Ol Mared We Oli Stret Long Fes Blong God Mo Ol Man

“I gat wan mared long wan vilej long Galili, nem blong hem Kena . . . oli bin singaot Jisas tu wetem ol man blong hem blong oli go long mared ya.”​—JON 2:​1, 2.

1. ?Stori blong Jisas long Kena i tokbaot wanem?

OL MARED blong ol man blong God oli taem blong bigfala glad. Jisas, mama blong hem, mo sam disaepol blong hem, oli kasem save long gladtaem we i kamaot long ol gudfala mared. Jisas i mekem faswan merikel blong hem long wan mared olsem. Samting ya i mekem se mared ya i spesel mo ol man oli glad tumas. (Jon 2:​1-11) Maet yu tu yu bin haremgud long sam mared blong ol Kristin man mo woman we oli wantem mekem wok blong Jeova tugeta, olsem ol hapi man blong hem. Maet yu wantem se mared blong yu i olsem, no maet yu stap givhan long wan fren blong yu blong hem i mekem wan mared we i givim glad. ?Olsem wanem blong mekem se mared ya i wan gudfala taem?

2. ?Baebol i talem wanem long saed blong ol mared?

² Ol Kristin man mo woman oli faenem se advaes long Tok blong God i givhan bigwan long olgeta, taem oli stap mekem plan blong mared. (2 Timoti 3:​16, 17) I tru, Baebol i no talem evri smosmol samting we ol Kristin oli mas mekem long mared blong olgeta. Hemia from we ol kastom mo ol loa blong ol kantri oli defdefren, mo laef i no sem mak tede olsem ol yia bifo. Tingbaot kastom blong ol man Isrel bifo. Oli no mekem wan seremoni blong mared. Long dei blong mared, man i karem woman i go long haos blong hem no long haos blong papa blong hem. (Jenesis 24:67; Aesea 61:10; Matiu 1:​24, NW ) Samting ya we tufala i mekem long fes blong ol man, i olsem mared blong tufala. I no gat wan seremoni blong mared olsem long plante mared tede.

3. ?Long Kena, Jisas i givhan blong mekem wanem?

³ Ol man Isrel oli save se taem wan man i tekem wan woman i go long haos blong hem no haos blong papa blong hem, hemia i wan mared. Afta, maet oli mekem wan kakae no wan lafet, olsem Jon 2:1 i tokbaot. Sam Baebol oli tanem vas ya se: ‘I gat wan mared long Kena.’ Be long olfala lanwis, tok ya i minim “kakae blong mared” no “lafet blong mared.”a (Matiu 22:​2-10; 25:10; Luk 14:8) Baebol i talem klia se Jisas tu i stap long taem ya, mo hem i givhan long lafet ya we ol man Jiu oli mekem long taem blong mared. Be yumi mas tingbaot se, wan mared long taem blong Jisas i defren long wan mared tede.

4. ?Sam Kristin oli jusum wanem kaen mared? ?From wanem?

⁴ Long plante kantri tede, i gat ol loa we ol Kristin oli mas folem taem oli mared. Sipos oli folem ol loa ya, oli save mekem wan mared we i stret long loa blong kantri. Maet gavman i givim raet long sam jaj, mea, no sam lida blong jos, blong oli mekem ol mared. Ale oli mekem wan smol seremoni blong mared. Sam Kristin oli jusum rod ya. Sipos loa i talem se ol man mo woman we oli mared oli nidim witnes, maet tufala i askem long wan famle no Kristin fren blong i witnes. Sipos tufala i no nidim witnes, be maet tufala i askem long sam famle mo fren blong oli kam nomo, blong serem glad blong tufala long impoten taem ya. (Jeremaea 33:11; Jon 3:29) Sam Kristin oli wantem mekem wan lafet blong mared tu, be oli no wantem wan bigfala lafet, from we bambae i tekem tumas taem mo mane blong rerem wan lafet olsem. Oli wantem mekem wan smol kakae nomo wetem wan smol grup blong ol gudfala fren blong olgeta. I stap long yu nomo blong jusum rod we yu wantem folem. Be yu no mas harem nogud sipos narafala Kristin we hem tu i bigman long ol Kristin fasin, i jusum defren rod long hemia we yu yu jusum.​—Rom 14:​3, 4.

