?Olsem Wanem Blong Winim Enemi Ya Ded?
NATING se yumi kasem sin mo ded long fas papa mo mama blong yumi Adam mo Iv we tufala i no obei long God, be tingting we God i gat fastaem i no jenis. Long Baebol, God i soemaot bakegen mo bakegen se tingting blong hem i no jenis.
“Ol stret man ya bambae oli tekem graon ya i blong olgeta, mo bambae oli stap long hem gogo i no save finis.”—Ol Sam 37:29.
“[God] bambae i mekem we ded bambae i go lus olgeta. Bambae hem i ravemaot wota blong ae blong yufala.”—Aesea 25:8.
“Laswan blong ol enemi ya we hem bambae i winim olgeta, hemia ded.”—1 Korin 15:26.
‘Bambae i no moa gat man i ded, mo man i no moa krae from we hem i sore, bambae i no moa gat man i krae, mo man i no moa harem nogud long bodi blong hem.’—Revelesen 21:4.
?Olsem wanem bambae God i mekem se ‘ded i go lus olgeta,’ o “i no moa gat man i ded”? Olsem yumi luk finis, Baebol i talem klia se ‘ol stret man bambae oli stap gogo i no save finis.’ Be Baebol i talem tu se ‘i no gat man long wol ya we oltaem i stap mekem i stret nomo.’ (Prija 7:20) ?Hemia i min se, God bambae i letem ol sinman oli laef olwe mo lego ol stret fasin blong hem? !Nogat! ‘God i no save giaman.’ (Taetas 1:2) ?Bambae hem i mekem wanem blong stamba tingting blong hem i kamtru?
‘GOD BAMBAE I MEKEM WE DED I GO LUS OLGETA.’—AESEA 25:8
RANSOM I WINIM DED
Jehova God i pem wan ransom blong karemaot ol man long ded. Ransom i minim praes we man i pem, blong pembak samting we wan man i spolem, o blong stretem wan trabol. Olgeta man oli sinman mo bambae oli ded, taswe Baebol i talem se: ‘Man i no save pem laef blong hem long God blong bambae i stap laef olwe. Olgeta samting we man i save givim, neva bambae i naf.’—Ol Sam 49:7, 8.
Taem wan sinman i ded, hem i pembak ol sin blong hem nomo. Be hem i no save pembak ol sin blong narafala man o sevem laef blong hem wan. (Rom 6:7) I nidim wan man we i stret gud mo i no gat sin, blong i givim laef blong hem. Hemia i no blong tekemaot sin blong hem, be blong tekemaot sin blong yumi.—Hibrus 10:1-4.
Hemia nao samting we God i mekem. Hem i sanem Pikinini blong hem, Jisas, i kamdaon long wol, blong i bon olsem wan man we i no gat sin. (1 Pita 2:22) Jisas i talem se hem i kam blong “givim laef blong hem olsem wan ransom, blong pembak plante man oli go fri.” (Mak 10:45) Hem i givim laef blong hem blong winim enemi ya ded, nao yumi save laef.—Jon 3:16.
?WETAEM BAMBAE DED I FINIS?
Olsem profet tok blong Baebol i talem, tede ‘laef i strong tumas mo i had blong winim ol trabol.’ Hemia i soemaot se yumi stap laef long “ol las dei” blong rabis wol ya. (2 Timoti 3:1) Ol las dei bambae oli finis long ‘dei blong jajmen mo blong spolem ol man we oli no obei long God.’ (2 Pita 3:3, 7) Be ol man we oli lavem God bambae oli no ded. Bambae oli kasem blesing ya blong “laef we i no save finis.”—Matiu 25:46.
Jisas i kam long wol “blong givim laef blong hem olsem wan ransom, blong pembak plante man oli go fri.”—Mak 10:45
Plante milian narafala we oli ded finis, bambae oli laef bakegen, mo bambae oli gat janis blong kasem laef we i no save finis. Taem Jisas i visitim taon ya Naen, hem i mekem wan man i laef bakegen. Boe blong wan wido i ded, wan pikinini nomo we hem i gat. Jisas “i sore tumas,” nao i mekem boe ya i laef bakegen. (Luk 7:11-15) Mo tu, aposol Pol i talem se: “Hop blong mi i stap long God, se ol man we oli stret wetem ol man we oli no stret bambae oli laef bakegen.” Strong hop ya blong laef bakegen i soemaot bigfala lav we God i gat long ol man.—Ol Wok 24:15.
Plante milian man oli save putum tingting blong olgeta i stap strong long laef we i no save finis. Baebol i talem se: “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.” (Ol Sam 37:29) Bambae oli glad tumas blong laef long taem ya, mo luk olsem wanem ol gudfala tok ya we aposol Pol i raetem samwe long 2,000 yia bifo, oli kamtru, se: “Ded, ?wehem paoa blong yu? Ded, ?wehem posen blong yu?” (1 Korin 15:55) !Rabis enemi ya ded, i finis!