Laef Stori

Mi Gat Strong Tingting Blong Gohed Blong Wosipim God Ya We i Wokem Mi

CONSTANCE BENANTI I TALEM STORI YA

!Ol samting oli hapen kwiktaem tumas! Long sikis dei nomo, Camille, gel blong mitufala we i gat klosap 2 yia finis, i fiva bigwan mo i ded. Mi mi harem nogud tumas. Mi wantem ded nomo. ?From wanem God i letem samting olsem i hapen? Tingting blong mi i fasfas.

PAPA mama blong mi oli blong Castellammare del Golfo, wan taon long Sicily, Itali. Oli muf i kam long New York City, ples ya nao we mi bon long hem long Disemba 8, 1908. Long famle blong mi, i gat papa mama mo mifala eit pikinini, faef boe mo tri gel.a

Long 1927, papa blong mi, Santo Catanzaro, i stat go long ol miting blong wan smol grup blong ol Baebol Studen, hemia nem blong ol Witnes blong Jeova bifo. Wan brata blong Itali we i wok long hedkwota long Brooklyn, New York, nem blong hem Giovanni De Cecca, i stap lukaot long ol miting long ples blong mifala, hemia klosap long New Jersey. Biaen, papa blong mi i stat blong mekem wok blong prij fultaem, mo hem i gohed blong mekem wok ya go kasem taem we hem i ded long 1953.

Taem mama blong mi i yangfala, hem i wantem kam wan sista blong Katolik jos, be papa mama blong hem oli no letem hem. Fastaem mama i blokem mi blong no joen wetem papa long Baebol stadi. Smoltaem biaen, mi luk sam jenis long laef blong papa. Hem i kam wan kwaet man, mo i gat pis insaed long famle. Mi mi laekem samting ya.

Long semtaem, mi mitim Charles, wan man we yia blong hem i sem mak long mi mo i bon long Brooklyn. Famle blong hem tu i blong Sicily olsem famle blong mi. Mitufala i mekem promes blong mared, mo taem papa blong mi i kambak long asembli blong ol Witnes blong Jeova long Columbus, Ohio, mi mo Charles mitufala i mared. Hemia long 1931. Sam manis afta we mitufala i mared, gel blong mitufala, Camille, i bon. Taem hem i ded, i no gat wan samting nating we i save leftemap tingting blong mi. Wan dei, Charles i krae, mo hem i talem long mi se: “Camille i gel blong yu be hemi gel blong mi tu. I gud yumitu gohed wetem laef blong yumitu we yumitu givgivhan long yumitu.”

Mifala i Glad Blong Folem Trutok Blong Baebol

Charles i mekem mi mi tingbaot bakegen hop ya blong laef bakegen we papa i bin tokbaot taem hem i givim tok blong berem Camille. Mi mi askem long Charles se: “?Yu yu rili bilif long laef bakegen long ded?”

Hem i ansa se: “!Yes, mi mi bilif! Ating i gud yumitu faenemaot moa wanem we Baebol i talem long saed ya.”

Long naet ya mi no save slip. Long sikis klok long moning, bifo we papa i go long wok, mi go luk hem mo mi talem long hem se mi mo Charles i wantem stadi Baebol. Hem i glad mo i holem mi. Mama we i stap slip yet i harem we mifala i stap toktok. Hem i askem long mi sipos wan samting i bin hapen. Mi talem se: “I no gat wan samting i hapen. Mi mo Charles nomo i gat tingting blong stadi Baebol.”

Mama i ansa se: “Yumi evriwan i nidim blong stadi Baebol.” Ale, mifala wetem ol brata mo ol sista blong mi, mifala leven evriwan long famle, mifala i stat stadi Baebol tugeta.

Taem we mi stadi Baebol, mi haremgud, mo sloslo mi gat hop long tingting blong mi we fastaem i fasfas, mo mi no moa harem nogud. Wan yia biaen, long 1935, mi mo Charles, mitufala i stat blong serem trutok blong Baebol wetem ol narafala. Long Februari 1937, afta we mitufala i harem wan tok long Brooklyn we i eksplenem mining blong baptaes long wota, olsem we i stap long Baebol, mitufala wetem sam narafala bakegen i tekem baptaes long wan pul blong swim long wan hotel we i stap klosap. Mi mi tekem disisen ya i no from we mi gat hop nomo blong luk gel blong mi bakegen, be, mi wantem wosipim God ya we i wokem yumi, we mi save hem mo mi laekem hem.