5. ?From wanem plante Kristin oli wantem se i mas gat wan tok blong mared? ?Wanem save i stap long wan tok olsem?

⁵ Plante Kristin man mo woman, oli wantem se long mared blong olgeta, i mas gat wan tok blong mared we i kamaot long Baebol.b Oli save se Jeova nao i stanemap fasin ya blong mared, mo Tok blong hem i givim waes advaes we oli save folem blong mekem mared i hapi mo i stap longtaem. (Jenesis 2:​22-24; Mak 10:​6-9; Efesas 5:​22-33) Mo tu, klosap olgeta man mo woman oli wantem se sam Kristin fren mo famle oli joen wetem olgeta blong serem hapi taem ya blong mared. ?Be olsem wanem long ol defdefren loa, fasin, mo kastom, long saed blong mared? ?Yumi mas gat wanem tingting long olgeta ya? Stadi ya bambae i tokbaot mared long plante ples. Maet sam samting i defren long wanem we yu yu save, no i defren long ol mared long ples blong yu. Nating se i olsem, yu save makem ol impoten rul no poen we olgeta man blong God long evri ples oli mas folem.

Mared We i Stret, Hem i Mas Folem Loa

6, 7. ?From wanem yumi mas obei long loa blong kantri long saed blong mared? ?Olsem wanem yumi mekem samting ya?

⁶ I tru se Jeova i stanemap fasin blong mared. Be ol gavman blong man tu oli putum sam loa we ol man mo woman oli mas folem blong oli save mared. Hemia i stret nomo. Jisas i talem se: “Samting we i blong Sisa, yufala i givimbak long Sisa. Mo samting we i blong God, yufala i givimbak long God.” (Mak 12:17) Aposol Pol i talem samting we i klosap sem mak, i se: “Yumi evriwan i mas ona long gavman [“from we i no gat man i save rul sipos God i no letem hem. Ol haeman we oli stap rul, oli stap long prapa ples blong olgeta from God,” NW ].”​—Rom 13:1; Taetas 3:1.

⁷ Long plante kantri, Sisa, we i minim gavman, i putum sam loa long saed blong hu i gat raet blong mared. Kristin man mo woman we tufala i fri blong mared folem ol rul blong Baebol, tufala i mas obei long loa blong kantri tu. Blong mekem olsem, maet tufala i mas kasem wan stefeket blong mared, mared long fored blong wan man we gavman i putumap, no rejisterem mared blong tufala long gavman ofis. Taem Sisa Ogastas i “mekem wan sensas,” Meri mo Josef i obei long loa we hem i putum. Tufala i wokbaot i go long Betlehem blong “raetemdaon nem blong tufala.”​—Luk 2:​1-5.

8. ?Wanem fasin we ol Witnes blong Jeova oli no mekem, mo from wanem?

⁸ Taem wan Kristin man mo woman i mared folem loa blong kantri, mo gavman i luksave mared blong tufala, ale God i luk tufala olsem hasban mo waef. Taswe ol Witnes blong Jeova oli mekem wan seremoni nomo blong mared. Oli no ripitim no talem promes blong mared bakegen, olsem long dei we i makem 25 yia no 50 yia blong mared. (Matiu 5:37) (Sam jos oli no agri long seremoni blong mared long munisipol. Oli talem se ol man we oli mekem olsem, oli no rili mared. Oli ting se pris no pasta i mas mekem blesing mared, no hem i mas talemaot se tufala i kam hasban mo waef.) Long plante kantri, gavman i givim raet long sam elda blong ol Witnes blong Jeova blong oli mekem ol mared. Sipos i olsem long kantri blong yu, ating i gat wan tok blong mared long Haos Kingdom nao tufala i saen long ples ya nomo. Hemia haos blong mekem trufala wosip, mo i stret blong yusum haos ya blong mekem tok blong mared, from we mared i wan fasin we Jeova God i stanemap.

