip blong faet oli stat blong sutum sam bom oli kam agensem ten taon we oli stap klosap long solwota. mo plante man oli stap talem se ating bambae ol plen blong ami blong Amerika oli kamdaon klosap long Tokyo. Ami i trenem ol woman mo ol yangfala boe blong faet wetem ol spia we oli wokem long bambu, blong protektem kantri. Mifala i gat wan spesel tok ya, “Ichioku Sougyokusai,” we i minim se, “I moa gud we 100 milyan man i ded, i bitim we yumi go long han blong enemi.”

Long Ogis 7, 1945, stamba tok blong wan niuspepa i talem se: “Wan Niufala Kaen Bom i Foldaon Long Taon Blong Hirosima.” Tu dei biaen, wan long ol niufala bom ya i foldaon long taon ya Nagasaki. Hemia ol nyuklia bom, mo biaen, mifala i harem se tufala bom ya oli kilim i ded bitim 300,000 man. Long Ogis 15, mifala i mekem wan trening blong maj wetem masket we oli wokem long wud. Taem mifala i kambak, mifala i harem tok blong hedgavman we i talemaot se Japan i go long han blong Amerika. Mifala i bin sua se bambae mifala i winim faet, be naoia, mifala i harem nogud i bitim mak.

Mi Gat Wan Niufala Hop

Taem mifala i luk ami blong Amerika i kam long Japan, sloslou, mifala i stat akseptem tingting ya se Yunaeted Stet i winim faet. Oli putumap wan niufala kaen gavman long Japan, mo ol niufala loa blong gavman ya oli givim fasin fri blong wosip long enikaen skul. Be laef long taem ya i kam strong tumas, mo i no isi blong faenem kakae. Long 1946, papa blong mi i ded from we hem i no kakaegud.

Long sem taem ya, skul blong mi i stat blong tijim Engglis, mo NHK, wan radyo stesen, i stat blong givim wan program blong lanem Engglis lanwis. Evri dei mi lesin long program ya we plante man oli lesin long hem, mo mi folem ol tok long wan buk we i laenap wetem program ya. Mi mekem samting ya long faef yia. Samting ya i mekem mi mi drim se bambae wan dei, mi go long Yunaeted Stet. Ol skul Sinto mo Budis oli mekem se mi mi harem nogud tumas, taswe mi stat blong tingting se ating mi save faenem trutok long saed blong God long ol skul blong Wes.

Long stat blong manis Epril 1951, mi mitim Grace Gregory, wan misinari blong Watch Tower Sosaeti. Hem i stap stanap long fored blong wan stesen blong tren long Nagoya, mo hem i stap seremaot Wajtaoa long Engglis mo wan buklet long lanwis Japan, we i tokbaot Baebol. Mi sapraes bigwan from tingting daon we hem i gat blong mekem wok ya. Mi tekem tufala buk we hem i soemaot, mo mi glad blong stadi Baebol. Mi promes blong kam long haos blong hem blong stadi Baebol sam dei biaen.

Taem mi sidaon long tren mo mi stat ridim Wajtaoa, mi sek long faswan tok blong faswan haf blong magasin ya. Tok ya, hem i “Jeova.” Mi neva luk nem ya bifo. Mi no ting se nem ya i save stap long smol Engglis-Japan diksonari blong mi. !Be mi sapraes blong luk se tok ya i stap insaed! “Jeova . . . , God blong Baebol.” !Naoia, mi stat blong kasem save long God blong ol Kristin man!

Long faswan taem we mi go long haos blong ol misinari, mi harem se Nathan H. Knorr, we i presiden blong Watch Tower Bible and Tract Society, bambae i givim wan tok sam wik biaen. Hem i stap visitim Japan wetem sekretari blong hem, Milton Henschel, mo bambae hem i kam long Nagoya. Nating se mi no gat plante save long saed blong Baebol, mi glad tumas blong lesin long tok ya, mo blong joen wetem ol misinari mo ol narafala man we oli kam lesin.

Long ol tu manis we oli kam biaen, mi stadi Baebol wetem Grace, mo mi lanem ol stamba trutok long saed blong Jeova, Jisas Kraes, ransom, Devel Setan, Amageden, mo Paradaes long wol. Gud nius long saed blong Kingdom, hemia nao mesej we mi bin lukaot. Long sem taem we mi stat blong stadi, mi stat blong kam long ol miting blong kongregesen. Mi laekem fasin frengud blong evriwan long ol miting ya, mo mi glad blong luk se ol misinari oli joen long ol man ples mo oli sidaon wetem mifala long ­tatami (wan kaen mat we oli wokem long lif).

Long Oktoba 1951, mifala i mekem faswan seket asembli long Japan, long Pablik Haos blong Nakanosima, long taon ya Osaka. I no gat 300 pablisa yet long ful Japan, be moa long 300 man oli kam long asembli ya, mo long namba ya i gat klosap 50 misinari. Mi gat wan smol haf blong program tu. Ol samting we mi luk mo harem oli pulum tingting blong mi bigwan, taswe mi tekem disisen long hat blong mi blong mekem wok blong Jeova long ful laef blong mi. Long nekis dei, mi tekem baptaes long hot wota blong wan pablik haos blong swim klosap long ples blong asembli ya.

