Yumi Laef Wetem Bilif Long Ol Promes Blong God
“Mi nomo mi God, mo . . . i no gat narafala god i stap we i olsem mi. Bifo olgeta, long stat blong olgeta samting, mi mi talemaot fastaem ol samting we biaen oli hapen. Bifo finis, mi mi talemaot ol samting we biaen oli kamtru.”—AESEA 46:9, 10.
1, 2. ?Wanem olgeta tingting we ol man oli gat long saed blong fasin we God i stap lidim ol samting long wol?
?GOD i lidim ol samting we oli stap hapen long wol ya? Ol man oli gat ol defren tingting long saed ya. Samfala man oli ting se, long wol ya, i no gat wan samting we God i lidim. Oli ting se, afta we God i wokem olgeta samting finis, hem i letem olgeta oli ron folem rod blong olgeta. Biaen, hem i no moa wantem, no hem i no moa naf, blong mekem wan samting long saed blong yumi. Oli talem se, God i olsem wan papa we i putum pikinini blong hem i sidaon gud antap long wan niufala baskel, mo i pusum baskel ya i ron folem rod i go. Biaen, papa ya i gowe long pikinini blong hem. Pikinini ya i stap hem wan. Sipos hem i foldaon no i rongud, be papa ya i no moa gat bisnes wetem hem.
2 Sam narafala man oli ting se, God i stap wok strong blong lidim evri samting long laef blong yumi mo se hem i stap lidim evri samting we oli kamaot long wol ya. Be sipos i olsem, bambae sam man oli talem se God nao i stamba blong ol gudgudfala samting we oli hapen mo tu hem i stamba blong olgeta raf fasin mo trabol we oli stap spolem ol man. Taswe, yumi mas kasem save trutok long saed blong ol samting we God i stap mekem. Samting ya bambae i halpem yumi blong save wanem we yumi stap wet long hem blong hem i mekem. Mo tu, taem yumi kasem save long samting ya bambae bilif blong yumi i kam strong moa long ol promes blong hem se oli mas kamtru.—Hibrus 11:1.
3. (a) ?Olsem wanem yumi save se Jeova i wan God we i gat ol stamba tingting? (b) ?From wanem Baebol i tokbaot Jeova olsem man we i stap “mekem” ol stamba tingting blong hem?
3 Blong kasem save sipos God i stap lidim olgeta samting long saed blong man no nogat, fastaem yumi mas save se Jeova i wan God we i gat ol stamba tingting. Nem blong hem i soemaot klia samting ya. Nem ya “Jeova” i minim “Hem i Mekem i Kamaot.” Sloslou, Jeova i stap mekem hem wan i kam olsem Man blong mekem olgeta promes blong hem oli kamtru. Taswe, Baebol i tokbaot Jeova se hem i stap “mekem” ol stamba tingting blong hem long saed blong ol samting we bambae i hapen, mo ol aksin we bambae hem i tekem long fiuja. (2 King 19:25; Aesea 46:11) Tok ya “mekem” i kamaot long Hibru wod ya ya·tsarʹ, we i joen wetem wan wod we i minim ‘man blong wokem graonpot.’ (Jeremaea 18:4) Wan man we i gat gudhan blong wokem graonpot i save yusum sam graon blong mekem wan naesfala botel. Long sem fasin, Jeova i save lidim ol samting blong mekem stamba tingting blong hem i kamtru.—Efesas 1:11.
4. ?Olsem wanem God i rerem wol ya blong man i save laef long hem?
4 Eksampel, stamba tingting blong God se wol ya i mas kam wan naesfala ples we i fulap long ol man we oli stretgud mo oli gat fasin obei. (Aesea 45:18) Longtaem bifo we Jeova i wokem faswan man mo woman, wetem fasin kea hem i reremgud ples blong tufala. Ol faswan japta blong Jenesis oli tokbaot olsem wanem Jeova i mekem dei mo naet, graon mo solwota ol tri mo gras, mo ol anamol. Wok ya blong rerem ol samting blong man i save laef long wol, i tekem plante taosen yia. Biaen, hem i finisim gud wol ya. Faswan man mo woman, tufala i stat laef long Iden, wan naesfala paradaes we i gat evri samting we tufala i nidim blong harem gud long laef. (Jenesis 1:31) Ol samting ya oli soem se Jeova i lidim evri samting blong wol. Sloslou, hem i mekem nambawan stamba tingting blong hem i kamtru. ?Olsem wanem taem ol man oli kam plante? ?Fasin ya we God i stap lidim olgeta samting i jenis?
