?Jeova i Lukluk Mo i Intres Long Ol Samting We Yu Stap Mekem?

?OLSEM wanem bambae yu yu ansa long kwestin ya? Plante man maet oli talem se: ‘Ating God i intres long ol bigfala wok blong ol man olsem Moses, Gideon, mo Deved. Be mi no ting se hem i intres long eni samting we mi mi mekem. Mi mi no olsem Moses, Gideon, no Deved ya.’

I tru se long taem blong bifo, sam man oli mekem sam bigbigfala wok blong soem bilif blong olgeta. Oli ‘lidim ol man Isrel blong oli go faet, oli blokem ol laeon blong oli no kam kakae olgeta, oli kilimdaon bigfala faea we i laet strong, mo oli ronwe long ol man we oli wantem kilim olgeta long naef blong faet.’ (Hibrus 11:33, 34) Be i gat sam narafala man tu we oli soem bilif blong olgeta nating se oli no mekem ol bigbigfala samting blong sapraes. Mo Baebol i talem se God i tingbaot ol wok blong ol man ya we i soem bilif blong olgeta. Blong soemaot samting ya bambae yumi storebaot eksampol blong tri man we Tok Blong God i tokbaot olgeta: wan man blong lukaot sipsip, wan profet, mo wan wido woman.

Wan Man Blong Lukaot Long Sipsip i Mekem Wan Sakrefaes

?Yu yu rimemba wanem long saed blong Ebel, namba tu pikinini boe ya blong Adam mo Iv? Maet yu rimemba we hem i ded from bilif blong hem, mo ating i no gat plante long yumi we bambae oli ded olsem hem. Be fastaem, God i intres long hem from wan narafala risen.

Wan dei, Ebel i tekem sam blong ol beswan anamol blong hem mo i givim wan sakrefaes i go long Jeova. Maet long ae blong yumi tede, presen ya i no wan bigfala samting. Be Jeova i intres long presen ya mo i soem we hem i glad long hem. Be i no hemia nomo. Klosap fo taosen yia biaen, Jeova i yusum tabu spirit blong hem blong pusum aposol Pol, blong tokbaot Ebel long buk blong Hibrus. !Traem tingbaot hamas yia i pas finis, be God i no fogetem smol sakrefaes ya!—Hibrus 6:10; 11:4.

?Wanem i pulum Ebel blong jusum wanem kaen sakrefaes nao hem i mas givim? Baebol i no talem. Be ating Ebel i tingting gud bifo we hem i mekem sakrefaes ya. Hem i wan man blong lukaot long sipsip, taswe yumi no sapraes we hem i jusum sam anamol blong hem. Be makemgud we Ebel i givim ol beswan haf blong anamol ya—“ol gudfala mit blong hem we i gat gris.” (Jenesis 4:4) Maet Ebel i tingting dip long ol tok ya we Jeova i bin talem long snek long garen blong Iden i se: “Bambae mi mi mekem we yu mo woman ya, yutufala i enemi blong yutufala, mo laen blong yu mo laen blong hem, tufala i enemi blong tufala. Hem bambae i smasem hed blong yu, mo yu bambae yu smasem leg blong hem.” (Jenesis 3:15, NW; Revelesen 12:9) Ebel i no kasem save hu ya “woman” ya mo “laen” blong hem. Be nating se i olsem, ating hem i luksave we sipos oli “smasem leg” blong sid blong woman ya, i min se blad i mas ron. Hem i luksave we beswan sakrefaes we hem i save givim, hemia wan laef samting. Be samting we i moa impoten, se sakrefaes we Ebel i givim i stret we i stret nomo.

Olsem Ebel, tede ol Kristin oli mekem sam sakrefaes i go long God. Oli no givim ol fasbon sipsip blong olgeta, be oli ‘mekem wan sakrefaes long God, we i blong presem hem. Sakrefaes ya i olsem frut blong maot blong olgeta we i talemaot nem blong [God] long ol man.’ (Hibrus 13:15, NW) Maot blong yumi i talemaot nem blong God long ol man taem yumi prij long olgeta.

?Olsem wanem? ?Yu yu wantem we sakrefaes blong yu blong presem God i kam gud moa? Ale, yu mas tingbaot ol nid blong ol man long teritori blong yu. ?From wanem oli wari? ?Oli intres long wanem samting? ?Wanem haf blong Tok blong God i save pulum intres blong olgeta? Evri taem we yu go prij, tingting gud long fasin blong yu blong talemaot mesej, ale bambae yu save kam gud moa long fasin blong prij. Mo taem yu stap tokbaot Jeova, i gud yu toktok wetem filing, wan filing we i kamaot long hat blong yu. Traehad blong mekem se sakrefaes blong yu i rili wan ‘sakrefaes we i blong presem God.’

