Gohed Nating Se ‘Nil Aranis i Stikim Yu’

“Mi mi save givhan long yu long gladhat blong mi, mo hemia i naf blong holem yu.”​—2 KORIN 12:9.

1, 2. (a) ?From wanem yumi no sapraes we yumi stap kasem ol traem mo problem? (b) ?From wanem yumi save stanap strong taem yumi kasem ol traem?

“OLGETA man we oli wantem joen long Jisas Kraes blong mekem laef blong olgeta i stret long fes blong God, bambae ol man oli save mekem i nogud tumas long olgeta.” (2 Timoti 3:​12) ?From wanem? From we Setan i wantem tumas blong pruvum se ol man oli mekem wok blong God jes blong kasem samting nomo. Jisas i bin talem long ol gudfala aposol blong hem se: “Setan i askem finis long God, blong i letem hem i kam traem bilif blong yufala blong seraot yufala, olsem we man i sevem sanbij blong sakemaot korel.” (Luk 22:31) Jisas i save gud we God i letem Setan i traem yumi wetem ol problem we oli strong lelebet. Be hemia i no minim se, evri hadtaem we yumi fesem long laef oli kamaot stret long Setan mo ol rabis enjel blong hem, nogat. (Prija 9:11) Be Setan i rere blong yusum eni samting we i stap long han blong hem blong pulum yumi blong lego God.

² Baebol i talem se yumi no mas letem ol traem oli mekem tingting blong yumi i fasfas. Nomata wanem kaen traem we i kasem yumi, yumi no sapraes mo tingting se i narakaen we traem ya i kasem yumi. (1 Pita 4:12) Tru ya, “long evri ples long wol, ol brata blong yumi oli stap kasem trabol from nem blong Jisas, stret olsem we [yumi] i stap kasem.” (1 Pita 5:9) Tede, Setan i stap putum hadtaem long laef blong evri man blong God. Devel Setan i glad blong luk we olkaen problem oli stap stikim yumi olsem nil blong aranis. Blong mekem olsem, hem i yusum wol ya we i blong hem, blong ademap moa “nil aranis” blong stikim yumi. (2 Korin 12:7) Nating se i olsem, yumi naf blong mekem we ol traem ya blong Setan oli no pulum yumi blong lego God. Jeova bambae i “mekem rod blong yumi,” blong yumi gohed nating se i gat traem. Mo hem i save mekem samting ya tu, taem yumi fesem sam trabol we oli olsem ol nil aranis.​—1 Korin 10:13.

Olsem Wanem Blong Gohed Wetem Nil Aranis

3. ?Wanem ansa blong Jeova taem Pol i askem hem blong karemaot nil aranis we i stap stikim hem?

³ Aposol Pol i krae long God blong hem i karemaot nil aranis ya we i stap stikim hem. “Tri taem mi askem long Masta blong yumi, blong hem i tekemaot.” ?Wanem ansa we Jeova i givim long krae blong Pol? “Mi mi save givhan long yu long gladhat blong mi, mo hemia i naf blong holem yu. Taem we yu yu no gat paoa, paoa blong mi i save kam strong moa long yu.” (2 Korin 12:​8, 9) I gud yumi traem kasem moa save long ansa ya mo luk olsem wanem hem i save halpem yumi blong fesem enikaen problem we i stikim yumi olsem nil aranis.

4. ?Olsem wanem God i soem gladhat blong hem long Pol?

⁴ Makem we long ples ya, God i pulum Pol blong gat tangkiu from help we hem i givim finis long gladhat blong hem, tru long Kraes. Tru ya, Pol i kasem plante blesing. Bifo, hem i wan man we i agensem strong ol man blong Jisas. Nating se i olsem, Jeova i soem lav long Pol taem i givim janis long hem blong kam wan disaepol blong Kraes. (Ol Wok 7:​58; 8:3; 9:​1-4) Afta long hemia, Jeova i kaengud long Pol mo i givim ol nambawan wok long hem. Hemia wan gudfala lesen blong yumi. Nating se yumi stap long hadtaem olsem wanem, yumi kasem plante blesing we yumi save tangkiu long God from. Yumi neva mas letem ol traem blong yumi oli mekem we yumi fogetem se Jeova i mekem i gud tumas long yumi.​—Ol Sam 31:19.

