!“Laswan Blong Ol Enemi” Bambae i Finis!
TAEM yu yu wan pikinini yet, maet yu yu stap fraet long tudak. Maet ol store blong mekem man i fraet mo tu ol kastom store oli mekem yu yu fraet. !Yu yu harem sef taem mama no papa blong yu i livim wan laet i stap laet taem yu traem blong slip!
Sem mak ded i mekem plante man oli fraet. Be, i no nid blong fraet olsem. ?From wanem? From trufala save ya se ded i rili olsem wanem, bambae i mekem se yu no fraet.
Save Enemi Blong Yu
Waes King Solomon blong Isrel bifo, i talem se: “Ol man we oli laef oli save se bambae oli mas ded. Be ol dedman oli no save wan samting nating.” (Eklesiastis 9:5) Folem tingting ya blong God we i stap long prapa Baebol blong yu, ded hem i defren olgeta long laef. Ded man i no gat tingting nating.
Taem Kristin aposol Pol i stap tokbaot ded, hem i raetem se: ‘?E, ded, olsem wanem yu save win? ?E, ded, olsem wanem yu save spolem mifala?’ ?Wanem samting ya we i save spolem yumi blong ded? Pol i talem se: “Ded i kasem paoa blong hem blong spolem yumi long sin.” (1 Korin 15:55, 56; Hosea 13:14) ?Nao, wanem stampa blong samting ya we i stap spolem yumi? Long narafala ples long Baebol Pol i talem se: “Bifo, fastaem olgeta, wan man nomo i statem fasin blong sin long wol ya. Mo from we hem i mekem sin, hem i ded. Be frut blong samting ya, hemia we ol man oli stap ded, from we olgeta oli mekem sin.” (Rom 5:12) Aposol Pol i talemaot stret hu nao i “wan man” ya, taem hem i talem se: “Olgeta man we oli joen long Adam oli save ded.” (1 Korin 15:22) Yes, from fasin blong faswan papa blong yumi Adam, blong no obei, yumi evriwan yumi kasem sin we i stap givim ded.—Jenesis 3:1-19.
Sipos yumi gat gudfala helt mo wan gudfala famle raonabaot long yumi mo yumi stap long wan gudfala ples, bambae i no gat wan long yumi i wantem ded. Be, olsem Baebol i soem i se, “ol taem mo ol samting we man i no save long hem,” oli save spolem laef blong yumi. (Eklesiastis 9:11) Yes, yumi no save wanem bambae i hapen long laef blong yumi tumora. (Jemes 4:14) Wan samting we yumi savegud—se yumi evriwan yumi bon wetem sin mo yumi mas ded. Taswe, ded i stap folem yumi mo i kilim yumi olsem wan enemi.
Winim Sore From Ded Blong Wan Famle
Ded hem i wan enemi, samting ya i tru moa taem hem i kasem wan famle. Wan waef we i kasem wan sik we bambae i mas ded from, i talem long hasban blong hem, i se, “Bambae hem i moa nogud long yu.” ?From wanem waef ya i save talem samting olsem? From we Baebol i talem se: “Olgeta samting we han blong yu i save mekem, i gud yu mekem wetem paoa blong yu. From we i no gat wok no plan no save no waes long Seol [hemia beregraon blong man], ples ya we bambae yu yu go long hem.” (Eklesiastis 9:10) Man we i ded hem i no moa safa. Be ol famle mo ol fren we oli laef yet, olgeta ya nao oli stap harem soa sore from. ?I gat rod blong winim soa sore olsem?
Insaed long Tok blong God, Baebol, i gat plante toktok blong mekem man i haremgud. Eksampel, fasin blong ridim mo tingting dip long ol tok blong Ol Sam hem i wan rod blong leftemap tingting. Tru ya ol tok olsem hemia se: “Yumi presem Masta ya blong yumi, we evri dei, hem i stap karem ol hevi samting blong yumi. Hem i God we i stap sevem yumi,” oli rili leftemap tingting.—Ol Sam 68:19.
Wan narafala samting blong leftemap tingting hemia Kristin kongregesen. Long faswan handred yia K.T., aposol Pol i raetem se: “Yu mas onagud long wido we i stap hem wan, i no gat famle blong lukaot long hem. Be sipos wan wido i gat pikinini blong hem no smol bubu blong hem [we oli save lukaotgud long hem long saed blong bodi], olgeta ya oli mas lan we wan nambawan wok blong ol Kristin man, oli mas lukaotgud long ol famle blong olgeta. Oli mas mekem olsem we oli pem kaon blong olgeta long ol mama mo papa blong olgeta, from we hemia wan samting we God i glad long hem. Bambae yu no raetemdaon nem blong wido long buk we ol nem blong wido oli stap long hem, sipos hem i no kasem sikiste yia yet. Wido we yu raetem nem blong hem, hem i mas woman blong wan man nomo, mo i mas gat gud nem, se hem i woman blong mekem ol gudgudfala wok. Hem i mas wan woman we i lukaotgud long ol pikinini blong hem gogo oli kam bigfala, mo i mas wan woman we i glad blong tekem strenja oli kam long haos blong hem, mo i mas wan woman we i wasem leg blong ol man blong God, mo we i givhan long olgeta we oli trabol, mo we i putum tingting blong hem finis blong mekem ol narafala gudfala wok.” (1 Timote 5:3, 4, 9, 10) Ol Wetnes blong Jeova tede oli stap givhan mo leftemap tingting olsem blong ol narafala man blong bilif.
