Ripot Long Wok Blong Kingdom
Ol Witnes Oli Go Long Ol Man Long Franis
STAT long Fraede moning, Janewari 29, 1999, go kasem Sande, ol Witnes blong Jeova long Franis oli glad tumas blong seremaot 12 milyan kopi blong traket ya we nem blong hem !Ol man Franis, ol man oli stap giaman long yufala! Oli seremaot traket ya long rod mo biaen, long ol haos wanwan. ?From wanem oli mekem spesel wok ya?
Long wan miting wetem ol man blong nius long Paris long Fraede ya, long moning, oli talemaot from wanem oli mekem spesel wok ya. Wan Witnes i eksplenem se: “Samting we mifala i wantem mekem tede i blong givhan long ol man blong oli save mifala mo blong blokem ol giaman tok we ol man oli stap talem agensem mifala. Mifala i rere blong harem ol tok agens, be mifala i no moa wantem harem ol giaman tok mo ol tok we i blong spolem nem blong mifala.”
Nating se ol Witnes blong Jeova oli namba tri bigfala skul long Franis, ol man oli bin tok nogud mo mekem trabol long plante pikinini blong olgeta long skul. Sam Witnes we oli bigman finis, oli lusum wok blong olgeta mo ol man oli mekem i nogud long olgeta from bilif blong olgeta. Wan samting we i mekem yumi sapraes bigwan, hemia se presen mane we ol Witnes oli kasem long skul blong olgeta, gavman i askem 60-pesen olsem takis. ?Olsem wanem spesel wok blong seremaot traket ya i givhan blong blokem fasin agensem ya?
Traket ya i talem se: “Olgeta 250,000 Witnes blong Jeova mo ol fren blong olgeta long Franis, OLI TOK AOT AGENS long giaman fasin blong ol man we oli talem se Kristin Skul blong ol Witnes, we i stat long Franis long yia 1900, i kam wan long ol grup blong skul we oli denja tumas stat long 1995. . . . OLI TOK AOT AGENS long fasin ya we oltaem ol man oli stap mekem trabol long olgeta.” Traket ya i soemaot klia se ol tok we oli agensem ol Witnes long Franis oli giaman nomo, mo i soemaot klia kruked fasin blong olgeta we oli wantem spolem nem blong ol Witnes long pablik. Lastok blong traket ya i talem se: “Tede, bitim tu milyan Witnes blong Jeova mo ol fren blong olgeta oli stap long Yurop. Olgeta oli gat bigfala respek long ol loa blong kantri we oli stap long hem, mo oli soemaot samting ya taem oli folem ol gudfala tok blong Gospel. Ol man Franis, hemia trutok ya. Mo hem i wok blong mifala blong talemaot.”
Kwiktaem Nomo, Ol Man Oli Talem Gudfala Toktok From Traket Ya
Long faswan dei, ol Witnes oli seremaot plante milyan kopi blong traket ya. Long Paris nomo, long medel dei, bitim 7,000 Witnes oli seremaot 1.3 milyan traket long ol man. Hemia fastaem we ol man oli luk plante Witnes oli stap seremaot ol traket long rod. Ol man blong niuspepa mo televisin, oli soem se oli glad long wok ya. Hem i wan wok we i givhan long ol man blong save trutok long saed blong ol Witnes. Niuspepa ya Le Progrès de Lyon i talem se: “Traket ya . . . i givhan blong stretem rong tingting we man i kasem long saed blong wan tok. Long ol ten yia we oli jes pas, tok ya ‘sekt’ (grup blong skul we bilif blong olgeta i narakaen) . . . i gat niufala mining ya se, wan grup blong skul we i rabis, i denja mo i spolem man. . . . Ol Witnes blong Jeova oli no wan denja long ol man raonabaot long olgeta.”
Ol man we oli savegud ol Witnes blong Jeova, oli luksave se ol Witnes oli man blong pis mo oli gat bigfala respek long stret oda we i stap. Taswe, plante man long rod oli talem se oli glad mo oli sapotem ol Witnes we oli joen long spesel wok ya. Kwiktaem nomo, ol man oli telefon, mo oli sanem ol leta mo faks i go blong talem tangkiu from traket ya. Antap long hemia, ol gudfala man oli gat jans blong harem trutok long saed blong ol Witnes. Trutok ya i defren olgeta long ol giaman tok mo ol krangke tok we oli bin harem fastaem. Mo olgeta we oli bin harem nogud from ol tok we i agensem bilif blong olgeta, oli gat jans blong soemaot filing blong olgeta long saed blong bilif blong olgeta we oli laekem tumas.