?Yumi Save Mekem Wanem Taem Tingting i Foldaon?

?OLSEM wanem wan man i save winim tingting we i foldaon? Hemia wan kwestin we plante taem, ol elda we oli goraon blong visitim ol kongregesen blong ol Witnes blong Jeova, oli stap harem. Ansa we ol elda ya oli givim i save givhan long yumi blong luksave stamba blong problem ya mo ol samting we i save halpem ol Kristin blong winim tingting ya we i foldaon.

I tru se, blong winim tingting we i foldaon, i no naf jes blong luksave fasin ya. Be, sam long ol saen we oli soemaot se tingting blong wan man i foldaon, hemia taem hem i no moa gat intres blong prea mo mekem prapa stadi blong hem wan, hem i slak blong kam long ol miting, i lusum fasin glad, mo tu, maet hem i no moa glad blong joen wetem ol Kristin brata sista. Be wan saen we i klia moa, hemia taem man ya i no moa gat strong tingting blong talemaot gud nius. Bambae yumi tokbaot ol saen ya mo sam long ol rod blong winim problem ya.

Taem Tingting i Foldaon Long Saed Blong Wok Blong Prij

Jisas Kraes i save se bambae i gat sam hadtaem oli kamaot long wok ya blong mekem disaepol. (Matiu 28:19, 20) Hem i sanem ol man blong hem olsem “ol sipsip we oli go long medel blong ol wael dog.” Hem i save se wok blong prij bambae i karem trabol i kam long olgeta. (Matiu 10:​16-​23) Be, hemia i no wan risen blong oli letem tingting blong olgeta i foldaon. Tru ya, ol man blong wok blong Jeova we oli prea strong long Hem, oltaem oli kasem paoa taem ol man oli mekem i nogud long olgeta.​—Ol Wok 4:​29-​31; 5:​41, 42.

Nating sipos i no oltaem we ol disaepol blong Kraes oli bin kasem bigfala trabol, be plante taem ol man oli no glad blong lesin long olgeta. (Matiu 10:​11-​15) Long sem fasin, wok blong prij blong ol Witnes blong Jeova tede, i no wan samting we i isi oltaem blong mekem.a Bighaf blong ol man oli tingting se fasin blong bilif long God i wan samting blong olgeta nomo, oli no wantem storeyan long hem. Sam narafala man oli no wantem save long wan jos from we oli gat sam tingting we oli no stret long saed blong jos ya. I klia se, taem man i no intres, taem yumi no luk frut i kamaot long wok we yumi mekem, no taem yumi kasem sam narafala problem bakegen, tingting blong yumi i save foldaon. ?Olsem wanem yumi save winim ol traem ya?

Kasem Ol Gudfala Frut

Glad we yumi gat long wok blong prij i joen lelebet wetem ol frut we yumi kasem long wok ya. ?Be olsem wanem yumi save kasem moa frut long wok blong prij? Yumi “man blong pulum fis.” (Mak 1:​16-​18) Ol man blong pulum fis long Isrel bifo, oli stap huk long naet, from we long taem ya oli save kasem moa fis. Long sem fasin, yumi mas faenem wanem taem i stret blong prij long teritori blong yumi. Long rod ya, bambae yumi save go “pulum fis” long taem we bighaf blong ol man oli stap long haos mo oli glad blong lesin long mesej blong yumi. Maet stret taem hem i long sapa, long ol wiken, no long sam narafala taem bakegen. Long tingting blong wan elda we i stap goraon, rod ya i save wokgud long ol ples we man i wok ful dei. Hem i makem se fasin blong prij long sapa i karem plante gudfala frut. Fasin blong yusum telefon no tekem jans blong prij i mekem se yumi save kasem plante moa man.

