“Man We i Ridim Tok Ya i Mas Traem Luksave”

“Taem bambae yufala i luk rabis samting ya we i spolem evri samting . . . i stap stanap long wan tabu ples, . . . olgeta we oli stap long Judia oli mas stat blong ronwe, oli mas go long ol hil.”​—MATIU 24:15, 16, NW.

1. ?Woning we Jisas i givim long Luk 19:43, 44 i karem wanem frut bifo?

TAEM yu harem we wan bigfala trabol i stap kam klosap, maet yu save mekem we trabol ya i no kasem yu. (Ol Proveb 22:3) So traem tingbaot laef blong ol Kristin long Jerusalem jes afta we ol man Rom oli kam faet long 66 K.T. mo oli gobak finis. Jisas i givim woning ya se bambae ol ami ol stanap raon long Jerusalem mo oli spolem taon ya. (Luk 19:43, 44) Bighaf blong ol man Jyu oli no no kea long tok ya. Be ol disaepol oli tingbaot woning ya blong hem. Taswe God i sevem olgeta tru long bigfala trabol long yia 70 K.T.

2, 3. ?From wanem i stret we yumi intres long profet tok blong Matiu 24:15-​21?

² Jisas i mekem wan profet tok we i tajem laef blong yumi tede, nao hem i talemaot wan saen we i mas kamtru, we i gat plante haf long hem. Ol haf ya, hemia ol wo, kakae we i sot, ol etkwek, mo ol man oli ronem ol Kristin we oli stap talemaot gud nius blong Kingdom blong God. (Matiu 24:​4-​14; Luk 21:10-​19) Mo tu, Jisas i givim wan pruf blong soemaot long ol disaepol we en i stap kam klosap. Pruf ya, se wan ‘rabis samting we i blong spolem evri samting, i stap stanap long wan tabu ples.’ (Matiu 24:​15, NW) I gud yumi skelem ol tok blong hem bakegen, blong faenem olsem wanem samting ya i save jenisim laef blong yumi naoia, mo long fiuja tu.

³ Taem Jisas i talemaot saen ya finis, hem i talem se: “Taem bambae yufala i luk rabis samting ya we i spolem evri samting, we profet Daniel i tokbaot bifo, mo samting ya i stap stanap long wan tabu ples, (man we i ridim tok ya i mas traem luksave) long taem ya nao, olgeta we oli stap long Judia oli mas stat blong ronwe, oli mas go long ol hil. Man we i stap antap long haos blong hem i no mas kamdaon blong go karemaot ol samting long haos blong hem. Mo man we i stap long garen, i no mas gobak long haos blong pikimap klos blong hem. !Sore tumas long ol woman we oli gat bel mo olgeta we pikinini i stap titi long hem yet long ol dei ya! Yufala i mas prea blong yufala i no ronwe long koltaem, no long sabat dei. From we long taem ya bambae i gat wan bigfala trabol, we i no gat olsem bifo, i stat long taem we wol i stat, i kam kasem taem ya.”​—Matiu 24:15-​21, NW.

4. ?Wanem i soemaot we tok blong Matiu 24:15 i kamtru long faswan handred yia fastaem?

⁴ Ol stori blong Mak mo Luk oli talemaot sam moa samting. Taem Matiu i talem tok ya “i stap stanap long wan tabu ples,” Mak 13:14 i talem se “i stap stanap long wan ples we oli no gat raet blong putum long hem.” Luk 21:20 i talem wan narafala tok blong Jisas, se: “Be taem we yufala i luk ol soldia oli stap kam plante raonabaot long taon ya Jerusalem, blong oli blokem ol man oli stap insaed, yufala i mas save we bambae i no longtaem oli save spolemgud ples ya.” Samting ya i halpem yumi blong save se profet tok ya i kamtru long yia 66 K.T. fastaem, taem ol man Rom oli kam faet long Jerusalem mo long haos blong God long ples ya. Long tingting blong ol man Jyu, Tempel ya i wan tabu ples, be long tingting blong Jeova, hem i no moa tabu. Gogo ol man Rom oli spolemgud taon ya wetem Tempel tu, long yia 70 K.T. ?Wanem i “rabis samting ya” long taem ya bifo? ?Mo olsem wanem samting ya ‘i stanap long wan tabu ples’? Ol ansa long ol kwestin ya bambae oli halpem yumi blong mekem i klia se profet tok ya i kamtru bakegen long taem blong yumi olsem wanem.

