?I Tru Se Sipos Yu Mekem Wok Blong God, Bambae Yu Kam Rijman?

‘God i wantem we yu yu rij, hem i wantem we yu gat plante trak, hem i wantem we yu wingud long bisnes blong yu. Wan samting nomo we yu mas mekem, yu mas bilif long hem, yu mas givim mane blong yu long hem, evri samting we yu yu naf blong givim, yu mas givim.’

WAN niuspepa long Brasil i talem se hemia nao toktok we sam skul long Brasil oli stap talem long ol man. Plante man oli bilif strong long ol toktok ya. Wan magasin we oli kolem Time, i tokbaot wan stadi we oli mekem long ol man long Yunaeted Stet we oli talem se oli Kristin, i se: “Sikisti-wan pesen blong ol man ya oli bilif se God i wantem mekem ol man blong hem oli kam rijman. Mo 31 pesen . . . oli agri se sipos yu givim mane blong yu long God, bambae God i blesem yu, i givim moa mane bakegen long yu.”

Plante man oli bilif olsem. Bilif ya i stap kam antap bigwan long ol kantri blong Latin Amerika, olsem Brasil, mo plante plante man oli stap go long ol jos we oli talem se God bambae i save givim samting long olgeta. ?Be i tru se God i promes blong mekem ol man blong hem oli rij? ?Olgeta man blong God bifo, oli rijman evriwan?

I gat plante stori long Hibru haf blong Baebol we oli talem se olgeta we God i blesem olgeta, oli gat plante samting. Olsem nao, long Dutronome 8:18 yumi ridim toktok ya se: “Hae God i God blong yumi, mo bambae yufala i no mas foget we hem nomo i stap givim paoa long yumi, mo hem nao i stap mekem yumi kam rijman.” Toktok ya i givhan long ol man Isrel blong trastem Jeova se sipos oli obei long hem, bambae hem i mekem we neson blong olgeta i gat plante samting.

?Be olsem wanem long ol man wanwan? Gudfala man ya Job, hem i rij we i rij. Setan i mekem we Job i lusum evri samting we hem i gat, be biaen, Jeova i givimbak ol samting ya we Job i bin gat, we “i dabolem evriwan.” (Job 1:3; 42:10) Ebraham tu hem i wan rijman. Jenesis 13:2 i talem se hem i “gat ol sipsip, mo ol nani, mo ol buluk blong hem, wetem ol silva mo ol gol blong hem tu.” Taem ol ami blong fo king blong ol kantri blong Is oli kam wanples blong mekem faet, oli holem Lot we i pikinini blong brata blong Ebraham, mo oli tekem hem i go wetem olgeta. Ale, Ebraham i “tekem ol man blong hem we hem i trenemgud olgeta blong faet, tri handred eitin man we olgeta ya oli pikinini blong ol slef we oli bon long famle blong hem.” (Jenesis 14:14, NW) Sipos Ebraham i gat 318 man blong hem we hem i “trenemgud olgeta” blong faet, hemia i min se famle blong Ebraham wetem ol wokman blong hem i bigwan lelebet ya. Sipos Ebraham i naf blong lukaot mo givim kakae long wan bigfala famle olsem, hemia i min se hem i wan rijman we i gat plante sipsip mo buluk.

Tru ya, plante long ol man blong God bifo, olsem Ebraham, Aesak, Jekob, Deved, Solomon, mo plante narafala bakegen, oli rijman. ?Be hemia i min se olgeta man we oli mekem wok blong God bambae oli kam rijman? ?Mo olsem wanem sipos wan man i pua? ?Hemia i min se God i no stap blesem hem? Nekis haf bambae i ansa long ol kwestin ya.