Plante taem bigfala jenis we man we i sore from ded i mas mekem hem i long saed blong filing. Wan man we waef blong hem i ded long tu yia i pas finis, i raetem se: “Mi mi laekem woman blong mi tumas. Hemia wan taem we mi mi sore bitim ol narafala taem long laef blong mi, mo mi mi faenem i had blong winim.” Wan man we i mared longtaem finis hem i serem laef blong hem long fasin fren we i dip wetem narafala. Taem wan long tufala i ded, hemia we i laef i harem se hem i lusum wan bigfala samting long laef blong hem. ?Bambae hem i kasem help long hu?
Long wan taem olsem, gudfala fasin joen wetem ol narafala Kristin i save leftemap tingting blong hem. Wan waes proveb i talem se: “Wan trufala fren i soemaot lav oltaem nomo, mo hem i olsem wan brata we i rere blong givhan long taem blong trabol.” (Proveb 17:17) Wan widowoman no wan man we woman blong hem i ded i nidim help—i nidim ol fren we oli givim trufala sapot long hem. Ol waes fren oli leftemap tingting blong olgeta ya we oli stap sore blong oli toktok, nating sipos oli save krae taem oli mekem olsem. Maet wan Kristin we i harem i soa sore long hat blong hem from hem i bin lusum hasban no waef blong hem finis, i save givhan long fasin we i kaen. Baebol i givim advaes ya se, “Yufala i mas toktok gud blong leftemap tingting blong olgeta we oli harem nogud oltaem from we tingting blong olgeta i foldaon.” (1 Tesalonaeka 5:14, NW) Be tingbaot se ol widowoman mo ol man we woman blong olgeta i ded oli mestem ol hasban no waef blong olgeta. Taswe, olgeta ya we oli sore from we oli lusum hasban no waef blong olgeta, oli mas toktok wetem ol narafala long taem ya nomo we hem mo narafala ya, tufala i save holemtaet fasin we i klin.—1 Pita 2:12.
Nambawan meresin blong daonem soa sore we man i kasem from ded, hem i blong bisi oltaem blong halpem ol narafala man—i hadwok long olgeta ya we oli bilif se, olgeta nao oli nidim help. Long taem olsem man i mas soem fasin blong no tingbaot hem wan. Fasin blong mekem sam samting long ol narafala man, i save givhan blong winim sad taem mo soa sore, from we Jisas i talem se: “Man we i stap givim presen i go, hem i save harem gud moa, i winim man we i stap kasem presen blong hem.”—Ol Wok 20:35.
Winim Ded
Taem wan sugabag i kakae man samting ya i soa we i soa, mo i save kilim man i ded tu. Be kolosap oltaem, sipos yu tekemaot smol pin ya we sugabag i stikim i go insaed long skin blong yu bambae samting ya i mekem soa blong hem i godaon. ?Be wanem samting long fyuja we i save tekemaot soa we i givim ded?
Afta we Pol i eksplenem se sin nao i givim soa we i mekem man i ded from, hem i talemaot se: “Be yumi stap talem tangkyu long God, from we hem i joenem yumi long Jisas Kraes, Masta blong yumi, nao oltaem hem i stap mekem yumi win.” (1 Korin 15:57) ?Olsem wanem Kraes i joen wetem fasin ya blong winim ded? Jisas i soem samting ya taem hem i tokbaot hem wan i se: “Mi mi Pikinini blong Man, be mi mi no kam blong bambae ol man oli mekem wok blong mi. Mi mi kam blong mekem wok blong olgeta, mo blong givim laef blong mi blong pem rod blong plante man oli gofri.” (Matyu 20:28) Yes, long olgeta ya we oli stap soemaot bilif long Pikinini blong God, Jisas Kraes, mo long ransom sakrifaes we Jeova i givim tru long Jisas, ded we yumi kasem long Adam bambae i no save mekem man i lus blong olwe.—Jon 3:16.
Ol tok ya blong Jisas oli rili leftemap tingting, hem i se: “I gat taem i stap kam we ol dedman we oli stap long beregraon, bambae oli harem voes blong mi, nao bambae oli aot long beregraon. Olgeta we bifo oli stap mekem ol gudfala fasin, oli mas stanap bakegen blong kasem laef. Be olgeta we bifo oli stap mekem ol rabis fasin, oli mas stanap bakegen blong pas long bigfala kot ya, blong mi save jajem olgeta.”—Jon 5:28, 29.
