Mekem Ae Mo Hat i Stap Strong Long Praes

EDITH MICHAEL I TALEM STORE YA

Jes afta long yia 1930, mifala i stap laef kolosap long taon blong Sen Lui, Misuri, long Yunaeted Stet. Nao wan dei, wan Wetnes blong Jeova i kam luk mifala. Long stret taem we Wetnes ya i kamtru, rop blong hangem klos blong mifala i brok, mo ol naesfala waet klos we Mama i bin wasem, oli foldaon long sofmad. Mama i karem ol buk we Wetnes ya i soem long hem, from we hem i wantem se woman ya i go kwik. Ale, hem i putum ol buk ya long kabod mo i fogetem olgeta.

LONG taem ya, laef i had from we i gat bigfala trabol long wol long saed blong mane, mo Papa blong mi i no gat wok. Wan dei, hem i askem sipos i gat wan samting long haos we hem i save ridim. Ale, Mama i talem long hem se i gat ol buk ya we hem i bin pem. Papa i stat ridim ol buk ya, mo smoltaem biaen hem i talem se: “!Mama, hemia trutok ya!”

Mama i ansa se: “A, hemia i jes wan moa skul we i wantem mane, olsem ol narafala skul.” Be, Papa i talem long hem blong sidaon wetem hem mo jekem ol vas blong Baebol. Taem tufala i mekem olsem, Mama tu i bilif se ol tok ya oli tru. Afta long samting ya, tufala i traem faenem ol Wetnes. Oli faenemaot se ol Wetnes oli stap mekem miting long wan haos we oli rentem kolosap long medel blong taon blong Sen Lui. Plante man oli stap rentem haos ya blong mekem ol danis, mo ol narafala lafet long hem.

Papa mo mama tufala i tekem mi mi go wetem tufala​—mi gat samwe long tri yia nomo​—mo mifala i faenem haos ya. Be i gat sam man oli stap danis insaed. Ale, Papa i faenemaot stret taem blong ol miting, mo mifala i kambak long stret taem ya. Mo tu, mifala i stat blong go evri wik long wan Baebol stadi we oli stap mekem kolosap long haos blong mifala. Stadi ya i stap long haos blong woman ya we i bin kam luk mifala fastaem. Hem i askem se: “?From wanem yu no karem ol pikinini boe blong yu tu oli kam?” Mama i sem blong talem long hem se oli no gat sus. Be, biaen, hem i talem long olgeta, mo oli givim sam sus long mifala. Nao ol brata blong mi tu oli stat kam long ol miting wetem mifala.

Mama i kasem wan teritori blong prij we i stap kolosap long haos blong mifala, ale hem i stat joen long wok blong prij long ol haos wanwan. Mi mi go wetem hem, be mi stap haed biaen long hem nomo. Bifo we Mama i save draevem trak, mifala i stap wokbaot bitim wan kilomita blong stopem wan bas we i save karem mifala i go long ol miting long Sen Lui. Nating se ples i kolkol tumas we i gat aes mo sno, mifala i neva mestem miting.

Long 1934, Mama mo Papa tufala i tekem baptaes. Mi tu, mi wantem baptaes, mo mi stap talem samting ya oltaem long mama blong mi, gogo hem i askem wan Wetnes we i olfala moa, blong kam tokbaot samting ya wetem mi. Wetnes ya i askem plante kwestin long wan fasin we mi kasem save long hem. Ale, hem i talem long papa mama blong mi se oli no mas blokem mi blong tekem baptaes; sipos no, oli save mekem se mi no moa gohed blong gru long saed blong speret. From samting ya, wan yia biaen, long hot taem, mi tekem baptaes, taem mi gat sikis yia blong mi nomo.