5, 6. (a) ?Olsem wanem Jeova i tijim Pol se paoa we hem i givim i ‘save kam strong moa’? (b) ?Olsem wanem eksampol blong Pol i pruvum se Setan i man blong giaman?

⁵ I gat wan narafala samting we i soem se help we Jeova i givim long gladhat blong hem, hemia i naf. Paoa blong God i save givhan bigwan long yumi long taem blong ol traem. (Efesas 3:​20) Jeova i tijim Pol se paoa blong hem i ‘save kam strong moa taem hem i no gat paoa.’ ?Samting ya i tru olsem wanem? Jeova i soem lav taem hem i givim paoa olsem we Pol i nidim blong stanap strong long traem we i kasem hem. Biaen, taem Pol i stanap strong mo i trastem Jeova fulwan hem i soemaot long olgeta man se paoa blong God i naf blong givhan long man we i slak mo we i gat sin. Samting ya i spolem gud Devel Setan, from we hem i talem se ol man oli stap mekem wok blong God nomo taem laef i isi mo taem oli gat evri samting. !Be nao, taem Pol i stanap strong, i olsem we hem i slavem fes blong man ya blong giaman!

⁶ Yes, Pol hem i man ya we fastaem i wok wetem Setan blong faet agensem God. Hem i wan flas man we i ronem ol Kristin. Hem i wan Farisi we i strong long skul blong hem, mo ating i bin harem gud long plante samting from we hem i gruap long wan famle we i rij. Be naoia, Pol i mekem wok blong Jeova mo Kraes, hem i “daon moa long ol narafala aposol.” (1 Korin 15:9) Hemia i minim se hem i gat tingting daon blong folem ol rul blong hed kampani blong ol Kristin long faswan handred yia. Mo i nating se i gat wan nil aranis we i stap stikim hem, hem i gohed blong stanap strong. Setan i harem nogud tumas se ol traem blong laef oli no karemaot strong tingting we Pol i gat. Pol i neva fogetem hop ya we bambae hem i kasem, hemia blong joen long Kingdom blong Kraes long heven. (2 Timoti 2:​12; 4:​18) Nomata we nil aranis ya i soa olsem wanem, hem i no save karemaot strong tingting we Pol i gat. !I gud sipos tingting blong yumi tu, i gohed oltaem blong stap strong! Taem Jeova i givhan long yumi blong stanap strong long ol traem, hem i givim ona long yumi from we yumi gat janis ya blong wok wetem hem blong pruvum se Setan i man blong giaman.​—Ol Proveb 27:11.

Sam Impoten Samting We Jeova i Givim

7, 8. (a) ?Jeova i yusum wanem blong givhan long ol man blong hem tede? (b) ?From wanem i impoten tumas blong ridim mo stadi Baebol taem nil aranis i stikim yumi?

⁷ Tede, Jeova i yusum tabu spirit blong hem, Tok blong hem, mo kampani blong olgeta Kristin brata blong givim paoa long ol Kristin we oli traehad blong holem bilif. Olsem aposol Pol, yumi save prea long Jeova blong putum ol trabol blong yumi long hem. (Ol Sam 55:22) I tru se, God bambae i no karemaot ol traem we yumi kasem, be hem i givim waes long yumi blong yumi naf blong winim ol traem ya, nating se maet oli mekem i strong tumas long yumi. Mo tu, Jeova i save givim “paoa ya we i bigwan tumas” blong halpem yumi blong stanap strong.​—2 Korin 4:7.

