!Bambae i No Moa Gat Ol Disasta!

SIPOS wan man i talem long yu se, “I no longtaem bambae i no moa gat ol disasta,” ?bambae yu yu talem wanem long hem? Maet yu talem se, “Yu stap drim ya. I no gat rod blong finisim ol disasta.” No maet yu tingting yu wan se, ‘Ating bambae i kamtru taem faol i gat tut.’

Nating se i luk olsem se ol disasta bambae oli gohed olwe nomo, yumi save gat strong tingting se bambae oli finis. Be bambae ol man oli no save finisim ol disasta. Oli no naf blong kasem save fulwan olsem wanem ol samting raonabaot long yumi oli wok mo from wanem oli wok olsem. Antap moa, oli no save bos long ol samting raonabaot long yumi, mo oli no save jenisim. King Solomon blong Isrel bifo i waes mo i stap lukluk gud ol samting we oli hapen. Hem i talem se: “[Yumi] no save luksave nating ol samting we God i stap wokem. Nating we yumi stap traehad olsem wanem, be bambae yumi no save faenemaot samtaem. Maet ol waes man oli save talem se oli save, be nogat, oli stap giaman nomo.”—Prija 8:17.

Sipos ol man oli no save finisim ol disasta, ?hu bambae i mekem? Baebol i talem se God we i mekem olgeta samting, hem nao bambae i mekem jenis ya i kamaot long wol. Hem nao i mekem se ol samting raonabaot long yumi oli wok gud mo oli folem rod blong olgeta. Hem i mekem se wota i stap gobak long ples we i kamaot long hem fastaem, nao i folem rod blong hem, i stap ron i godaon bakegen. (Prija 1:7) Paoa blong God i bigwan moa long paoa blong ol man. Yumi no save makem. Profet Jeremaea tu i talem olsem. Hem i se: ‘Hae God. Yu yu Masta blong mifala. Long bigfala paoa blong yu, yu yu mekem wol ya, wetem skae mo olgeta samting we i stap long hem. I no gat wan samting nating we i strong tumas we yu yu no save mekem.’ (Jeremaea 32:17) From we God i mekem wol ya mo olgeta samting we i stap long hem, hem i save wanem blong mekem blong ol man oli save stap long pis we oli sef.—Ol Sam 37:11; 115:16.

?Bambae God i mekem jenis ya olsem wanem? Plante nogud samting we i stap hapen long wol tede, oli “saen” we i soemaot se i no longtaem bambae “wol ya i finis.” Jisas i talem se: “Taem yufala i luk we ol samting ya oli kamaot, bambae yufala i save se niufala wol ya we God i king long hem [“kingdom blong God,” NW], bambae i no longtaem hem i kamtru.” (Matiu 24:3; Luk 21:31) Kingdom blong God i wan gavman we God i stanemap long heven. Kingdom ya bambae i mekem bigfala jenis i kamtru long wol. Yes, Kingdom ya bambae i gat paoa antap long ol samting raonabaot long yumi. Jehova God i gat paoa blong mekem ol jenis ya hem wan nomo, be hem i jusum Pikinini blong hem blong mekem wok ya. Profet Daniel i tokbaot Pikinini ya se: “[God] i putumap man ya i king, i leftemap nem blong hem i hae we i hae, mo i givim bigfala paoa long hem, blong bambae olgeta man blong olgeta kantri mo olgeta kala mo olgeta lanwis oli wok blong hem.”—Daniel 7:14.

God i givim paoa long Pikinini blong hem, Jisas, blong i mekem ol jenis ya we yumi nidim, nao bambae yumi save harem gud long laef long wol. Tu taosen yia bifo, taem Jisas i stap long wol, hem i mekem sam samting we oli soemaot se hem i gat paoa antap long ol samting raonabaot long yumi. Wan dei, Jisas i stap wetem ol man blong hem long wan bot long Lugun blong Galili. “Wan bigfala win i girap, i blu strong, i mekem wota long bigfala lugun ya i raf we i raf. Nao wota i stap kam insaed long bot ya we klosap bot i draon.” Ol man blong hem oli fraet se bambae oli ded. Nao oli singaot Jisas. ?Jisas i mekem wanem? Jisas i “tok long win ya, i talem se, ‘!Yu kwaet!’ Mo i tok long wota ya we i raf tumas, i talem se, ‘!I naf! !Yu stap kwaet!’ Nao win ya i finis, mo olgeta samting i kwaet.” Ol man blong hem oli sapraes mo oli taltalem long olgeta se: “!Olgeta! ?Wanem man ya? !Nating we win mo wota, be tufala i harem tok blong hem, tufala i obei long hem!”—Mak 4:37-41.

