Olsem Wanem Blong Kasem Ol Samting We Yu Nidim Long Saed Blong Spirit
NIUSPEPA ya U.S.News & World Report i talem se: “Long ol ten yia we oli jes pas, bitim 300 buk we oli tokbaot olsem wanem save long saed blong spirit i save givhan long man long ples blong wok—olsem buk ya Jesus CEO no buk ya The Tao of Leadership—oli fulumap ol stoa blong salem buk.” Samting ya i soem we long plante rij kantri, plante moa man oli lukaot save long saed blong spirit blong lidim laef blong olgeta. Niuspepa ya Training & Development i tokbaot samting ya i se: “Long taem blong yumi we teknoloji i gat paoa long evri haf blong laef blong yumi, yumi wantem se laef blong yumi i gat mining, yumi nidim wan mak blong kasem, mo yumi wantem glad moa long ol wok blong yumi.”
?Be hu nao i save lidim yu blong yu haremgud long saed blong spirit? Long taem bifo, ol man oli lukluk i go long ol bigfala skul blong faenem wan “laef we i gat mining” mo “wan mak blong kasem.” Tede, plante man oli no moa trastem ol skul ya. Long niuspepa ya Training & Development, wan stadi we oli mekem long 90 man we oli gat wan hae posisen, no oli bos, i soem we “ol man oli harem se skul i wan samting we i defren olgeta long ol nid blong man long saed blong spirit.” Ol man we oli ansa long ol kwestin blong stadi ya oli talem se skul “i no save letem wan rong i pas, mo i stap seraotem ol man,” be ol man ya oli talem se save long saed blong spirit hem i “blong olgeta man mo i joenemgud ol man.”
Plante yangfala we oli laef long ol kantri we oli no intres tumas long ol samting long saed blong spirit, olsem Ostrelia, Niusilan, Yunaeted Kingdom, mo Yurop, olgeta tu oli harem se skul mo intres long saed blong spirit hemia tu defren samting. Profesa Ruth Webber i raetem wan atikol long Youth Studies Australia i se: “Bighaf long ol yangfala oli bilif long God, no long wan kaen paoa we i bitim paoa blong man, be oli no ting se ol skul oli impoten, no oli no ting se [skul i] save givhan long olgeta blong kasem save long ol samting long saed blong spirit.”
Trufala Skul i Leftemap Ol Samting Long Saed Blong Spirit
Yumi no sapraes we plante man oli gat tingting ya long saed blong ol skul. Plante man blong skul oli joen long ol kruked fasin blong politik mo oli gat tu fes long saed blong gudfala fasin, mo tu ol skul oli gat fol from we oli letem plante man i ded long plante faet blong skul. Be taem ol man oli sakemaot ol skul we oli fulap long fasin tu fes mo fasin giaman, oli mekem wan mastik se oli sakemaot Baebol tu, from we oli ting se Baebol nao i no agensem ol rabis fasin ya.
Be rili, Baebol i tok agensem fasin tu fes mo fasin we i no stret. Jisas i talem long ol lida blong skul long taem blong hem se: “Ol tija blong Loa mo ol Farisi. Sore tumas long yufala. Yufala i gat tu fes. Yufala i olsem gref blong dedman we man i pentem i waet gud. Afsaed, i waet gud, i naes, be insaed i fulap long bun blong dedman, wetem bodi blong hem we i roten i stap. Long sem fasin, taem man i luk yufala, hem i ting se yufala i stret man, be long insaed, yufala i fulap long giaman mo ol fasin we i no stret.”—Matiu 23:27, 28.
Antap long samting ya, Baebol i leftemap tingting blong ol Kristin se oli no mas joen nating long politik. Baebol i no pulum ol man we oli gat bilif blong kilim i ded ol narafala man. Defren olgeta, hem i talem se ol Kristin oli mas rere blong lusum laef blong olgeta blong sevem ol narafala. (Jon 15:12, 13; 18:36; 1 Jon 3:10-12) Trufala skul i no wan skul we ‘i no letem wan rong i pas mo i seraotem man’ be, folem tijing blong Baebol, hem i “joenemgud ol man.” Aposol Pita i talem se: “God i stap mekem i sem mak nomo long olgeta man. Hemia wan trutok ya. Sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan laen blong Isrel, no i kamaot long wan narafala laen olgeta.”—Ol Wok 10:34, 35.
