Openem Ae Blong Ol Man Long Gud Nyus

WAN waes tok blong Denmak i talem se, “Skae i stap blu oltaem, nating se blaenman i no save luk.” Be long laef blong yumi evridei we yumi bisi oltaem, ?yumi stap luk se skae i blu? ?Yumi stap tingbaot wan gudfala fyuja wetem strong bilif? ?Yumi rili bilif long gud nyus ya we Tok blong God, Baebol, i talemaot?

Long faswan store, yumi tokbaot fasin blaen long saed blong bodi. Naoia yumi traem tingbaot narafala fasin blong lukluk we i impoten moa. Hem i save mekem yumi glad blong olwe mo givim nambawan fyuja long olgeta tu we yumi laekem olgeta tumas.

I tru tumas, yumi fesem ‘laef blong wol ya we i kam strong tumas.’ (2 Timote 3:⁠1) Taem ol man oli traehad blong kasem ol samting we oli nidim blong laef, winim ol hadtaem long helt mo ol problem blong famle, mo gohed nomo nating se ol man oli mekem i no stret long olgeta mo oli no laekem olgeta, ?wanem i stap hapen long ol man ya? Sore tumas, be plante man oli faenemaot se oli no moa trastem ol man, ol skul, mo ol gavman. Sam oli ting se i nidim wan merikel blong stretem ol problem blong olgeta, from we oli harem save se i no gat wan narafala rod blong stretem. Long nyuspepa ya blong Brasil, Jornal da Tarde, Jacob Pinheiro Goldberg i talem se: “Taem ol man oli fesem ol raf fasin mo trabol long laef, oli kam kros tumas from ol mastik, mekem se oli no moa gat stret tingting mo oli no tingtinggud long ol samting, nao oli dipen long ol skul we oli no save eksplenem ol tijing blong olgeta mo we mining blong olgeta i haed mo i mekem tingting blong man i fasfas.” Be nating se ol samting oli go rong, yumi wantem blong holem klia tingting mo folem waes fasin, ?i tru?

Tingbaot smoltaem se, yu nidim wan haos blong famle blong yu, mo yu no nidim blong wari se praes blong hem i hamas. Maet yu lukluk mo visitim ol haos long ol defren ples we oli stap kolosap long yu. Nating se man we i stap salem ol haos i traem blong kasem wan we yu laekem tumas, be i no save kasem haos we yu wantem. Be, from we yu wantem se famle blong yu oli glad mo oli haremgud, yu yu gohed blong lukaot haos we i stret, ?i tru? Nao tingbaot glad we bambae i kamaot taem yu faenem haos we yu bin drim long hem.

Olsem we bambae yu spenem taem blong lukaot wan nyu haos, ?from wanem yu no traem blong lukluk dip long Baebol blong faenem ansa long ol problem blong yu? Olsem we yumi mas skelem ol samting taem yumi mekem disisen long saed blong haos, sem mak nao yumi nidim blong tingtinggud mo kasem stret save long ol samting we yumi ridim long Tok blong God. Mo fasin blong yumi blong luksave mo akseptem trutok long saed blong Jeova God mo Jisas Kraes i gud moa long yumi bitim blong faenem wan haos. Jisas i talem se: “Mo hemia laef ya we i no save finis, we man i save yu, we yu nomo yu God tru, mo we man i save mi ya, Jisas Kraes, we yu yu sanem mi mi kam.”​—⁠Jon 17:⁠3.

Be sipos mesej blong Baebol i gud tumas, ?from wanem plante man oli blaen yet long gud nyus blong hem? Wan risen we plante man oli save sapraes long hem se, “olgeta man blong wol oli stap long paoa blong Setan.” (1 Jon 5:19) From samting ya, Devel Setan “i satem tingting blong olgeta finis, nao oli stap long tudak. Hem i stap blokem olgeta, blong oli no luk laet ya we i stap saenaot i go long olgeta. Laet ya i kamaot long gud nyus blong Jisas Kraes, we hem i gat olgeta paoa, mo hem i stret pija blong God.” (2 Korin 4:⁠4) Nating se yumi luk wetem ae blong yumi, bren blong yumi nao i kasem save long mining blong laet we i kam insaed long ae blong yumi. Taswe, blaen i minim tu se “no save, no wantem blong luksave no mekem disisen.” Samting ya i mekem yumi tingbaot tok ya we ol man oli savegud long hem se: “I no gat man i blaen olsem olgeta we oli no wantem blong lukluk.”

