?Olsem Wanem Jisas i Save Jenisim Laef Blong Yu?

JISAS KRAES i wan Nambawan Tija we i laef long Palestaen klosap 2,000 yia bifo. Yumi no gat plante save long saed blong laef blong hem taem hem i pikinini. Be, i gat plante samting we oli soem se, Jisas i gat 30 yia taem hem i statem minista wok blong hem blong “talemaot ol tok we i tru.” (Jon 18:37; Luk 3:​21-​23) Ol fofala disaepol we oli raetem stori blong laef blong hem, oli tokbaot moa ol laswan tri yia haf blong minista wok ya blong hem.

Taem Jisas Kraes i mekem minista wok blong hem, hem i givim wan oda long ol disaepol blong hem. Oda ya i olsem wan nambawan meresin we i save winim plante trabol soa long wol tede. ?Wanem oda ya? Jisas i talem se: “Mi mi givim wan niufala loa long yufala se, ‘Yufala i mas lavlavem yufala.’ Olsem we mi mi lavem yufala, ale long sem fasin, yufala i mas lavlavem yufala.” (Jon 13:34) Yes, rod blong winim bighaf blong ol problem blong man hemia lav. Long wan narafala taem bakegen, sam man oli askem long Jisas se wanem loa nao i hae moa long ol narafala loa. Jisas i ansa se: “ ‘Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu.’ Hemia nao loa ya we i hae moa long ol narafala loa, mo i nambawan blong folem. Mo narawan, we i klosap sem mak long hem, i talem se, ‘Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.’ ”​—Matiu 22:37-​40.

Jisas i soemaot long ol toktok mo ol wok blong hem olsem wanem blong lavem God mo ol man raonabaot long yumi. Bambae yumi tingbaot sam eksampel mo luk wanem we yumi save lanem from ol eksampel ya.

Ol Tijing Blong Hem

Long wan toktok blong Jisas Kraes, we ol man long histri oli savegud long hem, Jisas i talem long ol man blong hem se: “I no gat man we i save wok blong tu masta wantaem. Sipos man i mekem olsem, bambae hem i laekem wan, be i no laekem narawan, i agens long hem. No bambae hem i save ona long wan masta, be i stap lukluk nogud long narawan. Yufala i no save mekem we God i bos long yufala, be long sem taem nomo, mane tu i bos blong yufala.” (Matiu 6:​24) Tede, plante man oli ting se mane nomo i save winim olgeta problem. Taswe, ?tijing blong Jisas se yumi mas putum God long fasples long laef blong yumi, i save wokgud long laef blong yumi tede? I tru, yumi nidim mane blong laef evri dei. (Prija 7:​12) Be, sipos yumi letem “mane” i kam masta blong yumi, bambae fasin blong “laekem mane tumas” i bos long yumi mo i lidim fulwan laef blong yumi. (1 Timoti 6:​9, 10) Plante man we oli foldaon long trap ya oli lusum famle mo helt blong olgeta, mo sam oli lusum laef blong olgeta tu.

Defren nao, sipos yumi stap lukluk i go long God olsem Masta blong yumi, samting ya i save givim mining long laef blong yumi. Hem i Man We i Wokem yumi, hem i Stamba blong laef, mo from samting ya, i stret we yumi wosip long hem nomo. (Ol Sam 36:9; Revelesen 4:​11) Olgeta we oli lanem ol fasin blong hem mo we oli lavem hem oli wantem tumas blong folem ol loa blong hem. (Prija 12:13; 1 Jon 5:3) Taem yumi mekem olsem, yumi stap mekem i gud long yumi wan.​—Aesea 48:17.

