Laef Wetem Ol Denja
“Olgeta samting we yumi mekem evri dei—olsem slip tu—oli save karem denja i kam long yumi, mekem se sam long ol samting ya, yumi no wantem nating blong mekem.”—Niuspepa Ya Discover.
LAEF blong man i olsem wan graon we oli planem fulap bom long hem. Man we i wokbaot long graon ya i save kasem kil no lusum laef blong hem long eni taem, mo plante long ol taem ya hem i no kasem woning nating. Ol denja we man i fesem oli defdefren, i dipen long kantri we hem i stap long hem. Maet denja i kamaot from aksiden long trak, faet bitwin ol manples, sot long kakae, ol sik olsem AIDS, kansa, sik blong hat, mo plante narafala samting bakegen. Eksampol, long saot blong Sahara long Afrika, bighaf blong ol man oli ded from sik ya AIDS. U.S.News & World Report i tokbaot sik ya AIDS mo i talem se, long wan yia we i pas i no longtaem, “2.2 milian man oli ded. Namba ya i ten taem antap long namba blong ol man we oli ded long Afrika from ol faet bitwin ol laen.”
Long semtaem, ol man blong wol oli spenem bigfala mane blong mekem se laef blong ol man i longfala moa, mo blong daonem denja we i stap long saed blong sik no kil long bodi we i save spolem laef blong man. Sam long ol tingting we ol man oli stap leftemap mo we oli givhan long helt, hemia blong skelemgud kakae mo dring, mo blong mekem eksasaes. Be, i gat wan samting we i stamba blong ol save we yumi save trastem, mo we i givhan long evri impoten samting long laef blong yumi, blong mekem se laef blong yumi i sefgud moa. Stamba samting ya hemia Baebol. Baebol i soemaot sam rod we oli save halpem yumi blong winim plante wari long saed blong helt mo laef. I tru se, Baebol i no tokbaot rod blong winim evri smosmol problem we yumi kasem. Be, i gat sam nambawan rul long Baebol blong lidim yumi long saed blong kakae, eksasaes, tingting, seks, alkol, tabak, mo ol drag we man i yusum blong haremgud, mo plante narafala samting bakegen.
Plante man oli harem nogud long laef blong olgeta from ol wari long saed blong mane. Long saed ya tu, Baebol i save givhan. Hem i pulum yumi blong gat wan stret tingting long saed blong mane mo blong no spenem mane olbaot. Be i no samting ya nomo. Baebol i soemaot tu, olsem wanem yumi save kam moa gud long fasin blong yumi olsem wan man blong wok mo olsem wan bos. Blong talem stret, Baebol i no jes lidim yumi blong lukaotgud long mane mo helt blong yumi, be tu, hem i save lidim yumi blong lukaotgud long laef blong yumi. ?Yu yu wantem save olsem wanem Baebol i save givhan long laef blong yumi tede? Plis gohed blong ridim nekis haf.