5, 6. (a) ?Blong wanem ol man we oli ridim Daniel japta 9 oli nidim fasin luksave? (b) ?Olsem wanem profet tok blong Jisas long “rabis samting” i kamtru?

⁵ Jisas i pulum ol man we oli stap rid blong gat fasin luksave. ?Ol man ya oli stap ridim wanem? Ating Daniel japta 9. Long japta ya, profet tok i putum wan taem blong Mesaea bambae i kamtru, mo i talem se ol man oli “kilim hem i ded” tri yia haf afta. Profet tok i talem se: “Mo bambae i gat hemia we i spolem evri samting, we i stap kam long wing blong ol rabis samting. Mo, gogo kasem we evri samting i lus olgeta, samting ya we God i wantem bambae i kafsaed i kamdaon long hemia tu we oli spolem finis.”​—Daniel 9:​26, 27, NW; lukluk tu Daniel 11:31; 12:​11, NW.

⁶ Ol man Jyu oli ting se tok ya i stret long taem we King Antiokas 4 i spolem fasin tabu blong haos blong God. samwe long 200 yia bifo. Be Jisas i no agri, hem i pulum ol man blong gat fasin luksave, from we “samting we i rabis tumas” i no kamtru yet. Bambae hem i kamtru mo i stanap “long wan tabu ples.” I klia nomo we Jisas i stap tingbaot ol ami blong Rom we bambae oli kam long yia 66 K.T. mo evri grup blong ami i gat ol spesel samting olsem flag no pija we oli stap karem. Ol kaen flag ya we oli yusum longtaem finis, oli prapa aedol blong olgeta, we oli rabis olgeta long lukluk blong ol man Jyu.a ?Wetaem nao ol ami ya oli ‘stanap long wan tabu ples’? Samting ya i hapen taem ol ami blong Rom wetem ol pija blong olgeta, oli kam faet agens long Jerusalem mo haos ya blong God we ol man Jyu oli talem se hem i tabu. Ol man Rom oli girap, oli stat digim hol long botom blong bigfala wol aninit long yad blong tempel. Bifo, longtaem finis ol man Jyu oli tingbaot samting ya, se hem i rabis olgeta. !Be naoia hem i stap long wan tabu ples!​—Aesea 52:1; Matiu 4:5; 27:53; Ol Wok 6:​13.

“Samting We i Rabis Tumas” Naoia

7. ?Wanem profet tok blong Jisas i stap kamtru long taem blong yumi?

⁷ I stat long Fas Wolwo, yumi luk we saen blong Jisas long Matiu 24 i stap kamtru fulwan. Be yu mas tingbaot tok ya blong hem, se: “Taem bambae yufala i luk rabis samting ya we i spolem evri samting . . . i stap stanap long wan tabu ples, . . . olgeta we oli stap long Judia oli mas stat blong ronwe, oli mas go long ol hil.” (Matiu 24:15, 16, NW) Haf ya tu blong profet tok blong Jisas i mas kamtru long taem blong yumi.

8. ?I stat longtaem finis, ol Witnes blong Jeova oli ting se hu ya “rabis samting” long taem blong yumi?