Fasin blong stanap strong long wok blong prij i karem gudfala frut. Long ol kantri blong Is mo sam kantri long Afrika, wok blong prij i gohed gud, mo samting ya i mekem se namba blong ol man i kam antap. Mo tu, plante kongregesen oli stat long ol ples we fastaem yumi ting se i no save gat gudfala frut i kamaot, mo long ol ples we yumi prij oltaem long hem. ?Be, olsem wanem sipos wok blong prij we yu mekem i no karem gudfala frut olsemia?

Holem Wan Gudfala Tingting

Sipos ol mak we Jisas i stanemap, oli stap klia oltaem long tingting blong yumi, samting ya bambae i halpem yumi blong no letem tingting i foldaon taem ol man oli no soem intres long wok blong prij. Jisas Kraes i wantem se ol disaepol blong hem oli faenem ol man we oli rili intres, hem i no wantem se oli hareap blong baptaesem plante man wantaem. Wan wantaem, hem i bin talem klia se bighaf blong ol man bambae oli no akseptem gud nius, olsem we bighaf long ol man Isrel oli no bin lesin long ol profet bifo.​—Esikel 9:4; Matiu 10:11-​15; Mak 4:​14-​20.

Ol man we oli gat tangkiu taem oli kasem “gud nius blong Kingdom” hemia olgeta we oli “luksave ol nid blong olgeta long saed blong spirit.” (Matiu 5:3 NW; 24:14) Ol man ya oli wantem mekem wok blong God long rod we hem i wantem. Taswe, gudfala frut we yumi kasem long wok blong prij i dipen moa long samting we i stap long hat blong man, hem i no dipen long prapa save we yumi gat blong talemaot mesej. I tru se yumi mas traehad blong mekem ol man oli intres long gud nius. Be, God nomo bambae i mekem se wok ya i karem frut. Jisas i talem se: “I no gat man i save kam long mi, sipos Papa blong mi we i sanem mi mi kam, hem i no pulum hem i kam.”​—Jon 6:44.

Wok blong yumi blong talemaot gud nius i mekem ol man oli save nem blong God, Jeova. Nomata se ol man oli lesin no nogat, wok blong prij i givhan blong mekem nem blong Jeova i tabu. Mo tu, taem yumi talemaot gud nius yumi pruvum se yumi disaepol blong Kraes, mo i wan blesing blong joen long wok ya we i impoten moa i winim ol narafala wok long taem blong yumi.​—Matiu 6:⁠9; Jon 15:8.

Tingting We i Foldaon Mo Fasin Blong Narafala

Fasin blong ol narafala, insaed long famle no insaed long kongregesen, i wan samting we i save mekem tingting i foldaon. Eksampel, samtaem yumi ting se narafala i no kasem save long filing blong yumi. Mo maet ol slak fasin blong ol man we oli gat sem bilif olsem yumi, i wan samting we i mekem tingting blong yumi i foldaon. Bakegen Baebol i save givhan bigwan long yumi.

“Kampani blong ol brata” long olgeta ples blong wol, i mekemap wan bigfala famle long saed blong spirit. (1 Pita 2:​17) Be, taem trabol i kamaot from fasin blong wan i agensem fasin blong narawan, kwiktaem nomo tingting ya se yumi haf blong wan famle, i save lus. Tru tumas, ol Kristin long faswan handred yia tu, oli fesem ol problem olsemia from we aposol Pol i mas talem bakegen mo bakegen long olgeta se oli mas joengud. Eksampel, hem i givim advaes long tufala Kristin woman ya​—Yuodia mo Sintike​—blong tufala i stretem rao bitwin long tufala.​—1 Korin 1:⁠10; Efesas 4:​1-3; Filipae 4:​2, 3.

Sipos hemia nao problem, ?olsem wanem yumi save mekem se trufala lav blong ol brata mo sista blong yumi i kambak bakegen? Hemia taem yumi tingbaot se, Jisas Kraes i ded blong sevem olgeta, mo oli bilif long ransom sakrefaes, olsem yumi. Yumi save tingbaot tu se, plante long ol brata blong yumi oli rere blong folem eksampel blong Jisas Kraes, taem oli putum prapa laef blong olgeta long denja blong sevem yumi.