Mi mi laekem tumas buk ya Home and Happiness, oltaem nomo mi holem i stap wetem mi. Taem mi go slip tu, mi putum buk ya aninit long pilo blong mi. Mi askem Mama plante taem blong ridim buk ya long mi, gogo mi save baehat olgeta tok insaed long hem. Long las pej blong buk ya, i gat pija blong Paradaes, mo pija blong wan smol gel kolosap long wan laeon. Mi mi stap talem se mi nao mi smol gel long pija ya. Pija ya i halpem mi blong lukluk i go nomo long praes ya blong laef long nyufala wol blong God.

Mi mi wan gel we mi stap sem bigwan. Be nating se mi stap seksek, oltaem mi traem givim ansa long stadi blong Wajtaoa long kongregesen.a

Sore tumas, papa blong mi i no moa gohed blong joen wetem ol Wetnes. Hem i fraet se bambae hem i lusum wok blong hem from we hem i wan Wetnes. Ol brata blong mi tu oli no moa gohed.

Wok Blong Prij Fultaem

Mama i bin letem sam paenia, hemia ol man blong prij fultaem, oli putum smol haos blong olgeta we i gat wil mo oli pulum wetem trak, i stap long yad blong mifala. Ale, taem skul i finis mi stap go prij wetem olgeta. Smoltaem biaen, mi tu mi wantem mekem wok blong paenia, be Papa i no wantem, from we hem i ting se mi mas gohed blong skul moa. Be, Mama i toktok plante wetem hem, nao biaen, hem i letem mi mi kam wan paenia. Taswe, long Jun 1943, taem mi gat 14 yia, mi stat long wok blong fultaem paenia. Blong givhan blong pem ol samting we mifala i nidim long haos, mi faenem wan haftaem wok, mo sam samtaem mi wok fultaem tu. Be, oltaem mi kasem mak blong mi blong mekem 150 haoa long wok blong prij long wan manis.

Biaen, mi mitim wan sista we i kam paenia fren blong mi, nem blong hem Dorothy Craden. Hem i bin stat long wok blong paenia long Janewari 1943, taem hem i gat 17 yia. Bifo, hem i strong long skul Katolik, be afta we hem i stadi Baebol blong sikis manis, hem i tekem baptaes blong kam wan Wetnes. Blong plante yia, hem i leftemap tingting blong mi mo i mekem mi mi strong, mo mi tu mi givhan long hem. Fasin fren blong mitufala i kam strong moa i bitim fasin fren blong tu stret sista.

Stat long 1945, mitufala i paenia tugeta long sam smosmol taon blong Misuri we oli no gat kongregesen. Long taon ya Boling Grin, mifala i rerem wan smol haos blong mekem miting; Mama i kam givhan long mitufala. Ale, mifala i go long ol wanwan haos long taon ya evri wik blong singaotem ol man oli kam lesin long wan pablik tok we mifala i askem sam brata long Sen Lui blong kam mekem. Evri wik i gat raonabaot 40 mo 50 man we oli kam lesin. Biaen, mifala i mekem sem mak long Luisiana. Long ples ya, mifala i rentem wan haos we oli kolem Masonik tempel. Blong givhan long mifala blong pem ren long ol haos ya, mifala i putum sam smol bokis oli stap insaed long haos long taem blong ol miting, nao ol man oli save putum presen mane long olgeta. Evri wik, i gat naf mane blong rentem haos we mifala i miting long hem.

Biaen, mitufala i go long Meksiko, Misuri, mo mifala i rentem wan smol rum we i joen long wan stoa. Mifala i mekemgud haos ya blong bambae smol kongregesen long taon ya i save yusum. Haos ya i gat sam rum blong hem we mifala i yusum blong slip long olgeta. Mifala i givhan tu blong mekem rod blong ol brata oli kam givim ol pablik tok long Meksiko. Nao mifala i go long bigfala taon ya Jefason Siti. Long ples ya, evri moning long Mande kasem Fraede, mifala i go prij long ol haeman blong taon long ol ofis blong olgeta. Mifala i slip long wan rum antap long Haos Kingdom wetem wan woman we nem blong hem Stella Willie, hem i olsem wan mama nomo blong mitufala.