Sam handred yia bifo, Aesea, profet ya blong God i bin talemaot se: “Bambae hem [Jeova God] i finisim ded blong olwe, mo Hae God Jeova bambae i ravemaot wora blong ae long fes blong olgeta man.” (Aesea 25:8) Bakegen long Revelesen 21:4, Baebol i tokbaot nambawan fyuja ya, i se: “[God] bambae i ravemaot wora blong ae blong olgeta. Nao bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem. Ol samting ya blong bifo oli lus olgeta.” Baebol hop ya long olgeta we oli slip long ded, i givim strong tingting long olgeta ya we oli stap sore from ol famle we oli ded, blong oli no mas “harem nogud from olgeta ya, olsem we ol narafala man ya we tingting blong olgeta i no stap long God, oli stap harem nogud from ol ded man blong olgeta.”—1 Tesalonaeka 4:13.
Traem blong stap tingbaot samting we God i wantem mekem long olgeta man, olsem we Baebol i soem. “Bigfala trabol” we i kolosap tumas, bambae i spolem rabis fasin blong naoia. (Revelesen 7:14) Olgeta ya we oli stap mekem gyaman wosip bambae oli lus. Ol griri politik mo bisnes we oli stap mekem fasin hanggri mo faet i kamaot, oli no moa stap. Nao Jisas Kraes bambae i sakem Devel Setan we i stap mekem se ol man oli ded, i go daon long hol ya we i dip we i dip. Nao wan taosen yia rul blong Kraes i stat, long taem ya hem i yusum praes blong ransom sakrifaes blong givhan long ol man. Ol ded man oli kambak bakegen olsem hop ya blong laef bakegen long ded i bin promes, mo laet long Tok blong God i saenaot klia moa mekem se ol gyaman bilif long saed blong ded, hemia enemi blong man, oli no moa stap. Olgeta man we oli laef long taem ya oli gat jans blong lanem ol rod blong God mo jenisim laef blong olgeta folem ol stret rul blong hem.—Proveb 4:18; Ol Wok 24:15; Hibrus 2:14, 15; Revelesen 18:4-8; 19:19-21; 20:1-3.
‘Nao biaen long samting ya,’ Pol i talem se, ‘en blong olgeta samting bambae i kamtru taem Jisas Kraes i finis long king, i givimbak olgeta paoa blong hem long God, Papa blong hem. From we Kraes i mas stap king fastaem, gogo God i winim olgeta enemi i putum olgeta oli stap daon aninit long leg blong hem. Nao laswan blong enemi ya, hemia ded, i lus.’ (1 Korin 15:24-26) Evri haf blong bodi blong man we oli no save wokgud from sin blong Adam naoia oli wok gud. Wan laswan traem i kamaot, mo ol man we oli laekem God oli pas tru long hem wetem strong bilif. (Revelesen 20:4-10) Naoia we oli kam stretgud olgeta, ol man ya we oli gat fasin obei oli laef, i no blong sevente no handred mo ten yia nomo, be blong olwe. !Hemia wan nambawan presen we God i givim tru long Pikinini ya blong hem we hem i laekem hem tumas!—Rom 6:23.
?Nao, yu yu save laef kasem hamas yia? Yu yu save laef blong olwe. Olsem naoia we yu stap laef long “taem blong en” blong wol, maet yu no save ded samtaem. (Daniel 12:4; Jon 11:25, 26; 17:3) Sipos yu stap mekem wil blong God, yu save laef gogo yu pas tru i go insaed long nyufala wol we God i mekem promes long hem.—2 Pita 3:13.
Be, sipos yu yu olfala, i stret blong tingbaot se bambae yu save ded. Sua se, hop blong laef bakegen long ded i givim glad. Be maet yu stap tingbaot olsem wanem Jeova bambae i stretem rod blong famle laef long nyufala fasin ya. Yu no mas wari long ol samting olsem, from we Jeova bambae i mekem se olgeta ya we oli stap holemstrong oltaem long hem oli save glad blong olwe.
Taem “lasdei” ya, blong rabis fasin blong Setan, we laef i kam strong tumas i stap go kolosap long en blong hem, no letem fraet long ded i spolem yu long ol gudfala jans blong mekem wok blong Jeova naoia. (2 Timote 3:1) Sipos wan famle blong yu i ded, i gud blong stap tingbaot se paoa we i holemtaet ded man i blong smol taem nomo. (Revelesen 20:13, 14) Trastem hop blong laef bakegen long ded. Biaen, nating sipos yu laef tru long bigfala trabol no yu laef bakegen long ded blong stap long nyufala wol ya, yu save trastem promes blong God se ded, we i laswan enemi, bambae i lus olgeta.—Revelesen 7:9, 14.
[Tok Blong Pija Long Pej 5]
Ol gudfala Kristin fren oli save leftemap tingting long saed blong speret blong man we i soa sore from ded
[Tok Blong Pija Long Pej 7]
Fasin blong stap bisi oltaem blong givhan long ol narafala man bambae i daonem soa sore we i kamaot from wan famle i ded