Ripot Long Wok Blong Kingdom

Oli “Harem” Gud Nius Blong Kingdom Long Brasil

BLONG talemaot gud nius blong Kingdom long ol man we sora blong olgeta i fas, plante Witnes blong Jeova long Brasil oli glad blong lanem saen lanwis blong ol man Brasil. Traehad blong olgeta i karem gudfala frut, olsem yumi luk long ekspiriens we i kam biaen.

Evaa i wan woman we sora blong hem i fas mo hem i laef long São Paulo. Eva i stat lanem saen lanwis afta we hem wetem trifala pikinini blong hem oli go laef wetem wan man we sora blong hem tu i fas. Eva mo boefren blong hem, tufala i go long wan bigfala stoa mo long ples ya tufala i mitim wan grup blong Witnes we sora blong olgeta i fas, mo ol Witnes ya oli singaot tufala blong tufala i go long wan miting long Haos Kingdom. Tufala i agri blong go, from we tufala i ting se hemia wan smol lafet.

Eva i no savegud saen lanwis, taswe hem i no kasem save plante samting long miting ya. Biaen, sam Witnes oli singaot hem blong hem i go dring ti long haos blong olgeta. Oli yusum ol pija blong buklet ya !Yu Yu Save Harem Gud Blong Olwe Long Wol!, mo oli eksplenem promes blong God se bambae i mekem wol ya i kam wan Paradaes. Eva i laekem tumas ol samting we hem i lanem, mo hem i stat blong go long miting oltaem.

Smoltaem biaen, Eva i lego boefren blong hem blong laef folem ol rul blong Baebol. Nating se famle blong hem i agensem hem bigwan, hem i gohedgud long saed blong spirit mo i tekem baptaes long 1995. Sikis manis biaen, Eva i kam wan paenia, hemia wan pablisa we i wok fultaem blong talemaot Kingdom. Stat long taem ya hem i tijim fo man we sora blong olgeta i fas, go kasem we oli givim laef blong olgeta i go long Jeova mo oli tekem baptaes.

Carlos i bon we sora blong hem i fas. Taem hem i yang yet, hem i stat tekem drag, i gat wan fasin blong laef we i nogud, mo i stap stil. Ol memba blong wan rabis grup blong man oli wantem kilim hem i ded, taswe Carlos i ronwe i go long São Paulo mo i stap wetem João blong smoltaem. João i sem mak olsem Carlos, sora blong hem i fas mo laef blong hem i nogud nomo.

Sam yia biaen, Carlos i lanem gud nius blong Kingdom we i pusum hem blong stretem laef blong hem mo mared wetem gelfren blong hem. Taem laef blong hem i laenapgud wetem ol rul blong Baebol, Carlos i givim laef blong hem i go long Jeova mo i tekem baptaes. Carlos i no save se long sem taem, João tu i bin kasem trutok mo i mekem bigfala jenis long laef blong hem. Taem João i save we Jeova i no laekem nating ol tabu pija, hem i sakemaot olgeta pija blong ol “tabu man” we hem i gat. João i lego rabis laef blong hem blong bifo, mo hem tu i tekem baptaes.

!Carlos mo João tufala i glad tumas blong mitim tufala long Haos Kingdom mo blong luk ol jenis we tufala i bin mekem! Naoia tufala i lukaotgud long wanwan famle blong tufala mo tufala i wok strong blong talemaot Kingdom.

Long Brasil, i gat 30 kongregesen mo 154 grup we oli toktok saen lanwis, wetem bitim 2,500 pablisa, mo long namba ya i gat samwe 1,500 pablisa we sora blong olgeta i fas. Long Brasil long 2001 oli holem distrik asembli ya “Ol Man Blong Tijim Tok Blong God” blong ol man we sora blong olgeta i fas. Bitim 3,000 man i kam long hem, mo 36 man oli tekem baptaes. Wetem help blong Jeova, plante moa man we sora blong olgeta i fas bambae oli akseptem gud nius blong Kingdom.

[Futnot]