?Fasin Blong No Joen Long Wol i Blokem Ol Kristin Blong Soem Lav?

WAN Kristin i no jes ridim Baebol, prea long God, mo singim ol singsing blong jos long Sande. Wan Kristin i mas mekem moa. Hem i mas mekem sam wok, blong God mo ol man tu. Baebol i talem se: “I nogud yumi lavem man long toktok blong yumi nomo. Yumi mas mekem samting blong givhan long hem, blong soemaot we yumi lavem hem tru.” (1 Jon 3:18) Jisas i rili kea long ol narafala, mo ol Kristin oli wantem folem eksampol blong hem. Aposol Pol i talem long ol narafala Kristin se, oltaem, oli mas “wok strong long ol wok ya blong Masta.” (1 Korin 15:58) ?Be wanem ya ol wok blong Masta? ?Wok ya i minim se yumi mas traem jenisim politik blong ol gavman, blong mekem i gud long ol puaman mo long ol man we oli safa? ?Hemia nao samting we Jisas i bin mekem?

Ol man oli traem pulum Jisas blong joen long politik no tekpat long pati blong sam man, be Jisas i neva wantem mekem olsem. Hem i sakemaot presen we Setan i wantem givim long hem, hemia paoa antap long olgeta kantri blong wol. Hem i no wantem agiu wetem ol man long saed blong kwestin ya se ol man oli mas pem takis no nogat. Mo hem i ronwe taem ol man oli wantem putumap hem olsem king. (Matiu 4:8-10; 22:17-21; Jon 6:15) Jisas i no joen long wol ya, be samting ya i no blokem hem blong mekem i gud long ol narafala.

Jisas i wok strong blong givim samting we man i save harem gud long hem blong longtaem. I tru, hem i givim kakae long faef taosen man mo hem i mekem ol man we oli sik oli kam gud bakegen, mo ol wok ya oli mekem i gud long sam man blong smol taem. Be tijing blong hem nao i moa impoten, from we tijing ya i save karem blesing blong olwe i kam long olgeta man long wol. Sipos ol man oli savegud Jisas, i no from we hem i ogenaesem ol bigfala wok blong mekem i gud long ol man, be from we hem i wan “Tija.” (Matiu 26:18; Mak 5:35; Jon 11:28) Hem i talem se: “Mi mi bon, mi kam long wol ya blong wan samting nomo, blong mi talemaot ol tok we i tru.”—Jon 18:37.

Talemaot Samting We i Moagud i Bitim Politik

Trutok we Jisas i talemaot i no stanap long ol bigfala tingting blong politik. Trutok ya i stanap long Kingdom we Jisas bambae i mas kam King long hem. (Luk 4:43) Kingdom ya i wan gavman long heven, we bambae i tekem ples blong olgeta gavman long wol mo i karem pis i kam blong olwe long ol man. (Aesea 9:6, 7; 11:9; Daniel 2:44) Taswe, Kingdom hem i wan hop ya nomo we olgeta man oli save putum tingting blong olgeta i stap strong long hem. Ol man we oli tokbaot Kingdom ya olsem wan strong hop long fiuja, oli soem moa lav i bitim olgeta we oli leftemap tingting blong ol narafala se oli mas trastem man nomo blong kasem wan fiuja we i moagud. Baebol i talem se: “Yufala i no mas trastem ol lida blong wol ya. Olgeta oli no save sevem yufala. Taem oli ded, oli stap gobak long graon nomo, nao ol plan blong olgeta oli no save kamtru. Hae God i God blong Jekob. . . . Man we i putum tingting blong hem i stap long hem, hem bambae i harem gud.” (Ol Sam 146:3-5) Taswe, Jisas i no sanem ol disaepol blong hem oli go talemaot wanem nao beswan rod blong ogenaesem ol gavman, nogat. Hem i tijim ol disaepol blong oli talemaot “gud nius ya blong Kingdom.”—Matiu 10:6, 7; 24:14, NW.

Hemia nao ‘wok blong Masta’ we olgeta Kristin man oli mas mekem. Ol man we oli wantem stap aninit long rul blong Kingdom ya oli mas lavlavem olgeta. Taswe long Kingdom ya bambae i no moa gat ol puaman, from we bambae ol man oli seremaot ol rij samting blong wol long wan fasin we i stret. (Ol Sam 72:8, 12, 13) Hemia wan gudfala nius we yumi wantem tumas blong talemaot.