⁸ ?Yumi save kasem help ya olsem wanem? Yumi mas wantem oltaem blong stadi Tok blong God, from we insaed long hem nao yumi faenem ol tok blong leftemap tingting. (Ol Sam 94:19) Long Baebol, yumi save ridim ol tok we ol man blong God oli talem taem oli krae long hem blong i halpem olgeta. I gud yumi tingting dip long rod we Jeova i yusum blong givhan long olgeta ya, we plante taem hemia ol gudfala tok blong leftemap tingting. Fasin blong stadi i save mekem yumi strong blong ‘soemaot we paoa ya we i bigwan tumas i blong God, i no blong yumi.’ Yumi mas kakae evri dei blong fidim bodi blong yumi mo kasem paoa. Long sem fasin, yumi mas ridim Tok blong God evri dei, olsem kakae blong yumi. ?Yu yu stap mekem samting ya? Sipos yumi mekem olsem, ale, bambae yumi luk we yumi kasem “paoa ya we i bigwan tumas” blong halpem yumi blong stanap strong nomata wanem kaen nil aranis we i stap givim hadtaem long yumi naoia.

9. ?Olsem wanem ol elda oli save givhan long olgeta we oli gat problem be oli stap traehad blong gohed?

⁹ Ol Kristin elda we oli fraetgud long God oli “olsem wan ples blong haed long hem taem i gat bigfala win” blong trabol, “mo olsem wan sefples taem bigfala ren [blong ol problem] i foldaon.” Ol elda we oli wantem stap mekem olsem we Baebol i talem long ples ya, oli gat tingting daon blong askem strong long Jeova blong ‘tijim olgeta long ol tok we oli mas talem.’ Long rod ya, bambae oli save wanem toktok we i stret blong talem long man we i stap harem nogud. Toktok blong ol elda i save stap olsem smol ren we i foldaon sloslou blong mekem yumi harem gud mo kwaetem tingting blong yumi long ol hadtaem blong laef. Taem ol elda oli toktok gud blong “leftemap tingting blong ol man ya we oli stap harem nogud oltaem from we tingting blong olgeta i foldaon,” ol elda oli rili givhan long ol Kristin brata mo sista blong olgeta we maet oli slak from wan nil aranis we i stap stikim olgeta.​—Aesea 32:2, NW; 50:4, NW; 1 Tesalonaeka 5:​14, NW.

10, 11. ?Olsem wanem ol man blong God oli save leftemap tingting blong olgeta we oli stap gotru long sam strongfala traem?

¹⁰ Olgeta man blong Jeova oli haf blong wan Kristin famle we i joengud. Yes, yumi ‘evriwan i stap joen long yumi nomo, olsem we ol haf blong wan bodi oli stap joen long olgeta.’ Taswe, yumi “mas lavlavem yumi.” (Rom 12:5; 1 Jon 4:11) ?Olsem wanem yumi save mekem samting ya? 1 Pita 3:8 i soemaot se, yumi mekem samting ya taem yumi ‘gat sore, lav, mo yumi mekem i gud’ long olgeta Kristin brata sista blong yumi. Be yumi save givim spesel kea long olgeta we, nating se oli yangfala no olfala, oli stap harem nogud from wan nil aranis we i stap stikim olgeta oltaem. ?Yumi save mekem samting ya olsem wanem?

¹¹ Yumi mas traem harem save samting ya we i stap mekem olgeta oli safa. Sipos yumi no sore long olgeta, yumi no soem filing mo yumi no kea long olgeta, maet bambae yumi mekem we oli safa moa. Taem yumi luksave we oli stap fesem hadtaem yumi mas wantem blong lukaot gud long samting we yumi talem, olsem wanem yumi talem samting ya, mo wanem we yumi mekem. Taem yumi tokbaot samting we i gud oltaem mo traem leftemap tingting, yumi save daonem soa we sam long ol nil aranis ya i stap mekem long olgeta. Ale long rod ya yumi rili givhan long olgeta blong kasem paoa.​—Kolosi 4:​11.

