?I Gat Wan ‘Nil Blong Aranis We i Stap Stikim Yu’?
1 Yumi wantem tumas blong obei long oda blong talemaot gud nyus, mo mekem bes blong yumi long wok ya. Be, plante gudfala brata mo sista blong yumi oli faenem se i hadwok blong joen fulwan long wok ya, from we oli gat strong sik, no wan haf blong bodi blong olgeta i no wokgud. From samting ya, i had blong oli mekem plante wok olsem oli wantem mekem. I wan traem long olgeta blong winim tingting we i foldaon oltaem, antap moa, taem oli luk ol narafala we oli stap mekem plante long wok blong prij.—1 Kor. 9:16.
2 Wan Eksampel Blong Folem: Aposol Pol i gat wan ‘nil blong aranis we i stap stikim hem.’ Hem i askem tri taem long Jeova blong i tekemaot trabol ya we i stap blokem hem mo mekem hem i harem nogud. Hem i talem se trabol ya i “olsem man blong karem tok blong Setan,” we i stap kilim hem. Be, Pol i stanap strong mo i gohed strong long wok blong prij. Hem i no sore long hem wan mo i no stap komplen oltaem. Hem i mekem bes blong hem. Bigfala samting we i givhan long hem blong winim trabol ya, hemia promes ya blong God se: “Mi mi save givhan long yu long gladhat blong mi, mo hemia i naf blong holem yu. Taem we yu yu no gat paoa, paoa blong mi i save kam strong moa long yu.” Taem Pol i no gat paoa, hemia i mekem se hem i kam strong moa, from we hem i lanem blong akseptem trabol ya long laef blong hem, mo blong dipen long Jeova mo tabu speret blong givhan long hem blong holemstrong.—2 Kor. 12:7-10.
3 ?Olsem Wanem Yumi Save Stanap Strong?: ?Wan sik no wan trabol long bodi blong yu i stap blokem yu long wok blong God? Sipos yes, i gud we yu folem eksampel mo tingting blong Pol. Maet yu no save winim sik ya no trabol ya long bodi blong yu, long rabis wol ya. Be yu save trastem Jeova fulwan, from we hem i kasem save long wanem we yu nidim, mo bambae hem i givim ‘paoa ya we i bigfala tumas i blong hem, i no blong yu.’ (2 Kor. 4:7) Yu mas glad long givhan blong kongregesen, yu no mas stap yu wan nomo. (Prov. 18:1) Sipos i hadwok long yu blong joen long wok blong prij long olgeta haos wanwan, lukaot ol narafala rod blong tekem jans blong prij, no prij long telefon.
4 Sipos wan nil blong aranis i stap stikim yu, mo i blokem yu blong mekem plante long wok blong prij, yu no nidim blong harem se yu no save joen long wok blong prij. Olsem Pol, yu tu yu save ‘talemaot we gud nyus ya i tru, we i talem se God i stap givhan long yumi long gladhat blong hem,’ go kasem mak we bodi blong yu i naf blong mekem, mo we i stret long laef blong yu. (Ol Wok 20:24) Taem yu traehad blong finisim wok we God i givim long yu, yu save bilif se Jeova i glad long yu.—Hib. 6:10.