Wan blaenman i no save luk wanem we i stap long fored blong hem, taswe hem i save stap long denja blong kasem kil. Plante we oli blaen long saed blong bodi oli no save kamgud naoia, be i no gat wan man we i mas gohed blong stap blaen long saed blong speret.

Winim Fasin Ya Blong Stap Blaen Long Saed Blong Speret

Olsem we ples mo bodi we i no klin i save mekem ae i kam nogud, ol doti mo nogud fasin oli save mekem man i blaen long saed blong tingting. Antap moa, Jisas Kraes i givim woning agens long ol tijing mo kastom we man nomo i putumap. Hem i mekem i klia long taem blong hem, se ol lida blong skul oli stap lidim ol sipsip blong olgeta oli go krangke, i se: “Olgeta oli lida, be oli blaen nomo. Mo sipos wan blaenman i stap lidim wan narafala blaenman, bambae tufala i mas foldaon long hol.”​—⁠Matyu 15:⁠14.

Bitim we oli letem ol lida we oli blaen long saed blong speret mo tingting oli gyaman long olgeta, !olgeta we oli openem ae blong olgeta long saed blong gud nyus blong Kingdom oli glad tumas! Jisas i talemaot se: “Mi mi kam long wol ya blong mekem wok ya blong jajem man, blong ol blaenman oli save luk olgeta samting.” (Jon 9:39) ?Be, olsem wanem ol man we oli blaen long saed blong speret oli save lukluk? Oraet, yumi gohed blong lukluk moa long ol man we oli blaen long saed blong bodi.

I gat ol defren kaen samting naoia we oli save givhan long olgeta we oli no save luklukgud. Bifo i no olsem. Bifo we Valentin Haüy i putumap wan spesel skul blong givhan long olgeta we oli blaen long 1784, i no gat wan man i traehad blong givhan long ol blaenman. Biaen, Louis Braille i faenemaot rod ya blong raetem ol tok long fasin we ol blaenman oli save ridim, we oli kolem fasin ya long nem blong man ya, ‘braille;’ hem i mekem olsem blong givhan long olgeta we oli no save luklukgud blong oli save rid.

?Olsem wanem long man we i blaen long saed blong speret? Long ol yia we oli jes pas i gat wan bigbigfala wok i stap gohed blong talemaot gud nyus go kasem ol laswan ples long wol. (Matyu 24:14) Ol Wetnes blong Jeova oli glad blong karem hop long olgeta we oli blaen long saed blong speret mo tu long olgeta we oli blaen long saed blong bodi.

Wan woman Brasil i raetem se: “Mi wantem talem se nating se mi blaen long saed blong bodi, mi save lukluk​—⁠long saed blong speret. !God i gud tumas! Yumi glad blong save se ‘Jeova bambae i openem han blong hem, nao bambae i mekem we olgeta samting we i laef oli haremgud, from we oli kasem ol samting we oli wantem tumas.’ ” (Ol Sam 145:16) Mo Jorge, we hem i blaen long saed blong bodi, i talem se: “Mi save seraotem laef blong mi long tu haf: bifo mo afta we ol Wetnes oli faenem mi. . . . Olgeta nao oli mekem se, mi stat blong lukluk wol ya long tingting blong mi long fasin we i klia mo i stret. Mi haremgud long nambawan fasin fren we mi gat wetem evriwan long kongregesen.” Nating se tok ya i mekem yumi haremgud tumas, Baebol i mekem promes se i no longtaem bambae i no moa gat wan blaenman long wol ya​—⁠long saed blong bodi mo speret. ?Olsem wanem samting ya bambae i kamaot? ?Olsem wanem bambae i kamtru long ful wol se ‘Jeova i stap openem ae blong ol blaenman’?​—⁠Ol Sam 146:⁠8.

