Ol Man Oli Traehad Blong Winim Ded

Ded i wan enemi we i mekem man i fraet. Yumi mekem evri samting blong blokem ded. Taem wan famle i ded, maet yumi no wantem tingbaot se hem i ded. No maet taem yumi yangfala, yumi ting se enemi ya bambae i neva winim yumi, ale yumi stap tingbaot samting ya nomo.

Ol king blong Ijip bifo oli wantem laef olwe. Ale oli spenem bighaf blong laef blong olgeta mo laef blong ol taosen man we oli wok blong olgeta, blong traem winim ded. Ol bigfala piramid no beregraon we oli wokem, oli soemaot se ol king ya oli wantem winim ded. Insaed long ol piramid ya, oli putum gud ol dedbodi blong ol king. Oli ting se sol blong ol king ya i save kambak long bodi blong olgeta. Be ol yia oli pas, ale ol stilman oli spolem ol dedbodi ya. Taswe, ol bigfala piramid ya oli soemaot se ol king ya oli no winim ded.

Ol king blong Jaena tu oli wantem laef olwe, be oli mekem samting we i defren long ol king blong Ijip. Oli bilif se i gat wan majik wota we i save mekem man i laef olwe. King Qin Shi Huang i talem long ol man blong hem se, oli mas mekem majik wota ya we i save blokem man blong i no ded. Ale ol man ya oli traem mekem plante defren kaen wota, mo wan long ol samting we oli yusum, hemia mercury we i wan posen. I luk olsem se wan long ol wota ya i kilim i ded king ya.

Long ol yia 1500, wan man Spen we nem blong hem Juan Ponce de León, i go long sip blong hem blong faenem ol niufala aelan mo kantri. Stori i talem se hem i stap lukaotem wan springwota we i gat paoa blong mekem man i kam yangfala. Taem hem i stap lukaot springwota ya, hem i faenem wan ples long Amerika we nem blong hem, Florida. Sam yia biaen, hem i ded long wan faet. Be hem i neva faenem springwota ya.

Ol king blong Ijip, ol king blong Jaena, mo ol man we oli lukaotem ol niufala aelan mo kantri, olgeta evriwan oli traehad blong winim ded. Maet yumi no agri long rod we oli folem blong traem winim ded, be yumi kasem save from wanem oli mekem olsem. Hemia from we yumi evriwan i wantem stap laef.

?DED BAMBAE I WIN?

?From wanem yumi traehad blong blokem ded? Baebol i ansa, taem hem i tokbaot Jehova God,a se: “Olgeta samting, hem i wokem oli naes long stret taem blong olgeta. Laef we i no save finis, hem i putum long hat blong olgeta.” (Prija 3:11, NW) Yumi wantem harem gud blong olwe long ol naesfala samting long wol ya, be i no blong 80 yia nomo. (Ol Sam 90:10) Hemia nao samting we yumi wantem tumas.

?From wanem God i putum tingting ya blong “laef we i no save finis” long hat blong yumi? ?Hem i mekem olsem blong traem yumi nomo? Nogat. God i promes se bambae hem i winim ded. Baebol i talem plante taem se ded bambae i finis, mo hem i tokbaot promes ya blong laef we i no save finis.—Yu luk bokis ya “Ded Bambae i Lus.”

Jisas i talem klia se: “Laef ya [we i no save finis], hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.” (Jon 17:3) Taswe ded bambae i lus wan dei. Jisas i talem se God nomo i save winim enemi ya.