?From Wanem Yumi Mas Bilif Long Jisas Kraes?

“PLANTE man we oli no Kristin, oli bilif se Hem i wan nambawan tija we i waes. Tru tumas, hem i gat moa paoa long laef blong ol man, i bitim olgeta man we oli bin laef bifo mo naoia.” (The World Book Encyclopedia) ?“Hem” i hu? Hemia Jisas Kraes, man we i stanemap Kristin Skul.

Nating se buk ya i talem olsem, be long tingting blong plante milyan man long Medel Is mo long ol narafala ples long wol, Jisas Kraes i olsem wan strenja, hem i jes wan nem we maet oli tingbaot from we oli bin lanem long ol buk blong haeskul. Long ol jos blong Krisendoma tu, i gat ol haetija mo ol lida blong jos we oli talem se i no gat man we i rili save Jisas. Mo tu, oli no moa sua se fofala gospel oli rili tru, hemia fofala buk ya we i storebaot laef blong Jisas, we oli stap gud kam kasem taem blong yumi mo we yumi save faenem long Baebol.

?Maet olgeta we oli raetem ol Gospel long saed blong laef blong Jisas oli giaman? !No gat! Wan man blong raetem histri, we plante man oli save hem, nem blong hem Will Durant, i stadigud long ol Gospel ya. Nao hem i raetem se: “Sam man blong faswan handred yia we oli man nating nomo oli talemaot stori blong Jisas. Be oli talemaot wan man we fasin blong hem i gat paoa blong pulum tingting blong man, we i givim ol nambawan rul, we i soemaot long ol man olsem wanem blong laeklaekem olgeta olsem we oli brata nomo. Ol man ya oli no save wokem wan giaman stori olsemia long sot laef blong olgeta. Sipos oli mekem, hemia i wan merikel we i moa big, i bitim olgeta merikel we oli raetemdaon finis long ol Gospel. Nating se ol man blong hae save oli agensem Baebol long tu handred yia finis, ol stori long saed blong laef, fasin, mo tijing blong Kraes, oli stap klia nomo, mo oli pulum intres blong plante man long ol kantri blong Wes.”

Be, i gat sam man we oli sakemaot Jisas Kraes. Oli se, oli no save ona long Jisas from we ol man we oli talem se oli folem Kraes, oli mekem plante nogud fasin. Sam man long Japan oli talem se: ‘Ol Kristin nao oli bin sakem wan atomik bom long Nagasaki, we taon ya i gat plante moa Kristin man long hem, i bitim ol narafala taon long Japan.’ Be, taem wan man i sik ?i stret blong talem se i fol blong dokta, sipos sikman ya i no bin folem wanem we dokta i talem? No gat. Sem mak nomo, plante man we oli talem se oli Kristin oli no wantem folem ol advaes blong Jisas we oli olsem meresin blong winim ol trabol blong wol ya. Be, Jisas i bin soem rod blong winim ol problem we yumi stap fesem evri dei. Hem i soem olsem wanem blong finisim olgeta trabol soa blong man long ful wol. Taswe mifala i askem yu blong ridim haf we i kam biaen blong luk se Jisas i wanem kaen man.

[Futnot]