?Olsem Wanem Yu Save Soem Trufala Tingting Daon?
TRUFALA tingting daon i impoten tumas long fes blong God. Jemes i raetem se: “God i agensem olgeta we oli praod, be long olgeta we tingting blong olgeta i stap daon, hem i stap givhan long olgeta long gladhat blong hem.” (Jemes 4:6) Long ples ya, maet Jemes i stap tingbaot sam poen we i kamaot long Hibru haf blong Baebol. “Nating we yu yu hae olsem, oltaem yu stap lukaot gud long ol man we tingting blong olgeta i stap daon. Be ol praod man oli no save haed long fes blong yu.” “Fasin blong praod man bambae i finis, mo ol man we oli stap flas, Hae God bambae i daonem olgeta, mo bambae olgeta man oli stap leftemap nem blong hem nomo.” “[God] i no save tinghae long ol man we tingting blong olgeta i go antap, be hem i kaengud long olgeta we tingting blong olgeta i stap daon.”—Ol Sam 138:6; Aesea 2:11; Proveb 3:34.
Aposol Pita tu i pulum ol man blong gat tingting daon. Hem i raetem se: “Yufala i mas mekem tingting blong yufala i stap daon. Nao long fasin ya, yufala i save givhan gud long yufala. Baebol i talem se, ‘God i agensem olgeta we oli praod, be long olgeta we tingting blong olgeta i stap daon, hem i stap givhan long olgeta long gladhat blong hem.”—1 Pita 5:5.
Eksampel Blong Kraes Long Saed Blong Tingting Daon
Maet yu yu askem se, ?Mi save kasem wanem nambawan samting no blesing from tingting daon? Ansa blong kwestin ya i impoten tumas long man we i stap traehad blong folem trufala Kristin fasin. Man we tingting blong hem i stap daon, hem i folem fasin blong Kraes. Jisas i soem tingting daon taem hem i akseptem spesel wok we hem i kasem. Hem i mas aot long heven, mo kamdaon long wol ya blong laef olsem wan man we i daon moa long olgeta enjel. (Hibrus 2:7) Nating se hem i Pikinini blong God, ol enemi blong hem, we oli ol man blong skul, oli mekem plante samting long hem blong daonem hem. Jisas i naf blong singaot long Papa blong hem, blong i sanem bigfala kampani blong ol enjel, oli kam givhan long hem. Be hem i no mekem olsem. Hem i mekem tingting blong hem i longfala taem hem i fesem hadtaem ya.—Matiu 26:53.
Biaen, ol man oli mekem bigfala sem long Jisas, oli hangem hem long pos. Nating se i olsem, hem i holemstrong long Papa blong hem. From samting ya, Pol i tokbaot hem, i se: “Tingting blong yufala i mas kam stret wetem tingting blong Jisas Kraes. Fastaem, bifo olgeta, hem i olsem God nomo, be hem i no ting se hem i mas holemtaet fasin ya we hem i sem mak wetem God. Hem nomo i lego olgeta fasin ya, nao i kam olsem man blong wok nomo. Hem i bon long wol ya, i kam man. Hem i karem fasin blong man, mo i mekem tingting blong hem i stap daon blong i obei long God gogo i ded. Mo hem i ded long fasin we ol man oli nilim hem long [pos].”—Filipae 2:5-8.
?Nao olsem wanem yumi save soem trufala tingting daon? Taem wan samting i hapen we i stret blong yumi soem tingting daon, ?olsem wanem yumi save soem fasin ya be i no fasin flas?
Fasin Blong Man We i Gat Tingting Daon
I gud yumi tokbaot olsem wanem blong holem tingting daon taem yumi stap wok wetem narafala, maet long ples blong wok blong yumi no long ol Kristin wok. Blong wan wok i gohedgud, i nidim ol man blong lukaot long wok, ol maneja, mo ol bos. I mas gat wan man blong mekem ol disisen. ?Bambae yu mekem wanem? ?Yu gat tingting ya se, “Man ya i no gat raet blong talem long mi wanem wok mi mas mekem? Hem i jes stat wok nomo. Mi mi mekem wok ya plante yia finis.” Yes, sipos yu yu praod, bambae yu harem nogud taem narafala i bos long yu. Be man we i gat tingting daon, hem i traehad blong no ‘mekem wan samting blong leftemap hem nomo. Hem i mekem tingting blong hem i stap daon, mo hem i luk ol narafala man olsem we oli gud moa long hem.’—Filipae 2:3.
?Yu yu mekem wanem taem wan we i moa yang long yu, no wan woman, i givim advaes long yu? Sipos yu gat tingting daon, bambae yu tingting gud long advaes ya. Sipos yu yu flas, bambae yu kros mo yu sakemaot advaes ya. ?Bambae yu yu lesin long wanem tok? ?Ol swit tok we oli presem yu nomo, nao biaen oli mekem yu yu kasem bigfala trabol, no ol gudfala advaes we oli save givhan long yu?—Proveb 27:9; 29:5.