Sam yia bifo, long Paris, Franis, sam man oli bin putum wan bag we i gat wan bom insaed long hem, i stap jes afsaed long wan Haos Kingdom. Wan yangfala Witnes i no fraet nating blong tekem bag ya, resis i godaon long ol step, mo sakem bag ya i go long ples we i gat wota long hem. Ale, bom i faerap long ples ya. Taem oli askem wanem samting i pusum hem blong putum laef blong hem long denja olsemia, hem i ansa se: “Mi luksave se laef blong mifala evriwan i stap long denja. Taswe mi tingting se i moa gud blong mi wan mi ded bitim we mifala evriwan i ded.”b !I rili wan blesing blong gat sam fren olsem we oli rere blong folem eksampel blong Jisas!

I gud tu blong tingting dip long gudfala fasin we ol Witnes blong Jeova oli soemaot long taem blong Seken Bigfala Faet blong Wol. Nating se oli stap long ol rabis kalabus, oli stap wokgud tugeta.c I no longtaem, ol brata sista blong yumi long Malawi, oli soemaot se oli trufala Kristin taem oli stanap strong long bilif blong olgeta. ?Yu no ting se ol brata mo sista long kongregesen blong yu, bambae oli mekem sem mak sipos bigfala trabol i kamaot? Tingting ya i mas pusum yumi blong no letem ol smosmol rao mo trabol we yumi kasem evri dei, oli winim yumi, mo bambae i mekem yumi no luk ol smosmol problem ya olsem bigfala samting. Sipos yumi gat sem tingting olsem Jisas Kraes, fasin fren blong yumi wetem ol man we oli joen wetem yumi long wosip, bambae i leftemap tingting blong yumi, i no mekem tingting blong yumi i foldaon.

Tingting i Foldaon From Prapa Filing Blong Yumi

“Taem man i putum tingting blong hem i stap strong long wan samting, be samting ya i no kamtru, tingting blong hem i save foldaon, be taem samting ya i kamtru, hem i glad we i glad.” (Ol Proveb 13:12) Long tingting blong sam man blong Jeova, en blong wol ya i stap longwe yet. Ol Kristin oli faenem se taem naoia i ‘strong tumas’ long olgeta, olsem we i strong long ol man we oli no bilif.​—2 Timoti 3:​1-5.

Be, defren long ol man we oli no bilif, ol Kristin oli mas glad blong luk ol traem ya olsem “saen” se Jisas i stap finis. Samting ya i soemaot se i no longtaem Kingdom blong God, bambae i finisim ol rabis fasin blong wol ya. (Matiu 24:​3-​14) Nomata se ol samting oli kam moa nogud​—olsem bambae i kamaot long taem blong “bigfala trabol”​—olgeta samting ya oli mekem yumi glad, from we oli soem se niufala wol blong God i stap kam.​—Matiu 24:21; 2 Pita 3:​13.

Sipos wan Kristin i tingbaot taem ya we Kingdom bambae i stretem olgeta problem blong wol, olsem samting we i longwe yet, bambae hem i stat spenem moa taem blong ronem ol sas samting. Sipos hem i letem sam samting olsem wok mo pleplei oli tekem taem mo paoa blong hem, bambae i hadwok long hem blong mekemgud ol wok we Baebol i talem se yumi mas mekem. (Matiu 6:​24, 33, 34) Sam tingting olsem, i save mekem se yumi harem nogud mo tingting i foldaon. Wan elda we i goraon i talem se: “Yumi giaman long yumi wan, sipos yumi wantem wokem wan niufala wol blong yumi long wol blong naoia.”