Baebol—Yumi Save Trastem Hem Blong Lidim Yumi Long Saed Blong Spirit
Baebol i talem se God i wokem ol man blong oli olsem pija blong Hem. (Jenesis 1:26, 27, NW ) Samting ya i no min se bodi blong man i sem mak long bodi blong God, nogat. Be i min se ol man oli naf blong gat ol semfala fasin olsem God, mo tu oli naf blong kasem save long ol samting long saed blong spirit.
Nao from we God i wokem yumi olsemia, Hem i mekem rod tu blong yumi kasem ol samting we yumi nidim long saed blong spirit. Mo tu, Hem i soem rod long yumi blong yumi luksave samting we i save mekem yumi haremgud, mo samting we i save spolem yumi long saed blong spirit. God i wokem bodi blong yumi long wan fasin we i mekem se bodi ya i naf blong faet agensem ol sik mo i givhan long yumi blong stap helti. Long sem fasin, God i givim wan tingting long yumi we i save jajem yumi, olsem wan voes we i stap insaed long yumi we i stap halpem yumi blong tekem ol gudfala disisen mo blong ronwe long ol rabis fasin we oli save spolem yumi long saed blong bodi mo spirit. (Rom 2:14, 15) Yumi save finis we, sipos yumi wantem we bodi blong yumi i faetgud agensem ol sik, yumi mas kakaegud. Long sem fasin, sipos yumi wantem we tingting we i jajem yumi i wokgud, yumi mas kakaegud long saed blong spirit.
Jisas i talem wanem kaen kakae bambae i mekem yumi haremgud long saed blong spirit. Hem i talem se: “Man i no save laef long kakae nomo. Evri tok we God i talem, hemia nao samting blong mekem man i laef.” (Matiu 4:4) Olgeta tok blong Jeova oli stap insaed long Baebol, mo oli “stret gud blong tijim yumi long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim yumi long ol stret fasin.” (2 Timoti 3:16) Taswe, i stap long yumi nomo sipos yumi wantem traehad blong kasem kakae ya long saed blong spirit. Sipos yumi wokhad blong save Baebol mo blong mekem ol rul blong hem i wok long laef blong yumi, bambae yumi kasem ol gudfala frut long saed blong spirit mo bodi tu.—Aesea 48:17, 18.
?Ol Traehad Blong Yumi Bambae Oli Karem Frut?
Yumi nidim taem blong stadi long Baebol blong haremgud long saed blong spirit; mo i luk olsem se plante long yumi oli no gat naf taem. !Nating se i olsem, i gud blong traehad from we bambae yumi kasem frut from! Plis, ridim haf we i kam biaen, mo luk olsem wanem sam man we oli bisi long wok blong olgeta oli eksplenem we, long tingting blong olgeta, i impoten tumas blong tekem taem blong lukaot long helt blong olgeta long saed blong spirit.
Marina, wan dokta, i talem se: “Mi neva rili tingbaot ol nid blong mi long saed blong spirit gogo kasem taem we mi stat wok long wan hospital, mo mi haremsave safa blong narafala. Stat long taem ya, mi kasem save se mi mas luksave mo tekem ol samting we mi nidim long saed blong spirit, blong mi haremgud mo mi gat pis long tingting. Laef blong mifala i spid mo mifala i mas givhan long ol man we oli askem help from we oli wari tumas, mo samting ya i save kam hevi tumas long mifala we i mekem wok ya.
