Ministeriol Trening Skul​—⁠Doa We i Open Finis Blong Mekem Wan Gudfala Wok

¹ Jeova i yusum profet Jeremaea blong talemaot se: “Bambae mi mi jusumaot sam lida blong [ol man blong mi], blong oli stap lukaot long olgeta. Nao ol man blong mi bambae oli no moa save fraet, mo tingting blong olgeta i no moa save foldaon. Mo bambae i no gat wan long olgeta i lus.” (Jer. 23⁠:4) Tede, wok ya blong lukaot long ol man blong olgeta nesen, olsem we man blong lukaot long sipsip i lukaot long ol sipsip blong hem, i stap gohed yet. Plante taosen elda oli stap mekem wok ya long ol kongregesen. Mo tu, wan kampani blong ol yangfala man we oli plante olsem wota blong naet, oli glad blong yusum laef blong olgeta blong mekem wok blong Jeova. (Sam 110⁠:3) !Ol brata ya we oli gat tingtingdaon, oli wan bigfala blesing insaed long ol kongregesen blong ol man blong God! Be, wok i stap gohed strong yet blong karem kakae blong garen long saed blong spirit, taswe i nidim plante moa man yet we oli naf, mo we oli wantem givhan long ol Kristin brata blong olgeta.

² Gudfala rod i stap blong trenem ol elda mo ol man blong givhan we oli no mared blong oli save mekem moa wok. Rod ya, hemia Ministeriol Trening Skul. Long stat blong skul ya long 1987 kasem naoia, bitim 22,000 studen long samwe 140 kantri oli kasem trening long 999 klas. Long saed blong ol brata ya, skul ya i wan ‘doa we i open long olgeta, blong oli mekem wan gudfala wok.’​—⁠1 Kor. 16⁠:9.

³ Risen Blong Skul Ya: Wok blong Ministeriol Trening Skul i blong trenem ol man we oli naf, blong oli rere blong karem ol bigfala wok long ogenaesesen blong Jeova long ol ples we i gat nid. Skul ya i halpem ol brata ya blong oli kamgud moa long fasin blong lidim wok blong prij, givhan blong lukaot long ol sipsip, mo tij insaed long kongregesen. Sam studen oli finisim trening ya nao oli wok olsem ol spesel paenia mo ol seket elda long kantri blong olgeta no long narafala kantri. Sam long olgeta oli wok long kongregesen long ples blong olgeta nomo, no long wan narafala ples long teritori blong branj.

⁴ Long skul ya, ol studen oli stadi dip long Baebol blong eit wik. Oli stadi long plante defren tijing blong Baebol, mo long wok blong lukaot long ol sipsip, mo long ol rul blong stretem ol problem we oli kamaot long laef blong ol wanwan Kristin. Mo tu, oli lanem ol tijing blong Baebol long saed blong wok blong lidim ol narafala, ol wok insaed long ogenaesesen mo fasin blong stretem ol man we oli mekem bigfala sin. Oli kasem spesel trening long fasin blong toktok long fored blong plante man, mo olgeta wanwan oli kasem help blong kam bigman kwiktaem long saed blong spirit.

⁵ Ol Hae Mak: Yumi no sapraes se ol man we oli wantem go long skul ya, oli mas kasem ol hae mak. Oli mas mekem wok blong elda no man blong givhan blong tu yia finis. Yia blong olgeta i mas bitwin 23 mo 50 mo oli no mared. Oli mas naf blong rid, raet, mo toktok gud long lanwis we skul i stap long hem, mo oli mas gat strong bodi we oli no nidim spesel meresin mo kakae. Sosaeti i jusum fastaem ol brata we oli stap mekem wok blong fultaem paenia.

⁶ Ol brata we oli wantem go long skul ya oli mas glad mo oli mas naf blong go long eni ples we i gat nid. Hemia i min se oli mas gat sem tingting olsem profet Aesea, we hem i glad blong mekem wan spesel wok, i talem se: “!Mi ya, mi save go! !Yu sanem mi!” (Aes. 6⁠:8) Aesea i soemaot tingting daon tu long laef blong hem. Ol brata we oli go long Ministeriol Trening Skul oli mas lavem ol Kristin brata sista blong olgeta mo oli mas wantem tumas blong givhan long olgeta. Oli no mas wantem kam ol impoten man we oli gat hae posisen nomo. Ol brata oli mas yusum gudfala trening ya we oli kasem blong givhan long ol narafala.​—⁠Luk 12⁠:48.

⁷ Ol Gudfala Frut: Long strong trening ya blong eit wik, ol brata ya oli kasem ‘ol tok blong fasin blong bilif long God mo ol gudfala tijing, olsem we ol tok ya oli gudfala kakae blong olgeta.’ (1 Tim. 4⁠:6) Samting ya i mekem se oli naf blong givhan long ol narafala mo leftemap tingting blong ol brata sista long ol kongregesen mo seket we oli go wok long olgeta. Long plante ples we ol studen blong Ministeriol Trening Skul oli go wok long olgeta, wok blong prij i kam antap moa, oli leftemap tingting blong plante narafala blong oli mekem wok blong paenia, antap moa ol yangfala, mo oli givhan long ol niuwan we oli stap joen wetem ol man blong God.

⁸ ?Olsem wanem long yu? ?Yu yu wan elda no man blong givhan we yu no mared mo yia blong yu i bitwin 23 mo 50? Ale, i gud yu tingbaot blong fulumap pepa blong askem blong go long Ministeriol Trening Skul. Maet yu yu wan yangfala brata we yu stap mekem plan blong kasem ol hae mak long wok blong Jeova. I gud yu no mekem laef blong yu i fasfas mo yu no letem plante samting i pulum tingting blong yu i go long narafala rod. Olsem nao, bambae yu save pas long ‘doa ya we i open finis long yu blong mekem wan gudfala wok.’ Long rod ya, bambae yu save haremgud mo kasem bigfala glad. Tru ya, Ministeriol Trening Skul i karem blesing long ol brata we oli mekem kos ya. Be i no hemia nomo. Hem i karem blesing i go long ol kongregesen blong ol man blong God long olgeta ples blong wol.

[Bokis blong pija long pej 3]

?Olsem Wanem Trening Ya i Givhan Long Olgeta?

“Trening ya i rili givhan long mi blong kamgud moa long wok blong prij, mo i halpem mi blong yusum Baebol blong lukaot long ol sipsip long waes fasin.”

“Skul ya i mekem se mi sua moa nao olsem wanem blong mekem ol wok blong mi insaed long kongregesen.”

“Skul ya i jenisim klosap evri haf blong laef blong mi, mo i jenisim filing blong mi tu long saed blong fasin blong God blong rul long yumi mo long saed blong ogenaesesen blong Hem.”

“Trening we mi mi kasem i halpem mi blong luksave se mi mas glad blong wok long eni ples we i nidim moa brata.”