‘!Tok We Man i Talem Long Stret Taem Blong Hem, Hem i Gud We i Gud Tumas!’
LONG wan asembli blong ol Witnes blong Jeova, Kim i traem bes blong hem blong lesin long ol tok, tekem not mo long semtaem hem i traem mekem se smol gel blong hem we i gat 2 yia haf i sidaon kwaet. Taem program i finis, wan Kristin sista we i sidaon long sem laen wetem olgeta i lukluk Kim mo i talem ol gudfala tok long hem from fasin we hem mo hasban blong hem oli mekem blong lukaotgud long smol gel blong tufala long taem blong asembli. Tok blong sista ya, we hem i bin talem sam yia i pas finis, i tajem hat blong Kim mekem se tede yet Kim i talem se: “Taem mi stap long ol miting, nao mi harem se mi taed, mi tingbaot tok we sista ya i bin talem. Ol tok ya blong hem we oli kaen, i leftemap tingting blong mi yet blong gohed blong trenem gel blong mitufala.” Yes, ol tok we man i talem long stret taem blong hem oli save leftemap tingting blong wan man long saed blong spirit. Baebol talem se: ‘!Tok we man i talem long stret taem blong hem, hem i gud we i gud tumas!’—Ol Proveb 15:23.
Samfala long yumi i harem se i had blong talem ol gudfala tok long narafala. Samtaem, i had blong tok olsem from we yumi tingting tumas long ol samting we yumi no naf blong mekemgud. Wan Kristin i talem se: “Long saed blong mi i olsem we mi stap stanap long graon we i sofsof. Moa mi talem ol gudfala tok long narafala, moa mi harem olsem we mi mi nating nomo.” Ol fasin olsem, sem, no sua long yumi wan, mo fraet se bambae narafala i no kasem save long yumi, oli save mekem i had long yumi blong talem ol gudfala tok long narafala. Antap moa, sipos yumi kasem ol gudfala tok wanwan taem nomo no neva wan man i talem wan gudfala tok long yumi taem yumi smol i kam, maet yumi faenem i had blong talem ol gudfala tok long narafala tu.
Nating se i olsem, taem yumi save se ol gudfala tok we man i talem i save mekem i gud long hemia we i talem mo long hemia we i kasem, samting ya i save pusum yumi blong mekem beswan blong yumi blong talem wan gudfala tok long narafala long stret taem. (Ol Proveb 3:27) ?Be, wanem gudfala frut i save kamaot taem yumi mekem olsem? Naoia bambae yumi tokbaot sam long ol gudfala frut ya.
Ol Gudfala Frut
Gudfala tok i save bildimap fasin tras we narafala i gat long hem wan. Elaine, wan Kristin waef, i talem se: “Taem ol man oli talem ol gudfala tok long mi, mi harem se olgeta oli trastem mi.” Yes, taem yumi talem ol gudfala tok long wan man we i no sua long hem wan, samting ya i save leftemap tingting blong hem blong winim ol trabol mo from samting ya hem i save faenem glad. Ol yangfala oli haremgud long ol gudfala tok we narafala i talem long olgeta. Wan yangfala we tingting blong hem i foldaon from we hem i ting nogud long hem wan i talem se: “Oltaem mi traehad blong mekem Jeova i glad long mi, be samtaem mi harem se nomata wanem samting mi mekem be samting ya i no rili gud. Taem narafala i talem ol gudfala tok long mi, mi haremgud tumas long hat blong mi.” Wan tok blong Baebol i tru taem hem i talem se: “Tok we wan man i talem long prapa taem blong hem, i olsem sam gol apol long wan plet silva.”—Ol Proveb 25:11, NW.
Gudfala tok i save leftemap tingting blong wan man mo pulum hem blong mekem gudfala wok. Wan man we i wok blong Jeova fultaem i talem se, “Gudfala tok i leftemap tingting blong mi blong wok strong moa mo blong kam moagud long minista wok blong mi.” Wan mama we i gat tu pikinini i luksave se taem tufala pikinini blong hem i kasem wan gudfala tok long wan memba blong kongregesen from ansa we tufala i givim long ol miting, samting ya i pusum tufala pikinini ya blong wantem givim moa ansa. Yes, ol tok olsem oli save halpem ol yangfala blong gohed gud long saed blong Kristin laef. I tru ya, yumi evriwan i nidim we narafala i talem sam tok we oli mekem yumi harem se oli laekem yumi mo se yumi sas long ae blong olgeta. Wol ya we i fulap long ol samting we i mekem tingting blong yumi i foldaon maet i mekem yumi taed mo yumi no moa gat paoa. Wan Kristin elda i talem se, “Taem tingting blong mi i foldaon, ol tok we narafala i talem oli olsem ansa blong ol prea blong mi.” Sem mak, Elaine i talem se, “Samtaem mi harem olsem se Jeova i soemaot we hem i glad long mi tru long ol tok we narafala i talem long mi.”