Glad From Wok Blong Paenia

Mi wantem kam paenia, hemia nem blong ol Witnes blong Jeova we oli stap prij fultaem, be mi harem tu se mi mas givhan long famle blong mi long saed blong mane. Mi mekem tingting blong mi i strong mo mi go talem long bos blong mi ol samting we mi wantem mekem. Mi sapraes blong harem hem i talem se: “Bambae mi glad blong halpem yu sipos samting ya i save mekem yu yu hapi.” Ale mi wok tu dei nomo evri wik, mo samting ya i naf blong halpem mama blong mi blong pem ol samting we mifala i nidim long haos. Mi haremgud, olsem wan pijin we oli letem i gofri.

Ol samting oli gohed blong kamgud, ale long Ogis 1, 1954, mi statem wok blong paenia long wan teritori biaen long stesen blong tren blong Nagoya, jes klosap long ples we mi mitim Grace fastaem. Sam manis i pas, nao mi kasem wan oda blong wok olsem spesel paenia long taon blong Bepu, we i stap long aelan ya Kyusu, long wes blong Japan. Tsutomu Miura i joen wetem mi long wok ya.a Long taem ya, i no gat wan kongregesen blong ol Witnes blong Jeova yet long ful aelan ya. !Naoia i gat plante handred kongregesen long Kyusu, we oli seraot long 22 seket!

Sam Samting We Oli Soem Wanem Bambae i Hapen Long Niufala Wol

Taem brata Knorr i visitim Japan bakegen long Epril 1956, hem i askem mi blong ridim long bigfala voes, sam haf blong wan Wajtaoa long Engglis. Hem i no talem from wanem hem i wantem mi blong mekem olsem, be sam manis biaen, mi kasem wan leta we i singaot mi blong joen long namba 29 klas blong misinari skul blong Gilead. Taswe, long manis Novemba blong semfala yia ya, mi mekem trep i go long Yunaeted Stet. Mi bin drim longtaem blong mekem trep ya. Mi laef mo mi wok wetem bigfala famle blong Betel long Bruklin, mo samting ya i mekem se mi rili bilif long ogenaesesen blong Jeova long wol.

Long Febuwari 1957, Brata Knorr i karem mi mo tu narafala studen blong klas blong mi, i go long ples blong Gilead Skul, long Saot Lansing, long not blong Niu Yok. Long ol faef manis we oli kam biaen, mi kasem tijing blong Tok blong Jeova mo mi laef long wan naesfala ples wetem ol narafala studen, mi luksave wanem kaen laef bambae yumi gat long Paradaes long wol. I gat 103 studen long klas blong mi, mo Sosaeti i sanem mi wetem naen narafala studen, blong go long Japan.

Mi Haremgud Long Wok Blong Mi

I gat raonabaot 860 Witnes long Japan taem mi kambak long Oktoba 1957. Mi kasem wok blong seket elda blong visitim ol kongregesen, be fastaem, mi folem Adrian Thompson long Nagoya blong smoltaem, blong hem i trenem mi long wok ya. Eria blong seket we mi wok long hem, i stat long Simisu, klosap long Hil ya Fuji, i go kasem Sikoku Aelan, mo long ples ya i gat sam bigfala taon olsem Kyoto, Osaka, Kobe mo Hirosima.

Long 1961, Sosaeti i askem mi blong mekem wok blong distrik elda. Samting ya i minim se mi mas wokbaot i go long aelan ya Hokaido long not, wan ples we i gat plante sno, go kasem aelan ya Okinawa long saot, mo daon moa tu, long ol aelan blong Isigaki we oli klosap long Taewan. Hemia i kavremap wan eria blong raonabaot 3,000 kilometa.

Ale, long 1963, Sosaeti i invaetem mi blong go long Betel blong Bruklin, blong folem wan kos blong Gilead Skul. Long kos ya, Brata Knorr i soemaot se i impoten blong tinghae long wok we yumi kasem. Hem i talem se wok blong klinim ples blong swim i impoten tumas, i sem mak long wok blong ofis. Hem i talem se, sipos ol ples blong swim oli no klin, bambae ful famle blong Betel i harem nogud, mo bambae wok blong evriwan i nogud tu. Biaen, wan haf blong wok we mi mas mekem long Betel long Japan, hemia wok blong klinim toelet, mo mi rimemba advaes ya.

Taem mi kambak long Japan, mi kasem bakegen wok blong seket elda. Sam yia biaen, long 1966, mi mared wetem Junko Iwasaki, wan spesel paenia we i prij long taon blong Matsue. Lloyd Barry, brata we i lukaot long branj ofis blong Japan, i mekem gudfala tok blong mared. Junko i joen wetem mi long wok blong visitim ol kongregesen.