Jeova i No Moa Wok Plante Wetem Ol Man
5, 6. ?From wanem God i no moa wok plante wetem ol man?
5 Jeova i gat bigfala paoa, be hem i no traem blong bos mo lidim evri smosmol wok we man i mekem. ?From wanem i olsem? Faswan risen se, God i wokem ol man long pija blong hem. Oli fri blong jusum rod we oli wantem folem mo oli naf blong jusumaot wanem samting we i gud mo wanem samting we i nogud. Jeova i no fosem yumi blong mekem olgeta samting we hem i askem. Mo yumi no olsem doli we hem i kontrolem olgeta aksin blong yumi. (Dutronome 30:19, 20; Josua 24:15) I tru se God bambae i askem kaon long yumi from samting we yumi mekem. Nating se i olsem, hem i lavem yumi tumas, taswe hem i letem yumi fri blong jusum olsem wanem bambae yumi lidim laef blong yumi.—Rom 14:12; Hibrus 4:13.
6 I gat wan narafala risen from wanem God i no stap lidim evri samting we oli hapen long wol. Risen ya i joen wetem kwestin we Setan i bin statemap long Iden. Setan i tok agensem hae rul blong God. Hem i talem long Iv se naoia hem i save kam fri, blong no moa obei long Jeova—ale Iv, mo hasban blong hem, Adam, tufala i lesin long hem. (Jenesis 3:1-6) From samting ya, God i letem ol man oli rulum olgeta bakegen blong traem pruvum tok blong Setan. Taswe, yumi no save blemem God from ol nogud samting we ol man oli stap mekem tede. Moses i tokbaot ol man we oli stronghed, taem hem i raetem se: “Olgeta nomo oli jusum blong mekem ol nogud fasin. Oli no ol pikinini blong hem [God], olgeta nomo oli mekem sin.”—Dutronome 32:5, NW.
7. ?Wanem stamba tingting blong Jeova long saed blong wol ya mo ol man?
7 Yes, Jeova i letem ol man oli fri blong jus mo blong traem rulum olgeta bakegen. Be, samting ya i no minim se Jeova i no moa mekem wan samting long saed blong wol ya. Sipos i olsem, bambae yumi no gat hop blong luk we hem i mekem ol promes blong hem oli kamtru. Nating se Adam mo Iv, tufala i agensem hae rul blong God, Jeova i no lego nambawan stamba tingting blong hem long saed blong wol mo ol man. Bambae hem i mas jenisim wol ya i kam wan paradaes we i fulap long ol man we oli stretgud, oli gat fasin obei mo oli hapi. (Luk 23:42, 43) Ol buk blong Baebol, stat long Jenesis go kasem Revelesen, oli tokbaot olsem wanem Jeova i bin wok blong mekem stamba tingting ya blong hem i kamtru sloslou.
God i Mekem Samting We Hem i Wantem
8. ?Wanem ol samting we God i mekem blong tekem ol man Isrel oli go long Promes Lan?
8 Taem God i stap wok wetem nesen blong Isrel, hem i soemaot se bambae hem i mekem stamba tingting blong hem i kamtru. Eksampel, Jeova i talemaot long Moses se bambae Hem i mas mekem ol man Isrel oli gofri long Ijip mo i tekem olgeta oli go insaed long Promes Lan, wan kantri we i fulap long melek mo eg blong sugabag. (Eksodas 3:8) Tok ya i impoten tumas mo i leftemap tingting blong ol man Isrel. Hem i minim se bambae God i tekemaot ol man Isrel—we namba blong olgeta wetem ol narafala man we oli joenem olgeta, i kasem samwe long tri milyan man—long paoa blong wan strongfala nesen we i no wantem letem olgeta oli go. (Eksodas 3:19) Kantri ya we bambae God i givim long ol man Isrel i fulap long ol laen blong man we bambae oli agensem strong ol man Isrel. (Dutronome 7:1) Be bifo we oli kasem kantri ya, oli mas pastru long wan draeples, mo long draeples ya, oli nidim kakae mo wota. Samting ya i givim jans long Jeova blong soemaot bigfala paoa blong hem, mo se hem nomo i trufala God.—Levitikas 25:38.
9, 10. (a) ?From wanem Josua i save talem se ol promes blong God oli sua oltaem blong kamtru? (b) ?From wanem i impoten tumas blong trastem se bambae God i givim blesing long ol trufala man blong hem?