Tufala Beswan Rod Blong Winim Problem Ya

Afta we yumi lukluk problem ya, ?olsem wanem yumi save faenem wan rod we i naf blong winim problem ya? Fasin blong stadi yumi wan i beswan rod. ?From wanem? Wan elda we i goraon i talem se: “Fasin ya i mekem se yumi tingbaot oltaem, from wanem yumi mas gohed blong mekem samting ya we yumi mekem.” Mo tu, wan narafala elda we i goraon, i talem se: “Sipos yumi prij olsem we i wan kastom nomo long yumi, long taem we bambae i kam, wok ya i save kam olsem wan baden.” Be sipos yumi gat wan gudfala program blong stadi yumi wan, samting ya i save halpem yumi blong lukluk klia long wok we yumi mas mekem long taem ya we yumi stap klosap long en. Folem sem tingting, Baebol i talem long yumi bakegen se, trufala glad long wok blong God i joen wetem fasin blong yumi blong kakae gud long saed blong spirit.​—Ol Sam 1:​1-3; 19:​7-​10; 119:​1, 2.

Ol elda oli save givhan long ol narafala blong winim tingting we i foldaon, taem oli go visitim ol sipsip blong leftemap tingting blong olgeta. Long taem blong ol visit ya, ol elda oli save soem se oli tinghae long wanwan long yumi, mo oli save soem se yumi impoten long ae blong Jeova. (1 Korin 12:​20-​26) Wan elda i tokbaot sam Kristin brata sista, i se: “Blong leftemap tingting blong olgeta, mi mekem se oli tingtingbak long wok we oli bin mekem bifo. Mi makemaot se oli sas tumas long ae blong Jeova mo hem i givim blad blong pikinini blong hem blong pemaot olgeta. Oltaem toktok ya i mekem olgeta oli haremgud. Mo taem yumi joenem ol tok ya wetem sam vas blong Baebol, olgeta we tingting blong olgeta i foldaon, oli naf blong putum sam niufala mak we bambae oli traem blong kasem, olsem prea long famle, mo stadi mo ridim Baebol.”​—Hibrus 6:​10.

Taem ol elda oli visitim ol sipsip blong leftemap tingting blong olgeta, oli mas lukaot blong no mekem ol sipsip ya oli ting se God i neva save glad long ol samting we yumi mekem. Be, ol elda oli save givhan long olgeta we tingting i foldaon, blong oli luk se, samting we Jisas i putum long solda blong ol man blong hem, i no hevi. Ale, Kristin wok blong yumi bambae i save mekem yumi glad.​—Matiu 11:28-​30.

Winim Tingting We i Foldaon

Nomata wanem risen i mekem tingting blong yumi i foldaon, yumi no mas letem tingting ya i winim yumi. No fogetem se yumi no stap yumi wan long faet ya. Sipos tingting blong yumi i slak, yumi mas letem ol Kristin brata sista blong yumi, antap moa ol elda, oli halpem yumi. Sipos yumi mekem olsem, yumi save daonem tingting ya we i foldaon.

Antap long ol samting ya, yumi nidim blong askem God blong givhan long yumi blong winim tingting ya. Sipos yumi prea oltaem long Jeova, hem i save halpem yumi blong faet agensem tingting ya we i foldaon, gogo yumi winim fulwan. (Ol Sam 55:22; Filipae 4:​6, 7) Nating se i olsem wanem, yumi ol man blong God yumi save gat sem filing olsem man blong raetem Sam, we i sing se: “Olgeta we oli stap singsing blong presem yu, oli glad tumas. Oltaem yu yu kaen gud long olgeta, nao i olsem we oli stap wokbaot long delaet. Yu yu mekem olgeta oli haremgud, i stat long moning go kasem long sapa. Mo oltaem oli stap presem yu from ol gudgudfala fasin blong yu. Oltaem yu yu mekem mifala i stap win gud long faet. Yu stap mekem mifala i win from we yu lavem mifala tumas.”​—Ol Sam 89:​15-​17.

[Ol futnot]

[Tok Blong Pija Long Pej 31]

Ol elda we oli gat lav, oli visitim ol sipsip blong mekem olgeta oli strong moa, nao oli naf blong winim tingting ya we i foldaon