?From Wanem Yu Mas Intres Long Skul?

LONG evri kantri long wol, i gat ol man we oli intres long skul. Mo i gat plante man tu we oli talem stret se oli no intres long skul. ?Be oli gat tingting ya longtaem finis?

Ol man oli bon wetem fasin ya se oli no save haremgud from ol samting long saed blong bodi nomo. Oli nidim ol samting long saed blong speret. Ol wok we man i mekem evri dei blong kasem ol samting we hem i nidim long saed blong bodi, wetem sam taem blong spel, oli no mekem se hem i kasem fulwan evri samting we hem i nidim long dip filing blong hem. I defren olgeta long ol anamol, ol man oli wantem save se, ‘?Wanem mining blong laef?’ ‘?I gat laef ya nomo, we i sot mo i gat plante naes samting, be tu i gat plante samting we oli nogud tumas long hem?’ ?Yu bin askem ol kwestin olsem, no?

Nating se i olsem wanem, plante milyan man tede, oli gruap long medel blong ol fasin we oli daonem ol gudfala intres we man i save gat long skul. Maet oli tekem fasin ya long papa mama blong olgeta, long ol tija, long ol fren, no ating long gavman.

Skalabrino, wan yangfala man long Albania, i eksplenem se aninit long rul blong ol Komunis, oli tijim ol man se i no gat God. Antap long samting ya, i denja tumas long olgeta blong tokbaot skul; man we i mekem olsem i save go long kalabus. Be, long 1991, taem hem i go long Swiselan olsem wan refuji,a hem i gat jans blong stadi long Baebol. Hem i akseptem. ?From wanem?

Yes, long Albania, hem i bin harem se i gat wan buk we oli kolem Baebol, be hem i no save wan samting nating long saed blong buk ya. Taswe, fastaem, maet bigfala samting we i pusum hem blong stadi, i no from we hem i wantem kasem save long Baebol. Nating we oli bin talem long hem se, bambae hem i stadi long stampa tingting blong God long saed blong olgeta man mo wol, hem i luksave tu se stadi ya i olsem wan jans blong kam moa gud long lanwis blong ples ya. Be, kwiktaem nomo hem i faenem se samting we hem i stap lanem i mekem dip filing blong hem we i wantem tumas ol samting long saed blong speret, i haremgud. Hem i haremgud tumas taem i lanem promes blong God long saed blong wan nyufala wol we bambae pis i fulap long hem, wan wol we bambae ol man oli laef foreva long hem mo oli save haremgud long plante samting we oli nidim blong laef. Intres blong hem i kam bigfala moa taem i lanem se hem mo famle blong hem oli save stap long nyufala wol ya. From we hem i wantem talemaot gud nyus ya long narafala, hem i telefon long famle blong hem long Albania blong serem wetem olgeta.

Aleksei, we i stap long Rasia, hem tu i sapraes long samting we stret save blong Baebol i save mekem long laef blong wan man. From we hem i kasem fulap problem mo i no faenem wan stret ansa blong eksplenem mining blong laef, hem i plan blong kilim hem wan i ded. Be fastaem, hem i go long Finlan blong visitim wan fren. Taem hem i stap go long tren, hem i tokbaot ol problem blong hem long sam pasenja. Long medel blong ol man ya, i gat wan Wetnes blong Jeova, we i askem Aleksei blong stadi Baebol from we Baebol i save soem rod blong winim ol problem olsem. Aleksei i no bilif. Long trep blong hem blong kambak, hem i kasem sem ekspiryens. Long trep ya, wan narafala Wetnes i storeyangud wetem hem mo i talem se hem i bin gat plante problem olsem, be Baebol i halpem hem blong winim ol problem ya. Woman ya tu i leftemap tingting blong Aleksei blong stadi Baebol. Taem hem i kasem haos blong hem, telefon i ring. Hem i wan narafala fren, we i stap stadi wetem ol Wetnes mo hem i glad tumas. Aleksei i stat blong kasemsave se ating Baebol i rili save givim samting we hem i nidim, be hem i save se sipos i no gat wan man i halpem hem, bambae hem i no save kasem save long Baebol. Hem i agri blong stadi Baebol wetem ol Wetnes blong Jeova long haos blong hem, mo hem i stat blong go long ol miting blong olgeta. Kwiktaem nomo hem i kasem save from wanem olgeta we oli folem ol tijing blong Baebol long laef blong olgeta oli glad, nating se olgeta tu oli stap fesem ol problem we olgeta man oli stap fesem.

Jisas Kraes we i save long ol fasin we ol man oli bon wetem, i talem se: “Kakae nomo i no save mekem man i laef.” (Matyu 4:​4, The New English Bible) Mo tu hem i talem se: “Olgeta we oli luksave se oli nidim ol samting long saed blong speret, oli save harem gud.” (Matyu 5:⁠3, NW) Oli glad from we oli luksave klia ol samting we oli nidim, oli mekem ol stret wok blong kasem samting ya, mo oli kasem blesing blong God. Be, yumi no save kasem ol samting we yumi nidim long saed blong speret sipos yumi stap joen nomo long wan jyos no go long sam sevis blong skul. Skul we bighaf blong hem i folem kastom i save pulum filing blong man, ?be hem i soem trufala rod we i save wokgud blong winim ol problem blong laef? Nating se wan skul i leftemap sam stampa tijing we oli stret, be sipos skul ya i no tijim trufala mining blong laef, ?yu ting se skul ya i save givim olgeta samting we yu nidim long saed blong speret? Samting we i bigwan moa blong tingbaot se, sipos wan man i folem wan skul olsem, ?skul ya i save lidim hem blong frengud wetem God? Sipos man i no frengud wetem God, hem i no save gat trufala glad.

From samting ya, plante man oli stap lukaot wan samting we oli no faenem yet.

[Futnot]

[Tok blong pija long pej 3]

?Bambae yu rili kasem ol samting we yu nidim long saed blong speret sipos yu joen long wan skul?

[Tok blong pija long pej 4]

Plante man oli faenem se taem oli kasem save long Baebol, laef i gat nyufala mining