Joen Long Wok Blong Prij Fultaem

Mi haremgud blong tokbaot wanem we mi lanem wetem ol narafala man, antap moa we, long taem ya, plante man oli glad blong lesin mo joen tu long wok ya blong talemaot gud nius blong Kingdom. (Matiu 9:37) Long 1941, mi mo Charles, mitufala i kam ol paenia, hemia nem we ol Witnes blong Jeova oli yusum blong talem ol man we oli prij fultaem. I no longtaem biaen, mitufala i pem wan smol haos wetem wil we trak i save pulum. Mo Charles i lego faktri blong wokem ol traoses we i blong famle blong mifala, long han blong brata blong mi Frank. Biaen, mitufala i glad blong kasem wan leta we i talem se mitufala i kam ol spesel paenia. Fastaem, mitufala i paenia long New Jersey, mo biaen oli sanem mitufala i go long New York State.

Long 1946, taem mitufala i stap long wan asembli long Baltimore, Maryland, oli askem mitufala blong kam long wan miting wetem sam brata we oli wok long hed ofis blong ol Witnes blong Jeova. Long miting ya mifala mitim Nathan H. Knorr mo Milton G. Henschel. Oli toktok wetem mitufala long saed blong misinari wok, antap moa long saed blong wok blong prij long Itali. Oli askem mitufala blong tingbaot sipos mitufala i wantem go long Wajtaoa Baebol Skul blong Gilead.

Oli talem long mitufala se: “Yutufala i go tingtinggud fastaem, mo biaen yutufala i save givim wan ansa.” Taem mitufala i lego ofis, mi mo Charles i lukluk mitufala, nao mitufala i tanraon mo gobak insaed long ofis. Mitufala i talem se: “Mitufala i tingtinggud finis, mitufala i rere blong go long Gilead.” Afta long ten dei, mitufala i stap long namba seven klas blong Gilead.

Mitufala i neva fogetem ol manis we mitufala i kasem trening long hem. Mitufala i glad long lav mo longfala tingting we ol tija oli soem long mifala, oli rerem mifala blong fesem ol hadtaem long ol narafala kantri. Afta we mifala i kasem stefeket long Julae 1946, mitufala i go smoltaem blong mekem wok blong prij long wan ples long New York City we plante man Itali oli stap long hem. !Biaen, gudfala nius i kam! Long Jun 25, 1947, mitufala i go long Itali blong mekem wok blong misinari.

Mitufala i Kasem Ples We Bambae Mitufala i Wok Long Hem

Mifala i go long wan sip we oli bin yusum long taem blong faet. Afta 14 dei long solwota, mifala i kasem haba blong Itali long Genoa. Faet blong Wol Wo 2 i bin spolem plante haf blong taon ya, mo nating se faet ya i finis 2 yia finis be plante ples i stap nogud yet. Eksampol, tren stesen i no gat ol windo blong hem from ol bom we oli bin sakem long ples ya. Long Genoa mifala i go long wan bigfala tren blong kasem Milan, ples we branj ofis mo wan haos blong ol misinari i stap.

Fasin blong laef long Itali afta long wo i nogud we i nogud. Oli stat wokem olting bakegen, be fasin pua i kam antap. Sloslo mi stat kasem sam problem long helt blong mi. Wan dokta i talem long mi se, hat blong mi i no moa wok gud, mekem se i moa gud mi gobak long Yunaeted Stet. Be, mi mi glad se wanem we dokta ya i talem i no tru. From we afta long 58 yia, mi mi stap mekem wok yet long Itali.

Mifala i stap mekem wok blong mifala blong sam yia nomo nao ol brata blong mi we oli stap long Yunaeted Stet oli wantem pem wan trak blong mitufala. Be, wetem kaen fasin, Charles i talem no, mo mi tu mi glad long desisen ya. Mitufala i save se, long taem ya long Itali i no gat Witnes we i gat wan trak, mo Charles i harem se i moa gud mitufala i gat wan laef we i sem mak nomo long ol Kristin brata mo sista blong mitufala. Be, long 1961 mitufala i pem wan smol trak.