?Yu yu naf blong stanap strong taem narafala man i agensem yu? Tingting daon bambae i givhan long yu blong stanap strong olsem Job, mo winim ol hadtaem. Sipos yu yu flas, bambae yu letem tingting blong yu i foldaon olgeta mo maet yu rebel taem narafala i mekem yu yu harem nogud.—Job 1:22; 2:10; 27:2-5.
Man We i Gat Tingting Daon, Hem i Gat Lav Mo i Fogivim Narafala
Sam man, oli faenem se i hadwok blong talem se, “O sore. Mi mi rong. Samting we yu mekem, hem i stret.” ?From wanem oli faenem se i hadwok blong talem tok olsem? !Hemia from we oli flas tumas! Be plante taem, fasin ya nomo blong talem sore i blokem wan rao bitwin long hasban mo waef.
Taem wan man i mekem yu yu kros, ?yu rere blong fogivim hem? ?No, wetem fasin flas, yu kros long hem longtaem, maet yu no wantem toktok long hem blong plante dei no manis? ?Yu yu stap traem blong givimbak long hem blong mekem se trabol blong yutufala i kitkit? Plante man oli ded from fasin ya blong givimbak. Sam narafala, oli kros long wan man, nao oli spolem gudnem blong hem gogo, ol man oli no moa trastem hem. Defren olgeta, man we i gat tingting daon, hem i gat lav mo i fogivim narafala. ?From wanem? From we man we i gat lav, hem i no save kros longtaem. Jeova i rere blong fogivim ol man Isrel sipos oli lego fasin flas. !Wan man blong Jisas we i gat tingting daon, hem i rere blong fogivim narafala, nating se hem i mas mekem olsem plante taem bakegen!—Joel 2:12-14; Matiu 18:21, 22; 1 Korin 13:5.
Man we i gat tingting daon, ‘oltaem hem i ona long narafala man.’ (Rom 12:10) Long New International Version, yumi ridim se: “Yu mas ona moa long narafala man, bitim we yu ona long yu wan.” ?Yu yu stap presem ol narafala mo talem tangkiu long olgeta from waes mo save we oli gat blong mekem sam kaen wok? ?No oltaem, yu yu stap traem blong faenem poen long olgeta blong spolem gudnem blong olgeta? ?Yu yu gat fasin ya blong presem ol narafala man? Sipos i hadwok long yu blong mekem olsem, maet problem blong yu, hemia se yu no trastem narafala mo yu gat fasin flas.
Man we i flas, hem i no gat longfala tingting. Man we tingting blong hem i stap daon, hem i gat longfala tingting. ?Olsem wanem long yu? Taem narafala i mekem i no stret long yu, ?yu yu harem nogud kwiktaem? Fasin olsem i defren olgeta long fasin ya blong gat longfala tingting. Sipos yu gat tingting daon, bambae yu no tinghae tumas long yu wan. Tingbaot wanem we i hapen long ol disaepol blong Jisas. From we oli tinghae tumas long olgeta, oli rao from tingting ya se hu long olgeta i moa impoten long ol narawan. !Oli fogetem se olgeta evriwan ‘oli ol man blong wok nomo blong God’!—Luk 17:10; 22:24; Mak 10:35-37, 41.
Franis man ya, Voltaire, we i man blong raetem ol buk, i talem se tingting daon, hem i “gudfala fasin blong man, . . . hem i wan meresin blong winim fasin flas.” Yes, tingting daon i minim se man i no leftemap hem wan. Man we i gat tingting daon, tingting blong hem i stret, hem i no praod. Hem i gat bigfala respek long ol narafala mo i gat gudfala fasin.
?Taswe, from wanem yumi mas traehad blong holem tingting daon? From we God i agri long tingting daon, mo fasin ya i givhan long yumi blong kasem help long God. !From we profet Daniel i gat tingting daon, Jeova i ‘lavem hem tumas,’ nao i sanem wan enjel i kam long hem, i mekem se hem i luk wan vison! (Daniel 9:23; 10:11, 19) Tingting daon i karem plante blesing. Hem i mekem se yu gat ol trufala fren we yu lavem olgeta. Antap long hemia, Jeova i blesem man we i gat tingting daon. “Man we i obei long Hae God, mo i mekem tingting blong hem i stap daon, hem bambae i kam rijman. Bambae hem i gat longfala laef, mo ol man bambae oli ona long hem.”—Proveb 22:4.
[Tok Blong Pija Long Pej 7]
Fasin blong talem sore wetem tingting daon i blokem plante rao