Taem Jisas i mekem Bigfala Toktok blong hem antap long Hil, hem i tijim ol disaepol blong hem olsem wanem blong soemaot lav long ol narafala man. Hem i talem se: “Yufala i mas mekem i gud long ol narafala man, olsem we yufala i wantem blong olgeta oli mekem long yufala.” (Matiu 7:​12) Tok ya “ol narafala man” we Jisas i yusum long ples ya, i minim ol enemi blong yumi tu. Long sem bigfala tok ya, hem i talem se: “Yufala i mas lavem ol enemi blong yufala, mo yufala i mas prea from olgeta we oli stap mekem i nogud tumas long yufala.” (Matiu 5:43, 44) ?Yu ting se lav olsem bambae i save winim fulap long ol problem we yumi stap fesem tede? Wan lida blong ol man India, nem blong hem Mohandas Gandhi, i tingting olsem. Hem i talem se: “Taem [yumi evriwan] i agri long ol tijing blong Kraes long Bigfala Toktok blong hem antap long Hil, bambae yumi winim ol problem blong . . . ful wol.” Sipos ol man oli mekem tijing blong Jisas long saed blong lav i wok long laef blong olgeta, bambae oli save winim plante long ol trabol soa we i stap kasem olgeta.

Ol Wok Blong Hem

Jisas i no jes tijim ol bigfala trutok long saed blong fasin blong soemaot lav, be hem i mekem samting we hem i tijim. Eksampel, hem i tingbaot fastaem ol samting we narafala i nidim i bitim wanem we hem wan i wantem. Wan dei Jisas mo ol disaepol blong hem oli bisi tumas blong givhan long ol man, mekem se oli no gat taem blong kakae. Jisas i luksave se ol disaepol blong hem oli nidim blong spel smol, nao hem i tekem olgeta i go long wan ples we i no gat man long hem. Be taem oli kasem ples ya, plante man oli stap wet long olgeta. ?Bambae yu mekem wanem sipos yu luk plante man oli stap wet blong yu yu wok, taem yu harem se yu nidim blong spel? Jisas i “sore tumas long olgeta” mo “hem i stat tijim olgeta long plante samting.” (Mak 6:​34) Fasin blong Jisas blong tingbaot ol narafala i mekem se oltaem hem i givhan long olgeta.

Blong givhan long ol man, Jisas i no jes tijim olgeta. Hem i mekem sam samting tu blong halpem olgeta long laef blong olgeta. Eksampel, wantaem hem i fidim 5,000 man we oli bin stap lesin long hem kasem let aftenun. I no longtaem biaen, hem i fidim wan narafala hif blong man​—long taem ya namba blong olgeta i bitim 4,000. Hif man ya i bin lesin long hem blong tri dei finis mo oli no moa gat kakae i stap. Long faswan taem, Jisas i bin yusum faef bred wetem tu fis blong fidim ol man, mo long namba tu taem, hem i yusum seven bred mo sam smol fis. (Matiu 14:14-⁠22; 15:32-⁠38) ?Hemia ol merikel? Yes, Jisas i man blong wokem merikel.

Jisas i mekem fulap sikman oli kamgud bakegen. Ol man we oli blaen mo olgeta we leg blong olgeta i nogud, ol man we oli gat leprosi mo olgeta we sora blong olgeta i fas, oli kamgud bakegen. Ol dedman tu, be Jisas i mekem olgeta oli laef bakegen. (Luk 7:​22; Jon 11:30-45) Wan taem wan man we i gat leprosi i askem long Jisas se: “Plis, sipos yu yu wantem, mi mi save se yu yu gat paoa blong mekem mi mi gud bakegen.” ?Jisas i talem wanem long hem? “Nao Jisas i sore tumas long hem, i putum han blong hem long hem, i talem long hem se, ‘Yes, mi mi wantem. !Yu klin!’ ” (Mak 1:​40, 41) Taem Jisas i mekem ol merikel ya, hem i soemaot lav we hem i gat long olgeta we oli stap safa.