Ale, mitrifala i aot long taon ya blong go long Festas, mo kolosap long hem, i gat Kristal Siti tu. Mifala i slip long wan smol haos we bifo hem i haos blong ol faol, long yad blong wan famle we oli intres long trutok. I no gat wan brata we i tekem baptaes finis long taem ya, taswe mifala nomo i mekem olgeta miting. Blong winim mane blong stap laef, mifala i mekem haftaem wok ya we mifala i salem krim mo ol narafala samting we ol woman oli stap putum long fes blong olgeta. Mifala i no gat plante samting. Yes, mifala i no gat naf mane blong pem wan man blong fiksimap ol hol long sus blong mifala. Taswe, evri moning mifala i putum wan nyufala pis strong pepa insaed long sus blong mifala, mo long naet mifala i wasem wan dres nomo we wanwan long mifala i gat.

Long stat blong 1948, taem mi gat 19 yia, mi mo Dorothy, mitufala i kasem leta we i askem mitufala blong go tren long namba 12 klas blong Wajtaoa Baebol Skul blong Gilead blong kam misinari. Afta long kos ya we i gohed blong faef manis, ol wan handred studen oli kasem stefeket blong olgeta long Febuwari 6, 1949. Hemia wan taem blong bigfala glad. Papa mama blong mi, tufala i bin muf i go stap long Kalifonia, be Mama i aot longwe i kam long taem ya we mi kasem stefeket blong mi.

Ples We Oli Sanem Mifala Blong Wok Long Hem

Oli sanem 28 man long skul ya oli go long Itali​—fo blong olgeta ya, wetem mi mo Dorothy i go long taon blong Milan. Long Maj 4, 1949, mifala i aot long Nyu Yok long wan sip blong Itali we nem blong hem Vulcania. Trep ya i tekem 11 dei, mo plante blong mifala i sik from we solwora i raf tumas. Brata Benanti i kam long wof blong Jenoa blong mitim mifala, mo hem i tekem mifala i go kasem Milan long tren.

Taem mifala i kamtru long misinari haos long Milan, mifala i luk ol flaoa we wan yangfala gel Itali i bin putum long rum blong mifala wanwan. !Sam yia biaen, gel ya we nem blong hem Maria Merafina, i go long skul blong Gilead, i kambak long Itali bakegen, mo mitufala i stap long semfala misinari haos tugeta!

Nekis moning afta we mifala i kasem Milan, mifala i lukluk i go afsaed long windo long rum blong swim. Long rod biaen long haos blong mifala, i gat wan bigfala store haos we bom i bin spolemgud hem. Wan plen blong Amerika i mestem, nao i sakem bom i kamdaon long haos ya we i kilim i ded ol 80 famle insaed long hem. Long wan narafala taem bakegen, wan plen we i wantem sakem bom long wan faktri, i mestem nao i sakem bom long wan skul mo i kilim i ded 500 pikinini. From samting ya, ol man oli no laekem tumas ol man Amerika.

Ol man oli les long ol faet finis. Plante oli talem se sipos wan narafala faet i stat, bambae oli no go haed, be bambae oli stap long haos nomo mo bambae oli openem gas blong kilim olgeta i ded. Mifala i talem klia long olgeta se mifala i no wok blong gavman blong Yunaeted Stet no wan narafala gavman blong man. Be, mifala i kam blong talemaot Kingdom blong God, we bambae i finisim olgeta faet mo fasin blong harem nogud we i kamaot from ol faet ya.

