Ol Dot We Oli Jenisim Laef Blong Plante Man

Long 1 Jun 1912, The Watch Tower i talem se: “Ating plante rida blong magasin ya oli save sam blaenman. Ol blaenman oli save kasem ol buk fri nomo. . . . . Oli wokem ol buk ya wetem ol dot we blaenman i save filim blong ridim.” The Watch Tower i gohed se: “Plante blaenman oli glad tumas blong save se long fiuja ol nambawan blesing bambae oli kamaot long wol ya.”

Long taem ya we oli raetem ol tok ya, ol Inglis kantri oli gat defdefren wei blong raetem lanwis blong ol blaenman (Braille). Be ol Witnes blong Jehova oli stap wokem finis ol buk wetem ‘ol dot we blaenman i save filim’ (Braille), blong talemaot ol trutok blong Baebol long olgeta. !Mo mifala i stap gohed yet! Naoia mifala i wokem ol buk long Braille long bitim 50 lanwis. ?Oli wokem olsem wanem?

Jenisim Ol Tok i Go Long Braille Mo Wokem Ol Buk

Fas samting se mifala i mas jenisim ol tok i go long Braille. Michael Millen, we i wok long Text Processing Services long Patterson, New York, i talem se: “Bifo, mifala i stap yusum kompiuta program we narafala i wokem blong jenisim ol tok i kam long Braille, be i no wok gud long olgeta lanwis we mifala i nidim. Naoia mifala i yusum Wajtaoa Translesen Sistem, we i wok gud long bighaf blong ol lanwis long wol. Mi ting se i no gat wan narafala program we i olsem.”

Long ol buk long Braille, i no gat toktok long ol paragraf nomo, be i gat toktok blong eksplenem ol pija tu. Wan eksampol, ol tok blong eksplenem pija long kava blong buk ya !Enjoem Laef Olwe! i talem se: “Wan man i wokbaot i godaon long wan rod long medel blong ol flaoa, tri, mo ol hil.” Jamshed, wan man blong givhan mo wan paenia we i blaen, i talem se: “Ol tok we i eksplenem ol pija, i impoten tumas long mi.”

Afta we oli jenisim ol tok i kam Braille, oli sanem ol fael i go long ol branj ofis blong oli wokem ol buk. Oli stampem ol tok ya i go long strong pepa we i no save kam sofsof taem ol blaenman oli yusum plante. Biaen, oli putum ol pej long stret ples blong olgeta, oli joenem i kam wan buk, mo oli sanemaot wetem ol nara buk we oli sanem long ol kongregesen, o tru long postofis we i gat rod blong sanem “ol fri buk long ol blaenman.” Taem i gat nid, ol branj ofis oli sanem long rod we i kwik moa, blong ol brata mo sista we oli blaen oli kasem ol buk we oli nidim long stret taem blong ol miting long kongregesen.

I tekem plante taem blong mekem ol wok ya, mo i nidim mane tu. Traem tingbaot: Long faktri blong mifala long Wallkill, New York, oli tekem semtaem blong wokem 2 Baebol long Braille, olsem oli tekem blong wokem 50,000 narafala Baebol. I gat 25 volium long wan Baebol long Inglis Braille, mo praes blong evri samting blong wokem ol volium ya i 123 taem antap long praes blong wokem narafala Baebol. Praes blong ol kava nomo blong 25 volium blong wan Baebol long Braille, i bitim 16,000 vatu.

?Wanem tingting blong olgeta we oli wokem ol buk long Braille? Nadia, we i wok long branj ofis blong Saot Afrika, i talem se: “Ol brata mo sista we oli blaen, oli gat wan had laef. Taswe i wan blesing blong mekem wok ya blong givhan long olgeta. I klia se Jehova i lavem olgeta tumas.”

Learn to Read Braille

?Be olsem wanem sipos wan blaenman i no save ridim Braille? Sam yia i pas, mifala i printim wan niufala buk, Learn to Read Braille, hemia wan wok buk we i gat Braille mo ol nara raeting tu insaed. Mifala i wokem blong wan man we i lukluk i givhan long blaenman. Buk ya i kam wetem wan spesel divaes we blaenman i save yusum blong raetem Braille. Man we i stap lanem Braille i yusum ol tul ya. Samting ya i givhan long hem blong i lanem ol tok long Braille, nao taem hem i tajem hem i save rid.

“!Mi No Save Stop!”

?Olsem wanem ol buk ya oli givhan long ol brata mo sista we oli blaen? Bifo, Ernst blong Haiti i stap go long ol miting long kongregesen, be i no gat ol buk long Braille. Taswe, taem hem i givim wan tok o i ansa long miting, hem i mas lanem baehat nomo. Hem i talem se: “Be naoia, mi save leftemap han mo givim ansa enitaem. Mi harem se mi gat wan tingting nomo wetem ol brata mo sista. !Jehova i stap givim sem save long yumi evriwan!”

Wan elda long Ostria we i stap lidim Wajtaoa Stadi mo Baebol Stadi Blong Kongregesen, i talem se: “Ol buk blong yumi long Braille oli klia moa i bitim ol nara buk we mi ridim long Braille. I gat ol namba long ol pej, ol futnot we oli isi blong faenem, mo ol tok blong eksplenem klia ol pija.”

Son-uk, wan paenia sista long Saot Koria, i blaen mo sora blong hem i fas tu. Bifo, long ol miting, wan narafala i holem han blong hem mo i mekem saen lanwis we hem i save filim mo kasem save. Be naoia hem i save ridim ol buk blong stadi Baebol long Braille. Hem i talem se: “I had blong ridim ol narafala buk long Braille from we sam tok i no gat, ol laen oli kruked, o pepa i tintin tumas. Be ol Witnes blong Jehova oli yusum gudfala pepa, mo oli mekem ol dot i bigwan, taswe i isi moa blong mi mi ridim.” Hem i gohed se: “Bifo mi nidim help blong stadi be naoia mi save stadi mi wan. Mi harem gud tumas se mi save rerem ol miting evri wik mo joen fulwan long olgeta. Mi ridim evri buk blong yumi long Braille. !Mi no save stop!”

Ol buk blong yumi long Braille oli talem sem samting olsem ol narafala buk blong yumi, se : “Buk ya i no blong salem. Oli yusum long fulwol blong tijim ol man long Baebol. Wok ya i stanap long presen mane nomo.” Tangkiu tumas blong givim presen mane long ol rod we donate.jw.org i tokbaot. Presen mane blong yufala i mekem se olgeta we oli blaen oli save kasem ol buk blong eksplenem Baebol.