9 God i mekem sam bigbigfala saen blong tekemaot ol man Isrel long Ijip. Fastaem, hem i mekem ten trabol i kam long nesen blong Ijip. Biaen, hem i mekem Red Si i seraot long tu haf, nao ol man Isrel oli gokros, be ol soldia blong Ijip oli lus. (Ol Sam 78:12, 13, 43-51) Afta long samting ya, God i lukaot gud long ol man Isrel long ol 40 yia we oli stap long draeples. Hem i givim mana long olgeta blong oli kakae, i givim wota, mo i meksua se klos blong olgeta i no brobrok mo leg blong olgeta i no soa. (Dutronome 8:3, 4) Afta we ol man Isrel oli go insaed long Promes Lan, Jeova i givhan long olgeta blong winim ol enemi blong olgeta. Josua, we i bilif fulwan long ol promes blong Jeova, i bin luk olgeta samting ya stret long ae blong hem. Taswe, hem i save talem long ol olfala long taem blong hem se: “Yufala evriwan i savegud long tingting blong yufala we Hae God ya i givim ol gudgudfala samting ya long yumi, stret olsem we hem i promes bifo finis. Olgeta promes ya blong hem, hem i mekem oli kamtru evriwan, i no gat wan promes nating i stap we i no kamtru.”—Josua 23:14.
10 Olsem Josua bifo, ol Kristin tede oli trastem fulwan se God i rere mo i naf blong tekem aksin blong givhan long olgeta we oli stap mekem wok blong hem. Fasin ya we yumi gat blong trastem God fulwan, i wan impoten haf blong bilif blong yumi. Aposol Pol i raetem se: “Sipos man i no bilif strong long God, hem i no save mekem God i glad long hem, from sipos wan man i wantem kam long God, hem i mas bilif we God . . . i stap mekem i gud long olgeta we oli stap traem faenem hem.”—Hibrus 11:6.
God i Save Fiuja Blong Olgeta Samting
11. ?Wanem samting i mekem se God i naf blong mekem ol promes blong hem oli kamtru?
11 Naoia, yumi kasem save se God i letem ol man oli fri blong jus mo blong rulum olgeta bakegen. Nating se i olsem, God i gat paoa mo hem i wantem tumas blong mekem stamba tingting blong hem i kamtru. Be, i gat wan narafala samting we i givhan long yumi blong trastem fulwan se olgeta promes blong God bambae oli kamtru. Jeova i save fiuja blong olgeta samting. (Aesea 42:9) Tru long wan profet blong hem, God i talem i se: “Yufala i mas tingbaot ol samting ya we oli kamtru bifo finis. Yufala i mas luksave we mi nomo mi God, mo we i no gat narafala god i stap we i olsem mi. Bifo olgeta, long stat blong olgeta samting, mi mi talemaot fastaem ol samting we biaen oli hapen. Bifo finis, mi mi talemaot ol samting we biaen oli kamtru. Mi talem finis we ol plan blong mi bambae oli no save foldaon, mo we bambae mi mi save mekem olgeta samting we mi mi wantem.” (Aesea 46:9, 10) Wan man blong wokem garen, i savegud wetaem mo weples hem i mas planem sid, be hem i no save talem stret sipos garen blong hem bambae i karem gudfala frut no nogat. Be, “King blong olwe” i no olsem. Hem i savegud finis wetaem mo weples hem i mas tekem aksin blong mekem ol stamba tingting blong hem oli kamtru.—1 Timoti 1:17, NW.
12. ?Long taem blong Noa, olsem wanem Jeova i soemaot se hem i save wanem we bambae i hapen long fiuja?
12 Long taem blong Noa, God i soemaot se hem i naf blong save samting we bambae i hapen long fiuja. From we wol i fulap long rabis fasin, God i gat tingting blong finisim olgeta man we oli no obei long hem. Ale, hem i makemaot wan stret taem blong mekem samting ya, se bambae hem i mekem 120 yia afta. (Jenesis 6:3) Taem Jeova i makemaot impoten taem ya, hem i no jes tingbaot nomo blong spolem ol rabis man, wan samting we hem i save mekem enitaem. Hem i stap tingbaot wan narafala samting bakegen. Jeova i makemaot longfala taem ya tu blong sevem ol stret man. (Skelem wetem Jenesis 5:29.) God i waes tumas. Taswe, hem i save finis wetaem i stret blong givim wok we man i mas mekem bifo we en ya i kam. Hem i talem klia olgeta samting long Noa. Noa i mas wokem wan bigfala sip “blong sevem olgeta famle blong hem,” mo bambae bigfala wota i spolem olgeta rabis man.—Hibrus 11:7; Jenesis 6:13, 14, 18, 19.
Wan Bigfala Wok Blong Mekem
13, 14. ?From wanem wok ya blong bildim bigfala sip i no wan isi samting?
