[lef i go long raet] Marcelo, Yomara, mo Hiver. Olgeta wanwan i holem wan volium blong Spanis Niu Wol Translesen long braille
Oli Luksave Lav Blong Kongregesen
YOMARA mo tufala brata blong hem, Marcelo mo Hiver, oli laef long wan smol vilej long Guatemala. Yomara i stat blong stadi Baebol wetem ol Witnes, mo i no longtaem afta, tufala brata blong hem tu oli stat blong stadi. Be i gat wan problem. Trifala evriwan i blaen mo oli no save ridim braille. Taswe Baebol tija blong olgeta bambae i ridim ol haf blong ol lesen, mo ol vas blong Baebol long olgeta.
Blong go long ol miting, hemia tu i had. Mo blong go long Haos Kingdom we i klosap, oli mas wokbaot 40 minit olsem, be oli no save wokbaot olgeta wan i go. Be ol brata long kongregesen oli mekem plan blong oli save tekem olgeta i go long evri miting. Mo taem trifala i stat blong mekem ol tok long miting blong medel wik, ol brata oli halpem olgeta blong lanem baehat ol tok blong olgeta.
Long Mei 2019, oli stat blong mekem ol miting long vilej blong olgeta. Long taem ya, wan kapol we i fultaem paenia i muv i go long vilej ya. Tufala i putum mak ya blong tijim trifala blong rid mo raet long braille, nating se tufala tu i no save. Ale, tufala i go long wan laebri mo tekem sam buk we i save halpem tufala blong lanem olsem wanem blong tijim ol narafala blong rid mo raet long braille.
Marcelo i givim ansa long wan miting blong kongregesen
Sam manis biaen, trifala i save ridim braille mo hemia i mekem se oli save gohed gud moa long saed blong spirit.a Naoia Yomara, Marcelo, mo Hiver oli mekem wok blong fultaem paenia. Marcelo i wan man blong givhan. Long ful wik, trifala i bisi oltaem long wok blong Jehova, mo hemia i pulum ol narafala tu blong oli mekem moa long wok blong Jehova.
Yomara mo tufala brata blong hem oli glad tumas from lav mo sapot we kongregesen i soem long olgeta. Yomara i talem se: “Long faswan taem we mifala i mitim ol Witnes, oli soemaot trufala Kristin lav long mifala.” Marcelo tu i talem se: “Mifala i gat ol gudfala fren insaed long kongregesen, mo mifala i pat blong wan bigfala famle blong ol brata mo sista long fulwol, we lav nao i joenem olgeta wanples.” Yomara mo tufala brata blong hem oli stap wet long taem ya we bambae oli luk wol ya i jenis i kam wan paradaes.—Sam 37:10, 11; Aes. 35:5.
a Oli wokem wan buklet we taetel blong hem Learn to Read Braille blong halpem ol man we oli blaen o oli no save lukluk klia, blong oli lanem olsem wanem blong rid mo raet long braille.