‘Oli Tokbaot Gudfala Fasin Mo Lav’

LONG ol yia we oli jes pas, ol man oli mekem plante toktok blong spolem ol Witnes blong Jeova long Franis. Ol man ya we oli agensem ol Witnes oli yusum ol giaman tok mo ol save we oli no stret blong spolem olgeta long pablik. Long stat blong 1999, ol Witnes blong Jeova raon long Franis oli seremaot 12 milian kopi blong traket ya we nem blong hem se !Olgeta Man Franis, Ol Man Ya Oli Giaman Long Yufala! Long traket ya, oli talemaot klia se ol tok ya we ol man oli talem agensem olgeta, oli giaman stret.

Sam dei nomo afta we oli seremaot ol traket ya, wan dokta, Mr. Jean Bonhomme, we bifo hem i wan memba blong Palamen, i sanem wan leta i go long niuspepa blong ples ya. Hem i raetem se: “Plante taem ol Witnes blong Jeova oli stap kam long haos blong mi. Oli kam blong tokbaot ol gudfala fasin mo lav bitwin evri man long wol. . . . Oli no fosem man blong lesin long olgeta. Oli toktok long kwaet fasin mo oli lesin wetem kaen fasin, taem mi talemaot ol tingting blong mi we i hafhaf.”

Taem hem i stap tokbaot tingting blong ol Witnes blong Jeova long saed blong spirit, Mr. Bonhomme i talem se: “Long saed blong olgeta, oli no waes nating long ol bisnes blong wol ya, be samting ya i no save spolem laef blong man. Long defren fasin, ol man blong politik we oli no gat waes, oli mekem se ol manples oli no moa gat pis mo i no moa gat fasin joengud long komuniti.”