Wan Nambawan Tul Blong Translesen

JEOVA GOD i putum tok blong hem long Baebol, mo i wantem we gud nius blong Kingdom blong hem i go “long olgeta man long wol, long olgeta blong evri kala, mo kantri, mo laen, mo lanwis.” (Revelesen 14:6) Hem i wantem we ol man long olgeta ples oli gat janis blong kasem buk ya blong hem. Blong mekem olsem, ol man oli mas transletem Baebol i go long plante moa lanwis, i bitim ol narafala buk long wol. Ale, plante taosen man oli spenem plante taem, mo oli hadwok tumas, blong talemaot ol tingting blong God long ol naranarafala lanwis.

Be ol man ya oli no tingbaot Baebol olsem wan wok blong transletem ol tok nomo. Plante taem, translesen blong Baebol we samfala oli mekem finis, i halpem ol man blong transletem sam narafala tok bakegen. Plante transleta oli skelem ol tok blong Baebol long ol narafala lanwis, blong bambae oli save faenem ol stret wod we oli nidim. Mo naoia oli yusum fasin ya long ol translesen we kompiuta i mekem.

I hadwok blong ol kompiuta oli mekem translesen. Sam man blong save oli talem se ol kompiuta oli no naf nating long wok ya. ?From wanem? From we blong transletem ol tok, i no naf blong lanem ol wod mo mining blong olgeta nomo. Evri lanwis i gat ol grup blong wod we oli joenem blong mekem wan spesel mining, ol prapa rul blong hem, sam tok we oli no laenap wetem ol rul ya, sam tok we oli gat defren mining taem yumi joenem olgeta, mo sam tok we oli gat spesel mining long lanwis. Oli traem blong putum olgeta samting ya insaed long kompiuta, be i no wokgud. Taem kompiuta i yusum ol samting ya, translesen we i kamaot, man i no save kasem save long hem.

Naoia ol man we oli gat save long kompiuta, oli traem faenem sam niufala rod blong mekem translesen. Franz Joseph Och, wan haeman blong yusum kompiuta blong mekem translesen, i talem se: “Mifala i yusum rod ya we oli kolem statistical models blong faenem translesen we i moa gud.” Tingbaot sipos yu wantem tanem wan tok Hindi i kam long Inglis. Fastaem yu tekem sam save we i stap finis long tufala lanwis ya tugeta. Nao yu putum save ya long tufala lanwis ya i go insaed long kompiuta. Nao kompiuta i skelem tufala. Maet kompiuta i faenem wan tok Hindi long plante ples. Mo long ol semfala ples long Inglis hem i faenem Inglis wod ya “house” (haos). Ale, kompiuta i faenemaot we tok ya long Hindi hem i minim “haos” long Inglis. Nao ating ol tok we oli stap klosap long “haos” oli soemaot se haos i olsem wanem, maet ol tok olsem “big,” “smol,” “olfala,” mo “niu.” Ale sloslo kompiuta i wokem wan lis blong olgeta wod mo grup blong wod long tufala lanwis ya. Ale oli “trenem” kompiuta long fasin ya blong sam dei no wik, gogo hem i save folem ol tok ya we hem i “lanem” blong transletem ol narafala toktok. I tru we, plante taem kompiuta i no mekem gudfala translesen, be ol man oli save kasem save long stamba mining blong hem mo ol impoten poen.

Blong kompiuta i mekem gudfala translesen, oli mas putum plante toktok long tufala lanwis ya i go insaed long hem, we translesen long tufala lanwis ya i gud. Mo blong mekem samting ya, Baebol nao i nambawan. ?From wanem? From we oli mekem finis plante gudfala translesen blong Baebol, we i gat plante toktok insaed long olgeta, mo oli stap long olgeta ples long wol. Taswe Baebol i nambawan tul we ol man blong hae save oli yusum blong tijim kompiuta blong transletem wan niufala lanwis.