Kingdom Blong God Nomo Bambae i Winim Trabol Ya Blong Olwe

Nating se ol dokta oli stap kasem save moa olsem wanem blong mekem long ol sik, plante sik oli gohed blong mekem man i blaen, i soa, mo i ded. ?Ale i nidim wanem blong finisimgud fasin blong sot long kakae, fasin doti, mo trabol we i stap spolem ae mo glad long laef? Wok blong Jisas blong mekem ol blaenman mo ol narafala oli gud bakegen, i wan smol saen nomo blong soemaot samting we bambae i mekem long fyuja. I gud tumas we tijing mo wok blong hem blong mekem ol sikman oli kamgud, i olsem pija blong ol blesing we bambae oli kamaot long olgeta ples long wol aninit long Kingdom no gavman blong God.

Taem blong mekem ol sikman long olgeta ples blong wol oli kamgud bakegen, i kolosap.a Aposol Jon i yusum nambawan pijatok blong tokbaot program ya blong God blong mekem ol sikman oli kamgud i se: “Nao enjel ya i soemaot wan bigfala reva long mi. Reva ya i stap ron, mo hem i wora blong laef. Hem i stap saen olsem glas, mo i stap kamaot long bigfala jea ya we God i stap sidaon long hem, wetem Smol Sipsip blong hem. Wora ya i ron, i pas long medel blong rod blong bigfala taon ya. Mo long tufala saed blong hem, i gat ol tri blong laef, we oli stap karem frut blong olgeta twelef taem long wan yia, wan taem long wan manis. Mo lif blong ol tri ya oli blong tekemaot sik blong ol man blong ol kantri long wol.”​—⁠Revelesen 22:​1, 2.

Ol tok olsem “wora blong laef” mo “ol tri blong laef,” oli pijatok blong soemaot se afta we ol rabis fasin blong naoia oli finis, Kingdom blong God bambae i mekem plante samting blong givhan long ol man blong sloslou, oli save kam stretgud olgeta. Tru ya, ol blesing we oli kamaot from ransom sakrifaes blong Jisas (olsem fasin fogif from ol sin), tugeta wetem fasin ya blong savegud Jisas Kraes mo Papa blong hem, bambae i givim bodi we i stretgud olgeta mo laef blong olwe.​—⁠Jon 3:⁠16.

Fasin Glad Long Nyufala Wol Blong God

Ale traem mekem pija long tingting blong yu, long wol ya taem bambae i no moa gat ol fasin we oli agensem ol stret loa, doti long win, wora mo graon, mo fasin pua. Pijarem famle blong yu olsem we oli stap laef long pis long paradaes ya. (Aesea 32:​17, 18) !Bambae i gud tumas blong luk ol defren kala blong ol samting raonabaot long yumi wetem tingting mo ae we i stretgud olgeta!

Faber Birren i talem se, “Prapa fasin blong ol man i blong stap long medel blong ol samting we oli stap jenis oltaem​—⁠long saed blong laet, kala mo lukluk blong ol samting. Long ol samting we God i wokem raonabaot long yumi, i no gat wan samting we i stap sem mak oltaem. Kala i wan long ol samting blong wol ya we i mekem man i haremgud tumas. I wan samting we, olgeta samting raonabaot long yumi i gat, i no sam samting nomo we oli gat kala, mo kala i wan samting we yumi nidim blong haremgud long laef.”

!Fasin ya blong lukluk i wan gudfala presen tumas! !Bambae ol man oli glad tumas taem olgeta ya we oli blaen bifo​—⁠long saed blong bodi no long saed blong speret​—⁠oli lukluk bakegen!

!Yes, long wol ya we i no longtaem bambae i kam Paradaes bakegen, fasin blaen mo ol narafala sik blong bodi bambae i no moa mekem man i harem nogud! Bambae i no moa gat man i lidim narafala man i go krangke. Long taem ya trufala lav bambae i kamaot, taswe evriwan bambae oli kasem plante stret save long saed blong speret. Samting ya wetem plante narafala samting tu bambae i hapen i no longtaem long fyuja, be naoia i taem blong mekem se wan Man i glad long yumi, hemia Man ya we bambae i mekem promes blong hem long profet tok ya i kamtru: !“Long taem ya, ae blong ol blaenman bambae i open.”!​—⁠Aesea 35:⁠5.

[Futnot]

[Tok blong pija long pej 7]

!Long taem ya, ae blong ol blaenman bambae i open!