Wol—?Wan Ples Blong Traem Man Nomo?

!STUDEN ya i harem gud bigwan! Hem i pas. Afta long tu wik blong bigfala tes long skul, studen ya i kasem wan gudfala ripot. Naoia hem i naf blong mekem wok ya we oltaem hem i bin wantem mekem.

Plante man oli luk se hemia i sem mak wetem laef long wol ya. Oli tingbaot laef ya olsem wan tes, no traem, we evriwan i mas fesem. Olgeta we oli “pas” oli save muf i go long wan samting we i moa gud, wan narafala laef. I no stret sipos beswan laef we man i save gat hemia laef ya blong naoia—we i no gat mining long tingting blong plante man. Nating se Job, man ya we Baebol i tokbaot, i helti mo i gat plante samting, hem i talem se: “Man we i bon long woman, laef blong hem i sot nomo, mo i fulap long ol trabol.”—Job 14:1, NW.

New Catholic Encyclopedia i soemaot tingting we plante man oli gat, i se: “Naesfala heven ya, hem i ples we God i rerem finis blong ol man oli go stap long hem. . . . Man i save haremgud nomo sipos hem i kasem paradaes long heven.” Long Yunaeted Stet, Jos Blong Kraes i mekem wan stadi we i soemaot se 87 pesen blong olgeta we oli ansa long ol kwestin blong stadi ya, oli bilif se bambae oli go long heven afta we oli ded.

Plante man we oli no Kristin olgeta tu oli bilif se afta we oli ded bambae oli aot long wol ya blong go long wan ples we i moa gud. Eksampol, ol Muslim oli hop blong go long wan paradaes long heven. Long Jaena mo Japan, olgeta we oli stap joen wetem ol smol grup we oli kolem Klin Kantri long skul ya Budis, oli bilif se sipos oli gohed blong talem bakegen mo bakegen tok ya “Amitabha,” hemia nem blong Buda ya blong Laet We i Neva Finis, bambae oli save bon bakegen long Klin Kantri ya no Paradaes Blong Wes. Nao long ples ya bambae oli haremgud moa i bitim long wol ya.

Be i gud blong save se Baebol, tabu buk ya we i stap long plante lanwis mo we oli seremaot plante long wol, i no tokbaot wol ya olsem wan ples we man i stap long hem bifo we oli go long ol narafala ples we i moa gud. Eksampol, hem i talem se: “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.” (Ol Sam 37:29) Long Baebol yumi save faenem bigfala toktok blong Jisas se: “Olgeta we oli kwaet man oli save kasem blesing: from we bambae oli tekem graon ya i blong olgeta.”—Matiu 5:5, King James Version.

Tingting ya se laef blong yumi long wol ya i blong smol taem nomo, i minim se ded i olsem wan rod we i lidim man i go long wan narafala laef we i gud olgeta. Sipos i olsem, i sua se ded hem i wan blesing. ?Be, plante man oli gat tingting olsem long saed blong ded, no oli stap traem blong mekem laef blong olgeta i longfala? Plante samting oli soemaot se taem ol man oli harem gud long wan gudfala helt mo oli stap sefgud, oli no wantem ded.

Nating se i olsem, plante man oli tingbaot heven olsem ples ya nomo we oli save faenem trufala pis mo haremgud, from we laef blong wol ya i fulap wetem rabis fasin mo fasin safa. ?I tru se heven i wan paradaes blong pis, we i no save gat rabis fasin no fasin seraot long hem? ?Mo sipos i gat wan narafala laef long fiuja, laef ya i stap long heven nomo? Maet bambae yu sapraes long ol ansa blong Baebol. Plis gohed blong ridim ol haf biaen.