?Yu yu faenem se i had blong bilif long ol merikel blong Jisas? I gat sam man we oli faenem i had. Be, tingbaot, Jisas i wokem ol merikel ya long ol pablik ples. Ol enemi blong hem tu, we oltaem nomo oli traem faenem poen agens long hem, oli luksave klia se hem i wan man blong wokem merikel. (Jon 9:​1-​34) Antap long samting ya, i gat wan risen from wanem hem i wokem ol merikel. Ol merikel ya oli soemaot long ol man se hem i Man ya we God i sanem hem i kam.​—Jon 6:​14.

Jisas i no wokem ol merikel blong leftemap hem wan. Defren olgeta, hem i leftemap nem blong God, we i Stamba blong paoa ya blong hem. Wan taem, long Kapaneam, Jisas i stap long wan haos we i fulap gud long ol man. Wan man we haf bodi blong hem i ded, i wantem we Jisas i mekem hem i kamgud bakegen. Be from we ol man oli plante tumas hem i no save kam insaed long haos. Ale, ol fren blong hem oli tekem hem wetem bed blong hem, nao oli slakem hem i godaon insaed long haos tru long wan hol long ruf. Taem Jisas i luk bilif blong olgeta, hem i mekem bodi blong sikman ya i kamgud bakegen. From samting ya, ol man oli “presem God” mo oli talem se: “Neva yumi luk wan samting olsemia samtaem.” (Mak 2:​1-4, 11, 12) Ol merikel blong Jisas oli leftemap nem blong Jeova, God blong hem, mo oli givhan long ol man we oli trabol.

Be fasin blong wokem merikel blong mekem sikman i kamgud bakegen, i no stamba samting long minista wok blong Jisas. Wan long olgeta we oli raetem stori blong laef blong Jisas, i talem se: “Mi mi raetem ol tok ya blong yufala i save bilif we Jisas ya, hem i Mesaea, hem i pikinini blong God. Mi mi raetem olsem blong yufala i save kasem laef long nem blong hem, from we yufala i bilif long hem.” (Jon 20:31) Yes, Jisas i kam long wol ya blong bambae olgeta man we oli bilif long hem oli save kasem laef.

Sakrefaes Blong Hem

Maet yu yu askem se ‘?Jisas i kam long wol? ?Hem i aot long weples i kam?’ Jisas hem wan i talem se: “Mi mi no kamaot long heven blong mekem ol samting we mi nomo mi wantem. Mi kam blong mekem ol samting we Papa blong mi we i sanem mi mi kam, hem i wantem.” (Jon 6:​38) Jisas i laef finis, bifo we hem i kamdaon long wol olsem stret Pikinini blong God. Man ya we i sanem Jisas i kam long wol, ?hem i wantem se Jisas i mekem wanem? Jon, wan long olgeta we oli raetem ol Gospel, i talem ol tok blong Jisas i se: “God i lavem tumas ol man long wol, nao hem i givim mi, mi stret pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.” (Jon 3:​16) ?Olsem wanem hem i save mekem samting ya?

Baebol i soemaot from wanem ded i mas kasem olgeta man. God i givim laef long faswan man mo woman, mo tufala i gat hop blong laef gogo i no save finis. Be, tufala i jusum blong rebel agensem Man Ya We i Wokem olgeta samting. (Jenesis 3:​1-​19) From faswan sin ya blong Adam mo Iv, olgeta pikinini we oli kamaot biaen long tufala oli kasem ded. (Rom 5:​12) Blong givim laef ya we i prapa wan long olgeta man, sin mo ded i mas lus.

I no gat wan man blong sayens we i naf blong jenisim ol samting long bodi blong man blong mekem se oli no moa ded. Be, Man Ya We i Wokem yumi, hem i gat wan rod blong mekem ol man we oli obei long hem oli kam stretgud olgeta, blong kasem laef we i no save finis. Baebol i kolem rod ya se, ransom. From sin blong faswan man mo woman, tufala mo ol pikinini blong tufala oli kam slef blong sin mo ded. Oli sakemaot laef ya we i stretgud olgeta, we i blong man we i obei long God, mo oli jusum blong laef olgeta nomo, blong mekem prapa disisen blong olgeta long saed blong samting we i stret no i no stret blong mekem. Faswan papa mama blong yumi oli lusum laef ya we i stret gud olgeta. Blong pembak laef ya we oli lusum, wan man i mas givim wan samting we praes blong hem i sem mak long hem. From we i no gat wan man long wol ya we i stretgud olgeta, i no gat wan long olgeta we i naf blong pem praes ya.​—Ol Sam 49:7.