Haos Kingdom blong mifala long Milan i stap aninit long graon mo floa blong hem i graon nomo. I no gat ples blong swim, mo taem ren i ren ples i fulap long wota. Mo tu long Haos Kingdom ya i gat ol smolsmol rat we oli stap ronron olbaot. Blong gat laet long taem blong ol miting, mifala i yusum tu smol laet nomo. Nating se laef i no isi, be, mifala i glad blong luk olgeta we oli gat gud hat oli kam long ol miting mo sloslo oli joen wetem mifala long wok blong prij.

Ol Stori Blong Misinari Wok

Wan dei mifala i givim buklet ya Peace​—Can It Last? long wan man. Taem mifala i aot, waef blong man ya, Santina, i kamtru long haos wetem ol basket kakae. Hem i harem nogud smol, mo i talem se hem i gat eit gel blong i lukaot long olgeta mo hem i no gat fri taem. Taem mi kambak blong luk Santina bakegen, man blong hem i no stap long haos, mo Santina i stap somap wan kolsot. Hem i talem se: “Mi no gat taem blong lesin. Mo tu, mi mi no save rid.”

Mi prea long Jeova long tingting blong mi nomo, nao mi askem long Santina sipos mi save pem hem blong i somap wan kolsot blong man blong mi. Tu wik biaen, mi gat wan kolsot, mo mi mo Santina i stat stadi Baebol long buk ya “Trutok Blong Soemaot Rod Blong Itenel Laef.” Santina i lanem blong rid, mo nating se man blong hem i agens long hem, hem i gohedgud mo i tekem baptaes. Faef gel blong hem oli kam ol Witnes, mo Santina tu i givhan long plante man blong kam long trutok.

Long Maj 1951, oli sanem mitufala wetem tu moa misinari​—Ruth Cannonb mo Loyce Callahan we biaen hem i mared long Bill Wengert—​i go long Brescia we i no gat Witnes long hem. Mifala fo i stap long wan haos we i gat evri samting long hem, be afta long tu manis, ona blong haos i talem se mifala i mas aot long haos ya bifo long 24 aoa. From we i no gat narafala Witnes long ples ya, mifala i mas go stap klosap tu manis long wan hotel.

Mifala i no gat plante kakae: Long moning mifala i dring kofe mo kakae swit bred, long medel dei mifala i kakae stik bred mo jis, mo long sapa mifala i kakae frut mo bred wetem jis bakegen. Nating se i no isi, be mifala i kasem plante blesing. Biaen, mifala i faenem wan smol haos, mo long 1952, i gat 35 man oli kam long Memoriol blong tingbaot ded blong Jisas long wan smol rum we mifala i yusum olsem Haos Kingdom.

Dil Wetem Ol Traem

Long taem ya, ol lida blong skul oli gat bigfala paoa long ol man. Eksampol, taem mifala i stap prij long Brescia, sam pris oli talem long sam boe blong oli stonem mifala. Be biaen, i gat 16 man oli stat stadi Baebol wetem mifala, mo long sot taem nomo oli kam ol Witnes. ?Mo yu save hu ya i wan long olgeta ya? !Hem i wan long ol boe ya we pris i bin talem long olgeta blong stonem mifala! Naoia hem i wan elda long wan kongregesen blong Brescia. Long 1955, taem mifala i lego Brescia, i gat 40 pablisa blong Kingdom we oli gohed blong mekem wok blong prij long ples ya.

Biaen, mifala i go prij long Leghorn (Livorno) blong tri yia. Bighaf blong ol Witnes oli ol woman nomo. Samting ya i minim se mifala ol sista i mas mekem ol wok we ol brata oli stap mekem insaed long kongregesen. Biaen, mifala i muf i go long Genoa, we mifala i bin stap long hem 11 yia bifo. I gat wan kongregesen finis long ples ya. Haos Kingdom i stap long faswan stori blong haos we rum blong mifala i stap long hem.

Taem mifala i kasem Genoa, mi statem stadi wetem wan woman we bifo man blong hem i mekem boksing mo i maneja blong wan ples blong boksing. Woman ya i gohedgud long saed blong spirit mo i kam wan Kristin sista blong yumi. Be, man blong hem i agens long hem blong plante yia. Biaen, hem i stat go wetem waef blong hem long ol miting. Be hem i no go insaed long Haos Kingdom, hem i stap sidaon afsaed mo i lesin. Afta we mifala i lego Genoa, mifala i harem se hem i agri blong stadi Baebol. Ale, hem i tekem baptaes mo i kam wan Kristin elda. Hem i stap tru long Jeova go kasem taem we hem i ded.