Olsem Wanem Samfala Oli Naf Blong Gohed Strong

12-14. (a) ?Wan Kristin sista i mekem wanem blong stanap strong long hadtaem we hem i kasem? (b) ?Ol Kristin brata sista blong woman ya oli mekem wanem blong sapotem hem mo leftemap tingting blong hem?

¹² Taem yumi kam klosap long en blong ol las dei ya, bambae yumi luk se ol trabol we oli givim “soa” oli stap kam plante evri dei. (Matiu 24:8) Taswe, ol traem bambae oli mas kasem evri man long wol ya, antap moa ol gudfala man blong Jeova we oli stap traehad blong mekem wok blong hem. Tingbaot eksampol ya blong wan Kristin sista we i mekem wok blong prij fultaem. Ol dokta oli faenemaot se hem i gat kansa nao oli mas katemaot ol glan long maot mo nek blong hem. Taem hem mo man blong hem tufala i harem se hem i gat sik ya, kwiktaem nomo tufala i mekem wan longfala prea i go long Jeova blong askem help blong hem. Samtaem biaen, sista ya i talem se afta we tufala i mekem olsem, pis i kam fulap long tingting blong tufala. Nating se i olsem, i gat taem we hem i harem gud mo taem we hem i stap harem nogud tu, antap moa taem hem i stap folem tritmen blong hem.

¹³ Sista ya i lukaot rod blong dil wetem sik blong hem ale hem i traem kasem moa save long saed blong kansa. Hem i toktok wetem ol dokta blong hem. Hem i faenem sam gudfala stori long Wajtaoa mo Wekap! long saed blong sam man we oli no letem filing blong olgeta i winim olgeta from sik ya. Mo tu, hem i ridim sam vas blong Baebol we oli soemaot paoa we Jeova i gat blong givhan long ol man blong hem long hadtaem, mo hem i kasem plante moa save bakegen.

¹⁴ Wan long ol stori we hem i ridim i tokbaot olsem wanem blong winim tingting we i foldaon, mo i yusum waes tok ya se: “Hemia we i stap hem wan oltaem bambae i tingbaot hem wan nomo.” (Ol Proveb 18:1, NW ) Ale, stori ya i givim advaes se: “Traehad blong no stap yu wan.”a Sista ya i talem se: “Plante [brata sista] oli talem se oli stap prea from mi. Sam narafala oli telefon long mi. I gat tu elda we tufala i kam luk mi plante taem blong jekem sipos mi oraet. Samfala oli sanem ol flaoa mo plante leta. I gat samfala we oli rerem kakae blong mi tu. Mo plante long olgeta oli rere blong tekem mi mi go long hospital taem mi nidim tritmen.”

15-17. (a) ?Olsem wanem wan Kristin sista i naf blong stanap strong long hadtaem we hem i kasem from aksiden blong trak? (b) ?Wanem help we kongregesen i givim long hem?

¹⁵ Wan sista we i mekem wok blong Jeova longtaem finis, long New Mexico, Yunaeted Stet, i aksiden tu taem long trak. Hem i kasem bigfala kil long nek mo solda blong hem. Samting ya i mekem we problem blong ol bun we hem i gat bitim 25 yia finis, i kam moa nogud. Hem i stori se: “Mi faenem i had tumas blong holem hed blong mi i stap stret mo mi no save holem wan samting we i hevi moa long 2 kilo. Be wanem we i givhan bigwan long mi hemia prea we mi mekem oltaem long Jeova. Mo ol haf blong Wajtaoa we mi stadi long olgeta oli givhan tu. Wan long ol haf ya i tokbaot Maeka 6:8, mo i soem se taem wan man i wokbaot wetem God we tingting blong hem i stap daon hemia i min se man ya i luksave wanem samting we hem i no naf blong mekem. Tok ya i givhan long mi blong stap glad long mi wan, mo no letem tingting blong mi i foldaon, nating se ol aoa we mi spenem long wok blong prij i no plante olsem we mi wantem. Nambawan samting hemia blong mekem wok blong Jeova wetem wan hat we i fulwan.”