⁸ Ol man blong Jeova oli trastem profet tok ya, se bambae hem i kamtru. Taswe Wajtaoa blong Janewari 1, 1921, we i tokbaot ol trabol long Medel-Is, i mekem stadi long profet tok ya. Nao Wajtaoa blong Desemba 15, 1929, pej 374, i talem klia se: “Ogenaesesen ya, Ligofnesen, hem i blong mekem ol man oli tanem baksaed long God mo long Kraes. Taswe hem i wan samting blong spolemgud evri samting, we Setan i stampa blong hem. Mo long lukluk blong God, hem i rabis nomo.” So long 1919 “rabis samting ya” i kamtru. Taem Ligofnesen i lus finis, Yunaeted Nesen i girap long ples blong hem. Ol Wetnes blong Jeova oli soemaot finis we tufala ogenaesesen ya blong traem putum pis long wol, ol man nomo oli stamba blong tufala, mo tufala i rabis long lukluk blong God.

9, 10. Bifo, yumi gat defren tingting long saed blong bigfala trabol. ?From samting ya, long taem bifo ya, yumi ting se wetaem nao “rabis samting” i stanap long wan tabu ples?

⁹ Stadi we i stap bifo, i soemaot klia wanem i stap insaed long Matiu 24 mo 25. ?Olsem wanem? ?I gat sam poen long saed blong ‘rabis samting ya we i stanap long wan tabu ples,’ we oli save kam moa klia long tingting blong yumi naoia? Yes, i luk olsem. Jisas i laenemap samting we “i stanap long wan tabu ples” wetem “bigfala trabol” we bambae i stat kamaot. I tru we “rabis samting ya” i stap plante yia finis, be taem ya we hem i “stanap long wan tabu ples” i joen wetem taem blong bigfala trabol, mo samting ya i save jenisim tingting blong yumi naoia. ?Olsem wanem?

¹⁰ Bifo, ol man blong God oli ting se faswan haf blong bigfala trabol i stat finis long yia 1914, mo laswan haf blong hem bambae i kamaot long faet blong Amageden. (Revelesen 16:14, 16; skelem wetem Wajtaoa long Engglis blong Epril 1, 1939, pej 110.) Taswe yumi save from wanem bifo oli ting se “rabis samting ya” i go stanap long wan tabu ples jes afta we Fas Wolwo i finis.

11, 12. ?Long 1969, tingting blong yumi long bigfala trabol i jenis olsem wanem?

¹¹ Be long ol yia biaen, yumi kasem narafala tingting. Long Tasde Julae 10, 1969, long Intenasnal Asembli “Pis long Wol” long Nyu Yok, F. W. Franz, we i vaes-presiden blong Watch Tower Bible and Tract Society, i givim wan tok we i mekem ol man oli sek. Fastaem brata Franz i talemaot tingting blong olgeta bifo, long saed blong profet tok blong Jisas. Hem i talem se: “Bifo yumi ting olsem se, ‘bigfala trabol’ i stat finis long 1914 K.T., be God i no letem hem i kamtru fulwan mo i finis long taem ya, nao hem i blokem Faswan Wolwo long Novemba 1918. Nao i stat long taem ya i kam, God i letem sam taem long ol laswan tabu Kristin we hem i jusumaot, blong oli save mekem wok blong hem. Nao biaen, las haf blong ‘bigfala trabol’ i save gohed bakegen wetem faet ya blong Amageden. Hemia nao tingting blong yumi bifo.”

¹² Nao hem i givim wan niufala tingting long saed ya, i se: “ ‘Bigfala trabol’ blong naoia i no stat long 1914 K.T. Sipos hem i bin stat long 1914, . . . hemia i no joengud wetem wanem i bin hapen long faswan handred yia. Long 1914-1918, wanem i hapen long samting we naoia i olsem Jerusalem bifo, hemia ‘stat’ nomo ‘blong ol trabol we i blong mekem man i harem nogud.’ . . . ‘Bigfala trabol’ we bambae i no moa gat trabol olsem samtaem, hem i no kam yet. From we taem bambae hem i kam, olgeta giaman skul long wol (we ol skul blong Krisendom oli insaed long olgeta) bambae oli lus olgeta. Nao biaen bambae i gat ‘faet blong bigfala dei blong God we i gat olgeta paoa,’ long Amageden.” Tok ya i soemaot we “bigfala trabol” i no stat nating yet. Hem i stil stap long fiuja.