Mi mi stadi tu wetem wan woman we i promes finis blong mared long wan polis man. Fastaem man ya i intres smol, be afta we tufala i mared, fasin blong man ya i jenis. Hem i agens long woman ya, mekem se woman ya i stop blong stadi. Be biaen taem woman ya i stat stadi bakegen, man blong hem i talem se sipos hem i luk mitufala i stap stadi bambae hem i kilim mitufala tugeta i ded. Be, woman ya i gohedgud long saed blong spirit mo i tekem baptaes blong kam wan Witnes. Man ya i neva kilim mitufala i ded. Be, sam yia biaen, taem mi go long wan asembli long Genoa, wan man i kam biaen long mi mo i putum tufala han blong hem long ae blong mi mo i askem mi blong traem talem se hem i hu. Mi mi krae taem mi luk se hemia hasban blong woman ya. !Afta we hem i holem mi, hem i talem se hem i givim laef blong hem long Jeova mo hem i tekem baptaes long dei ya!

Long 1964 go kasem 1972, mi gat blesing ya blong go wetem Charles taem hem i visitim ol kongregesen blong oli stap strong long saed blong spirit. Mifala i wok long klosap olgeta ples blong not blong Itali​—long Piedmont, Lombardy, mo Liguria. Biaen, mifala i paenia bakegen klosap long ples ya Florence mo afta long Vercelli. Long 1977, i gat wan kongregesen nomo long Vercelli, be taem mifala i aot long 1999 i gat tri kongregesen. Long yia ya mi gat 91 yia, mo oli talem long mitufala se i gud mitufala i go stap long haos misinari long Rom, wan naesfala haos we i stap long wan ples we i kwaet.

Wan Narafala Taem Blong Sore

Long Maj 2002, Charles we oltaem i gat gudfala helt, i kasem wan strongfala sik. Helt blong hem i kam nogud go kasem we hem i ded long Mei 11, 2002. Long 71 yia we mitufala i laef tugeta, mitufala i krae tugeta long ol taem we i gat trabol, mo mitufala i glad tugeta taem mitufala i kasem ol blesing. Taem hem i ded, i olsem we mi lusum wan bigfala samting mo mi harem nogud tumas.

Oltaem mi tingbaot Charles wetem klos we hem i stap werem mo stael hat blong ol yia 1930 we hem i stap putum long hed blong hem. Mi tingbaot olsem wanem hem i smael, mo mi harem hem i laf. Be Jeova i halpem mi, mo mi tangkiu tu long lav we plante Kristin brata mo sista oli soem long mi, ol samting ya oli halpem mi blong stanap strong long trabol taem ya. Mi glad blong wet long taem we bambae mi save luk Charles bakegen.

Gohed Long Wok Blong Mi

Nambawan samting long laef blong mi, hemia blong mekem wok blong God ya we i wokem mi. Long ol yia we oli pas, ‘Mi traem trastem Jeova mo mi luk se hem i gud.’ (Ol Sam 34:8) Mi harem save se hem i lavem mi mo mi save se hem i lukaotgud long mi. Nating we bebi blong mi i ded, Jeova i givim long mi plante boe mo gel long saed blong spirit​—olbaot long Itali—​we oli mekem hat blong mi mo Jeova i glad.

Mi laekem tumas blong tokbaot God ya we i wokem mi long ol narafala man. Taswe, mi gohed long wok blong prij mo mekem ol Baebol stadi. Sam samtaem mi sore from we, helt blong mi i blokem mi blong mekem moa. Be, mi luksave se Jeova i save wanem we mi save mekem mo hem i laekem mi mo i tinghae long wanem we mi naf blong mekem. (Mak 12:42) Mi traehad blong folem ol toktok blong Ol Sam 146:2 we i se: ‘Oltaem long laef blong mi, bambae mi stap presem hem. Bambae mi stap sing blong presem hem.’c

[Ol Futnot]

[Tok blong pija long pej 13]

Camille

[Tok blong pija long pej 14]

Taem mitufala i mared, 1931

[Tok blong pija long pej 14]

Fastaem Mama i no laekem, be biaen hem i agri se mifala evriwan i mas stadi Baebol

[Tok blong pija long pej 15]

Wetem Brata Knorr long Gilead skul, 1946

[Tok blong pija long pej 17]

Wetem Charles bifo we hem i ded