Taem man i kasem ol gudfala tok hem i harem se hem i pat blong wan famle. Fasin blong talem ol gudfala tok we i tru, i soemaot se yumi tingbaot narafala mo i bildimap lav, fasin sef mo fasin ona bitwin long yumi. Samting ya i pruvum se yumi rili lavem ol Kristin brata mo sista blong yumi mo yumi glad long olgeta. Josie, wan mama i talem se: “Bifo, mi mas stanap strong long trutok from mi laef long wan famle we i no gat sem bilif wetem mi. Long taem ya, ol tok blong ol brata mo sista we oli bigman long saed blong spirit oli givim paoa long mi blong no lego trutok.” Yes, ‘yumi olsem ol haf blong wan bodi nomo.’—Efesas 4:25.
Fasin blong wantem talem ol gudfala tok i halpem yumi blong luk ol gudfala fasin blong ol narafala. Yumi lukluk ol gudfala fasin blong narafala be i no ol slak fasin blong olgeta. David, wan Kristin elda, i talem se, “Sipos yumi rili gat tangkiu from samting we narafala i mekem, bambae tangkiu ya i halpem yumi blong talem ol gudfala tok bakegen mo bakegen long narafala.” I gud yumi tingbaot fasin blong Jeova mo Jisas blong toktok gud long saed blong ol sinman, ale, samting bambae i pusum yumi tu blong lukluk gudfala fasin blong narafala.—Matiu 25:21-23; 1 Korin 4:5.
Ol Man We i Stret Blong Talem Gudfala Tok Long Olgeta
From we Jeova God i Man we i Wokem olgeta samting, hem i mas faswan blong kasem ol gudfala tok blong presem hem. (Revelesen 4:11) Jeova i no nidim yumi blong mekem hem i sua long hem wan no blong yumi leftemap tingting blong hem. Taem yumi presem hem from ol gudfala fasin mo kaengud fasin blong hem, hem i kam klosap long yumi mo yumi wokem wan fasin fren wetem hem. Fasin blong presem Jeova bambae i halpem yumi blong gat stret tingting mo no flas from ol wok we yumi mekem. Mo tu samting ya i givhan long yumi blong luksave se yumi save win nomo from we Jeova i stap givhan long yumi. (Jeremaea 9:23, 24) Jeova i givim janis ya blong laef olwe long olgeta man we hat blong olgeta i stret mo hemia i wan narafala risen blong presem hem. (Revelesen 21:3, 4) King Deved bifo i wantem blong “presem God long singsing” blong “talem tangkiu long hem blong leftemap hae nem blong hem.” (Ol Sam 69:30) I gud sipos hemia samting we yumi tu yumi wantem mekem.
Ol brata mo sista blong yumi oli nidim ol gudfala tok blong leftemap olgeta. Taem yumi talem ol gudfala tok long narafala, yumi stap folem oda we Jeova i talem hemia blong ‘yumi mas tingbaot yumi, blong yumi givgivhan long yumi blong mekem yumi strong blong lavem ol man, mo blong mekem ol gudfala fasin.’ (Hibrus 10:24) Wan eksampol long saed ya hemia aposol Pol. Hem i raet i go long kongregesen blong Rom se: “Fas tok blong mi, long nem blong Jisas Kraes, mi talem tangkiu long God from yufala evriwan, from we olgeta man long wol oli stap harem nius blong bilif blong yufala.” (Rom 1:8) Aposol Jon tu i mekem olsem, taem i talem ol gudfala toktok long Kristin brata blong hem Gaeas from nambawan eksampol blong hem blong ‘folem trutok.’—3 Jon 1-4.
Tede, taem wan Kristin brata no sista i soemaot wan fasin blong Kraes oltaem, i reregud ol miting blong hem, no i givim wan gudfala ansa long miting, yumi gat janis blong talem long hem se yumi glad long wanem we hem i mekem. Mo tu yumi save talem gudfala tok long wan pikinini we i traehad blong faenem ol vas long taem blong ol miting. Elaine we yumi tokbaot hem finis i talem se: “Fasin blong yumi blong gat gudhan blong mekem wan samting i no sem mak. Taem yumi luksave wok we narafala i mekem, yumi soemaot se yumi tangkiu we Jeova i givim gudhan long ol man blong hem blong oli save mekem defdefren samting.”
Insaed Long Famle
?Olsem wanem long fasin ya blong talem wan gudfala tok long ol memba blong famle blong yumi? I tekem taem, fasin traehad, mo lav blong wan hasban mo waef i givim ol samting we famle i nidim long saed blong spirit, filing mo bodi. I sua se olgeta ya oli nidim we narafala no ol pikinini blong olgeta oli talem ol gudfala tok long olgeta. (Efesas 5:33) Long saed blong wan gudfala waef, Baebol i talem se: “Oltaem, ol pikinini blong hem oli stap soemaot we oli glad tumas long hem, mo man blong hem tu i stap talemaot long hem we i glad tumas long hem.”—Ol Proveb 31:10, 28.