Taswe Jeova God i mekem wan samting blong givhan. Hem i putum laef blong stret Pikinini blong hem, we i no gat sin, insaed long bel blong wan vejin, nao hem i karem Jisas. Plante yia bifo, maet yu sakemaot tingting ya se wan pikinini i save bon long wan vejin. Be tede, sam man blong sayens oli faenem rod blong jenisim sam samting insaed long bodi blong wan anamol blong mekem hem i gat bel hem wan mo i bonem pikinini we i olsem hem nomo. Sipos man i naf blong mekem olsem, i klia we Man Ya We i Wokem olgeta samting, hem tu i naf blong mekem se pikinini blong hem i bon long rod we i defren.

Tru long man ya we laef blong hem i stret gud olgeta, God i save pemaot ol man long sin mo ded. Be, bebi ya Jisas we i bon long wol, i mas gruap fastaem blong kam “dokta” ya we bambae i givim “meresin” blong winim olgeta trabol soa blong man. Hem i mekem “meresin” ya taem hem i gat wan laef we i stret gud olgeta mo hem i no mekem sin. Jisas i luk ol nogud trabol we ol man oli fesem from we oli gat sin. Be tu, from we hem i gat bodi olsem man, hem i luksave se i gat plante samting we man i no gat paoa blong mekem. Samting ya i mekem se hem i kam olsem wan dokta we i gat bigfala sore long man. (Hibrus 4:​15) Ol merikel we Jisas i wokem long laef blong hem long wol oli pruvum se hem i wantem, mo hem i gat paoa, blong mekem sikman i kamgud bakegen.​—Matiu 4:​23.

Tri yia haf afta we Jisas i mekem minista wok blong hem long wol ya, ol man we oli agens long hem oli kilim hem i ded. Jisas i soemaot se wan man we i stret gud olgeta i save obei long Man Ya We i Wokem hem, nating se hem i kasem sam bigfala traem. (1 Pita 2:​22) Laef blong Jisas we i stret gud olgeta mo we hem i givim olsem wan sakrefaes, hemia nao ransom we i save pemaot man long sin mo ded. Jisas Kraes i talem se: “I no gat man we i lavem ol fren blong hem moa, i winim man we i lusum laef blong hem blong sevem ol fren blong hem.” (Jon 15:13) Tri dei afta long ded blong hem, Jisas i laef bakegen olsem wan spirit man, mo sam wik biaen hem i go antap long heven blong givim praes blong ransom ya i go long Jeova God. (1 Korin 15:3, 4; Hibrus :11-14) Taem Jisas i mekem samting ya, hem i kam naf blong yusum ransom sakrefaes blong hem blong givhan long olgeta man we oli biaen long hem.

Ating yu tu yu wantem we Jisas i mekem yu yu kamgud bakegen long saed blong spirit, filing, mo bodi blong yu tu? Blong kasem blesing ya yu mas bilif long Jisas Kraes. !I gud yu kam long Dokta ya! Yu save mekem olsem sipos yu lanem moa long saed blong Jisas, mo wok blong hem blong sevem olgeta man we oli stanap strong long bilif. Ol Witnes blong Jeova bambae oli glad blong givhan long yu blong mekem olsem.

[Tok Blong Pija Long Pej 5]

Jisas i gat paoa mo hem i wantem blong mekem olgeta we oli sik oli kamgud bakegen

[Tok Blong Pija Long Pej 7]

?Olsem wanem ded blong Jisas i gat paoa long yu?