¹⁶ Sista ya i talem tu se: “Oltaem ol elda oli talem ol gudfala tok blong presem traehad we mi mekem blong go long ol miting mo long wok blong prij. Ol yangfala oli kam holem mi mo kisim mi. Ol paenia oli gat longfala tingting mo plante taem oli jenisim ol plan blong olgeta long ol taem we mi harem nogud. Taem weta i nogud, oli kaen gud wetem mi mo tekem mi mi go long ol visit blong olgeta no oli singaot mi blong sidaon mo joen wetem olgeta blong mekem ol Baebol stadi blong olgeta. Mo, from we mi no naf blong karem wan basket wetem ol buk, ol narafala pablisa oli stap putum ol buk blong mi long basket blong olgeta taem mifala i go prij.”

¹⁷ ?Yu luk olsem wanem ol elda blong kongregesen mo narafala Kristin oli halpem tufala sista ya blong tufala i save gohed nating se tufala i stap long hadtaem? Ol Kristin ya oli givim help wetem kaen fasin, we i stret long nid we tufala i gat long saed blong spirit, bodi, mo filing. ?Samting ya i no pulum yu blong wantem givhan long ol brata mo sista we oli stap fesem hadtaem tu? Yufala ol yangfala, yufala tu i save givhan long olgeta long kongregesen blong yufala we oli stap harem nogud from wan nil blong aranis we i stap stikim olgeta.​—Ol Proveb 20:29.

18. ?Olsem wanem ol stori we oli kamaot long ol Wajtaoa mo Wekap! oli save leftemap tingting?

¹⁸ Ol Wajtaoa mo Wekap! magasin oli storebaot laef blong plante Witnes we oli bin gohed strong, mo we oli stap gohed strong yet, nomata wanem problem we oli kasem long laef. Taem yu stap ridim ol stori ya, bambae yu luk se plante long ol Kristin brata mo sista blong yu raon long wol oli stap kasem hadtaem be oli stanap strong. Oli kasem ol hadtaem long saed blong mane, ded blong wan memba blong famle no ol fren long wan disasta, mo laef we i had from ol trabol blong wo. Sam narafala oli laef wetem sam sik we i blokem olgeta long plante samting. Plante long olgeta ya oli no save mekem sam long ol samting ya we maet oli isi nomo long ol narafala we bodi blong olgeta i gud. Sik we oli kasem i wan traem we i strong tumas, antap moa taem oli no save joen fulwan long ol Kristin wok olsem we maet oli wantem tumas blong mekem. !Oli tangkiu tumas long help we ol brata sista we oli yangfala no we oli olfala, oli stap givim long olgeta!

Man We i Stanap Strong Hem i Kasem Glad

19. ?From wanem Pol i naf blong harem gud nating se hem i gat ol traem mo slak fasin we oli olsem nil aranis?

