Ripot Long Wok Blong Kingdom

India​—“Fasin Joengud Long Medel Blong Ol Man We Oli Defren”

“FASIN joengud long medel blong ol man we oli defren.” Long India, ol man oli yusum toktok ya plante blong tokbaot fasin joen blong ol defren laen blong man. Long wan kantri olsem India, we i fulap long ol defren kastom, lanwis, skul, mo laen blong man, i no isi nating blong joengud tugeta. Be, yumi save faenem fasin ya long ofis blong ol Witnes blong Jeova long India. Ol man we oli wok mo laef long ples ya oli kamaot long plante defren stet mo teritori blong India, mo oli toktok long plante defren lanwis.

• Wan long olgeta we oli wok long ples ya, hem i Rajrani​—wan yangfala woman we i kamaot long Punjab, long not wes blong India. Taem Rajrani i skul yet, wan long ol skulfren blong hem i stat blong stadi Baebol wetem ol Witnes blong Jeova. Yangfala fren ya i traem pulum Rajrani blong intres long Baebol. From we fren ya i save smol Inglis nomo, mo Wajtaoa long taem ya i no kamaot yet long lanwis blong Punjab, hem i askem Rajrani blong tanem ol stori blong Wajtaoa i kam long lanwis blong hem. Sloslou ol samting we Rajrani i ridim long Wajtaoa i gat paoa long laef blong hem. Nating se papa mama blong hem, tufala i agensem hem, Rajrani i gohedgud mo i givim laef blong hem long Jeova God. Tede hem i wok long Betel blong India, i stap mekem semfala wok ya we hem i bin mekem taem hem i harem trutok fastaem. !Hem i stap tanem ol Kristin buk i go long lanwis blong Punjab!

• Mo tu, i gat Bijoe, we hem i kamaot long wan narafala haf blong India​—hemia stet blong Kerala we i stap long saot wes. Taem Bijoe i stap long hae skul yet, skul i sakemaot hem from we hem i no wantem joen long ol lafet blong leftemap kantri. Hem i pas long kot from bisnes ya, mo disisen blong kot i stanap long saed blong trufala wosip, ale, Bijoe i gobak long skul.a Biaen hem i go long kolej. Be taem hem i stap long kolej, tingting blong hem i stikim hem from ol nogud fasin blong ol narafala studen. From samting ya, hem i lego kolej. Naoia hem i stap ten yia finis long Betel, olsem wan memba blong Betel famle. Nating se ol memba blong Betel famle oli kamaot long ol defren laen, oli joengud tugeta, mo long tingting blong Bijoe, fasin ya i givhan moa long hem bitim wanem we hem i save kasem from wan hae edukesen.

• Norma mo Lily, tufala i gat bitim 70 yia finis, mo tufala i wido woman blong plante yia. Wanwan long tufala i prij fultaem bitim 40 yia finis. Lily i wok long branj ofis samwe long 20 yia finis. Hem i stap tanem ol Kristin buk i go long lanwis blong Tamil. Norma i kam wok long Betel 13 yia bifo, afta we hasban blong hem i ded. Antap long gudfala eksampol we tufala i soem blong wok strong mo traehad, tufala i gat wan fasin we i pulum fulwan famle long Betel blong joengud. Tufala i laekem blong singaot man i kam kakae long rum blong tufala, mo tufala i glad blong kampani wetem ol yangfala memba blong Betel famle, mo tufala i storian long ol gudfala taem we tufala i kasem long Kristin laef blong tufala long ol yia we oli pas. Mo ol yangfala tu, oli singaot tufala i kampani wetem olgeta long rum blong olgeta mo oli glad blong mekem eni wok blong givhan long tufala taem i nidim. !Eksampol blong tufala ya, i gud tumas!

Ol man ya we oli rere blong wok fri blong givhan long ol narafala, oli win agensem ol fasin we oli mekem man i seraot mo faet long plante ples long wol. Oli glad blong wok tugeta olsem ol memba blong Betel famle long India, we i joengud.​—Ol Sam 133:1.

[Futnot]

[Foto Credit Line blong pija long pej 8]

Background: Mountain High Maps® Copyright © 1997 Digital Wisdom, Inc.