13. ?From wanem i stret blong talem se bambae long fiuja, “rabis samting” i mas “stanap long wan tabu ples”?

¹³ Samting ya i halpemgud yumi blong luksave wetaem “rabis samting ya” i stanap long wan tabu ples. Ol man Rom oli go faet long Jerusalem long 66 K.T., be afta, wantaem nomo oli gobak, nao sam “bodi blong man” oli save gowe, oli sef. (Matiu 24:​22, NW) Sem mak bakegen, yumi wet long bigfala trabol blong bambae hem i stat kwiktaem. Be bambae God i katem taem blong hem, blong givhan long ol man we hem i jusumaot. Yu mas luksave impoten poen ya, se: Long tingting blong yumi bifo, ‘rabis samting ya we i go stanap long wan tabu ples’ i laenap wetem ol man Rom taem oli go faet aninit long kapten blong olgeta, Sestias Galas, long yia 66 K.T. Samting ya i sem mak long bigfala trabol long taem blong yumi. Hem i no kam yet, bambae nomo hem i kam. Taswe “rabis samting ya we i spolem evri samting,” i tru we hem i stap finis stat long 1919, be i klia we hem i no go stanap yet long wan tabu ples.b ?Olsem wanem samting ya bambae i hapen? ?Mo bambae hem i save gat paoa long laef blong yumi olsem wanem?

Bambae Wan Faet i Kamaot

14, 15. ?Olsem wanem Revelesen japta 17 i halpem yumi blong save wanem bambae i hapen fastaem long Amageden?

¹⁴ Buk blong Revelesen i soemaot olsem wanem ol nesen bambae oli faetem ol giaman skul blong spolemgud olgeta. Japta 17 i soemaot jajmen blog God agens long “Bigfala taon ya Babilon, we i mama blong olgeta woman blong rod.”​—hemia rul blong olgeta giaman skul long wol. Ol jos blong krisendom oli gat haeples long medel blong olgeta, mo oli talem se oli gat spesel kontrak wetem God blong fren wetem hem. (Lukluk Jeremaea 7:4.) Ol giaman skul wetem Krisendom tu, longtaem finis oli mekem fren wetem “ol king blong wol,” be bambae ol skul ya oli lus olgeta. (Revelesen 17:​2, 5) ?Hu bambae i mekem samting ya?

¹⁵ Revelesen i soemaot wan wael “anamol we i red we i red” we fastaem hem i stap, nao i no moa stap, mo biaen i kambak i stap bakegen. (Revelesen 17:​3, 8) Ol gavman blong wol oli stamba blong anamol ya. Ol tok blong ol profet oli soemaot we anamol ya i wan pija blong wan ogenaesesen we i blong putum pis long wol, we ol man oli stanemap long 1919. Fastaem nem blong “rabis samting ya” Ligofnesen, mo naoia Yunaeted Nesen. Revelesen 17⁠:​16, 17 i soemaot we God bambae i putum wan strong tingting long hat blong sam bigfala man we oli rul wetem “anamol” ya, hemia blong spolemgud paoa blong ol giaman skul long wol. Long taem ya we bambae oli stat faet olsem, bambae bigfala trabol tu i stat wantaem.

16. ?Tingting blong samfala man long saed blong ol skul, i stap jenis olsem wanem?