¹⁹ Pol i glad blong luk olsem wanem God i stap givhan long hem. Hem i se: “Mi mi glad moa blong tok flas from ol samting we i soemaot we mi mi no gat paoa. Long fasin ya, mi save harem we Kraes i stap lukaot long mi long paoa blong hem. Nao from samting ya, taem mi mi stap long trabol from we mi man blong Kraes, be tingting blong mi i save stap kwaet. Taem mi no gat paoa, no ol man oli tok nogud long mi, no mi gat hadtaem, no ol man oli mekem i nogud long mi, no mi harem we laef i strong tumas, be mi mi glad nomo, from we long taem we mi mi no gat paoa, long taem ya nao, mi mi gat paoa.” (2 Korin 12:9, 10) Ol samting we oli hapen long laef blong Pol oli mekem hem i naf blong talem se: “Mi mi tok olsem, i no from we mi stap sot long sam samting, nogat. Mi mi lanem finis, se long wanem rod we mi stap long hem, be mi save stap gud nomo. Sipos mi trabol, be mi save rod blong samting ya finis. Sipos mi gat plante samting, be mi save rod blong samting ya tu, from we mi gotru long ol samting ya finis. Nao long wanem rod mi pas long hem, be mi stap harem gud. Sipos mi fulap gud, no mi hanggri, sipos mi gat plante samting, no mi trabol, be nating. Mi save mekem evri samting, long paoa blong Kraes ya we i stap mekem mi mi strong.”​—Filipae 4:​11-​13.

20, 21. (a) ?From wanem yumi save glad taem yumi tingbaot ol samting we “yumi no save luk”? (b) ?Wanem sam long ol samting we “yumi no save luk” we yu yu hop blong luk long Paradaes wol?

²⁰ Taswe, taem yumi stanap strong long enikaen nil aranis we maet i stikim yumi, yumi save glad bigwan from we yumi soem long ol man se paoa blong Jeova i stap mekem yumi strong. Pol i raetem se: “Neva tingting blong mifala i kam nogud long ol trabol we i kasem mifala. . . . Evri dei, God i stap mekem tingting blong mifala i niuwan bakegen. Ol trabol ya we i kasem mifala oli smol nomo, mo oli no save stap longtaem. Be frut blong olgeta i narafala olgeta, i gud tumas long mifala, mo i stap mekem mifala i rere blong go joen long gudfala laef ya blong God long heven, we i no save finis samtaem. Nao mifala . . . i stap tingbaot ol samting ya we yumi no save luk, from we . . . ol samting ya we yumi no save luk, oli blong stap oltaem, gogo i no save finis.”​—2 Korin 4:​16-​18.

²¹ Bighaf blong ol man blong Jeova tede oli gat hop blong laef long wan Paradaes wol mo harem gud from ol blesing we hem i promes blong givim. Ol blesing ya oli samting we tede yumi “no save luk” yet. Be, taem i stap kam klosap nao we bambae yumi save luk ol blesing ya wetem prapa ae blong yumi, nao, bambae yumi save harem gud long ol blesing ya olwe. !Wan long ol blesing ya hemia blong kam fri long eni problem we i olsem nil aranis! I no longtaem bambae Pikinini blong God i “brekemdaon ol wok we Setan i mekem,” mo bambae hem i “save brekem paoa blong Setan, we i holem paoa blong ded.”​—1 Jon 3:8; Hibrus 2:​14.

22. ?Wanem samting we yumi sua long hem mo yumi wantem mekem wanem?

²² Taswe, nomata wanem kaen nil aranis we i stap stikim yumi tede, yumi mas gohed strong oltaem. Olsem Pol, paoa we bambae yumi kasem blong gohed i kamaot long Jeova, we hem i glad nomo blong givim paoa ya long yumi. Taem yumi laef long Paradaes wol bambae yumi presem Jeova, God blong yumi, evri dei from ol gudgudfala samting we hem i mekem long yumi.​—Ol Sam 103:2.

[Futnot]

?Bambae Yu Yu Ansa Olsem Wanem?

• ?From wanem Devel Setan i traem blokem yumi blong fasgud long God mo olsem wanem hem i mekem samting ya?

• ?Olsem wanem paoa blong Jeova “i save kam strong moa long yu” taem yu no gat paoa?

• ?Olsem wanem ol elda mo narafala Kristin oli save leftemap tingting blong olgeta we oli harem nogud from wan hadtaem?

[Tok blong pija long pej 18]

Pol i prea tri taem long God blong hem i karemaot nil aranis ya we i stap stikim hem