13 Traem skelem tingting blong Noa long saed blong wok ya. Noa i wan man blong God, taswe, hem i save se Jeova i naf blong spolem ol man we oli no save obei. Be, bifo we Jeova i spolem ol man ya, Noa i gat wan wok blong mekem—wan wok we i nidim strong bilif blong mekem. Wok blong bildim bigfala sip, hem i wan bigfala wok. God i talemaot saes blong sip ya. Longfala blong hem i bitim wan futbol fil mo i hae olsem wan haos we i gat faef stori long hem. (Jenesis 6:15) Ol man we oli mekem bigfala wok ya, oli no gat save blong wokem sip mo oli no plante. Oli no gat ol tul blong wok olsem we yumi gat tede. Mo tu, Noa i no olsem Jeova we i naf blong save samting we bambae i hapen long fiuja. Taswe hem i no save wanem we bambae i hapen long ol yia we oli kam taem hem i stap bildim sip ya. Maet wok i gohed gud nomo, no maet hem i fesem sam hadtaem we bambae oli blokem wok ya. I sua se Noa i tingbaot plante kwestin. ?Weples bambae hem i tekem ol samting blong bildim sip ya? ?Olsem wanem bambae hem i hivimap olgeta anamol oli kam wanples? ?Bambae oli nidim wanem kaen kakae, mo hamas kakae oli mas karem wetem olgeta? ?Long wanem taem stret, bambae Bigfala Wota ya i ron?
14 Antap long hemia, tingbaot laef blong ol man long taem ya. Rabis fasin i fulap long olgeta ples. Ol strongfala Nefilim—ol pikinini blong ol rabis enjel we oli karem ol woman blong wol ya—oli mekem se wol i fulap long raf fasin. (Jenesis 6:1-4, 13) Antap long samting ya, bambae Noa i no bildim bigfala sip ya long wan ples we i haed. Bambae olgeta man oli wantem save se Noa i stap mekem wanem, mo Noa i mas eksplenem samting ya long olgeta. (2 Pita 2:5) ?Bambae ol man ya oli blong bilif long Noa? !No gat! Sam yia bifo long taem ya, Inok i bin talemaot se bambae ol rabis man oli lus. Be i no gat man i wantem bilivim mesej we hem i talemaot, nao God i “tekemaot hem long wol ya,” minim se hem i no letem Inok i laef longtaem long wol ya. Hem i mekem olsem from we hem i no wantem se ol enemi blong Hem oli kilim Inok i ded. (Jenesis 5:24; Hibrus 11:5; Jud 14, 15) Long saed blong Noa, hem i mas talemaot wan mesej we ol man oli no laekem. Long sem taem, hem i mas bildim wan bigfala sip. !Wok ya blong bildim sip bambae i soemaot strongfala bilif we Noa i gat, taem hem i stap long medel blong ol man nogud!
15. ?From wanem Noa i sua se hem i naf blong bildim bigfala sip?
15 Noa i save se God ya we i gat Olgeta Paoa i stap givhan long hem mo blesem wok blong hem. Hem i save samting ya from we Jeova nao i givim wok ya long hem. Jeova i talem long Noa se hem mo famle blong hem bambae oli go insaed long bigfala sip ya we oli bildim mo bambae oli sef taem Bigfala Wota i kavremap wol. Mo tu, God i mekem wan promes se bambae hem i sevem Noa mo famle blong hem. (Jenesis 6:18, 19) Ating Noa i luksave se Jeova i bin tingtinggud, mo i skelemgud olgeta samting bifo we hem i givim wok ya long Noa. Mo tu, Noa i save se Jeova i gat paoa blong halpem hem enitaem sipos hem i nidim help. Taswe, bilif blong Noa i pusum hem blong mekem wok. Hem i gat sem tingting olsem Ebraham we i kamaot biaen long hem. Yes, Noa i “savegud we bambae God i save mekem olgeta samting we hem i promes blong mekem.”—Rom 4:21.
16. Taem wok blong bildim sip i stap gohed, ?olsem wanem bilif blong Noa i kam strong moa?
16 Ol yia oli stap pas mo wok ya blong bildim sip i stap gohedgud. Samting ya i mekem bilif blong Noa i kam strong moa. Noa mo famle blong hem oli faenem rod blong bildim sip ya. Oli winim ol defren traem we oli fesem. Fasin agens blong ol man i no blokem wok ya. Famle blong Noa i luksave se Jeova i stap givhan mo lukaotgud long olgeta. Taem Noa i stap gohed long ol wok ya, ‘bilif blong hem i strong, hem i winim ol traem, nao hem i kam strong moa blong stanap longtaem.’ (Jemes 1:2-4) Biaen, taem wok ya blong bildim sip i finis, mo Bigfala Wota i kam, Noa wetem famle blong hem oli sef. Noa i luk we God i mekem ol promes blong hem i kamtru. Biaen, Josua tu i luk we ol promes blong God oli kamtru. Noa i kasem blesing from bilif blong hem.
