Man i Traehad Blong Gat Longfala Laef
“Mifala man we i bon long wol ya, mifala i no strong. Laef blong mifala i sotfala nomo, mo i fulap long trabol. Mifala i stap kam bigfala kwiktaem nomo, olsem we flaoa i gru, be mifala i stap ded kwiktaem tu, olsem flaoa. Laef blong mifala i olsem sado, we i stap lus kwiktaem nomo.”—Job 14:1, 2.
LONG taem blong yumi tu, plante man oli agri wetem tingting ya se laef i sotfala nomo, nating se oli bin raetem tok ya 3500 yia i pas finis. Oltaem ol man oli faenem se ol faswan yia blong laef oli sotfala nomo blong oli haremgud long hem, mo biaen oli kam olfala mo oli ded. Taswe, tru long histri, ol man oli bin traem faenem sam rod blong mekem laef blong man i longfala moa.
Ol man Ijip long taem blong Job, oli traehad blong nating: oli kakae ol haf bodi blong anamol we i blong karem pikinini, blong kam yangfala bakegen. Ol man Yurop tu long Medel Ejes, oli traem mekem wan spesel meresin we i save mekem laef i longfala. Plante long olgeta oli bilif se sipos oli save tanem wan samting olbaot i kam gol, bambae samting ya afta, hem i save givim laef we i no save finis. Mo oli ting se man we i kakae long ol plet we oli wokem long gol, bambae laef blong hem i longfala moa. Ol man long Skul Tao oli stat folem sam fasin we oli ting se oli save halpem bodi blong olgeta blong i no kam nogud, mo i no save ded samtaem—Oli tingting dip, pulum win strong, mo oli tekem ol spesel kakae.
Juan Ponce de León, wan man Spen, we i stap wokbaot long solwota blong faenem ol niufala ples, oltaem hem i traehad blong faenemaot spring wota ya we sipos man i dring long hem, hem i save stap yang oltaem. Wan dokta we i laef afta yia 1700, i talem long buk blong hem Hermippus Redivivus, se oli mas putum sam yangfala gel long wan smol rum long taem we ol tri oli putum flaoa. Nao taem ol gel oli pusum win, oli putum win ya long ol botel, olsem wan meresin blong mekem laef i longfala moa. Sore tumas blong talem se, i no gat wan long ol meresin ya we i wok.
Tede, 3,500 yia i pas finis afta we Moses i raetemdaon tok blong Job. Man i save wokbaot long mun, wokem ol trak mo ol kompyuta, mo lukluk tru long atom mo sel. Be nating se save blong man i kam antap long saed ya, “laef blong yumi i sotfala yet, mo i fulap long trabol.” I tru se long ol kantri we oli rij, namba blong ol man i stap kam antap i bitim las yia. Be samting ya i kamaot from we, ol man i mekem se helt blong olgeta i kamgud moa, ples blong olgeta i moa klin, mo oli gat gudfala kakae. Eksampel, samwe long 1850 ol man Swiden oli save laef 40 yia mo ol woman 44. Be long 1990 ol man oli save laef 75 yia mo ol woman 80 yia. ?Be samting ya i min se naoia ol man oli haremgud from we laef i longfala inaf?
No gat. I tru we long sam kantri, namba blong ol man we oli rili olfala i kam antap moa. Be tok we Moses i raetem bifo, i tru yet long taem blong yumi, i se: “Yia blong mifala i save kasem seventi nomo, no sipos bodi blong mifala i stap strong oltaem, mifala i save kasem eiti, be . . . laef blong mifala i save finis kwiktaem nomo, nao mifala i go lus olgeta.” (Ol Sam 90:10) ?Olsem wanem? ?Long fiuja bambae yumi luk wan jenis? ?Bambae laef blong man i save kam longfala moa? Nekis haf bambae i ansa long ol kwestin ya.