¹⁶ From we bigfala trabol i no stat yet, ?olsem wanem nao? ?I stret blong talem se “rabis samting” ya tu i no “stanap” yet “long wan tabu ples”? Yes, samting ya i no kamaot yet, bambae nomo hem i mas kamaot. I klia we ol man oli stanemap “rabis samting ya” smoltaem afta yia 1900, mo naoia hem i stap plante yia finis. Be bambae i no longtaem, hem i go “stanap long wan tabu ples,” olsem we hem i neva mekem bifo. Long taem bifo, ol faswan Kristin oli wet from we oli intres tumas blong save olsem wanem rabis samting ya bambae i kam “stanap long wan tabu ples,” mo ol Kristin blong tede oli mekem sem mak nomo. Yumi save se yumi mas wet gogo olgeta samting oli kamtru finis, nao biaen yumi save kasem save long evri poen. Be yumi luk finis naoia long samfala kantri, we ol man oli no moa laekem ol skul, mo fasin ya i stap gru kwiktaem. Sam man blong politik oli joen finis wetem sam Kristin we oli lego trufala bilif, nao olgeta oli pulum ol man blong agensem olgeta skul, mo blong agensem moa yet ol tru Kristin. (Ol Sam 94:20, 21; 1 Timoti 6:​20, 21) Yumi luk finis ol paoa blong politik naoia we oli stap “faet agens long Smol Sipsip,” mo bambae faet ya i kam strong moa. I tru, oli no save putum han blong olgeta long Jisas​—hemia Smol Sipsip blong God long ful paoa blong hem long heven​—be oli save mekem kros blong olgeta i faerap long ol trufala man blong wosip long God, speseli “ol tabu man” blong hem. (Daniel 7:​25; lukluk wetem Rom 8:​27; Kolosi 1:2; Revelesen 12:17.) God i mekem strong promes se Smol Sipsip mo ol man blong hem, bambae oli win long faet.​—Revelesen 19:11-​21.

17. Yumi no wantem bitim mak long ol tok blong yumi, be ?olsem wanem bambae “rabis samting ya” i stanap long wan tabu ples?

¹⁷ Yumi save finis se ol giaman skul bambae oli lus. Nating we Bigfala Babilon i “fuldrong, from we hem i dring blad blong ol man blong God,” mo hem i mekem evri samting olsem we hem i kwin nomo, be bambae hem i lus olgeta. Hem i gat strong paoa long ol king blong wol blong pulum olgeta long nogud fasin, be bambae oli no moa fren wetem hem. Yes, ‘ol ten hon bambae oli no laekem woman ya nating, oli agensem hem.’ (Revelesen 17:​6, 16; 18:​7, 8) Taem we “anamol we i red we i red” bambae i stat faet long ol skul ya we oli olsem woman blong rod, long semtaem bambae i olsem we “rabis samting ya” i stap long ples blong Krisendom we i tabu, blong spolem hem.c Nao bambae hem i stat blong spolemgud ol giaman Kristin skul we oli no gat bilif, oli ting se oli tabu nomo.

“Ronwe”​—?Olsem Wanem?

18, 19. ?From wanem yumi save se ol man we oli ‘ronwe oli go long ol hil,’ oli no man we oli jes jenisim skul blong olgeta?

¹⁸ Taem Jisas i talemaot finis se bambae ‘rabis samting i stanap long wan tabu ples,’ hem i givim woning long ol man we oli gat fasin luksave, blong oli mekem wan samting. ?Olsem wanem? ?Hemia i min se long taem ya we bambae i klosap nomo long en​—⁠taem “rabis samting” bambae “i stanap long wan tabu ples,”​—⁠bigfala hip blong man bambae oli ronwe long ol giaman skul blong joen long tru wosip? No gat. Traem tingbaot taem profet tok ya i kamtru fastaem. Jisas i talem se: “Taem yufala i luk samting ya, yufala we i stap long Judia, yufala i mas ronwe i go haed long ol hil. Sipos man i stap spel afsaed long haos blong hem, bambae hem i no save go insaed bakegen blong tekem sam samting blong hem. Sipos man i stap long garen blong hem, bambae hem i no save gobak long haos blong tekem klos blong hem. Mo sore tumas long ol woman we oli gat bel, mo long olgeta we oli stap givim titi long pikinini long taem ya, from we bambae oli harem nogud tumas. Yufala i mas prea from trabol ya, blong bambae i no kam kasem yufala long taem blong ren.”​—Mak 13:14-​18.

