Oli Mekem Samting We Jeova i Wantem

Wan Visit We i Karem Gudfala Frut

TREP ya blong aot long Seba go kasem Jerusalem i mekem se kwin ya i taed tumas. Hem i lan long wan laef we i isi. Naoia, hem i stap mekem wan trep blong 2,400 kilometa. Hem i sidaon long wan kamel, mo sloslou hem i krosem wan drae ples we i hot tumas. !Sam man oli ting se trep ya i tekem 75 dei, mo hemia blong go nomo!a

?From wanem kwin ya we i rij tumas, i lego naesfala haos blong hem long Seba blong mekem trep ya we i strong tumas?

Wan Nius We i Pulum Intres

Kwin ya blong Seba i kam long Jerusalem afta we hem i “harem nius blong King Solomon, mo nius blong Hae God we king ya i stap leftemap nem blong hem.” (1 King 10:1) Yumi no save talem stret se, wanem nius ya we kwin i bin harem. Be, yumi save se Jeova i blesem Solomon bigwan taem hem i givim waes long hem, i mekem hem i kam rijman mo i gat gudnem. (2 Kronikel 1:11, 12) ?Olsem wanem kwin ya i save ol samting ya? Seba i wan taon we plante man oli kam long hem blong mekem bisnes. Taswe, maet ol bisnesman we oli pas long taon ya oli tokbaot Solomon. Maet sam long olgeta oli bin go long Ofiri, wan kantri we Solomon i mekem bigfala bisnes wetem.​—1 King 9:26-​28.

Be taem kwin ya i kam long Jerusalem “hem i tekem plante man blong hem i kam wetem hem, mo i putum plante samting long ol kamel blong hem. . . . I gat ol lif blong wokem senta mo blong putum long kakae blong mekem i tes gud, mo ol ston we oli flas gud, mo gol we i plante we plante.” (1 King 10:2a) Sam man oli talem se tok ya “plante man blong hem” maet i minim tu se i gat ol soldia blong protektem hem. I stret nomo blong talem olsem, from we kwin ya i wan haefala woman, mo hem i karem plante samting wetem hem we praes blong olgeta i bigwan tumas.b

Be, makemgud se kwin ya i harem nius blong Solomon “mo nius blong Hae God we king ya i stap leftemap nem blong hem.” Taswe hemia i no jes wan trip blong mekem bisnes. I klia se stamba risen we i pusum kwin ya blong kam, hemia blong harem waes blong Solomon​—no maet blong lanem samting long saed blong Jeova, God ya blong Solomon. Kwin ya i kamaot long laen blong Sem no Ham, we oli bin wosip long Jeova. Taswe, maet hem i wantem save moa long saed blong wosip blong ol bubu blong hem.

Strong Kwestin, Gudfala Ansa

Taem kwin ya i mitim Solomon hem i askem plante “strong kwestin.” (1 King 10:1) Narafala rod blong talem Hibru tok we oli yusum long ples ya, hemia se “ridel.” Be samting ya i no minim se kwin i plei long wan gem wetem Solomon. Ol Sam 49⁠:​4 i yusum semfala Hibru tok ya blong tokbaot sam bigfala kwestin long saed blong sin, ded, mo rod blong pemaot man. Taswe, i luk olsem se kwin blong Seba i tokbaot sam impoten samting wetem Solomon. Hem i wantem luksave se waes blong Solomon i bigwan olsem wanem. Baebol i talem se kwin ya i “askem ol strong kwestin.” Mo Solomon “i ansa long olgeta evriwan, we i no gat wan long olgeta nating we i strong blong i talemaot mining blong hem.”​—1 King 10:​2b, 3.

Taem kwin blong Seba i luk se Solomon i waes tumas mo kingdom blong hem i rij we i rij, kwin ya i ‘sapraes tumas, i no moa askem wan samting bakegen.’ (1 King 10:​4, 5) Sam man oli talem se tok ya i minim we kwin “i no moa save toktok.” !Wan man blong stadi i talem tu se, maet ae blong hem i dak! Nating se i olsem wanem, be i sua se olgeta samting we kwin ya i luk mo i harem oli mekem hem i sapraes bigwan. Hem i talem se ol man blong wok blong Solomon oli laki tumas blong harem ol waestok blong king ya, mo hem i presem Jeova we i putumap Solomon olsem king. Biaen, hem i givim plante sas presen i go long king ya. Gol we hem i givim i kasem samwe long 40,000,000 dola, long mane blong tede. Solomon tu i givim presen, “ol samting we kwin ya i askem, king i givim olgeta i go long hem, mo i givim sam moa samting bakegen long hem long gladhat blong hem.”c​—1 King 10:6-13.

Wan Lesen Blong Yumi

Jisas i yusum eksampel ya blong kwin blong Seba blong givim wan lesen long ol tija blong loa mo ol Farisi. Hem i talem long olgeta se: “Woman ya bifo we i kwin blong olgeta long saot, bambae hem tu i save stanap blong talemaot we yufala i man nogud, from we hem i aot long narasaed wol, i wokbaot i kam blong harem waestok blong King Solomon bifo. Be yufala i luk, mi mi waes moa long King Solomon.” (Matiu 12:42) Yes, kwin blong Seba i soem se hem i tinghae long waes we i kamaot long God. Hem i mekem longfala trep ya blong 2,400 kilometa blong lesin long Solomon. Be, ol tija blong loa mo ol Farisi oli no save lesin long Jisas we i stap klosap nomo long olgeta.

Tede yumi save soem fasin tangkiu long Bigfala Solomon, Jisas Kraes. ?Olsem wanem yumi save mekem samting ya? Wan rod hemia blong “mekem disaepol long ol man blong olgeta nesen.” (Matiu 28:​19, NW) Wan narafala rod i blong luklukgud long eksampel blong Jisas mo gudfala tingting we hem i gat, nao yumi save mekem sem mak.​—Filipae 2:5; Hibrus 12:​2, 3.

I tru se yumi mas wokhad blong folem eksampel blong Bigfala Solomon. Be bambae yumi save kasem gudfala frut from. Yes, Jeova i mekem promes ya se sipos yumi rere blong lego ol samting we yumi nomo i wantem, bambae hem ‘i openem skae, i letem olgeta gudgudfala samting i kam long yumi we i plante we i plante.’​—Malakae 3:10.

[Ol futnot]