Ol pikinini tu oli nidim we narafala i talem ol gudfala tok long olgeta. Sore tumas, sam papa mo mama oli kwik blong talem long ol pikinini blong olgeta wanem samting we oli wantem se pikinini blong olgeta i mekem be oli no talem ol gudfala tok long ol pikinini ya from ol traehad we oli mekem blong soem respek mo obei oltaem. (Luk 3:22) Taem pikinini i smol yet mo papa mama i talem ol gudfala tok long hem, samting ya i mekem hem i haremgud mo i harem se hem i sef tu.
I tru se i nidim fasin traehad blong talem ol gudfala tok long narafala be yumi save kasem plante blesing taem yumi mekem olsem. Yes, moa yumi talem ol gudfala tok long narafala, moa we bambae yumi glad.—Ol Wok 20:35.
Akseptem Mo Talem Ol Gudfala Tok Wetem Wan Tingting We i Stret
Fasin blong kasem ol gudfala tok i save kam olsem wan traem blong samfala. (Ol Proveb 27:21) Eksampol, maet wan man i flas, ale, taem hem i kasem ol gudfala tok, samting ya i mekem hem tinghae tumas long hem wan. (Ol Proveb 16:18) Taswe, i nidim blong skelemgud fastaem. Aposol Pol i talem se: “Mi mi talem long yufala evriwan, se yufala i no mas letem tingting blong yufala i go antap. Tingting blong yufala i mas stret gud, mo yufala i mas makem laef blong yufala, stret long fasin blong bilif ya we God i givim long yufala.” (Rom 12:3) Blong halpem ol narafala blong oli no foldaon long trap ya blong tinghae tumas long olgeta wan, i waes blong no talem ol gudfala tok long narafala jes from we fes blong hem i naes, hem i smat no from we hem i gat gudhed. Defren olgeta, yumi mas leftemap narafala from ol gudfala fasin we oli soemaot.
Sipos yumi akseptem no yumi talem ol gudfala tok wetem wan gudfala tingting, ol gudfala tok ya i save givhan long yumi. Oli save pusum yumi blong talem tangkiu long Jeova from we hem nao i mekem we yumi naf blong mekem samting we i gud. Mo tu, oli save leftemap tingting blong yumi blong gohed blong mekem ol gudfala fasin.
Fasin ya blong talem ol gudfala tok we i tru mo we i stret long wanem we man i mekem, i wan presen we yumi evriwan i save givim long narafala. Taem yumi talem ol gudfala tok long wan man, maet tok blong yumi i givhan long man ya long wan rod we yumi no save.
[Bokis/Foto blong pija long pej 18]
Wan Leta We i Tajem Hat Blong Hem
Wan elda we i stap goraon blong visitim ol kongregesen i tingbaot wan taem we hem mo waef blong hem, tufala i gobak long haos we tufala i slip long hem afta long wok blong prij long wan dei we i kolkol. Elda ya i talem se: “Waef blong mi i kolkol mo tingting blong hem i foldaon. Hem i talem long mi se hem i no moa save gohed. Hem i se, ‘Ating i moa gud blong mekem wok blong paenia long wan kongregesen, nao yumi stap long wan ples nomo, mo yumi save mekem ol Baebol stadi blong yumi.’ Mi no tekem eni desisen, be mi talem long hem se bambae mitufala i gohed kasem wik i finis mo biaen bambae mitufala i luk sipos hem i jenisim tingting blong hem no nogat. Sipos hem i strong se mitufala i finis long wok ya blong visitim ol kongregesen, bambae mi respektem ol filing blong hem. Long sem dei ya, mitufala i stop smol long postofis mo mitufala i kasem wan leta blong branj ofis. Leta ya i blong waef blong mi. Long leta ya i gat ol gudfala tok we i leftemap waef from ol traehad blong hem long wok blong prij mo longfala tingting blong hem. Leta ya i talem tu se branj ofis i luksave olsem wanem i no isi nating blong jenisim haos evri wik. Ol gudfala toktok ya oli rili tajem hat blong waef mekem se hem i no moa tokbaot bakegen se bambae mitufala i livim wok ya blong visitim ol kongregesen. Tru ya, plante taem, hem i leftemap tingting blong mi blong gohed taem mi harem se mi wantem lego wok ya.” Tufala ya i gohed long wok ya blong visitim ol kongregesen blong klosap 40 yia.
[Tok blong pija long pej 19]
Ol pikinini oli nidim we narafala i kea long olgeta wetem lav mo i talem ol gudfala tok long olgeta