Wok blong mifala i jenis long 1968, taem Sosaeti i singaot mi long branj ofis long Tokyo blong mekem wok blong translesen. Be i no gat inaf rum long Betel, taswe mifala i stap long Sumida Wad, we i afsaed lelebet long Tokyo. Long dei, mi kam wok long Betel, mo Junko i mekem wok blong spesel paenia long kongregesen blong ples ya. Long taem ya, mifala i nidim wan Betel we i bigwan moa. Taswe long 1970, Sosaeti i pem wan graon long Numazu, klosap long Hil ya Fuji. Long ples ya, mifala i bildim wan faktri we i gat tri stori, mo wan stori haos we i ples blong slip blong olgeta we oli wok long Betel. Bifo we wok blong bildim ol haos ya i stat, mifala i yusum ol haos we oli stap finis long ples ya blong mekem Kingdom Ministri Skul, we i givim wan trening long ol elda blong kongregesen. Mi gat jans blong stap wan tija long skul ya, mo Junko i mekem rere ol kakae blong ol studen. Mi glad tumas blong luk plante handred Kristin brata we oli kasem spesel trening blong minista wok.

Wan aftenun, mi kasem wan telegram we i impoten tumas. Mama blong mi i stap long hospital mo ol dokta oli talem se bambae hem i ded. Mi tekem wan tren we i spid blong go long Nagoya, mo mi resis i go long hospital. Hem i slip dip, be mi stap fulnaet klosap long hem. Mama i ded long eli moning. Taem mi stap gobak long Numazu, mi krae from we mi tingbaot ol hadtaem we hem i fesem long laef blong hem, mo olsem wanem we hem i bin laekem mi tumas. Sipos Jeova i wantem, bambae mi luk hem bakegen long taem we ol dedman oli laef bakegen long ded.

I no longtaem biaen, famle blong Betel i kam bigwan tumas blong stap long Numazu. Taswe mifala i pem wan pis graon blong 7 hekta long Ebina Siti, mo long 1978 mifala i stat blong bildim wan niufala Betel. Naoia, long pis graon ya i gat wan faktri mo haos blong slip blong olgeta we oli wok long Betel, i gat wan Haos Asembli tu we moa long 2,800 man i save sidaon insaed. Long stat blong yia ya, mifala i finisim blong bildim tu haos blong slip we oli gat 13 stori, mo wan narafala haos blong 5 stori, we i blong putum ol trak. Famle blong Betel i gat raonabaot 530 memba naoia, be ol niufala haos we mifala i wokem, oli save karem raonabaot 900 man.

Mi Gat Plante Risen Blong Stap Glad

Mi glad tumas blong luk se profet tok blong Baebol i kamtru, yes, ‘wan smol wan i kam wan bigfala nesen.’ (Aesea 60:22) Mi rimemba wan long ol stret brata blong mi we, long 1951, i askem long mi se: “?I gat hamas Witnes long Japan?”

Mi ansa se: “Raonabaot 260.”

Hem i ansa blong daonem mi lelebet, se: “?Hemia nomo?”

Mi rimemba tingting blong mi long taem ya se: ‘Taem nomo bambae i talem hamas man we Jeova bambae i pulum oli kam wosipim hem long kantri ya blong ol Sinto-Budis.’ !Mo Jeova i givim ansa! !Tede, i no moa gat wan ples long Japan we ol pablisa oli no prij long hem, mo namba blong ol trufala man blong wosip i kam antap bitim 222,000 we oli joen long 3,800 kongregesen!

Mi glad tumas long ol 44 yia ya blong laef blong mi long fultaem wok​—⁠mi spenem 32 blong ol yia ya wetem waef blong mi we mi laekem tumas. Mi wok long Translesen Dipatmen long Betel blong 25 yia. Mo tu, long Septemba 1979, Sosaeti i invaetem mi blong kam wan memba blong branj komiti blong ol Witnes blong Jeova long Japan.

Mi glad tumas long jans mo blesing ya we mi gat blong halpem ol man we oli gat stret tingting mo we oli laekem pis, blong oli kam joen long wosip blong Jeova. Plante oli mekem stret olsem mi mekem, oli stop blong wosipim hedgavman, mo oli stat blong wosipim trufala God, Jeova. Mi rili wantem halpem plante moa man blong oli kam long saed blong Jeova we i stap win, mo blong oli kasem laef we i no save finis long wan niufala wol we i gat pis.​—Revelesen 22:⁠17.

[Futnot]

[Tok Blong Pija Long Pej 29]

Bighaf blong tijing long skul oli stanap long wosip blong hedgavman

[Credit Line]

The Mainichi Newspapers

[Tok Blong Pija Long Pej 29]

Long Niu Yok wetem Brata Franz

[Tok Blong Pija Long Pej 29]

Wetem waef blong mi, Junko

[Tok Blong Pija Long Pej 31]

Taem mi wok long Translesen Dipatmen