¹⁹ Jisas i no talem se ol man Jerusalem nomo oli mas gowe, olsem we oli mas aot long tabu taon blong wosip blong ol man Jyu. Mo hem i no talem tu se ol man oli mas jenis kwik, livim giaman skul mo joen long trufala skul. No gat. Ol disaepol blong Jisas oli kam tru Kristin finis. Oli no nidim wan woning blong ronwe long wan skul mo joen long narawan. Mo taem ol man Jyu long Jerusalem mo long Judia oli luk we faet blong yia 66 K.T. i jes finis, oli no agri blong lego skul blong olgeta blong oli kam tru Kristin. Profesa Heinrich Graetz i talem se olgeta we oli ronem ol man Rom, biaen oli kambak long taon ya. Hem i talem se: “Ol man Silot ya, oli singaot bigwan olsem man we i win long faet, taem oli kambak long Jerusalem (long Oktoba 8), mo hat blong olgeta i stap pam strong from oli ting se naoia bambae oli fri mo oli gat independens. . . . Oli ting se God i halpem olgeta bigwan, olsem we hem i halpem ol bubu blong olgeta bifo. Long tingting blong olgeta, oli no fraet nating long fiuja.”

20. ?Ol faswan disaepol oli obei long oda blong Jisas blong ronwe long ol hil, no olsem wanem?

²⁰ Nao smol namba blong olgeta we oli ronwe, we God i jusumaot olgeta, ?oli mekem wanem blong obei long oda blong Jisas? Oli aot long Judia, oli krosem Jodan reva, nao oli go ronwe long ol hil narasaed. Olsem ya nao oli soemaot we oli no haf long wol ya blong ol man Jyu, long politik mo long skul blong olgeta. Ale, oli livim ol garen mo ol haos blong olgeta, mo oli no tekem taem blong pikimap ol samting blong olgeta long haos. Oli trastem paoa blong Jeova blong protektem olgeta mo givhan long olgeta. Taswe oli putum wosip blong Jeova long fas ples, bitim evri narafala impoten samting.​—Mak 10:29, 30; Luk 9:​57-​62.

21. Taem bambae “rabis samting ya” i stat faet, ?wanem samting bambae i no save hapen?

²¹ Naoia traem tingbaot taem we bambae profet tok ya i kamtru fulwan. Long plante plante yia finis. yumi traem blong pulum ol man blong oli kamaot long ol giaman skul, oli joen long tru wosip. (Revelesen 18:​4, 5) Mo plante milian man oli mekem olsem finis. Profet tok blong Jisas i no talem se taem bigfala trabol bambae i stat, ol bigfala hip blong man bambae oli kam joen long klin wosip. I klia we long yia 66 K.T., i no gat ol bigfala hip blong man Jyu we oli kam joen long tru wosip. Be ol Kristin man bambae oli gat gudfala risen blong obei long woning blong Jisas mo ronwe.

22. ?Blong yumi ronwe i go long ol hil, olsem we Jisas i talem, maet bambae yumi mas mekem wanem?

²² Yumi no save kasem save long evri samting yet long saed blong bigfala trabol ya, be wan samting i klia nomo. Yumi no mas ronwe long ples blong yumi blong go stap long wan narafala ples long wol. Ol Witnes blong Jeova oli stap finis long olgeta ples long wol. Be yumi save finis we long taem ya we bambae i taem blong ronwe, yumi mas stap seraot long ol ogenaesesen blong ol giaman skul, blong soemaot we yumi defren long olgeta. Mo tu, Jisas i talem se yumi no mas gobak long haos blong pikimap klos mo ol narafala samting. Samting ya i impoten long yumi. (Matiu 24:17, 18) Maet bambae yumi gat traem long saed blong olgeta samting blong yumi, mo olsem wanem yumi tingbaot olgeta. ?Oli impoten tumas long yumi, bitim evri samting? ?No ating i moa impoten blong sevem laef blong yumi, wetem olgeta we oli stap long saed blong God? Tru ya, maet taem yumi ronwe, bambae yumi kasem hadtaem mo yumi sot long sam samting. Bambae yumi mas rere blong mekem evri samting we yumi mas mekem long taem ya, olsem ol Kristin blong bifo we oli olsem yumi, oli ronwe long Judia, oli krosem Jodan reva blong go long Peria.

