Soem Intres Long Ol Man—Talem Ol Gudfala Tok From Traehad Blong Olgeta
1 Taem yumi talem gudfala toktok we i kamaot long hat blong yumi from traehad blong ol man, samting ya i leftemap tingting blong olgeta, i pusum olgeta blong tekem aksen, mo i mekem oli glad. Long wok blong prij, plante pablisa oli faenem se taem oli talem wan smol tok olsem long ol man, oli glad moa blong lesin. ?Olsem wanem yumi save talem ol gudfala tok long ol man taem yumi wantem prij long olgeta?
2 Lukluk Gud: Afta we Jisas Kraes i go long heven, hem i makem ol gudfala samting we ol seven kongregesen blong Esia Maena oli mekem. (Rev. 2:2, 3, 13, 19; 3:8) Long sem fasin, sipos yumi rili intres long ol man we yumi faenem long wok blong prij, hemia bambae i pusum yumi blong lukaot janis blong talem ol gudfala tok long olgeta. Maet yumi kam long wan yad we i klingud, no yumi luk wan papa no mama we i soemaot long ol pikinini blong hem se hem i lavem olgeta, no yumi mitim wan man we i smaelgud mo i talem halo. Olgeta samting ya i givim janis long yumi blong talem gudfala tok long olgeta. ?Yu yu lukluk gud long ol samting ya mo yusum ol janis ya?
3 Lesingud: Taem yumi prij long ol narafala, yumi mas pulum olgeta blong oli talemaot tingting blong olgeta. Blong mekem olsem, yumi save askem sam gudfala kwestin long olgeta. Yumi mas soem ona long olgeta tu. Blong mekem olsem, yumi lesingud long samting we oli stap talem. (Rom 12:10) Long fasin ya, bambae yu save talem wan gudfala tok long olgeta folem wan poen we oli talem mo biaen, yu save mekem storian blong yu i stanap long poen ya we yutufala tugeta i agri long hem.
4 Gat Fasin Luksave: ?Bambae yumi mekem wanem sipos wan man we yumi prij long hem i talem wan samting we i no laenap wetem trutok blong Baebol? Yumi no mas agensem tok blong hem stret. I moagud we yumi talem tangkiu long hem from we hem i talemaot tingting blong hem, nao yumi gohed mo talem wan tok olsem: “Mi luk se yu bin tingting gud long poen ya.” (Kol. 4:6) Nating sipos wan man i wantem agiu, be yumi save talem gudfala tok long hem from we hem i rili intres long poen ya. Kwaet fasin blong yumi i save mekem tingting blong man we i agensem gud nius i godaon.—Prov. 25:15.
5 Sipos yumi wantem se toktok blong yumi i leftemap tingting blong narafala, toktok ya i mas kamaot long hat blong yumi. Taem yumi talem ol gudfala tok olsem, yumi givim ona long Jeova mo yumi mekem se plante man oli glad blong lesin long ol tok blong Kingdom.