Ol Elda—Trenem Narafala Blong Holem Wok

LONG ol kongregesen blong ol Witnes blong Jeova raon long wol, i nidim moa brata blong lukaot long ol wok insaed long kongregesen. I gat tri bigfala risen from wanem i nidim moa brata.

Faswan risen. Jeova i stap mekem promes blong hem i kamtru se “smolwan bambae i kam wan bigfala nesen.” (Aesea 60:​22, NW ) From kaengud fasin mo gladhat blong Jeova, long ol tri yia we i pas, i gat klosap wan milian niufala disaepol oli tekem baptaes blong kam ol Witnes blong Jeova. I nidim moa brata we oli rere blong wok, blong halpem ol niuwan ya we oli jes baptaes blong oli kam ol Kristin we oli bigman long saed blong spirit.​—Hibrus 6:1.

Namba tu risen. Sam brata we oli mekem wok blong elda blong plante yia finis, naoia maet oli kam olfala no maet oli sik mo oli no moa save lukaot long plante wok insaed long kongregesen.

Namba tri risen. Plante long ol Kristin elda oli wok tu long ol komiti olsem, Komiti blong Hospital, Komiti blong Bildim ol Haos, no Komiti we i lukaot long ol Haos Asembli. Sam long ol elda ya oli luk se oli mas letem sam wok blong kongregesen i go long han blong narafala elda from we oli no save mekem tufala wok ya wantaem.

?Olsem wanem blong gat moa man we oli naf blong wok olsem elda? Wan impoten samting hemia trening. Baebol i talem se ol Kristin elda oli mas trenem ol ‘man we oli save trastem olgeta, se oli naf blong tijim ol narafala man bakegen long ol tok ya.’ (2 Timoti 2:2) Wan diksonari i talem se veb ya “trenem” i minim se man i “tijim narafala blong mekem hem i stret long wan wok, i naf blong mekem, mo i karem frut long wok ya.” I gud we naoia yumi luk olsem wanem ol elda oli save trenem sam narafala man we oli naf blong karem wok olsem.

Folem Fasin Blong Jeova

Jisas Kraes hem i ‘stret, i naf, mo i karem frut’ long wok blong hem. Yumi no sapraes long samting ya from we Jeova God hem wan i tijim Jisas. ?Wanem impoten poen i mekem se trening ya i wokgud? Jisas i tokbaot tri poen, olsem i stap long Jon 5:20 “Papa blong mi, [1] hem i lavem mi tumas, mo [2] hem i stap soemaot long mi olgeta samting we hem i stap mekem. Mo bambae hem i save soemaot long mi [3] ol samting we oli bigwan moa long ol samting ya.” Bambae yumi kasem moa save long saed blong fasin blong trenem narafala, sipos yumi lukluk moa long mining blong vas ya.

Makem faswan poen ya we Jisas i talem se: “Papa blong mi, hem i lavem mi tumas.” Longtaem finis, long stat we God i wokem evri samting, i gat wan spesel fasin fren i stap bitwin Jeova mo Pikinini blong hem. Ol Proveb 8:30 i givim moa save long saed blong fasin fren blong tufala i se: “Mi [Jisas, mi] stap stanap long saed blong hem [Jeova God], mi olsem man we i mekem ol plan we hem i stap folem. Evri dei, mi stap mekem hem i glad, mo oltaem nomo, mi harem gud blong stap wetem hem.” Jisas i sua fulwan se Jeova i “glad” long hem. Mo Jisas i no haedem glad we hem i gat blong wok wetem Papa blong hem. !I naes tumas taem ol Kristin elda wetem olgeta we oli stap trenem olgeta blong mekem wok oli frengud tugeta long fasin we oli no fraet blong tokbaot evri samting tugeta!

Seken samting we Jisas i tokbaot hemia se Papa ‘hem i stap soemaot long hem olgeta samting we hem i stap mekem.’ Ol tok ya oli pruvum wanem we i stap long Ol Proveb 8:30, hemia se, Jisas i “stap stanap” klosap long Jeova taem hem i wokem olgeta samting long heven mo wol. (Jenesis 1:26) Ol elda oli save folem nambawan fasin ya taem oli wok gud wetem ol man blong givhan, oli soem long olgeta ya olsem wanem blong mekem gud olgeta wok blong olgeta. Be trening ya, oli no mas givim nomo long ol man blong givhan we oli niu long wok ya. Tingbaot ol brata ya tu we oli stanap strong longtaem long trutok mo maet oli wantem tumas blong kasem wan wok insaed long kongregesen be oli no kasem yet. (1 Timoti 3:1) Ol elda oli mas givim klia advaes long ol brata olsem, blong oli save wanem samting yet oli mas traehad long hem, blong kam naf long wok ya.