9. (a) ?Afta we Kristin man mo woman i mared long gavman ofis, maet tufala i wantem mekem wanem? (b) ?Wanem wok blong ol elda long saed blong ol mared?

⁹ Long sam kantri, loa i talem se man mo woman i mas mared long gavman ofis olsem taon hol, no long fored blong wan man we gavman i putumap. Ol Kristin oli obei long loa ya, mo biaen, long sem dei no long nekis dei, plante taem i gat wan tok blong mared long Haos Kingdom. (Oli no mas letem plante dei i pas bifo long tok blong mared long Haos Kingdom, from se afta we tufala i saen, God, ol man, mo Kristin kongregesen oli luk tufala olsem we tufala i mared finis.) Sipos wan man mo woman i mekem plan blong gat wan tok blong mared long Haos Kingdom afta we tufala i saen, fastaem tufala i mas go luk ol elda blong Sevis Komiti, blong askem sipos tufala i save yusum Haos Kingdom. Ol elda bambae oli tingbaot sipos tufala i gat gudnem, mo bambae oli meksua se mared blong tufala i no blokem miting no narafala samting we kongregesen i stap mekem long Haos Kingdom. (1 Korin 14:​33, 40) Bambae ol elda oli tokbaot ol samting we tufala i wantem mekem blong rerem Haos Kingdom from mared ya, mo bambae oli tekem desisen sipos oli talemaot mared ya long kongregesen no nogat.

10. ?Sipos tufala i mared finis long gavman ofis, tok blong mared long Haos Kingdom i mas olsem wanem?

¹⁰ Elda we i givim tok blong mared, bambae i toktok long kaen fasin, tok blong hem bambae i givhan long evriwan long saed blong spirit, mo bambae i soem respek. Sipos tufala i mared finis long gavman ofis, elda bambae i talemaot klia se tufala i mared finis folem loa blong Sisa. Sipos tufala i no bin talemaot promes blong mared, maet tufala i talemaot long tok blong mared long Haos Kingdom.c Sipos tufala i bin talemaot promes ya long gavman ofis, be tufala i wantem talemaot bakegen long fored blong Jeova mo kongregesen, bambae tufala i yusum ol tok olsem: ‘Mi [nem] mi mekem promes finis blong tekem yu [nem blong narawan] . . .’ Hemia i soemaot se tufala i bin talemaot promes ya finis we i “joenem tufala.”​—Matiu 19:6; 22:21.

11. ?Long sam ples, man mo woman i mared olsem wanem? ?Long taem olsem, tok blong mared i olsem wanem?

¹¹ Long sam ples, maet i no gat loa se i mas gat wan seremoni blong mared, nating sipos i long fored blong man we gavman i putumap, no nogat. Tufala i mared taem tufala i saenem pepa blong rejisterem mared mo tufala i go putum pepa ya long gavman ofis. Afta, tufala i kasem wan stefeket blong mared. Ale ol man oli luk tufala olsem hasban mo waef, stat long dei we oli makem long stefeket blong mared. Olsem yumi tokbaot finis, maet tufala i wantem se i gat wan tok blong mared long Haos Kingdom. Brata we i givim tok ya, we i olfala long trutok, bambae i talemaot se tufala i rejisterem mared blong tufala finis. Sipos tufala i wantem talemaot promes blong mared, bambae tufala i folem ol advaes long haf 10 mo futnot. Olgeta we oli stap long Haos Kingdom bambae oli serem bigfala glad blong man ya mo woman ya, mo ol advaes we i kamaot long Tok blong God bambae i givhan long olgeta evriwan.​—Sing Blong Solomon 3:11.

Ol Kastom Mared Mo Mared Long Gavman

12. ?Wanem ya kastom mared? ?I gud we tufala i mekem wanem afta long kastom mared?