Wan Wok We Jeova i Stap Lidim
17. ?Long wanem rod, taem blong yumi i sem mak long taem blong Noa?
17 Jisas i bin talem se taem blong yumi bambae i sem mak long taem blong Noa. God i gat tingting bakegen blong spolem ol rabis man, mo hem i makemaot finis taem we bambae hem i mekem samting ya. (Matiu 24:36-39) Mo tu, God i mekem rod finis blong sevem ol stret man. Bifo, Noa i mas bildim wan bigfala sip, be tede, ol man blong God oli mas talemaot ol stamba tingting blong Jeova, tijim Tok blong hem, mo pulum ol man oli kam disaepol.—Matiu 28:19.
18, 19. ?Olsem wanem yumi save se Jeova i stap biaenem wok blong talemaot gud nius?
18 Sipos Jeova i no bin sapotem Noa mo givhan long hem, bambae Noa i no naf blong bildim bigfala sip ya. (Skelem wetem Ol Sam 127:1.) Long sem fasin, sipos Jeova i no givhan long trufala Kristin Skul, bambae skul ya i no save kam antap bigwan. Gamaliel, wan Farisi mo wan tija blong loa long faswan handred yia, we ol man oli tinghae long hem, hem i luksave samting ya. Taem Sanhedrin, Kaonsel blong ol man Jiu i wantem kilim ol aposol oli ded, Gamaliel i givim woning ya long kot, se: “Yumi mas livim ol man ya i stap. Yumi mas letem olgeta oli go fri, from we sipos samting ya i tingting mo wok blong man nomo, bambae i no save gotru. Be sipos samting ya i blong God, bambae yumi no save blokem olgeta.”—Ol Wok 5:38, 39.
19 Gudfala frut we i kamaot from wok blong prij, long faswan handred yia mo tede tu, i pruvum se wok ya i no wok blong man be hem i wok blong God. Long nekis stadi, bambae yumi tokbaot sam long ol nambawan samting we oli bin hapen mo ol niufala samting we oli givhan long wok ya blong karem plante frut long plante ples blong wol.
!Yu No Mas Lego!
20. ?Hu i givhan long yumi taem yumi stap talemaot gud nius?
20 Nating se yumi stap long taem we ‘laef long wol ya i kam strong tumas,’ yumi sua se Jeova i stap lidim olgeta samting. Naoia ol man blong hem oli stap traehad blong talemaot gud nius bifo long stret taem we God i makemaot blong finisim rabis wol ya. Taswe hem i stap sapotem olgeta mo i stap givhan long olgeta. (2 Timoti 3:1; Matiu 24:14) Jeova i singaot yumi blong ‘joen wetem hem blong mekem wok blong hem.’ (1 Korin 3:9) Mo tu, yumi sua se Jisas Kraes i stap wetem yumi long wok ya. Yumi sua tu se ol enjel oli stap givhan, oli lidim yumi long wok ya.—Matiu 28:20; Revelesen 14:6.
21. ?Wanem tingting we yumi neva mas lego?
21 Noa mo famle blong hem oli sef tru long bigfala wota, from we oli soemaot bilif long ol promes blong Jeova. Tede tu, ol man we oli soemaot sem bilif olsem, bambae oli save sef taem “bigfala trabol” i kamaot. (Revelesen 7:14) Yumi stap laef long wan taem we i rili spesel. !Sam bigfala samting bambae oli mas hapen yet long fiuja! I no longtaem, God bambae i tekem aksin blong openem rod long nambawan niufala heven mo niufala wol we stret fasin nomo bambae i stap long hem. (2 Pita 3:13) Yu neva, neva mas lego strong tingting ya se, wanem we God i talem, bambae hem i mas mekem i kamtru.—Rom 4:21.
Ol Poen Blong Tingtingbak
◻ ?From wanem Jeova i no bos long evri smosmol samting long saed blong man?
◻ ?Taem Jeova i stap wok wetem ol man Isrel, Olsem wanem hem i soemaot se hem i naf blong mekem olgeta stamba tingting blong hem oli kamtru?
◻ ?Long taem blong Noa, olsem wanem Jeova i soemaot se hem i naf blong save wanem we bambae i hapen long fiuja?
◻ ?Yumi mas trastem ol promes blong God olsem wanem?