?Jisas, Hem i Hae God Ya We i Gat Olgeta Paoa?

Ansa we plante man oli givim:

▪ “Yes, Jisas hem i God ya we i gat Olgeta Paoa.”

▪ “Jisas, hem i God we i kamdaon long wol long bodi blong man.”

?Jisas i talem wanem?

▪ “Sipos yufala i lavem mi tru, bambae yufala i glad nomo blong luk we mi stap go long Papa blong mi, from we hem i hae moa long mi.” (Jon 14:28) Jisas i talem klia se hem mo Papa blong hem, tufala i no gat sem paoa.

▪ “Mi mi stap gobak long Papa blong mi we hem i Papa blong yufala tu, mo i God blong mi mo i God blong yufala tu.” (Jon 20:17) Jisas i no talem se hem i God, be oltaem hem i tokbaot God olsem we hem i wan defren Man.

▪ “Ol tok ya blong mi oli no kamaot long mi nomo. Papa blong mi we i sanem mi mi kam, hem i talemaot long mi wanem fasin blong tok bambae mi folem, mo wanem tok bambae mi talem.” (Jon 12:49) Ol tijing blong Jisas oli no kamaot long hem wan. Papa blong hem nomo i givim ol tijing ya long hem.

JISAS i talem se hem i Pikinini blong God, i no talem se hem i Hae God ya we i gat Olgeta Paoa. Sipos Jisas i God, ?hem i stap prea long hu taem i stap long wol? (Matiu 14:23; 26:26-29) ?Jisas i stap giaman nomo se hem i toktok long wan narafala man? !I no stret nating blong tingting olsem!

Wan taem, tu disaepol blong Jisas oli askem long hem blong givim wan spesel posisen long tufala long Kingdom blong hem. Jisas i ansa long tufala se: “Man we bambae i sidaon long raet saed blong mi mo man we bambae i sidaon long lef saed blong mi, mi mi no gat raet blong jusumaot tufala. Ples ya, Papa blong mi i makemaot tu man blong hem longtaem finis.” (Matiu 20:23) ?Olsem wanem? ?Jisas i stap giaman taem i talem se hem i no gat raet blong givim hae posisen long tufala? !Nogat! Defren olgeta, hem i gat tingting daon mo i luksave se God nomo i gat raet blong tekem ol desisen olsem. Jisas i talem tu se i gat sam samting we hem mo ol enjel oli no save, be Papa blong hem nomo i save.—Mak 13:32.

?Jisas i daon moa long God long taem ya nomo we hem i stap long wol? Nogat. Baebol i tokbaot Jisas afta we hem i ded mo i laef bakegen, se hem i stap daon yet long God. Aposol Pol i talem se “God, hem i hae moa long Kraes.” (1 Korin 11:3, Today’s English Version) Baebol i tokbaot samting we bambae i hapen long fiuja, i se: “Taem olgeta samting oli kam aninit long paoa blong Kraes finis, Pikinini ya blong God bambae i putum hem wan i stap daon aninit long paoa blong God we i bin putum olgeta samting oli stap aninit long paoa blong hem, nao God bambae i rul fulwan antap long olgeta samting.”—1 Korin 15:28, TEV.

I klia nomo se Jisas i no Hae God ya we i gat Olgeta Paoa. Taswe hem i talem se Papa blong hem i ‘God blong hem.’—Revelesen 3:2, 12; 2 Korin 1:3, 4.a

[Futnot]

[Tok blong makem poen long pej 7]

Jisas i talem se i gat sam samting we hem mo ol enjel oli no save, be Papa blong hem nomo i save