Tingbaot eksampol ya. Maet wan man blong givhan i wokgud, i neva let, mo i tinghevi long ol wok blong hem. Mo tu, maet hem i gat gudhan blong tij. From olgeta samting ya maet hem i stap mekem nambawan wok insaed long kongregesen. Be, maet hem i no luksave se fasin blong hem i strong taem hem i stap toktok long ol Kristin brata sista. Ol elda oli mas soemaot ‘tingting daon, mo waes.’ (Jemes 3:13) Wan elda i save soem kaen fasin mo toktok wetem man blong givhan ya. Hem i save talem stret wanem problem we i stap, mo yusum sam klia eksampol blong soem samting ya, nao hem i save givim sam advaes blong hem i kam moagud. Sipos elda ya i putum smol ‘sol long toktok blong hem,’ man blong givhan bambae i no save harem nogud long tok blong hem. (Kolosi 4:​6, NW ) Be i tru tu se, wok blong elda ya bambae i isi moa sipos man blong givhan i rere blong lesin mo folem advaes we hem i kasem.​—Ol Sam 141:5.

Long sam kongregesen, ol elda oli stap soemaot finis ol gudfala rod long ol man blong givhan, blong trenem olgeta. Eksampol, taem oli go blong visitim ol brata sista we oli sik no we oli olfala, oli tekem ol man blong givhan wetem olgeta. Long rod ya, ol man blong givhan oli kasem save long wok blong visitim ol sipsip blong leftemap tingting blong olgeta. Be i tru tu se wan man blong givhan i mas traehad hem wan blong hem i gru long saed blong spirit.​—Lukluk bokis we nem blong hem “Sam Samting We Ol Man Blong Givhan Oli Save Mekem.”

Namba tri poen we i mekem se trening we Jisas i kasem i wok gud, hemia se Jeova i tingbaot fiuja taem hem i stap givim trening ya. Jisas i talem se Papa bambae i soem long Pikinini “ol samting we oli bigwan moa long ol samting ya.” Save we Jisas i kasem taem hem i stap long wol i halpem hem blong wokem sam gudfala fasin we bambae hem i nidim long wok we hem i mekem long fiuja. (Hibrus 4:15; 5:​8, 9) Eksampol, tingbaot bigfala wok ya we Jisas bambae i mekem i no longtaem blong givim laef bakegen long plante bilian dedman.​—Jon 5:​21, 22.

Taem ol elda oli trenem ol man blong givhan tede, oli mas tingbaot ol yia we bambae oli kam. I tru se maet naoia i gat inaf elda mo man blong givhan long kongregesen we i stap. ?Be olsem wanem sipos wan niufala kongregesen i stanap? ?Olsem wanem sipos plante niufala kongregesen oli stanap? Long ol tri yia we i pas, i gat moa long 6,000 niufala kongregesen long fulwol. !I nidim plante elda mo plante man blong givhan blong lukaot long olgeta kongregesen ya!

?Sipos yu yu wan elda, yu stap folem fasin blong Jeova blong frengud wetem olgeta we yu stap trenem olgeta? ?Yu yu stap soem long olgeta olsem wanem blong mekem gud wok blong olgeta? ?Yu yu stap tingbaot ol nid blong fiuja taem yu trenem olgeta? Sipos yu folem eksampol we Jeova i soem taem hem i trenem Jisas, bambae yu mekem we ol narafala oli kasem plante blesing.

No Fraet Blong Putum Wok Long Han Blong Narafala

Ol elda we oli lan blong mekem plante impoten wok wantaem, maet oli faenem i had blong givim sam long ol wok ya long narafala. Maet oli bin mekem samting ya finis samtaem, be oli luk se narafala i no mekem gud wok ya. Ale, maet oli gat tingting ya se: ‘Sipos mi wantem se wok ya i finis gud, i moagud we mi nomo mi mekem.’ ?Be olsem wanem? ?Tingting ya i laenap wetem tingting blong Jeova olsem we Baebol i tokbaot, se ol man we oli gat save oli mas trenem olgeta we oli nidim save?​—2 Timoti 2:2.