Tede, ol Witnes blong Jeova oli ogenaesgud blong mekem ‘wok blong Masta’ long 235 kantri. Oli obei long oda blong Jisas, mo oli soem respek long ol gavman. (Matiu 22:21) Be tu, oli obei long tok we Jisas i talem long ol disaepol blong hem se: “Yufala i no man blong wol ya, mi mi jusumaot yufala finis, mo mi tekemaot yufala long ol man blong wol ya.”—Jon 15:19.

Sam man we bifo oli trastem politik, oli jenisim tingting blong olgeta afta we oli bin stadi long Baebol. Wan man blong politik long Itali, we bifo hem i memba blong grup ya Catholic Action, wan grup we jos i lidim, i talem se: “Mi mi joen long politik, from we mi harem se wanwan man i mas wokhad blong mekem politik mo laef blong man i kam gud moa.” Be hem i lego wok blong hem olsem mea blong wan taon, from we hem i wantem talemaot Kingdom blong God olsem wan Witnes blong Jeova. Hem i eksplenem from wanem traehad blong man insaed long politik i no save karem frut, nating sipos ol man ya oli gat gudfala tingting. Hem i se: “Sipos wol blong tede i olsemia, i no from we ol gudfala man oli no traem mekem laef i kam moa gud, nogat, be hemia from we i gat plante moa man we oli mekem ol rabis fasin i bitim ol man we oli traem mekem i gud.”

Ol trufala Kristin we oli talemaot Kingdom olsem wan hop ya nomo we ol man oli save bilif se i tru, oli no joen long politik, be oli halpem ol man we oli gat nid. Oli tijim ol man olsem wanem blong lego ol rabis fasin we i save spolem olgeta, olsem wanem blong soem respek long ol haeman, olsem wanem blong mekem famle laef blong olgeta i kam gud moa, mo olsem wanem blong gat wan tingting we i skelgud long saed blong ol sas samting blong wol. Mo, samting we i impoten moa, ol Witnes blong Jeova oli halpem ol man blong oli kam ol fren blong God.

Ol man we oli talemaot Kingdom blong God oli mekem i gud long komuniti we oli laef long hem. Mo, samting we i gud moa se, oli pulum ol man blong trastem wan trufala gavman we bambae i karem pis blong olwe long olgeta man we oli lavem God. Ol Kristin oli no joen long wol, taswe i no gat samting long saed blong wol ya we i blokem olgeta blong givim wan trufala help we i save mekem i gud long ol man blong longtaem.

[Bokis blong pija long pej 7]

Mi Lego Politik Mo Mi Talemaot Kingdom Blong God

Taem hem i yang yet, Átila i lanem tijing ya we oli kolem liberation theology we ol pris blong Belém long Brasil oli stap tijim. Hem i glad blong harem se wan dei bambae ol man oli fri long olgeta ya we oli stap mekem i nogud long olgeta. Átila i joenem wan grup we i wok blong jenisim sam samting long politik mo laef. Long grup ya hem i lanem olsem wanem blong ogenaesem ol maj blong agensem gavman mo olsem wanem blong pulum ol man blong no obei long ol loa.

Be long sem taem, Átila i glad blong tijim ol pikinini blong grup ya, wetem wan buk we hem i bin kasem, nem blong buk ya Listening to the Great Teacher.a Buk ya i tokbaot gudfala fasin mo fasin blong obei long ol gavman. Tijing ya i pusum Átila blong wantem save from wanem ol man we oli sapotem liberation theology oli no folem fasin blong laef blong Jisas, mo from wanem sam man oli fogetem ol puaman, taem oli kasem paoa. Hem i lego grup ya. Biaen, ol Witnes blong Jeova oli kam prij long hem mo oli tokbaot Kingdom blong God. Hem i stat stadi long Baebol mo i lanem se i gat wan rod nomo we i save stretem ol trabol blong man fulwan.

Raonabaot long semtaem ya, ol Katolik oli mekem wan miting we i tokbaot bilif mo politik, mo Átila i go long miting ya. Ol man we oli givim tok oli talem se bilif mo politik, oli olsem “tufala saed blong wan selen mane nomo.” Átila i go long wan miting long wan Haos Kingdom tu. !Miting ya i defren olgeta! Wan samting se, i no gat man i smok tabak, i drong, no i talem ol rabis tok. Átila i tekem disisen blong joen long wok blong prij, mo hem i tekem baptaes. Naoia hem i luksave from wanem liberation theology i no rod ya we i save stretem trabol blong ol puaman.

[Futnot]

[Tok blong pija long pej 6]

Ol Kristin oli no joen long wol ya, be samting ya i no blokem olgeta blong halpem narafala