Joengud Long Wan Fasin Blong Laef We i Nambawan
Sipos namba blong ol man i gohed blong kam antap, bambae i no longtaem i gat sikis bilyan man long wol. Nating se olgeta laen oli kamaot long wan man nomo, bighaf blong ol man oli no luksave se oli memba blong wan intenasnal famle mo oli gat kaon blong pembak long Man ya we i Wokem Yumi, we i waes mo i kaengud long yumi. Fasin seraot we i stap kamaot bitwin ol defren nesen, laen, mo kastom, oli pruvum se wol i no gat tingting olsem.
TAEM yumi luk ol samting we oli stap hapen long wol naoia, ating yumi harem olsem se neva bambae ful wol ya i save joengud. The Columbia History of the World i talem se: “Long ol impoten kwestin blong faenem olsem wanem yumi save joengud tugeta, ol man blong naoia oli no gat wan niufala tingting nating blong givim.”
Be, blong mekem ful wol ya i joengud, i no nid blong faenem wan niufala tingting. Rod blong kasem fasin joengud i stap finis long Baebol. Hem i stanap long wosip long Man we i wokem wol ya mo olgeta laef samting. Trufala fasin joengud long wan tingting, mak long laef, mo fasin blong laef, i stap finis long medel blong ol man blong God. Namba blong olgeta i bitim faef milyan haf long 233 kantri. Olgeta evriwan oli gat sem tingting ya se, fasin blong laef we God i glad long hem, hemia nao beswan rod blong laef. Olsem wan man we i raetem Sam, oli prea se: ‘O Jeova, tijim mi long rod blong yu. Bambae mi wokbaot long trutok blong yu. Yu mekem se mi wantem tumas long hat blong mi blong ona long nem blong yu.’—Ol Sam 86:11.
Long taem bifo, profet Aesea i bin talemaot olsem wanem klin wosip i mekem ol man blong God oli joen tugeta. Hem i raetem se: “Olgeta. I gat taem i stap kam we hil ya we haos blong mi i stap long hem, bambae i kam hae moa, i winim ol narafala hil. Mo ol man blong ol narafala kantri bambae oli save wokbaot blong kam long hem. Olgeta ya bambae oli kam, oli talem se, ‘Hae God i God blong Jekob. Yufala i kam. Yumi go antap long hil ya blong hem. Yumi go mekem wosip long haos blong hem. Hem bambae i tijim yumi long ol fasin we hem i wantem blong yumi folem, nao bambae yumi save folem ol rod we hem i jusumaot.’ ”—Aesea 2:2, 3.
Fasin joengud we ol Witnes blong Jeova oli gat i defren long ol narafala. Long fulwol, bitim 87,000 kongregesen oli stap kasem semfala kakae long saed blong spirit long ol miting blong olgeta evri wik. (Matiu 24:45-47) Be long medel blong yia 1998 i go kasem stat blong yia 1999, ol Witnes oli soemaot fasin joengud long wan rod we i defren—taem oli joen tugeta long olgeta ples blong wol, long tri dei Distrik Asembli ya “Fasin Blong Laef We God i Glad Long Hem.” Long 13 kantri, i gat plante grup blong ol defren kantri oli kam. Ol asembli ya oli intenasnal asembli. Ol narafala asembli oli distrik asembli. Be olgeta asembli ya oli kasem semfala nambawan tijing.
!I gud blong luk olkaen man we oli glad, mo oli putum klos we i stret, taem oli hivap wanples long ol bigbigfala haos no ol stad, blong Jeova i save tijim olgeta! Plante blong olgeta oli gat sem tingting olsem brata ya we i joen long intenasnal asembli long Mijigan, long Yunaeted Stet, hem i se: “!Mi glad tumas blong luk ol brata blong mi we oli kam blong ol defren ples long wol! !Ol brata blong Ripablik blong Jek, Barbados, Naejeria, Hangari, Engglan, Holan, Itiopia, Kenya, mo plante narafala kantri bakegen, oli putum han blong olgeta i goraon long ol narafala brata! I naes tumas blong luk ol brata oli stap joengud wanples, mo blong luk se glad i mekem wota blong ae blong olgeta i ron, from we oli gat lav long medel blong olgeta mo long hae God blong olgeta, Jeova.” Nekis haf bambae i tokbaot program blong asembli ya, we i mekem plante milyan man long ful wol oli haremgud.
[Foto Credit Line Blong Pija Long Pej 3]
Mountain High Maps® Copyright © 1997 Digital Wisdom, Inc.