Long bigfala taon blong Milan, i gat wan kongregesen nomo, wetem samwe 20 man, we oli mekem miting long misinari haos. Long taem ya, oli no seraotem ol teritori yet blong prij, taswe mifala i prij long wan bigfala store haos fastaem. Long faswan doa, mifala i mitim Masta Giandinotti, we i wantem se waef blong hem i lego jyos, taswe hem i glad blong karem wan buk blong mifala. Misis Giandinotti i wan gudfala woman, mo hem i askem plante kwestin. Hem i talem se: “Mi glad sipos yu lanem lanwis blong Itali kwiktaem, olsemia bambae yu save tijim mi long saed blong Baebol.”

Ruf insaed long haos blong tufala i hae, mo laet i no saengud. Taswe, long naet hem i putum wan jea antap long tebel blong go kolosap moa long laet, ale hem i save ridim Baebol. Hem i askem long mifala se: “Sipos mi stadi Baebol wetem yufala, ?mi save go long jyos blong mi yet?” Mifala i talem long hem se hem nomo i mas mekem disisen ya. Taswe, hem i stap go long jyos long Sande moning mo i stap kam long miting blong mifala long aftenun. Ale, wan dei hem i talem se, “Bambae mi no moa go long jyos.”

Mifala i askem long hem se: “?From wanem?”

“From we jyos i no stap tijim Baebol, mo mi mi faenem trutok finis long stadi blong mi wetem yufala.” Hem i tekem baptaes mo i mekem stadi wetem plante narafala woman we oli stap go long jyos evri dei. Samtaem biaen, hem i talem long mifala se sipos mifala i bin talem long hem se hem i mas no moa go long jyos blong hem, bambae hem i stopem stadi blong hem mo maet hem i neva bilif long trutok.

Oli Sanem Mifala Long Wan Narafala Ples

Samtaem biaen, mi mo Dorothy, wetem fo narafala misinari, mifala i go long wan narafala taon blong Itali we nem blong hem Tries. Long taem ya, ol ami blong Briten mo Amerika oli stap long ples ya we i gat raonabaot ten Wetnes nomo long hem. Be, namba ya i stat blong kam antap. Mifala i prij long Tries blong tri yia, ale taem mifala i aot, i gat 40 man blong talemaot Kingdom long ples ya, mo 10 blong olgeta ya oli paenia.

Nekis ples we mifala i go prij long hem, hemia bigfala taon ya Verona, we i no gat wan kongregesen long hem. Be, taem jyos i pusum ol haeman long ples ya blong agensem mifala, ale, mifala i mas aot. Sosaeti i sanem mi mo Dorothy i go long Rom. Long ples ya, mitufala i rentem wan rum, mo mitufala i prij long ol ples kolosap long Vatikan. Taem mitufala i stap long ples ya, Dorothy i aot blong go long Lebanon blong maredem John Chimiklis. Mitufala i bin wok tugeta blong kolosap 12 yia, mo taem hem i go, mi rili mestem hem.

Long 1955, oli stanemap wan nyufala misinari haos long Rom, kolosap long rod we oli kolem Nyu Apian Wei. Wan long ol fofala misinari long haos ya, hemia gel we i bin putum ol flaoa long rum blong mifala long naet we mifala i jes kam long Milan, nem blong hem Maria Merafina. Wan nyufala kongregesen i stanap long eria we misinari haos ya i stap. Afta long bigfala intenasnal asembli long Rom long sem yia ya, mi gat jans blong go long asembli long Nurembeg, Jemani. !Mi glad tumas blong mitim plante brata mo sista we oli bin stanap strong tru long ol trabol we rul blong Hitler i bin mekem!

Gobak Long Yunaeted Stet

Long 1956, mi gobak long Yunaeted Stet, from mi gat sam problem long saed blong helt. Be, mi stap gohed blong lukluk nomo long praes ya we mi kasem blong mekem wok blong Jeova naoia, mo blong olwe long nyufala wol blong hem. Mi mekem plan blong gobak long Itali. Be, mi mitim Orville Michael, we i stap wok long hedkwota blong ol Wetnes blong Jeova long Bruklin, Nyu Yok. Mitufala i mared biaen long intenasnal asembli long Nyu Yok Siti long 1958.

