?Yu Yu Save?
?From wanem Baebol i tokbaot wosip long giaman god ya Bal se i joen wetem ol lafet blong mekem ol rabis fasin long saed blong seks?
Bal i god blong ol man Kenan. Olgeta ya oli bilif se Bal i god blong mekem ol samting oli gru gud mo kam plante, i mekem oli gat plante kakae long garen, mo oli gat plante anamol tu. Taswe, buk ya Manners and Customs in the Bible i talem se, “ol man mo woman oli mekem ol rabis fasin long saed blong seks long ol haos prea blong olgeta from oli ting se fasin ya bambae i pulum Bal, god ya blong tanda, mo waef blong hem Asera blong tufala i slip tugeta. Nao graon bambae i kam gud blong oli save gat plante kakae, mo bambae ol anamol tu oli kam plante.”
Ol man Kenan oli bilif se long draetaem, god blong draetaem mo ded we nem blong hem Mot, hem i winim Bal, mo i fosem Bal blong i go haed longlongwe aninit long graon. Long taem we ren i stat, oli bilif se Bal i gat paoa bakegen mo i mekem se oli gat plante kakae mo anamol. Ol man Kenan oli glad long rentaem, ale, oli mekem ol lafet from, we hemia ol lafet blong mekem ol rabis fasin long saed blong seks we oli nogud olgeta. Hemia nao from wanem sam man Isrel we oli joen long wosip long Bal blong Peoro, oli go “slip wetem ol woman Moab.”—Namba 25:1-3.
?Jisas i minim wanem taem hem i talem se ol tija blong Loa mo ol Farisi oli olsem “gref blong dedman we man i pentem i waet gud”?
Jisas i tok strong long ol tija blong Loa mo ol Farisi se oli gat tu fes mo i talem long olgeta se: “Yufala i olsem gref blong dedman we man i pentem i waet gud. Afsaed, i waet gud, i naes, be insaed i fulap long bun blong dedman, wetem bodi blong hem we i roten i stap.” (Matiu 23:27) Ol man Jiu oli gat kastom ya se, afta we taem blong ren i finis, long namba 15 dei blong manis Ada, hemia wan manis bifo long taem blong Pasova, oli pentem ol gref long laem blong oli waet. Oli mekem olsem from we ren i wasemaot ol laem nao oli no moa waet.
Buk ya The Jewish Encyclopedia, i talem se fasin ya blong pentem ol gref oli waet i blong protektem “ol man we oli wokbaot long ol rod blong kam mekem lafet blong Pasova” blong oli no kam doti. Loa we i stap long Namba 19:16 i talem se man we i tajem wan ded bodi, bun blong man we i ded, no beregraon blong wan man, bambae hem i no klin blong seven dei. Sipos wan man Isrel i doti olsem, hem i no save joen long trufala wosip, mo sipos hem i no folem loa ya, hem i save kasem panis blong ded. (Levitikas 15:31) Jisas i tokbaot eksampol ya jes bifo long dei blong Pasova; wok ya blong pentem gref oli waet gud i stap long tingting blong olgeta we oli lesin long hem. Jisas i wantem mekem i klia se ol enemi blong hem, hemia ol lida blong skul, oli stap haedem prapa fasin blong olgeta, mo se sipos man i go klosap long olgeta bambae wosip blong man ya i save kam doti.
[Tok blong pija long pej 29]
Pija blong baal-of-the-lightning we oli wokem long ston, ol yia 13 handred mo 12 handred bifo kristin taem
[Credit Line]
Musée du Louvre, Paris