Ripot Long Wok Blong Kingdom

Oli Prij Long Gudfala Taem Mo Long Had Taem Tu

TAEM faet i kasem kantri ya Bosnia mo Hersegovina, plante taosen man oli fesem hadtaem bitim mak. Long taem ya, ol Witnes blong Jeova oli traehad fulwan blong leftemap tingting mo givim hop long ol man. Tok we i kam biaen, i haf blong wan leta we wan Witnes, we i bin prij long Sarayevo, i raetem.

“Laef i had long ples ya, be ol man oli rere blong lesin long trutok blong Baebol. Ol Witnes blong ples ya oli givim wan gudfala eksampel long fasin blong stanap strong oltaem. Oli no gat plante samting long saed blong bodi, be oli gat wan nambawan tingting blong gohed. Long kongregesen ya,a klosap olgeta yangfala oli joen long fultaem Kristin minista wok. Fasin ya blong wok strong i leftemap tingting blong ol niufala pablisa. Taswe, mifala i no sapraes se long faswan manis we ol niufala pablisa ya oli statem wok blong prij, oli spenem 60 aoa no moa long wok ya.

“Mifala i prij long ol haos wanwan, be mifala i traem ol defdefren rod tu blong storeyan wetem ol man. Wan eksampel, mifala i kasem gudfala risal taem mifala i seremaot ol buk long saed blong Baebol, long ol man we oli go long ol beregraon long taon ya.

“Mo tu, mifala i prij long ol hospital. Dokta we i bos long Dipatmen blong ol Sik Blong Hat, long hospital blong Sarayevo, i tekem Wekap! blong Desemba 8, 1996 (Engglis no Franis), we stamba tok blong hem: ‘Hat Atak​—?Yumi Save Mekem Wanem?’ Hem i askem sipos hem i save gat sam moa kopi blong magasin ya, blong givim long ol narafala dokta. Mo tu, hem i letem ol Witnes oli visitim ol sikman long dipatmen blong hem long hospital. Taswe, long bitim wan aoa, mifala i seremaot moa long 100 magasin long ol bed wanwan. Plante sikman oli talem se hemia faswan taem we sam man oli kam visitim olgeta long hospital blong leftemap tingting mo givim hop long olgeta.

“Long wan narafala taem, mifala i tekem sam magasin we i stret long ol pikinini, nao mifala i go prij long Dipatmen we i lukaot ol Sik blong Pikinini. Dokta we i lukaot long dipatmen ya tu hem i tekem sam kopi blong buk ya My Book of Bible Stories blong putum long ples blong buk we man i save go ridim. Mekem se naoia, ol mama we oli kam visitim pikinini blong olgeta long hospital, oli ridim stori blong Baebol evri dei long ol pikinini. Mifala i mekem plan tu blong visitim dokta blong dipatmen ya long haos blong hem.

“Long Sarayevo, i gat plante taosen soldia blong ‘NATO [North Atlantic Treaty Organization]’ we oli blong narafala kantri. Mifala i gohed blong givim witnes long olgeta tu. Mifala i yusum buklet ya Good News for All Nations wetem Wajtaoa mo Wekap! long ol defren lanwis, nao mifala i prij long ol man we oli stap long ol bigbigfala trak blong faet. Mifala i seremaot bitim 200 magasin long kamp blong ami blong Itali. Mifala i sapraes we plante long ol soldia ya blong Itali oli talem se oli neva storeyan wetem ol Witnes blong Jeova bifo. Be mifala i gat jans blong storeyan wetem olgeta long Sarayevo.

“Wan dei, wan bigfala trak blong faet i stop long saed blong rod. Mi kilkilim trak ya wetem ambrela blong mi, ale, wan soldia i kamaot. Mi soem wan Wajtaoa long hem we stamba tok blong hem se ‘Ol Trufala Man Blong Talemaot Pis​—?Hu Ya Olgeta Ya?’ Soldia ya i lukluk mi mo i askem se, ‘?Yu yu wan Witnes blong Jeova?’ Taem mi talem long hem se yes, hem i talem se ‘I no tru; ?Yufala i stap long ples ya tu? ?Be i gat wan ples wol we i no gat ol Witnes long hem?’ ”

Aposol Pol i talem se: “Nating we ol man oli wantem harem tok ya no oli no wantem harem, be oltaem yu yu mas strong blong talemaot.” (2 Timoti 4:2) Ol Witnes blong Jeova long Sarayevo oli stap mekem samting ya, olsem ol brata mo sista blong olgeta long fulwol, !nating se oli mas go long wanwan bed mo bigfala trak blong faet tu!

[Futnot]