?From Wanem Yumi Mas Wokem Ol Fasin We Oli Gud?

WAN man Japan we i medel man finis, nem blong hem Kunihito, i jes muf nomo i go long Yunaeted Stet.a Sam wik afta we hem i kasem Yunaeted Stet, wan samting i hapen long hem we i mekem se klosap nomo hem i lusum wok blong hem. Kunihito i talem se: “Taem bos blong mi i askem long mi sipos mi save lukaot long wan spesel wok, mi harem se mi naf blong mekem wok ya. Be, long kantri blong mi, taem mi mi wan pikinini, oli tijim mi se tingting daon hem i wan gudfala fasin. Taswe mi talem long bos blong mi se: ‘Mi no sua sipos mi save mekem wok ya, be bambae mi traem bes blong mi.’ Long tingting blong bos blong mi we i man Amerika, ansa ya i soem se mi no naf mo mi no sua blong mekem gud wok ya. Taem mi faenemaot se bos blong mi i tingting olsem, mi luksave se mi nidim blong jenisim sam fasin blong mi.”

Maria we i stap long New York Siti, i wan gudfala studen we i glad oltaem blong halpem ol fren blong hem long skul. Juan i wan long ol studen ya we Maria i stap givhan long hem. Be Juan i stat blong laekem Maria, mo hem i traem pulum Maria blong i laekem hem tu. Nating se Maria i wantem stap klin long ol fasin blong hem, hem i foldaon long traem we Juan i mekem blong pulum hem, nao tufala i mekem nogud long saed blong seks.

Yumi mas faet strong blong wokem ol gudfala fasin long wol ya we ol kastom blong hem oli defdefren mo ol rabis fasin blong hem oli plante tumas. ?From wanem nao yumi mas wokem ol gudfala fasin? From we ol gudfala fasin oli mekem God i glad, mo i sua se plante long yumi i wantem tumas blong hem i glad long yumi.

Tok blong God, Baebol, i givim advaes long ol man we oli ridim long hem se oli mas wokem ol gudfala fasin. Eksampol, aposol Pol i raetem se: “Mo yufala i mas putum tingting blong yufala i stap strong long ol fasin olsem. Ol fasin ya oli tru, mo oli hae, mo oli stret, mo oli klin gud, mo oli save mekem yumi harem gud, mo ol man oli stap ona long olgeta we oli stap mekem ol fasin ya.” (Filipae 4:8) Mo aposol Pita i talemaot strong bakegen se, ‘yumi gat fasin blong bilif finis, ale yumi mas joenem long stret fasin.’ (2 Pita 1:​5, Nyutesteman Wetem Ol Sam Long Bislama) ?Be wanem ya gudfala fasin? ?Oli save tijim samting ya long ol skul? ?Olsem wanem nao yumi save wokem fasin ya?

[Futnot]