¹² Long sam kantri, ol man mo woman oli mekem kastom mared. Hemia i no min se oli stap tugeta nomo, nating se long sam ples ol man oli luksave ol mared ya we oli no laenap fulwan wetem loa.d Kastom mared i min se tufala i mared folem ol kastom blong laen blong tufala no ples blong tufala. Maet man i pem woman, mo maet famle blong woman i mekem sam kastom long famle blong man, nao folem loa blong kantri mo Baebol, tufala i mared. Gavman i luksave ol mared ya se oli stret, oli folem loa, mo oli blong olwe. Klosap oltaem i gat rod blong rejisterem kastom mared, mo maet tufala i kasem wan stefeket blong mared. I gud blong rejisterem kastom mared, from we samting ya i save givhan long tufala. Olsem nao, sipos man i ded, fasin ya we tufala i bin rejisterem mared blong tufala i save givhan long woman blong hem, mo i save givhan tu long ol pikinini blong tufala. Kongregesen i leftemap tingting blong olgeta we oli mekem kastom mared, blong oli rejisterem mared blong olgeta kwiktaem. Tingbaot ol man we oli stap aninit long Loa blong Moses bifo. Oli raetemdaon long wan buk, nem blong ol man mo woman we oli mared, mo nem blong ol pikinini we oli bon.​—Matiu 1:​1-16.

13. ?Sipos i gat wan tok blong mared afta long kastom mared, i stret blong mekem wanem long saed blong tok ya?

¹³ Tufala we i mekem kastom mared mo gavman i luksave mared ya, tufala i kam hasban mo waef. Olsem yumi tokbaot finis, sipos tu Kristin i mared olsem, maet tufala i wantem se i gat wan tok long Haos Kingdom tu, mo maet tufala i wantem talemaot promes blong mared. Ale, brata we i givim tok bambae i talemaot long ol man se tufala i mared finis mo mared ya i stret folem loa blong Sisa. Bambae i gat wan tok blong mared nomo. I gat wan mared nomo, we i folem kastom mo gavman i luksave hem, ale i gat wan tok blong mared nomo we i stanap long Baebol. I moagud we afta long kastom mared, i no gat tumas taem i pas bifo long tok blong mared, maet oli mekem long sem dei nomo. Samting ya i save mekem se ol man raonabaot oli tinghae long mared we ol Kristin oli mekem.

14. ?Sipos i gat rod blong tufala Kristin i save mekem kastom mared mo mared long gavman tu, maet bambae tufala i mekem wanem?

¹⁴ Long sam kantri we gavman i luksave ol kastom mared, tufala i save mekem mared long gavman tu. Klosap oltaem, tufala i mekem samting ya taem tufala i talem promes blong mared mo saen long fored blong wan man we gavman i putumap. Sam Kristin oli laekem moa blong mekem mared olsem, i bitim we oli mekem kastom mared. I no gat nid blong mekem tufala evriwan, from we tufala mared ya tugeta oli stret long loa. Sipos tufala Kristin i mekem wan kastom mared we gavman i luksave, nao biaen tufala i wantem mekem mared long gavman ofis (i no long Haos Kingdom), hemia i bisnes blong tufala nomo. Samting ya we tufala i mekem long gavman ofis i no mekem se mared ya i moa stret. Long taem olsem, i no nid blong mekem plan blong givim wan tok blong mared no blong mekem wan lafet. Ol advaes long haf 9 mo 10 long saed blong tok blong mared mo promes blong mared, oli stret long kaen mared ya. Bigfala samting se tufala i mas mared long fasin we i stret long fes blong God mo ol man.​—Luk 20:25; 1 Pita 2:​13, 14.

Holem Fasin Ona Insaed Long Mared

15, 16. ?Olsem wanem fasin ona i mas joen wetem mared?

