?Yumi Save Blemem God From Ol Trabol Blong Yumi?

TAEM bigfala gel blong Marion i gat wan kil long hed we i spolem bren blong hem, Marion i mekem wan samting we plante long yumi oli mekem.a Hem i prea long God blong kasem help. Marion i talem se: “Mi no rimemba wan narafala taem olsemia, we mi harem se mi no gat paoa nating, mo mi stap mi wan nomo.” Biaen, gel blong hem i kam sik moa, mo Marion i stat tingting se maet God i no kea. Hem i askem se: “?From wanem samting ya i hapen?” Marion i no kasem save olsem wanem wan God we i gat lav mo we i kea long man, i save lego hem olsemia.

I gat plante stori olsem stori blong Marion. Plante man raon long wol oli harem se, long taem we oli nidim God moa, God i lego olgeta. Wan woman we nem blong hem Lisa i harem nogud taem wan man i kilim i ded pikinini boe blong gel blong hem. Hem i talem se: “Mi stap wari oltaem long kwestin ya se, ‘?From wanem GOD i letem ol nogud samting olsem i hapen?’ Mi bilif yet long God, be, i no moa olsem bifo.” Wan narafala woman we smol boe blong hem i ded long fasin we i rabis olgeta i talem se: “Taem samting ya i hapen, God i no givhan long mi nating. Hem i no mekem wan samting blong soem we hem i kea no i sore long mi.” Woman ya i talem se: “Bambae mi neva fogivim God.”

Sam narafala man oli kros long God taem oli luk samting we i hapen long wol, raonabaot long olgeta. Oli luk ol man we oli safa bigwan from we oli pua mo oli no gat kakae, oli luk ol refuji we oli no gat hop, oli luk plante tumas pikinini we oli lusum papa mama blong olgeta from rabis sik ya AIDS, mo oli luk plante milian man we oli harem nogud from sam narafala sik bakegen. Taem ol man oli fesem ol trabol olsemia, plante taem oli putum fol long God, from we i luk olsem se hem i no mekem wan samting blong blokem ol trabol ya.

Be, tru, yumi no save blemem God from ol trabol we i kasem ol man. I gat sam pruf we i soem se i no longtaem bambae God i karemaot ol trabol ya mo i mekem i gud long olgeta man. Plis, ridim haf we i kam biaen, mo luk sam defren samting we i soem se God i rili kea long yumi.

[Futnot]