Taem God i mekem Jisas i laef bakegen, i go long heven, God i givim bigfala paoa long hem. Jisas i King blong Kingdom blong God. Wok blong hem i blong mekem ol jenis long wol, blong ol man oli stap gud mo oli gat pis. Jisas i naf blong mekem ol jenis ya oli kamtru.

Plante problem mo disasta oli kamaot from samting we ol man oli mekem. Ol man oli tingbaot olgeta nomo mo oli wantem plante samting, nao oli stap spolem wol. Ale ol disasta oli mekem moa trabol long ol man. ?Bambae Kingdom i mekem wanem long ol man we oli no wantem jenisim fasin blong olgeta? Baebol i tokbaot Jisas, Masta blong yumi, se bambae hem “i aot long heven . . . wetem ol strong enjel blong hem, mo faea we i laet. Hem bambae i kam blong givim panis long olgeta we oli no save ona long God, mo long olgeta we oli no save obei long gud nius blong Jisas, Masta blong yumi.” Yes, bambae hem i “spolem ol man ya we oli stap spolem wol.”—2 Tesalonaeka 1:7, 8; Revelesen 11:18.

Biaen, Jisas Kraes we i “King blong olgeta king,” bambae i gat ful paoa antap long olgeta samting raonabaot long yumi. (Revelesen 19:16) Bambae hem i meksua se ol man aninit long rul blong Kingdom, oli no moa harem nogud from ol disasta. Bambae hem i yusum paoa blong hem antap long ol samting, blong mekem se weta mo ol defren taem blong yia, olsem hot taem mo kolkol taem, oli mekem i gud long ol man. Ale promes we Jehova God i mekem long ol man blong hem longtaem bifo, bambae i kamtru. Hemia se: “Bambae mi mi sanem ren i kam long yufala long stret taem blong hem, blong yufala i save gat plante kakae long graon blong yufala, mo ol tri blong yufala oli save karem plante frut.” (Levitikas 26:4) Ol man bambae oli wokem ol haos be bambae oli no fraet se trabol bambae i spolem haos blong olgeta. “Man we i wokem haos blong hem, hem bambae i save stap gud long hem. Bambae i no moa gat narafala man i save kam tekemaot haos ya. Man we i planem plantesen blong grep, hem bambae i dring waen blong ol grep ya.”—Aesea 65:21.

?Yu Mas Mekem Wanem?

Olsem plante narafala man, ating yu tu yu wantem stap long taem ya we i no moa gat ol disasta oli spolem wol. ?Be yu mas mekem wanem blong stap long taem ya? ‘Olgeta we oli no save God,’ mo “olgeta we oli no save obei long gud nius,” bambae oli no save laef long taem ya we i no moa gat ol disasta long wol. Taswe, yumi mas save God, mo yumi mas folem plan we hem i stanemap blong rulum wol. Yes, God i wantem se yumi save hem mo yumi obei long gud nius blong Kingdom. Hemia Kingdom blong God we Pikinini blong hem i rul long hem.

Rod we i beswan blong save God, hemia blong stadi gud long Baebol. Baebol i givim ol save we yumi mas folem blong stap gud aninit long rul blong Kingdom. I gud yu askem long ol Witnes blong Jehova blong givhan long yu blong save wanem we Baebol i tijim. Bambae oli glad tumas blong mekem olsem. Yu save gat strong tingting se sipos yu traehad blong save God mo obei long gud nius, bambae yu luk se ol tok blong Ol Proveb 1:33 i kamtru long laef blong yu. Hem i talem se: “Man we i stap lesin long mi, bambae hem i stap gud oltaem long laef blong hem. Hem bambae i save we i no gat wan samting nating we i save mekem hem i fraet.”