¹⁵ Long taem bifo, wan king blong Pesia i gat trabol long mared blong hem. Nambawan advaesa blong hem, nem blong hem Memukan, i talem ol tok blong traem givhan long mared blong tufala. Hem i talem se: ‘Ol woman oli mas ona gud long ol man blong olgeta.’ (Esta 1:20) Long mared blong ol Kristin, i no nid blong wan king i talem long ol woman se oli mas ona gud long ol man blong olgeta, from we ol Kristin waef oli glad blong mekem olsem. Long sem fasin, ol Kristin hasban oli ‘ona long ol woman blong olgeta,’ mo oli talem ol gudfala tok blong leftemap olgeta. (Ol Proveb 31:​11, 30; 1 Pita 3:7) Tufala i no mas wet plante yia bifo we tufala i ona long tufala. Taem tufala i jes mared, yes, stat long dei blong mared nomo, tufala i mas ona long tufala.

¹⁶ Be i no tufala nomo we i mas soem ona long dei blong mared. Sipos wan Kristin elda i mekem tok blong mared, ol tok we hem i talem i mas soem ona. Hem i mas toktok i go stret long tufala. Mo ol tok we hem i talem i mas soem ona long tufala. Bambae hem i no mekem wan tok we i fulap long ol tok plei mo ol kastom stori. Hem i no mas tokbaot ol samting long saed blong tufala we i no blong talemaot long ol narafala man. Hemia i save mekem tufala i sem mo i save mekem ol man we oli lesin oli harem nogud tu. Hem i mas mekem tok ya long fasin we i frengud wetem tufala, mo i leftemap tingting blong evriwan we oli stap. Hem i mas tokbaot Jeova we i Stamba blong mared, mo ol nambawan advaes blong Hem. Yes, sipos elda i mekem tok blong mared long fasin we i soem respek, bambae hem i givhan blong mekem se mared ya i givim ona long Jeova God.

17. ?From wanem ol Kristin mared oli mas stret folem loa?

¹⁷ Long stadi ya, ating yu luk se i gat plante samting we loa i askem ol man mo woman blong mekem long saed blong mared. Maet sam long ol save ya yufala i no nidim long ples blong yufala. Nating se i olsem, yumi evriwan i mas luksave se i impoten tumas we ol Witnes blong Jeova oli respektem loa blong ples blong olgeta, hemia ol samting we Sisa i askem, taem oli mekem mared blong olgeta. (Luk 20:25) Pol i talem se: “[“Ol samting we i stret blong yufala i givim long olgeta, yufala i mas givim,” NW ]. Yufala i mas pem hed takis long man we i tekem hed takis, mo yufala i mas pem takis blong ol samting blong yufala i go long man we i tekem takis ya. Man we i stret blong yufala i ona long hem, yufala i mas ona long hem.” (Rom 13:7) Plan ya we God i putumap, ol Kristin oli mas ona long hem long mared blong olgeta. Tru ya, samting ya i mas stat long dei blong mared nomo.

18. ?I gud we yumi tokbaot wanem narafala samting we samfala oli jusum blong mekem long mared blong olgeta? ?Weples yumi save faenem advaes long saed ya?

¹⁸ Plante Kristin oli mekem wan lafet blong mared. Tingbaot we Jisas i bin go long wan kakae olsem. Sipos i gat wan lafet blong mared, lafet ya tu i mas givim ona long God, mo i no mas spolem gudnem blong tufala we i mared mo blong Kristin kongregesen. ?Olsem wanem advaes blong Baebol i save givhan long saed blong lafet ya? Nekis stadi bambae i tokbaot kwestin ya.

[Ol Futnot]

?Yu Yu Tingbaot?

• ?From wanem yumi mas tingbaot samting we i stret folem loa mo long fes blong God long saed blong mared?

• ?Sipos tu Kristin i mared long gavman ofis, maet kwiktaem biaen tufala i mekem wanem?

• ?From wanem i gat tok blong mared long Haos Kingdom?

[Tok blong pija long pej 8]

Blong mared long Isrel bifo, man i tekem woman blong hem i go long haos blong hem no long haos blong papa blong hem

[Tok blong pija long pej 11]

Afta we tu Kristin i mekem kastom mared, maet i gat wan tok blong mared long Haos Kingdom