Wan Profet i Prij Long Ol Man We Oli No Wantem Lesin

Traem tingbaot profet ya Inok. Maet hem i stap hem wan nomo olsem wan Witnes Blong Jeova long taem blong hem. ?Maet yu tu yu olsem Inok we yu stap yu wan nomo long famle blong yu blong mekem wok blong Jeova? ?No maet long skul no long ples blong wok blong yu, yu wan nomo yu stap folem ol tijing blong Baebol? Sipos i olsem, ating yu fesem sam traem. Maet ol fren, ol famle, ol fren blong skul, mo ol man we oli wok wetem yu oli pulum yu blong yu brekem ol loa blong God. Maet oli talem long yu se: “Yu no wari, bambae i no gat man i save se yu yu mekem wanem. Bambae mifala i no talemaot yu.” Maet oli talem se i krangke nomo blong traem folem ol rul blong Baebol, from we God i no kea long ol samting we yu yu stap mekem. Oli no glad long yu from we yu yu no gat semfala tingting mo semfala fasin olsem olgeta, taswe oli traem mekem evri samting blong spolem strongfala tingting blong yu blong stap tru long Jeova.

I tru se i no isi blong fesem ol traem olsem. Be yu save winim ol traem ya. Tingbaot man ya Inok, we i namba seven long laen blong Adam. (Jud 14) Inok i bon long wan wol we ol man oli no moa gat sem nating. Toktok blong olgeta i doti mo fasin blong olgeta i nogud stret. (Jud 15) Fasin blong olgeta i sem mak nomo long fasin blong plante man tede.

?Olsem wanem Inok i stanap strong? I gud we yumi intres long ansa blong kwestin ya. Nating se maet long taem ya, Inok i wan man nomo long ful wol we i stap wosipim Jeova, be hem i no rili stap hem wan nomo. Inok i fren gud wetem Jeova.—Jenesis 5:22.

Inok i wantem mekem Jeova i glad long hem. Hemia nao stamba mak long laef blong Inok. Hem i save se hem i mas gat wan laef we i klin mo i stret, blong fren gud wetem Jeova. Be hemia i no naf. Inok i save tu se, Jeova i wantem we hem i prij. (Jud 14, 15) Ol man oli mas save se God i stap wajem ol rabis fasin blong olgeta. Inok i gohed blong fren gud wetem Jeova blong bitim 300 yia—wan longfala taem ya, we i longfala moa bitim eni taem we eni wan long yumi i bin fesem samtaem. Inok i gohed blong stap fren gud wetem God go kasem ded blong hem.—Jenesis 5:23, 24.

Sem mak olsem Inok, yumi tu yumi mas go prij. (Matiu 24:14) Yumi go prij long ol haos wanwan, mo antap long samting ya yumi traem talemaot gud nius long ol famle, ol man we oli mekem bisnes wetem yumi, mo ol yangfala we yumi skul wetem olgeta. Maet samtaem yumi fraet smol blong prij. ?Yu yu harem olsem? Sipos yes, yu no mas letem tingting blong yu i foldaon. Yu mas folem eksampol blong ol faswan Kristin, mo prea long Jeova blong i mekem tingting blong yu i kam strong. (Ol Wok 4:29) Yu no mas fogetem se sipos yu gohed blong fren gud wetem God, bambae yu neva stap yu wan nomo.

Wan Wido Woman i Rerem Wan Kakae

!Traem tingbaot wido woman ya we Baebol i no talem nem blong hem, be hem i kasem tu blesing from we hem i rerem wan smol kakae! Woman ya i no wan woman Isrel. Hem i wan strenja we i bin laef long ol yia 900 B.K.T.a long taon ya Jarefat. Ren i no bin foldaon blong plante yia, mo kakae i sot. Ale klosap long en blong hadtaem ya, wido woman ya i no gat plante kakae i stap. Hem i gat wan kap flaoa nomo wetem smol oel i stap, blong mekem wan laswan kakae blong hem mo boe blong hem.

Nao long taem ya, wan man i kam visitim hem. Man ya, hemia Elaeja, wan profet blong God. Elaeja i kam, i askem long wido ya sipos hem i save kakae wetem hem. Be wido ya wetem boe blong hem, tufala i no gat plante kakae i stap. Mo yumi sua we hem i no gat inaf kakae blong givim long wan narafala man bakegen. Nating se i olsem, Elaeja i talem long wido ya se Jeova i mekem wan promes. Promes ya se: sipos wido ya i serem kakae blong hem wetem Elaeja, bambae hem mo boe blong hem, tufala i no moa hanggri. Wido ya i mas gat wan strong bilif, from we i had blong bilif we God ya blong Isrel i intres long hem, wan wido we i wan strenja. Nating se i olsem, hem i bilivim tok blong Elaeja, mo Jeova i blesem hem from. “Flaoa i no finis nating long besin, mo oel i no finis long botel, stret olsem tok ya blong Hae God we profet i talemaot.” Woman ya wetem boe blong hem, tufala i gat naf kakae evri dei go kasem en blong taem ya we kakae i sot.—1 King 17:8-16.

