Ripot Long Wok Blong Kingdom
Ol Man We Oli Holem Stret Fasin Oli Leftemap Nem Blong Jeova
LONG olgeta ples blong wol, ol man oli save long stret fasin we ol Witnes blong Jeova—ol yangfala mo ol olfala—oli soemaot. Tingbaot ol stori ya we i kamaot long tri bigfala kantri.
Olusola we i laef long Naejeria i gat seventin yia blong hem. Wan dei taem hem i finis skul, i stap gobak long haos, hem i faenem wan paos long graon. Olusola i karem paos ya i go long hedmasta blong skul, mo taem hedmasta i kaontem mane we i stap long paos, i gat 6,200 naira (hemia samting olsem 5,000 VT). Hedmasta i givimbak paos long tija we i bin lusum paos ya. Blong soem tangkiu long Olusola, tija ya i givim 1,000 naira (raonabaot 800 VT) long hem, mo i talem long Olusola blong yusum mane ya blong pem skul fi blong hem. Ol narafala studen oli jikim Olusola taem oli harem samting we i hapen. Sam wik biaen, wan studen i talem se wan man i bin stilim mane blong hem. Ale, ol tija oli mas jekem olgeta studen blong traem faenem mane ya we i lus. Tija blong Olusola i talem long hem se: “Yu yu stap long ples ya, mi save se, from we yu yu wan Witnes blong Jeova, yu no save stil.” Oli faenem mane ya long tu boe we oli bin jikim Olusola, mo tufala i kasem panis from. Olusola i raetem se: “Mi mi glad tumas from we oli save mi olsem wan Witnes blong Jeova we bambae i neva stil, mekem se samting ya i leftemap nem blong Jeova.”
Marcelo i wan manples blong Ajentina. Wan dei taem hem i aot long haos blong hem, hem i faenem wan basket long graon, sam mita nomo longwe long doa biaen long haos blong hem. Hem i tekem basket ya i kam insaed long haos, nao hem mo woman blong hem, tufala i openem basket ya. Tufala i sapraes blong luk bigfala mane i stap, i gat ol kredit kad, mo sam jek we oli saenem finis, mo wan long ol jek ya i blong wan milian pesos (bitim 36,000,000 VT). Insaed long basket ya oli faenem wan telefon namba. Oli telefon long man ya we basket ya i blong hem, mo oli mekem plan blong mitim hem long ples blong wok blong Marcelo, blong givimbak basket mo olting blong hem. Taem man ya i kam, i luk olsem se hem i wari. Nao bos blong Marcelo i talem long man ya blong i no wari, from we Marcelo i wan Witnes blong Jeova. Man ya we basket i blong hem, i givim 20 pesos (raonabaot 600 VT) long Marcelo blong talem tangkiu long hem. Bos blong Marcelo i bin sapraes bigwan long stret fasin blong Marcelo, taswe hem i kros bigwan taem hem i luk we man ya i givim smol mane nomo long Marcelo. Marcelo i tekem janis ya blong talem se hem i wan Witnes blong Jeova mo from samting ya hem i wantem mekem samting we i stret oltaem.
Nekis stori i kamaot long kantri ya Kyrgzstan. Rinat i wan boe we i gat sikis yia blong hem. Hem i faenem wan paos blong wan woman we i stap klosap nomo long haos blong hem. Long paos ya i gat 1,100 som (samting olsem 2,800 VT). Taem Rinat i givimbak paos ya long woman ya, woman ya i kaontem mane mo i talem long mama blong Rinat se 200 som (samwe 500 VT) i lus. Rinat i talem se hem i no karem mane ya. Ale, trifala i go lukaot mane we i lus mo oli faenem long ples we paos ya i bin stap long hem. Woman ya i sapraes. Hem i glad long Rinat mo mama blong hem from we tufala i givimbak mane blong hem, mo from we mama blong Rinat i tijim gud hem long ol Kristin fasin.