Smoltaem afta, mitufala i muf i go long Fran Royal, Vejinia, mo mitufala i glad blong givhan long smol kongregesen long ples ya. Mitufala i stap long wan smosmol haos biaen long Haos Kingdom. Long Maj 1960, mitufala i mas gobak long Bruklin blong faenem wan wok blong pem ol kaon blong mitufala. Mitufala i wok long naet blong klinim sam bang, olsemia mitufala i save gohed long wok blong prij fultaem.

Taem mitufala i stap long Bruklin, papa blong mi i ded, mo mama blong man blong mi i kasem wan sik we i mekem haf bodi blong hem i ded. Taswe, mitufala i mekem disisen blong muf i go long Oregon blong stap kolosap long tufala mama blong mitufala. Mitufala tugeta i faenem haftaem wok, ale mitufala i gohed long wok blong paenia long ples ya. Kolosap long en blong 1964, mitufala wetem tufala mama blong mitufala, i krosem kantri ya long trak blong go long miting we Watch Tower Bible and Tract Society i mekem evri yia long Pitsbeg, Pensylvania.

Taem mifala i visitim Aelan blong Rod, seket elda, Arlen Meier, mo woman blong hem, tufala i leftemap tingting blong mitufala blong muf i go long Providens, bigfala taon long ples ya, we i nidim moa man blong talemaot Kingdom. Mama blong mi mo mama blong man blong mi, oli pusum mitufala blong go long nyufala ples ya, ale, taem mifala i kasem Oregon bakegen, mitufala i salem bighaf blong olting blong mitufala mo mitufala i aot.

Gilead Skul Bakegen

Long hot taem blong yia 1965, mitufala i go long wan asembli long Yanki Stadium. Long ples ya, mitufala i askem sipos mitufala i save go long Gilead Skul tugeta. Raonabaot long wan manis biaen, mitufala i sapraes blong kasem pepa we mifala i mas fulumap mo sanem i gobak bifo we 30 dei i pas. Mi mi wari se maet mitufala i mas go long wan kantri farawe, from we Mama i stap sik. Be, hem i leftemap tingting blong mi se: “Yu fulumap pepa ya. !Yu save finis se yu mas agri long enikaen wok we Jeova i givim long yu blong mekem!”

Samting ya i mekem tingting blong mi i strong. Mitufala i fulumap pepa ya mo sanem i gobak. !Mitufala i sapraes blong kasem wan leta we i singaot mitufala blong go long namba 42 klas blong Gilead skul, we i stat long Epril 25, 1966! Long taem ya, Gilead Skul i stap long Bruklin, Nyu Yok. Kolosap long faef manis biaen, hemia long Septemba 11, 1966, 106 blong mifala i kasem stefeket.

Oli Sanem Mifala Blong Wok Long Ajentina

Tu dei afta we mifala i kasem stefeket, mifala i stap long plen blong Peru blong go long Ajentina. Taem mifala i kasem Buenos Eres, brata we i lukaot long branj ofis, Charles Eisenhower, i mitim mifala long epot. Hem i halpem mifala blong pastru long kastom long epot, nao hem i tekem mifala i go long branj ofis. Mifala i gat wan dei blong stretem olting blong mifala mo spel smol; ale mifala i stat blong lanem lanwis blong Spen. Long faswan manis, mifala i spenem 11 haoa evri dei blong stadi long lanwis ya. Long namba tu manis, mifala i spenem fo haoa evri dei blong stadi long lanwis ya, mo mifala i stat blong joen long wok blong prij.