Be wido ya i kasem wan narafala blesing. Sot taem nomo afta we merikel ya i hapen, boe blong wido ya we hem i lavem hem tumas, i kam sik mo i ded. Elaeja i sore tumas long wido ya ale, hem i prea long Jeova blong i mekem boe ya i laef bakegen. (1 King 17:17-24) !Wan bigfala merikel ya! Baebol i no tokbaot we bifo long hemia i gat wan ded man we i laef bakegen. ?Olsem wanem? ?Jeova bambae i soem sore bakegen long wido woman ya we i no blong Isrel? Yes. Jeova i givim paoa long Elaeja blong i mekem boe ya i laef bakegen. Biaen, Jisas i tokbaot wido ya we i kasem blesing i se: “I gat plante wido oli stap long Isrel. Be God . . . i sanem [Elaeja] i go blong givhan long wan wido long Saedon, long wan vilej we nem blong hem Jarefat.”—Luk 4:25, 26.

Tede ekonomi i save jenis kwiktaem nomo, long ol pua kantri mo long ol rij kantri tu. Sam bigfala kampani oli sakem sam man blong wok blong olgeta, nating se ol man ya oli bin wok plante yia finis long kampani ya. Wan Kristin we i fraet blong lusum wok blong hem i save gat tingting blong wok plante moa aoa. Maet hem i ting se olsem nao bambae kampani blong hem i no save sakemaot hem. Be sipos hem i mekem olsem, maet hem i no moa gat plante taem i stap blong go long ol Kristin miting, joen long wok blong prij, no lukaotgud long famle blong hem long saed blong filing mo spirit. Be Kristin ya i harem se hem i mas holem wok blong hem, nomata wanem frut i kamaot.

Wan Kristin we i fesem sam trabol long saed blong mane, i stret nomo we hem i wari. Long taem blong yumi i had blong faenem wok. Ating bighaf blong yumi, yumi no ronem ol sas samting, be olsem wido ya blong Jarefat, yumi wantem lukaotgud long famle blong yumi. Nating se i olsem, aposol Pol i talem bakegen long yumi ol toktok ya blong God se: “Bambae mi mi no save livim yu yu stap yu wan. Bambae mi mi no save lego yu samtaem.” Yumi save talem wetem wan strong tingting se: “Hae God i stap givhan long mi, nao mi bambae mi mi no save fraet. Man i no save mekem wan samting blong spolem mi.” (Hibrus 13:5, 6) Pol i rere blong lusum prapa laef blong hem from we hem i bilif long promes ya. Mo oltaem, Jeova i lukaotgud long hem. Bambae Jeova i mekem i sem mak long yumi, sipos yumi no lego hem.

Maet yumi harem olsem se bambae yumi no naf blong mekem ol bigbigfala wok olsem Moses, Gideon, mo Deved. Be yumi save soem semfala bilif olsem olgeta. Mo yumi save rimemba ol smol wok we sam man oli bin wokem blong soem bilif blong olgeta, olsem man ya Ebel, Inok, mo wido woman blong Jarefat. Jeova i gat intres long evri wok we man i mekem from bilif blong hem—i nating se ol wok ya oli smol. Jeova i stap lukluk, taem wan yangfala we i fraetgud long God i no wantem tekem drag long skul, taem wan Kristin i ronwe long ol man long ples blong wok we oli wantem pulum hem blong mekem rabis fasin, no taem wan olfala Witnes Blong Jeova i stap tru, i gohed blong go long ol miting blong kongregesen, nating se hem i taed mo i sik. !Jeova i stap luk ol samting ya mo i haremgud from!—Ol Proveb 27:11.

?Yu Yu Luksave Samting We Ol Narafala Oli Stap Mekem?

Yes, Jeova i intres long ol samting we yumi stap mekem. Taswe, sipos yumi folem eksampol blong God, yumi mas kwik blong luksave ol traehad blong ol narafala. (Efesas 5:1) Ating i gud blong luksave ol traem we sam narafala Kristin oli fesem taem oli go long ol miting blong kongregesen, oli joen long wok blong prij, mo long laef blong olgeta blong evri dei tu.

Nao yu save talem long ol man ya we oli mekem wok blong Jeova, se yu yu tinghae long ol traehad blong olgeta. Bambae oli haremgud from we yu yu bin luksave samting we oli stap mekem. Mo fasin kea we yu soemaot long olgeta i save givhan long olgeta blong oli luksave we Jeova tu, Hem i lukluk mo i intres long wok blong olgeta.

[Futnot]