Aposol Pol i harem nogud tumas taem Jon Mak i lego wok we oli bin givim long hem, i livim Pol long Pamfilia mo i gobak long ples blong hem. (Ol Wok 15:​38, 39) Be, Pol i no letem smol trabol ya i spolem tingting blong hem blong trenem sam narafala long wok ya. Hem i jusum wan narafala yangfala brata, hemia Timoti, nao i trenem hem long wok blong misinari.a (Ol Wok 16:​1-3) Long Berea, ol man oli mekem bigfala trabol long ol misinari, mekem se i no waes we Pol i gohed blong stap long ples ya. Taswe, hem i lego niufala kongregesen ya i stap long han blong Saelas, wan olfala we i bigman finis long ol Kristin fasin, mo Timoti. (Ol Wok 17:​13-15) Ating Saelas i lanem Timoti long fulap samting. Biaen, taem Timoti i naf blong karem moa wok, Pol i sanem hem i go blong leftemap tingting blong kongregesen long Tesalonaeka.​—1 Tesalonaeka 3:​1-3.

Pol mo Timoti tufala i no wok tugeta olsem tu bisnesman we tufala i tokbaot wok nomo, nogat. Tufala i laeklaekem tufala olsem fren. Taem Pol i raet i go long kongregesen blong Korin hem i tokbaot Timoti, we bambae i sanem hem i go long olgeta ya. Hem i kolem hem se, “pikinini blong mi we mi mi lavem hem.” Hem i gohed se: “[Timoti] i save tijim yufala bakegen long ol fasin we mi stap folem long niufala laef ya we i kamaot long Jisas Kraes.” (1 Korin 4:17) Timoti i folemgud trening we hem i kasem long Pol, nao hem i kam nafgud blong mekem olgeta wok we oli givim long hem. I gat plante yangfala brata tede tu we oli kam man blong givhan, elda insaed long kongregesen, no elda we i goraon blong visitim ol narafala kongregesen, from we oli folem trening we oli kasem long sam narafala elda we oli soem intres long olgeta, olsem we Pol i bin mekem long Timoti.

!Yufala Ol Elda, Trenem Narafala!

I klia nomo se profet tok blong Aesea 60:22 (NW ) i stap kamtru tede. Yes Jeova i stap mekem “hemia we i olsem nating nomo bambae i kam wan strongfala nesen.” Blong mekem se nesen ya i stap ‘strong’ oltaem, hem i mas wok folem plan. Ol elda, i gud yufala i tingbaot ol defdefren rod blong givim trening long sam brata we oli naf blong kasem trening olsem. Meksua se wanwan long olgeta man blong givhan oli save gud wanem samting nao we oli nidim blong mekem blong kam gud moa. Mo yufala ol brata we i baptaes finis, tinghae long olgeta advaes mo trening we yufala i kasem. Yusum evri janis we yufala i kasem blong kamgud moa, kasem moa save, mo gat gudhan long wok blong yufala. Yumi sua se Jeova bambae i blesem ol plan ya blong halpem narafala wetem lav.​—Aesea 61:5.

[Futnot]

[Bokis blong pija long pej 30]

Sam Samting We Ol Man Blong Givhan Oli Save Mekem

I tru se ol elda nao oli mas givim trening long ol man blong givhan, be i gat plante samting we ol man blong givhan tu oli save mekem blong gru long saed blong spirit.

—Ol man blong givhan oli no ol les man, oli man we narafala i save trastem se bambae oli mekem gud evri wok we oli kasem. Oli mas lanem fasin blong stadi oltaem. Bigfala samting we bambae i givhan long olgeta blong gru, hemia stadi mo fasin blong mekem wanem we oli lanem i wok long laef.

—Taem wan man blong givhan i rerem wan tok blong givim long Kristin miting, hem i no mas fraet blong askem long wan elda we i gat gudhan, blong i givim sam advaes long saed blong wei we hem i save mekem tok ya.

—Wan man blong givhan i save askem long wan elda blong lukluk gud olsem wanem hem i givim tok blong hem long saed blong Baebol, mo givim advaes long hem biaen.

Ol man blong givhan oli mas lukaot advaes blong ol elda, lesin long advaes ya, mo folem. Long rod ya, ‘olgeta man bambae oli save luk we oli stap gohed gud long laef blong olgeta mo long wok blong olgeta.’​—1 Timoti 4:15.