Givhan Long Ol Blaenman Blong Oli Save Jehova

1. ?Olsem wanem Jisas i soemaot se hem i gat sore long ol blaenman?

¹ I gat sam dei nomo i stap bifo we Jisas i ded. Taem hem aot long taon blong Jeriko, i gat tu blaenman we tufala i stap sidaon long saed blong rod, mo tufala singaot bigwan se: “!Plis yu sore long mitufala!” Nating se Jisas i stap tingbaot ol trabol we bambae hem i kasem i no longtaem, be hem i stanap mo singaot tufala blong kam long hem, mo hem i mekem se tufala i save lukluk bakegen. (Mat. 20:29-34) ?Olsem wanem yumi save folem fasin blong Jisas blong gat sore long ol blaenman?

2. (1) ?Olsem wanem yumi save prij long wan blaenman we maet yumi mitim hem long pablik ples? (2) ?Yumi mas tingbaot wanem taem yumi wantem givhan long ol blaenman?

² Yu Givhan Long Olgeta: Sipos yu mitim wan blaenman, maet long pablik ples, i gud yu talem halo long hem mo yu talemaot nem blong yu, mo yu askem hem sipos hem i nidim blong yu givhan long hem. Plante taem ol man oli mekem i nogud long olgeta no oli daonem olgeta. Taswe, maet fastaem man ya bambae i no trastem yu. Nating se i olsem, taem yu givhan blong mekem samting we hem i talem, mo yu soemaot se yu intres long hem, bambae hem i no moa fraet long yu. Yu mas tingbaot se, i gat ol defdefren kaen blaenman. Mo hemia bambae i givhan long yu blong luksave olsem wanem blong givhan long olgeta. Afta we yu givhan long wan blaenman, i gud we yu talemaot long hem se, yu stap joen long wan wok blong tijim man long Baebol. I gud yu ridim wan vas long hem, olsem Ol Sam 146:8 no Aesea 35:5, 6. Sipos hem i save ridim Braille, we i lanwis blong ol Blaenman, i gud yu askem sipos yu save tekem sam magasin we oli stap long lanwis ya, we oli save givhan long hem blong kasemsave long Baebol. Mo tu yu save givhan long hem blong karem ol rikoding we oli stap jw.org. Sipos hem i gat wan kompiuta we i save ridim ol toktok we oli stap long ol magasin we oli printim, maet bambae hem i glad long ol buk we oli stap long jw.org mo ol buk we yu save daonlodem long RTF fomat (Rich Text Format). Yu luk bokis ya “Taem Yu Givhan Long Wan Blaenman . . . ”

3. ?Olsem wanem yumi save faenem ol blaenman long teritori blong yumi?

³ Yu Traem Faenem Olgeta: Taem yumi prij long ol haos wanwan, plante taem yumi no luk ol blaenman. Hemia from we, plante long olgeta oli no laekem tumas blong toktok wetem ol man we oli no save olgeta. Taswe, i nidim we yumi traehad blong “faenem” olgeta, mo prij long olgeta. (Mat. 10:11) ?Yu yu gat wan fren long wok, no long skul we hem i blaen? I gud yu tekem janis ya blong storian wetem hem. Sipos i gat wan skul blong ol blaenman long teritori blong yumi, i gud we yumi givim long olgeta, sam buk we oli wokem long Braille. Olsem nao oli save putum long laebri blong skul. ?Yu yu save wan man, we wan famle blong hem i blaen? Long teritori blong yu, ?i gat wan ogenaesesen we i lukaot long ol blaenman? I gud yu eksplenem long olgeta we oli lukaot long ol blaenman ya se, ol Witnes blong Jehova oli glad blong givhan long hemia we i blaen, mo givim sam buk long lanwis blong ol blaenman, no sam rikoding. Yu soem long Baebol, promes we i se, i no longtaem God bambae i finisim ol trabol we oli mekem ol man oli blaen. Mo tu, sipos yu wantem yu save soem video ya we i stap long jw.org, we stamba tok blong hem i se: “Without It, I Would Feel Lost” (Franis mo Inglis). Video ya i tokbaot stori blong wan blaenman we i kasem ol gudfala samting, taem hem i kasem Baebol long lanwis blong ol blaenman. Taem yu eksplenem from wanem yu go visitim ol blaenman, hemia bambae i openem rod blong yu save storian moa wetem ol blaenman.

4. ?Yumi lanem wanem long stori blong Janet?

⁴ Wan sista we i blaen nem blong hem Janet, i go visitim wan haos we i gat ol blaenman long hem. Hem i storian wetem wan woman. Sista ya i talem long hem se: “Jisas i mekem ol blaenman oli lukluk bakegen, mo hemia i soemaot se long fiuja, bambae hem i mekem samting ya.” Tufala i ridim Revelesen 21:3, 4, mo sista ya i eksplenem se, Kingdom blong God nomo bambae i mekem ol promes ya oli kamtru. Woman ya i talem se: “Mi neva harem wan blaenman i talem wan samting olsem. Plante man we oli save lukluk, oli talem se ol man we oli blaen, oli kasem panis from samting we olgeta, no wan famle blong olgeta bifo i mekem.” Sista ya i sanem wan link, (wan adres we man i klik long hem mo i go stret long samting we hem i save luk long Intenet) blong Baebol Tijim buk, long imel blong woman ya. Mo naoia, tufala i stap stadi Baebol, tu taem long wan wik.

5. ?Wanem gudfala samting i save kamaot sipos yumi soemaot se yumi intres long ol blaenman?

⁵ I tru, yumi no save mekem ol blaenman oli kamgud bakegen olsem we Jisas i mekem. Be yumi save givhan long olgeta we rabis god blong wol ya i mekem tingting blong olgeta i blaen, mo olgeta we prapa ae blong olgeta i blaen, blong oli kasemsave long ol trutok we oli stap long Tok blong God. (2 Kor. 4:4) Jisas i mekem tufala blaenman we tufala i stap klosap long taon blong Jeriko, tufala i save lukluk bakegen, from we hem “i sore long tufala.” (Mat. 20:34) Sipos yumi soemaot se yumi intres long ol blaenman olsem we Jisas i mekem, bambae yumi glad long nambawan janis ya, blong givhan long olgeta blong oli save Jehova, we hem nao bambae i finisim trabol blong ol blaenman blong olwe.