Ansa Long Wan Kwestin
◼ ?Sipos wan man mo wan woman tufala i wantem mekem mared blong tufala long Haos Kingdom, wanem ol samting we tufala i mas tokbaot wetem ol elda?
Mared we i folem ol rul blong Baebol, i leftemap nem blong Jeova. Hemia i tru moa long ol mared we oli mekem long Haos Kingdom, from we ol samting we oli hapen long Haos Kingdom, oli soemaot long ol man se ogenaesesen blong yumi i olsem wanem. Sipos wan man mo wan woman, tufala i wantem mekem mared blong tufala long Haos Kingdom, i gud we ol elda oli storian wetem tufala long sam samting long saed blong mared ya. Olsem nao, bambae oli ‘mekem olgeta samting long fasin we ol man oli laekem, mo long fasin we i stret nomo.’—1 Kor. 14:40, NW.
Tufala we i wantem yusum Haos Kingdom blong mekem mared blong tufala long hem, tufala i mas raetem wan leta blong askem long seves komiti blong kongregesen. Tufala i mas givim leta ya plante manis bifo long mared blong tufala mo tufala i mas raetem dei mo taem we tufala i wantem se mared i stap long Haos Kingdom. Tufala i mas tingbaot se ol elda bambae oli no jenisim dei blong miting, blong mekem se mared blong tufala i stap long dei ya. Mo tu, tufala we i mared i mas gat gudnem long kongregesen, laef blong tufala i mas laenap wetem ol tingting blong Jeova we oli stap long Baebol mo wetem ol stret mak we Jeova i wantem se oli kasem.
Blong meksua se mared ya i soem ona mo respek long God blong yumi, tufala we i mared i mas toktok wetem seves komiti blong letem oli save long ol samting we tufala i wantem mekem long taem blong mared ya. Tufala i mas mekem samting ya bifo we tufala i agri long plan blong dei ya. Ol elda bambae oli no fosem tufala blong folem tingting blong olgeta, be sipos oli luk se wan samting long plan blong tufala i no stret, bambae tufala i mas jenisim samting ya. Bambae tufala i yusum ol miusik blong Kingdom Melodies nomo mo olgeta we oli stap long singbuk blong yumi. Tufala i mas talemaot long ol elda sipos tufala i wantem flasem Haos Kingdom mo jenisim ol ples blong sidaon. Sipos i gat samfala we oli tekem foto mo vidio, oli mas lukaot se oli soem respek long taem ya. Bifo long mared, ol elda oli save letem tufala we i mared blong tufala i trenem tufala long Haos Kingdom, blong luk se bambae oli mekem olsem wanem long dei we bambae tufala i mared. Oli save mekem olsem sipos hemia i no blokem ol narafala wok we kongregesen i mas mekem. Oli no mas putum pepa long notis bot, blong singaot ol man oli kam long mared. Be ol elda oli save talemaot wan smol mesej long Miting blong Kingdom Wok, blong mekem kongregesen i save long mared we bambae i stap long Haos Kingdom.
I no gat rul we i talem se olgeta we bambae oli wokbaot biaen long man mo woman we i mared, mo stanap wetem tufala long platfom, oli mas baptaes finis. Be i no stret we olgeta ya, fasin blong olgeta i no laenap nating wetem ol tingting blong Jeova we oli stap long Baebol, we i save mekem se olgeta we oli kam long mared ya oli stap asaskem kwestin long saed ya. I mas wan elda we i mekem tok blong mared, sipos i gat elda i stap we i save mekem olsem. Ol elda oli save tijim gud Tok blong God, taswe olgeta nao oli nafgud blong soemaot ol tingting blong Jeova long Baebol we oli laenap wetem impoten taem ya.—1 Tim. 3:2.
Elda ya we i mekem tok blong mared bambae i kasem gudnem no badnem from mared ya, taswe hem tu i mas save long ol plan blong mared ya fastaem finis. Bambae hem i storian wetem tufala we i wantem mared, blong save se fasin blong tufala i olsem wanem taem tufala i stap fren. Tufala ya bambae i no haedem wan samting long elda ya, mo tufala i mas tok tru long hem. Sipos wan long tufala i bin mared wan taem finis, bambae hem i mas pruvum se hem i fri, folem rul blong Baebol mo folem loa blong gavman, blong mared bakegen. (Mat. 19:9) Blong mekem olsem, hem i mas soemaot long elda ya pepa we i talem se hem i divos finis.
Taem tufala we bambae tufala i mared, tufala i no fraet blong storian wetem ol elda mo tufala i wokgud wetem olgeta, bambae evriwan oli save glad long taem blong mared blong tufala.—Prov. 15:22; Hib. 13:17.