23, 24. (a) ?Weples nomo bambae yumi save kasem sef? (b) ?Woning blong Jisas long saed blong ‘rabis samting ya we i stap stanap long wan tabu ples,’ i mas pulum yumi blong mekem wanem?

²³ Oltaem nomo yumi mas trastem Jeova, wetem ogenaesesen blong hem we i olsem wan hil, hemia nao tufala sefples blong yumi. (2 Samuel 22:​2, 3; Ol Sam 18:2; Daniel 2:​35, 44) Long ol ples ya bambae yumi sef, bitim we yumi folem ol bigfala hip blong ol man we bambae oli ronwe blong “go haed long ol hol blong ston, mo aninit long ol bigbigfala ston olbaot long ol hil.” Ol ples ya oli minim ol ogenaesesen mo gavman blong ol man we oli save stap smoltaem afta we Bigfala Babilon i lus finis. (Revelesen 6:​15; 18:​9-​11) Tru, bambae yumi save gat hadtaem, olsem olgeta long yia 66 K.T. oli gat hadtaem blong ronwe long Jerusalem, ol woman we oli gat bel mo ol narafala we oli mas ronwe long taem blong kol mo ren. Be yumi save finis we Jeova bambae i givim jans long yumi blong sevem laef blong yumi. Taswe i stret nomo blong yumi putum tingting blong yumi i stap strong naoia long Jeova mo long pikinini blong hem, we i stap rul finis olsem king long Kingdom.

²⁴ I nogud yumi stap fraet oltaem from ol samting we bambae oli kamtru. Jisas i no wantem mekem ol disaepol blong hem blong bifo oli fraet. Mo hem i no mantem mekem yumi fraet naoia, mo long ol samting we bambae oli kamaot tu. Hem i givim woning long yumi, blong yumi save mekemrere hat mo tingting blong yumi. Yumi mas tingbaot we bambae taem ya i taem blong spolem ol giaman skul mo ol narafala samting nogud long wol ya, i no taem blong panisim yumi ol Kristin, we yumi obei long God. Bambae yumi luksave fasin blong “rabis samting ya” mo bambae yumi obei long tok blong Jisas taem bambae ‘rabis samting i stap stanap long wan tabu ples.’ Nao bambae strong bilif blong yumi i save pulum yumi blong jusum gudfala rod. Yumi mas neva fogetem tok ya blong Jisas we i talem se: “Man ya we i stanap strong gogo olgeta samting ya i finis, bambae God i sevem hem.”​—Mak 13:⁠13.

[Ol futnot]

?Yu Yu Rimemba?

◻ ?Olsem wanem “rabis samting ya we i spolem evri samting” i kamaot long faswan handred yia?

◻ ?From wanem i stret blong talem se “rabis samting” ya blong tede bambae i stanap long wan tabu ples long fiuja?

◻ ?Revelesen i talem se “rabis samting” ya bambae i faetem wanem?

◻ ?God i wantem we yumi “ronwe” long wanem kaen fasin?

[Tok Blong Pija Long Pej 16]

Baebol i talem se Bigfala Babilon i “mama blong ol woman blong rod”

[Tok Blong Pija Long Pej 17]

Wael anamol we i red we i red long Revelesen japta 17, hemia nao “rabis samting” we Jisas i tokbaot

[Tok Blong Pija Long Pej 18]

Bambae wael anamol ya we i red we i red, i lidim wan bigfala faet blong spolemgud ol skul