Mifala i stap long Buenos Eres blong faef manis. Nao oli sanem mifala i go long Rosario, wan bigfala taon long not we i tekem fo haoa long tren blong kasem hem. Afta we mitufala i wok long ples ya blong 15 manis, mitufala i go long not bakegen, go kasem Santiago del Estero, wan taon we i stap long draeples we i hot. Taem mitufala i stap long ples ya, long Janewari 1973, mama blong mi i ded. Mi no bin luk hem blong fo yia. Samting we i givhan long mi long taem ya we mi harem nogud, hemia se mi gat strong bilif long hop blong laef bakegen long ded, mo mi save tu se Mama i bin wantem se mi mekem wok long ples ya.​—Jon 5:​28, 29; Ol Wok 24:15.

Ol man blong Santiago del Estero oli gat kaengud fasin, mo i isi nomo blong statem ol Baebol stadi. Taem mifala i kasem ples ya long 1968, i gat samwe 20 no 30 man nomo we oli stap kam long ol miting. Be eit yia biaen, i gat bitim wan handred man long kongregesen blong mifala. Mo tu, long sam taon kolosap, i gat tu nyufala kongregesen wetem samwe 25 mo 50 pablisa long wanwan blong tufala.

Yunaeted Stet Bakegen

From problem blong helt, long 1976 mitufala i gobak long Yunaeted Stet blong wok olsem spesel paenia long Feyetvil, Not Karolaena. I gat plante man we oli tok lanwis blong Spen long ples ya. Olgeta ya oli kamaot long ol kantri blong Sentrol mo Saot Amerika, Dominikan Ripablik, Poto Riko, mo Spen tu. Mitufala i gat plante Baebol stadi, mo smoltaem biaen, wan kongregesen long lanwis blong Spen i stat. Mitufala i gohed blong wok long ples ya blong eit yia.

Mitufala i nidim blong stap kolosap moa long mama blong man blong mi, from we hem i kam olfala nao, mo i no moa naf blong lukaot long hem wan. Hem i stap long Potlan, Oregon, taswe oli sanem mitufala i go long kongregesen we i toktok lanwis blong Spen, long Vankuva, Wasington, hemia kolosap nomo long Potlan. Taem mitufala i kasem ples ya long Desemba 1983, kongregesen i smol nomo, be naoia, mitufala i luk se plante nyuwan oli stap kam.

Long Jun 1996, i mekem 53 yia we mi stap prij fultaem, mo long Janewari 1, 1996, man blong mi i mekem wok ya blong 55 yia. Long olgeta yia ya, mi gat jans blong halpem plante handred man blong kasem save long trutok blong Baebol, mo blong givim laef blong olgeta long Jeova. Plante blong olgeta, naoia oli stap mekem wok blong elda mo paenia.

Samtaem samfala oli askem long mi sipos mi harem nogud from we mi neva gat pikinini. Mi save talem tru se, Jeova i bin blesem mi wetem plante pikinini mo smol bubu long saed blong speret. Yes, laef blong mi i bin gat mining mo i fulapgud long ol blesing long wok blong Jeova. Mi kolosap sem mak long gel blong Jefta, we i spenem ful laef blong hem blong wok long haos prea, mo hem i neva gat pikinini from we hem i gat bigfala blesing ya blong mekem spesel wok blong Jeova.​—Jajes 11:38-​40.

Mi stap tingbaot yet, taem we mi bin givim laef blong mi i go long Jeova nating se mi wan smol gel nomo. Pija ya blong Paradaes i klia yet long tingting blong mi, sem mak olsem bifo. Ae mo hat blong mi oli stap strong yet long praes ya blong kasem laef we i no save finis long nyufala wol ya blong God. Yes, mi wantem tumas blong mekem wok blong Jeova, i no jes blong 50 yia nomo, be blong olwe​—aninit long Rul blong Kingdom blong hem.

[Futnot]

[Tok blong pija long pej 23]

Dorothy Craden, we i putum han blong hem long solda blong mi, mo sam narafala paenia long 1943

[Tok blong pija long pej 23]

Long Rom, Itali, wetem sam narafala misinari long 1953

[Tok blong pija long pej 25]

Wetem man blong mi