“Naoia mi stadi Baebol wetem ol Witnes blong Jeova. Stadi ya i halpem mi blong luklukgud ol aksin blong mi mo ol samting we i pulum mi blong wok, mo i trenem mi blong holem wan gudfala tingting, ale mi save gat wan laef we i skelgud. Mi rili haremgud from wok blong mi [olsem dokta]. Be Baebol stadi blong mi i mekem mi mi harem gud moa long saed blong ol filing blong mi, i halpem mi blong bos long ol filing we oli mekem mi mi harem nogud, i mekem wari i godaon, mo i halpem mi moa blong gat longfala tingting mo blong haremsave ol filing blong ol narafala. Ol rul blong Baebol oli karem gudfala frut long mared blong mi tu. Be samting we i impoten moa hemia se, mi save Jeova mo mi haremsave we hem i stap givim spirit blong hem oltaem nomo, mo samting ya i givim mining long laef blong mi.”
Nicholas, wan man blong wokem ol plan blong haos, i talem se: “Bifo we mi stadi long Baebol wetem ol Witnes blong Jeova, mi no intres nating long ol samting long saed blong spirit. Mi gat wan mak nomo long laef blong mi, mi wantem wingud long wok ya we mi skul from. Baebol i tijim mi se i gat sam samting long laef we oli moa impoten, mo man we i mekem samting we God i wantem bambae hem i kasem trufala glad we i stap olwe.
“Mi haremgud long wok blong mi, be Baebol i tijim mi blong gat wan laef we i no fasfas long tumas samting, mo blong putum ol samting long saed blong spirit fastaem. Long rod ya, mi wetem waef blong mi, mitufala i no stap wari tumas long ol samting long saed blong bodi. Mo tu, mitufala i faenem ol trufala fren long medel blong ol man we oli gat semfala tingting olsem mitufala long saed blong spirit.”
Vincent, wan loea, i talem se: “Wan gudfala wok i save mekem man i haremgud. Nating se i olsem, mi luksave se sipos wan man i wantem kasem glad mo harem gud long laef blong hem, hem i nidim wan samting moa. Bifo we mi lanem wanem we Baebol i talem long saed blong samting ya [olsem wanem blong faenem glad mo haremgud long laef], mi rimemba we mi bin harem nogud tumas taem mi tingting se laef i no gat mining nating—yumi bon, yumi gruap, yumi mared, yumi wok blong kasem naf mane blong lukaot long ol pikinini, yumi trenem ol pikinini ya blong oli folem semfala fasin blong laef olsem yumi, yumi kam olfala mo yumi ded.
“Taem mi stadi wetem ol Witnes blong Jeova nao, mi faenem stret ansa long ol kwestin ya we mi stap askem long mi wan long saed blong mining blong laef. Baebol stadi blong mi i halpem mi blong tingbaot Jeova olsem wan trufala man, mo mi lanem blong lavem hem. Hemia i givhan long mi blong holem wan gudfala tingting long saed blong spirit, taem mi stap traehad blong mekem laef blong mi i laenap wetem stamba tingting blong Jeova long saed blong ol man. Naoia, mi wetem waef blong mi, mitufala i haremgud from we mitufala i sua we mitufala i yusumgud laef blong mitufala, long wan rod we i rili gat mining.”
Yu tu, yu save faenem wan mining long laef blong yu sipos yu stadi Baebol. Ol Witnes blong Jeova oli glad blong givhan long yu. Olsem Marina, Nicholas, mo Vincent, yu save haremgud from we yu save Jeova mo stamba tingting we Hem i gat long saed blong ol man, mo long saed blong yu wan. Yes, bambae yu haremgud from we yu kasem ol samting we yu nidim long saed blong spirit, mo tu bambae yu save kasem laef we i no save finis mo stap helti oltaem—hemia wan hop blong olgeta ya nomo we “oli luksave se oli nidim ol samting long saed blong spirit.”—Matiu 5:3, NW.
Prea hem i wan fasin blong tingbaot ol nid blong yumi long saed blong spirit. Jisas i tekem taem blong tijim ol disaepol blong hem long fasin blong prea, mo i lanem olgeta long prea ya we yumi kolem Lodsprea. ?Prea ya i minim wanem long yu tede? ?Wanem ol blesing we yu save kasem from? Tufala haf we i kam biaen i ansa long ol kwestin ya.
[Tok blong pija long pej 6]
Marina
[Tok blong pija long pej 7]
Nicholas
[Tok blong pija long pej 7]
Vincent